2-4 Aton val jun ley tic scꞌanabꞌajej junoc anima ecꞌnac lepra dꞌay: Ayic snaani to ix bꞌoxi scꞌool, yovalil syavtej vin̈ sacerdote dꞌa spatiquel campamento chiꞌ yic syilan vin̈ tato man̈xa lepra chiꞌ dꞌay. Tato syil vin̈ sacerdote chiꞌ to toxo ix el jun yabꞌil chiꞌ, schecan vin̈ icꞌchajcot chavan̈oc nocꞌ much dꞌa spitzanil, aton nocꞌ vachꞌ icha yalan ley. Scotpax jabꞌoc teꞌ cꞌuteꞌ, lana chꞌal qꞌuicꞌ schaquil yedꞌ teꞌ hisopo. 5 Schecan miljoccham junoc nocꞌ much chiꞌ vin̈ sacerdote dꞌa yibꞌan̈ a aꞌ ayem dꞌa yol junoc lum chen, aton aꞌ scot bꞌaj sqꞌueul sjaj junoc a aꞌ. 6 Slajvi chiꞌ tzꞌicꞌjicot junxo nocꞌ much chiꞌ dꞌa spitzanil, teꞌ cꞌuteꞌ yedꞌ lana chꞌal qꞌuicꞌ schaquil yedꞌ teꞌ hisopo, slabꞌchajem dꞌa scal schiqꞌuil nocꞌ chamnacxo chiꞌ calan yedꞌ a aꞌ. 7 Uquel stzicjioch dꞌa jun mach bꞌaj ecꞌnac jun yabꞌil chiꞌ, syalan vin̈ sacerdote chiꞌ to vachꞌxo jun anima chiꞌ. Axo nocꞌ much pitzan chiꞌ tzꞌactajcanel nocꞌ.

8 A jun mach tzꞌilji to vachꞌxo, yovalil sjuqꞌuel spichul, sbꞌicanpaxel sbꞌa, sjoxanel xil sjolom smasanil, yic vachꞌxon̈ej tzꞌajcani. Ichato chiꞌ syalxo yoch dꞌa yol campamento, palta uqueto cꞌual scan ichn̈ej taꞌ, maxto yal-laj yoch dꞌa yol bꞌaj cajantaxoni. 9 Axo dꞌa yuquil cꞌual chiꞌ, vachꞌ tzꞌaj sjoxjiel sjolom. Vachꞌ tzꞌaj sjoxanel xil stiꞌ yedꞌ scꞌu sat yedꞌ pax masanil xil ay dꞌa snivanil, sjucꞌanel spichul, sbꞌicanpaxel sbꞌa. Icha chiꞌ tzꞌaj sbꞌoxicani.

10 Axo dꞌa junxo cꞌu, syicꞌancot chavan̈oc nocꞌ quelemtac calnel yedꞌ junoc nocꞌ cobꞌes calnel, jun abꞌil sqꞌuinal junjun nocꞌ, malaj jabꞌoc spaltail nocꞌ. Scotpax nan̈al yuquil libra ixim harina te vachꞌ calabꞌil yedꞌ aceite, tzꞌacꞌji ofrendail yedꞌ pax oxeoc octavo aceite. 11 Axo vin̈ sacerdote chiꞌ schecanoch lin̈an jun anima yedꞌ yofrenda chiꞌ dꞌa yichan̈ Jehová dꞌa stielxo scajnubꞌ bꞌaj schꞌox sbꞌa. 12 Slajvi chiꞌ, tzꞌicꞌjicot jun nocꞌ quelem calnel chiꞌ yedꞌ aceite, sbꞌachchajbꞌat dꞌa yichan̈ Jehová silabꞌil yuj smul jun anima chiꞌ. 13 A bꞌaj schamtaxon nocꞌ tzꞌacꞌji silabꞌil yuj mul yedꞌ nocꞌ silabꞌ stzꞌa smasanil, ataꞌ smiljicham nocꞌ quelem calnel chiꞌ, yujto a nocꞌ tzꞌacꞌji yuj mul, yic vin̈ sacerdote tzꞌajcan nocꞌ, icha nocꞌ tzꞌacꞌji yuj stupcanel mul, a juntzan̈ tic yic Jehová yaji.

14 Slajvi chiꞌ a vin̈ sacerdote chiꞌ tzꞌicꞌancot jabꞌoc schiqꞌuil nocꞌ silabꞌ yuj mul, sucanoch vin̈ dꞌa sjayil schiquin dꞌa svachꞌ jun mach sbꞌoxi scꞌol chiꞌ, dꞌa smam scꞌabꞌ dꞌa svachꞌ yedꞌ dꞌa yiximal smam yoc dꞌa svachꞌ. 15 Syicꞌanpaxcot jabꞌoc aceite vin̈ sacerdote chiꞌ, secanem vin̈ dꞌa yol scꞌabꞌ dꞌa sqꞌuexan̈, 16 slabꞌanem jun sbꞌabꞌel yiximal scꞌabꞌ vin̈ dꞌa svachꞌ dꞌa scal aceite, stziquem uqueloc aceite chiꞌ vin̈ dꞌa yichan̈ Jehová. 17 A aceite tzato can dꞌa scꞌabꞌ vin̈ sacerdote chiꞌ, sucoch vin̈ dꞌa jun anima ix bꞌoxi scꞌool chiꞌ, an̈ejaꞌ dꞌa sjayil schiquin dꞌa svachꞌ, dꞌa smam scꞌabꞌ dꞌa svachꞌ yedꞌ pax dꞌa yiximal smam yoc dꞌa svachꞌ, aton bꞌaj ayxo och schiqꞌuil nocꞌ silabꞌ yuj smul. 18 Axo jabꞌocxo aceite tzꞌacꞌjicanqꞌue dꞌa sjolom jun anima chiꞌ. Icha chiꞌ tzꞌaj stupcan smul dꞌa yichan̈ Jehová. 19 Slajvi chiꞌ syacꞌanpax nocꞌ silabꞌ vin̈ sacerdote chiꞌ, aton nocꞌ silabꞌ yuj yacꞌji tup mul. Icha chiꞌ tzꞌaj stupcanel smul jun anima chiꞌ. Slajvi chiꞌ, smiljicham nocꞌ calnel stzꞌa smasanil silabꞌil. 20 Junn̈ej tzꞌaj yacꞌjiqꞌue nocꞌ dꞌa yibꞌan̈ altar yedꞌ ofrenda tzꞌacꞌji dꞌa tas svaji. Icha val chiꞌ tzꞌaj stupcanel smul jun anima chiꞌ dꞌa yichan̈ Jehová, sbꞌoxicani.

21 Tato mebꞌaꞌ jun anima bꞌaj ix ecꞌ jun yabꞌil chiꞌ, malaj stumin yic syacꞌ nocꞌ silabꞌ scꞌanchaj chiꞌ, an̈ej junoc nocꞌ quelem calnel syicꞌcoti yic sbꞌachchajoch silabꞌil dꞌa yichan̈ Jehová yuj smul, chabꞌn̈ej libra ixim harina te vachꞌ calabꞌil yedꞌ aceite syacꞌaꞌ yedꞌ oxeoc octavo aceite. 22 Syicꞌpaxcot chavan̈oc nocꞌ paramuch yaln̈ej tas macan̈il, ato aꞌ jantac stzacꞌvan smanani. Jun nocꞌ tzꞌacꞌji silabꞌil yuj yacꞌji tup smul, jun nocꞌ sn̈usjitzꞌaoc. 23 A dꞌa svajxaquil cꞌual syicꞌancot masanil juntzan̈ tic jun anima chiꞌ dꞌa vin̈ sacerdote yic sacbꞌicaneli. A juntzan̈ tic tzꞌacꞌjioch dꞌa yichan̈ Jehová dꞌa stielxo scajnubꞌ bꞌaj schꞌox sbꞌa. 24 Slajvi chiꞌ syicꞌancot jun nocꞌ calnel vin̈ sacerdote yedꞌ aceite chiꞌ, sbꞌachanecꞌ vin̈ dꞌa yichan̈ Jehová dꞌa silabꞌil yuj yacꞌji tup smul jun anima chiꞌ. 25 Smilancham nocꞌ quelem calnel chiꞌ vin̈, syicꞌanqꞌue jabꞌoc schiqꞌuil nocꞌ vin̈, sucanoch vin̈ dꞌa sjayil schiquin jun anima chiꞌ dꞌa svachꞌ, dꞌa smam scꞌabꞌ dꞌa svachꞌ yedꞌ dꞌa yiximal smam yoc dꞌa svachꞌ. 26 Slajvi chiꞌ syacꞌanqꞌue jabꞌoc aceite chiꞌ vin̈ dꞌa yol scꞌabꞌ dꞌa sqꞌuexan̈. 27 Yedꞌ sbꞌabꞌel yiximal scꞌabꞌ vin̈ dꞌa svachꞌ, stzicanem uqueloc aceite ayem dꞌa yol scꞌabꞌ vin̈ chiꞌ dꞌa yichan̈ Jehová. 28 Syacꞌpaxoch jabꞌoc aceite chiꞌ vin̈ dꞌa schiquin jun anima chiꞌ dꞌa svachꞌ, dꞌa smam scꞌabꞌ dꞌa svachꞌ yedꞌ dꞌa yiximal smam yoc dꞌa svachꞌ, aton bꞌaj toxo ix och schiqꞌuil nocꞌ silabꞌ chiꞌ. 29 Axo jabꞌocxo aceite chiꞌ scani, syacꞌqꞌue vin̈ sacerdote chiꞌ dꞌa sjolom jun anima chiꞌ, yic stupcanel smul dꞌa yichan̈ Jehová. 30 Slajvi chiꞌ, smilancham nocꞌ paramuch chiꞌ vin̈ sacerdote chiꞌ schavan̈il. 31 A junoc nocꞌ paramuch chiꞌ tzꞌacꞌji silabꞌil yuj yacꞌji tup mul, axo junxo nocꞌ sn̈usjitzꞌaoc yedꞌ pax ixim harina tzꞌacꞌjipax dꞌa ofrendail. Icha chiꞌ tzꞌaj stupcan smul jun anima ix bꞌoxi chiꞌ dꞌa yichan̈ Jehová.

32 Aton sleyalil tic dꞌa junoc mach ix ecꞌ lepra dꞌay, yic tzꞌalchaji to ix sacbꞌixicani tato max tzacꞌvan yacꞌan juntzan̈ silabꞌ icha val sleyalil, xchi Jehová.

33 Ix yalan Jehová dꞌa vin̈aj Moisés yedꞌ dꞌa vin̈aj Aarón:

34 Ayic ayexxo ecꞌ dꞌa lum Canaán, aton lum ol vacꞌ eyicoc, talaj svacꞌbꞌat junoc tas cꞌustac yilji tzꞌel lebꞌebꞌoc dꞌa yol e pat taꞌ, 35 a mach ay yic teꞌ pat chiꞌ yovalil scot dꞌa junoc vin̈ sacerdote syalani: Ay juntzan̈ cꞌustumtac yilji van yel lebꞌebꞌoc dꞌa yol in pat, xchama.

36 Ayic manto och vin̈ sacerdote dꞌa yol pat chiꞌ, yovalil syal vin̈ to tzꞌelta masanil tastac ay dꞌa yol teꞌ, yic vachꞌ max can juntzan̈ cꞌael chiꞌ dꞌa yol pat tato syal vin̈ sacerdote chiꞌ to man̈ vachꞌoc yaj jun pat chiꞌ. Slajvi chiꞌ tzꞌoch vin̈ yil tas yilji jun cꞌustum tzꞌel lebꞌebꞌoc chiꞌ.

37 Tato ayic syilanoch vin̈ to a dꞌa sattac pat chiꞌ ay juntzan̈ nivac cꞌustum lebꞌquiltac, yaax yilji, ma chac yilji, yelcꞌolal to sbꞌat dꞌa yol sattac pat chiꞌ, 38 axo tzꞌelxita vin̈ dꞌa yol teꞌ pat chiꞌ, syalan vin̈ to smacchajcan teꞌ uqueoc cꞌual. 39 Ayic slajvi uqueꞌ cꞌual chiꞌ, sbꞌatxi vin̈ sacerdote chiꞌ yilaꞌ. Tato toxo ix te bꞌat lebꞌebꞌoc jun scꞌustumtaquil chiꞌ dꞌa sattac pat chiꞌ, 40 yovalil syal vin̈ sacerdote chiꞌ to slipjielta masanil qꞌuen qꞌueen bꞌaj toxo ix och juntzan̈ lebꞌquiltac chiꞌ, bꞌat yumchajcan dꞌa junoc lugar man̈ vachꞌoc dꞌa stiel chon̈abꞌ. 41 Syalanpax vin̈ to sjoschajel masanil sattac yol teꞌ pat chiꞌ, axo masanil spococal tzꞌel dꞌa yool chiꞌ, sbꞌat yumchajcan dꞌa junoc lugar man̈ vachꞌoc dꞌa stiel chon̈abꞌ. 42 Chꞌocxo qꞌuen qꞌueen tzꞌochpaxcan sqꞌuexuloc qꞌuen tzꞌicꞌchajelta chiꞌ, chꞌocxo lum luum tzꞌochpax dꞌa sattac yol pat chiꞌ.

43 Tato scheclajxiqꞌue juntzan̈ cꞌustum lebꞌquiltac chiꞌ ayic toxo ix icꞌjiel qꞌuen qꞌueen chiꞌ yedꞌ toxo ix joschajel sattac pat chiꞌ, toxo ix ochpaxcan sqꞌuexul, 44 sbꞌat yilanxi vin̈ sacerdote chiꞌ. Tato toxo ix el lebꞌebꞌoc jun scꞌustumtaquil chiꞌ, man̈xo vachꞌoc tzꞌajcan jun pat chiꞌ. 45 Yuj chiꞌ, a jun pat chiꞌ yovalil spojchajemi. Masanil te teꞌ, qꞌuen qꞌueen yedꞌ lum luum ayoch dꞌa jun pat chiꞌ, bꞌat acꞌjican dꞌa junoc lugar to man̈ vachꞌoc dꞌa stiel chon̈abꞌ. 46 Yaln̈ej mach tzꞌoch dꞌa yol jun pat chiꞌ dꞌa uqueꞌ cꞌual ayic toxo ix yal vin̈ sacerdote to smacchajcani, man̈ vachꞌoc tzꞌajcani icha yalan ley, masanto dꞌa sqꞌuicꞌbꞌicanemi. 47 Yaln̈ej mach svaꞌi, ma svay dꞌa jun pat chiꞌ, yovalil sjuqꞌuel spichul.

48 Palta tato ayic tzꞌoch vin̈ sacerdote yil jun pat chiꞌ, syilan vin̈ to a juntzan̈ lebꞌquiltac chiꞌ max bꞌeybꞌati yictax ix bꞌojican yol teꞌ pat chiꞌ, syal vin̈ to vachꞌxo jun pat chiꞌ. 49 Yic sacbꞌixican teꞌ pat chiꞌ, tzꞌicꞌjicot chavan̈oc nocꞌ much yedꞌ jabꞌoc teꞌ cꞌuteꞌ yedꞌ lana chꞌal qꞌuicꞌ schaquil yedꞌ teꞌ hisopo. 50 Smilancham junoc nocꞌ much chiꞌ vin̈ sacerdote dꞌa yibꞌan̈ a aꞌ ayem dꞌa yol jun lum chen, aton aꞌ scot bꞌaj sqꞌueul sjaj junoc a aꞌ. 51 Slajvi chiꞌ syicꞌanbꞌat teꞌ cꞌuteꞌ chiꞌ vin̈ yedꞌ teꞌ hisopo yedꞌ lana chꞌal qꞌuicꞌ schaquil yedꞌ junxo nocꞌ much pitzanto, slabꞌanem vin̈ dꞌa scal a aꞌ calanxo yaj yedꞌ schiqꞌuil nocꞌ much ix miljicham chiꞌ dꞌa yol lum chen chiꞌ. Uquel stzicoch vin̈ dꞌa teꞌ pat chiꞌ. 52 Icha chiꞌ tzꞌaj sacbꞌixican jun teꞌ pat chiꞌ yuj schiqꞌuil nocꞌ much chiꞌ yedꞌ a aꞌ sqꞌueul sjaj, yuj nocꞌ much pitzanto, yuj teꞌ cꞌuteꞌ, yuj teꞌ hisopo yedꞌ lana chꞌal qꞌuicꞌ schaquil. 53 Slajvi chiꞌ, tzꞌactajcanbꞌat jun nocꞌ much pitzan chiꞌ dꞌa stiel chon̈abꞌ. Icha chiꞌ tzꞌaj scꞌanabꞌajaj sleyalil dꞌa junoc pat, vachꞌ tzꞌajcani, xchi Jehová.

54-57 Aton juntzan̈ checnabꞌil tic dꞌa yibꞌan̈ lepra smalqꞌuei, mato dꞌa yaxcꞌail, mato dꞌa lebꞌquiltac sacsac yilji, mato dꞌa juntzan̈ cꞌustumtac dꞌa pichul yedꞌ dꞌa spatictac teꞌ pat. Icha chiꞌ tzꞌaj snachajel tastac to man̈ vachꞌoc yedꞌ tastac to vachꞌ. Aton dꞌa tic slajvican checnabꞌil dꞌa juntzan̈ tic.