2 Tato ay junoc anima smalqꞌue snivanil, ma sqꞌue vochjabꞌ, ma chac sulinac tzꞌaj yilji snivanil, talaj lepra jun yabꞌil chiꞌ, yovalil tzꞌicꞌjicot dꞌa vin̈aj Aarón, ma dꞌa juntzan̈ocxo ebꞌ sacerdote yin̈tilal vin̈. 3 Axo vin̈ sacerdote chiꞌ tzꞌilan jun yabꞌil chiꞌ. Tato a xiil bꞌaj ay jun yabꞌil chiꞌ, sacxo, ma nivan chequel to man̈ocn̈ej dꞌa stzꞌumal ay jun yabꞌil chiꞌ, palta julxo yich, a jun yabꞌil chiꞌ lepraxo. Ayic toxo ix ilji jun anima chiꞌ yuj vin̈ sacerdote, a vin̈ tzꞌalani to maxtzac yal-laj yajecꞌ jun anima chiꞌ dꞌa scal yetanimail.

4 Tato sacxo yilji stzꞌumal bꞌaj ay jun yabꞌil chiꞌ, palta to an̈ej dꞌa stzꞌumal ayochi, man̈ sacoc pax xiil chiꞌ taꞌ, yovalil smacchaj jun anima chiꞌ yuj vin̈ sacerdote chiꞌ uqueoc cꞌual. 5 Axo slajvi uqueꞌ cꞌual chiꞌ, sayjixi iljoc jun anima chiꞌ. Tato a jun yabꞌil chiꞌ an̈ejaꞌ max bꞌeybꞌati, smacchajxi uqueocxo cꞌual. 6 Ayic slajvi uquexo cꞌual chiꞌ, sayjixi iljoc jun anima chiꞌ yuj vin̈ sacerdote chiꞌ. Tato a jun yabꞌil chiꞌ vanxo sateli, maxtzac bꞌeybꞌat dꞌa stzꞌumal jun anima chiꞌ, ichato chiꞌ syalan vin̈ sacerdote chiꞌ to man̈ lepraoc tzꞌicꞌani, comon yabꞌiln̈ej. Slajvi chiꞌ sjucꞌanel spichul jun penaay chiꞌ, vachꞌxo tzꞌajxicani.

7 Palta tato a jun yabꞌil dꞌa snivanil junoc anima chiꞌ sbꞌat lebꞌebꞌoc, vachꞌchom toxo ix yal vin̈ sacerdote to man̈ lepraoc, yovalil scotxi dꞌa vin̈ sacerdote chiꞌ yic sayanxi yil vin̈. 8 Tato a syilan vin̈ sacerdote chiꞌ to van sbꞌat lebꞌebꞌoc jun yabꞌil chiꞌ, syal vin̈ to a jun yabꞌil chiꞌ lepra toni.

9 Tato ay junoc anima ay lepra dꞌay, yovalil tzꞌicꞌjicot dꞌa vin̈ sacerdote. 10 A vin̈ sacerdote chiꞌ tzꞌilani tato van smalqꞌuei, sacxo yilji sat chiꞌ, vanxo pax sacbꞌi xiil dꞌa sat chiꞌ, chequelxo sbꞌacꞌchil. 11 Tato icha chiꞌ, aton jun chiꞌ scuchan lepra, cotac scal schꞌoxanqꞌue sbꞌa dꞌa stzꞌumal chiꞌ, yuj chiꞌ syalan vin̈ sacerdote chiꞌ to maxtzac yal-laj yajecꞌ dꞌa scal ebꞌ yetanimail. Man̈xo yovaliloc smacchaj dꞌa uqueocxo cꞌual.

12 Tato elan̈chamel sbꞌat lebꞌnaj jun yabꞌil chiꞌ, smajel snivanil chiꞌ yuuj, ato aꞌ tzꞌaj yilanoch vin̈ sacerdote chiꞌ, 13 ayic slajvi yilan vin̈, tato toxo ix majel snivanil chiꞌ, sacxon̈ej yilji jun anima chiꞌ, syalan vin̈ to man̈xalaj smay. 14 Tato ay junoc cꞌual scheclajqꞌue sbꞌacꞌchil dꞌa scal jun yabꞌil chiꞌ, maxtzac yal-laj yajecꞌ jun anima chiꞌ dꞌa scal ebꞌ yetanimail. 15 Axo vin̈ sacerdote tzꞌilan jun yabꞌil chiꞌ, tato ay bꞌaj tzꞌel tochnaj stzꞌumal ichn̈ej taꞌ, syalan vin̈ to lepra tzꞌicꞌani, maxtzac yal-laj yajecꞌ dꞌa scal ebꞌ yetanimail.

16 Palta tato sacbꞌixiel bꞌaj ix el tochnaj chiꞌ, yovalil scot jun anima chiꞌ dꞌa vin̈ sacerdote, 17 yic vachꞌ say yil vin̈. A vin̈ sacerdote chiꞌ tzꞌilani tato sacxo yilji jun yabꞌil chiꞌ, syalan vin̈ to man̈xalaj smay jun yabꞌil chiꞌ.

18 Tato ay mach ayqꞌue junoc yabꞌil mal dꞌay, stacjixiemi, 19 axo dꞌa sat chiꞌ smali, sac yilji, ma chac sulinac yilji, a jun chiꞌ yovalil scot dꞌa yichan̈ vin̈ sacerdote. 20 Axo vin̈ sacerdote chiꞌ tzꞌilani, tato man̈ocn̈ej dꞌa stzꞌumal ayoch jun yabꞌil chiꞌ, tato sacxo xiil dꞌa sat jun yabꞌil chiꞌ, a vin̈ tzꞌalani to lepra jun yabꞌil chiꞌ, yuj chiꞌ maxtzac yal-laj yajecꞌ jun anima chiꞌ dꞌa scal ebꞌ yetanimail. 21 Tato syil vin̈ sacerdote chiꞌ, to max sacbꞌilaj xiil bꞌaj ay sat chiꞌ to dꞌa satn̈ej stzꞌumal ayochi, vanxo stacji, a jun anima chiꞌ yovalil smacchaj uqueoc cꞌual. 22 Ayic slajvi uqueꞌ cꞌual chiꞌ, tato yelcꞌolaln̈ej sbꞌat lebꞌebꞌoc jun yabꞌil chiꞌ dꞌa stzꞌumal jun anima chiꞌ, syalan vin̈ sacerdote chiꞌ to lepra tzꞌicꞌani, maxtzac yal-laj yajecꞌ dꞌa scal ebꞌ yetanimail. 23 Palta tato max bꞌat lebꞌebꞌoc jun yabꞌil chiꞌ, syalelcꞌochi to an̈ej sjechꞌal aycani, syalan vin̈ sacerdote chiꞌ to man̈xalaj smay jun yabꞌil chiꞌ.

24 Qꞌuinaloc ay junoc mach ay yaxcꞌa dꞌa snivanil, tato scheclaj sbꞌacꞌchil jun anima bꞌaj ay yaxcꞌa chiꞌ, axo dꞌa sbꞌacꞌchil chiꞌ scheclajpaxqꞌue junoc setan̈ sacsac, ma chac sulinac to sbꞌat lebꞌebꞌoc. 25 A vin̈ sacerdote tzꞌilani, tato a xiil vanxo sacbꞌi, vanxo sbꞌat yich jun setan̈ bꞌaj ay sat chiꞌ, tato icha chiꞌ, lepra ix checlajqꞌue bꞌaj ay yaxcꞌa chiꞌ, axo vin̈ sacerdote chiꞌ tzꞌalani to maxtzac yal-laj yajecꞌ jun anima chiꞌ dꞌa scal ebꞌ yetanimail. 26 Tato a syilan vin̈ sacerdote to malaj junoc xil van sacbꞌieli, to man̈ vanoc sbꞌat yich jun yabꞌil chiꞌ, palta to van stacjiemi, yovalil smacchaj jun anima chiꞌ dꞌa uqueoc cꞌual. 27 Slajvi chiꞌ, sayanxi yil vin̈ sacerdote chiꞌ, tato toxo ix bꞌat lebꞌebꞌoc dꞌa snivanil jun anima chiꞌ, syalan vin̈ to lepra tzꞌicꞌani, maxtzac yal-laj yajecꞌ dꞌa scal ebꞌ yetanimail. 28 Palta tato a bꞌaj setquixtac chiꞌ, vaanochi, vanxo sbꞌoxi, ton̈ej smal yuj bꞌaj stzꞌai, syalan vin̈ sacerdote chiꞌ to a jun yabꞌil chiꞌ malaj smay, an̈ej sjechꞌal bꞌaj stzꞌa chiꞌ scani.

29 Tato a dꞌa junoc vinac ma dꞌa junoc ix ix sqꞌue yabꞌil yaxcꞌa dꞌa sjolom, ma dꞌa yucꞌtiꞌ, 30 a vin̈ sacerdote yovalil sayan yil jun chiꞌ. Tato a jun yabꞌil chiꞌ van sbꞌat yich, mato van scꞌanbꞌiel xiil yuuj, syalan vin̈ sacerdote chiꞌ to lepra jun ayoch chiꞌ dꞌa jun anima chiꞌ. 31 Palta tato max bꞌatlaj yich jun yabꞌil chiꞌ, man̈ qꞌuicꞌoc val xiil bꞌaj ay yabꞌil chiꞌ, yovalil smacchaj jun anima chiꞌ uqueoc cꞌual. 32 Axo slajvi uqueꞌ cꞌual chiꞌ, sayanxi yil vin̈ sacerdote chiꞌ, maxtzac bꞌatlaj lebꞌebꞌoc jun yabꞌil chiꞌ, malaj yich, max cꞌanbꞌiel-laj xiil, 33 syalan vin̈ to sjoxjiel stitac yabꞌil, palta max joxjiel-laj dꞌa sat yabꞌil, smacchaj uqueocxo cꞌual jun anima chiꞌ. 34 Axo yic toxo ix ecꞌbꞌat uquexo cꞌual chiꞌ, sayanxi yil vin̈ sacerdote chiꞌ. Tato max bꞌat lebꞌebꞌoc, max bꞌat yich yuuj, syalan vin̈ to malaj smay jun yabꞌil chiꞌ, an̈ej to sjuqꞌuel spichul jun anima chiꞌ, vachꞌ tzꞌajxicani. 35 Palta tato ayic toxo ix alchaji to vachꞌ scꞌol jun anima chiꞌ, sbꞌatxi lebꞌebꞌoc jun yabꞌil chiꞌ, 36 yovalil sayxi yil vin̈ sacerdote chiꞌ. Tato a jun yabꞌil chiꞌ van sbꞌat lebꞌebꞌoc dꞌa stzꞌumal, man̈ yovaliloc cꞌan yilji xiil, lepra tzꞌicꞌani. 37 Palta tato vanxo stacji, qꞌuicꞌ scotxi xiil, a vin̈ sacerdote chiꞌ tzꞌalani to vachꞌxo scꞌol jun anima chiꞌ.

38 Tato a junoc vinac ma junoc ix ix setquixtac sacsac dꞌa stzꞌumal, 39 a vin̈ sacerdote tzꞌilan stzꞌumal chiꞌ, tato sactac val yilji, palta man̈ copopioclaj, comon yabꞌil tzꞌicꞌan jun anima chiꞌ syal chiꞌ, malaj smay.

40-41 Tato ay junoc vinac scꞌajbꞌanel xil sjolom ma an̈ej dꞌa snan̈al sat scꞌajbꞌanel xiil, man̈xalaj xiil scani, a jun chiꞌ malaj smay. 42-44 Palta tato sqꞌue junoc yabꞌil yaxcꞌa bꞌaj man̈xalaj xiil chiꞌ, yovalil syil vin̈ sacerdote. Tato chac sulinac yilji jun yaxcꞌa chiꞌ icha yabꞌil lepra, aton lepra ayoch dꞌay. Syalan vin̈ sacerdote chiꞌ to a jun anima chiꞌ, maxtzac yal-laj yajecꞌ dꞌa scal yetanimail yuj jun yabꞌil chiꞌ.

45 A mach penaay yuj lepra, yovalil a pichul n̈icꞌchimtac syacꞌochi, malaj smusil sjolom syacꞌqꞌuei, smusan nan̈aloc sat. Tato sbꞌat dꞌa scal anima, tzꞌel yav, syalan icha tic: Elan̈ec, chuc vaji, chuc vaji, xchi. 46 Ayic ayoch jun yabꞌil chiꞌ dꞌay, yovalil schꞌocoj tzꞌaj dꞌa spatiquel campamento.

47 Ayic cꞌustumtac yilji junoc pichul lana, ma lino, 48 yaln̈ej tas macan̈il, pachꞌuchꞌabꞌil, ma jalbꞌil, ma junoc tzꞌuum to yamcꞌabꞌ yaji, 49-50 tato yaax yilji, ma chacchac yilji juntzan̈ scꞌustumtaquil chiꞌ, aton jun macan̈ to tzꞌel lebꞌebꞌoc. A jun chiꞌ yovalil schꞌoxji dꞌa vin̈ sacerdote yic syilan jun setan̈ scꞌustumtaquil chiꞌ vin̈, smacchaj jun chiꞌ uqueoc cꞌual. 51 Axo slajvi uqueꞌ cꞌual chiꞌ, tzꞌiljixi. Tato toxo ix bꞌat lebꞌebꞌoc dꞌa jun pichul chiꞌ, ma dꞌa junoc tzꞌum scꞌanji chiꞌ, a jun chiꞌ aton juntzan̈ cꞌustumtac tzꞌel lebꞌebꞌoc, a juntzan̈ yamcꞌabꞌ chiꞌ ay smay. 52 Yaln̈ej tas yamcꞌabꞌil to ayxo jun chiꞌ dꞌay, yovalil sn̈usjitzꞌa smasanil, yujto a jun chiꞌ tzijtum tas syixtejbꞌati. 53 Palta tato ayic syilan vin̈ sacerdote chiꞌ to max bꞌeylaj juntzan̈ scꞌustumtaquil chiꞌ, 54 syalan vin̈ to sjucꞌchajel jun yamcꞌabꞌ chiꞌ, smacchajcan uqueocxo cꞌual.

55 Ayic toxo ix jucꞌchajel jun yamcꞌabꞌ chiꞌ, ichato chiꞌ syilanxi vin̈ sacerdote chiꞌ. Tato max qꞌuexmaj yilji jun setan̈ scꞌustumtaquil chiꞌ, vachꞌchom max el lebꞌebꞌoc, yovalil sn̈usjitzꞌaoc, vachꞌchom a jun scꞌustumtaquil chiꞌ ayoch dꞌa spatic ma dꞌa yool, yujto yelxo ay smay jun chiꞌ. 56 Tato a syilan vin̈ sacerdote chiꞌ ayic toxo ix jucꞌchajel chiꞌ, vanxo satel jun scꞌustumtaquil chiꞌ, slodꞌchajel bꞌaj ayoch chiꞌ. 57 Palta tato scheclajxiqꞌue scꞌustumtaquil jun chiꞌ, yovalil sn̈usjitzꞌaoc. 58 A juntzan̈ tastac bꞌaj satel juntzan̈ cꞌustumtac chiꞌ ayic sjucꞌchajeli, yovalil sjucꞌchajel junelxo, icha chiꞌ syal scꞌanchajxi.

59 Aton juntzan̈ checnabꞌil tic dꞌa cꞌustum tzꞌoch dꞌa junoc pichul pachꞌuchꞌabꞌil, ma jalbꞌil, lana, ma lino, ma junoc tzꞌuum. Icha chiꞌ tzꞌaj scheclajcaneli tato vachꞌ yaji, mato man̈ vachꞌoc yaji, xchi Jehová dꞌa vin̈aj Moisés yedꞌ dꞌa vin̈aj Aarón chiꞌ.