Checnabꞌil yuj tas man̈ vachꞌoc tzꞌel dꞌa ebꞌ vin̈ vinac
15
Ix yalan Jehová dꞌa vin̈aj Moisés yedꞌ dꞌa vin̈aj Aarón 2 to syal masanil juntzan̈ checnabꞌil tic ebꞌ vin̈ dꞌa ebꞌ yetisraelal. Yuj chiꞌ ix yalan ebꞌ icha tic: Tato ay junoc vinac ay junoc yabꞌil dꞌa snivanil, yuj chiꞌ ay tas tzꞌel dꞌa svinaquil, a jun chiꞌ man̈ vachꞌoc yaji icha yalan ley. 3 Vachꞌchom tzꞌeln̈ej juntzan̈ chiꞌ, ma ay bꞌaj tzꞌoch vaan jayeoc cꞌual tzꞌelxi, man̈ vachꞌoc yaji, icha yalan ley.4 Yaln̈ej tas vaynubꞌal bꞌaj svay vin̈ vinac chiꞌ, ma yaln̈ej tas cꞌojnubꞌal bꞌaj tzꞌem cꞌojan vin̈, man̈ vachꞌoc tzꞌajcani.
5 Yaln̈ej mach syaman svaynubꞌ jun vinac chiꞌ, yovalil sjuqꞌuel spichul sbꞌicanpaxel sbꞌa, palta man̈ vachꞌoc tzꞌajcani masanto sqꞌuicꞌbꞌiemi.
6 Yaln̈ej mach tzꞌem cꞌojan bꞌaj ix em cꞌojan jun vinac chiꞌ, yovalil sjuqꞌuel spichul, sbꞌicanpaxel sbꞌa, palta man̈ vachꞌoc tzꞌajcani masanto sqꞌuicꞌbꞌiemi.
7 Yaln̈ej mach syaman junoc vinac ay tas tzꞌel dꞌay, yovalil sjuqꞌuel spichul, sbꞌicanpaxel sbꞌa, palta man̈ vachꞌoc yaji masanto sqꞌuicꞌbꞌiemi.
8 Tato a junoc vinac ay tas tzꞌel dꞌay chiꞌ, stzubꞌanoch dꞌa junocxo anima, a jun anima bꞌaj ix och stzubꞌ chiꞌ, yovalil sjuqꞌuel spichul, sbꞌicanpaxel sbꞌa, palta man̈ vachꞌoc tzꞌajcani masanto sqꞌuicꞌbꞌiemi.
9 Tato a jun vinac ay tas tzꞌel dꞌay chiꞌ sqꞌue dꞌa yibꞌan̈ chej, a stzꞌum nocꞌ chiꞌ man̈ vachꞌoc tzꞌajcani.
10 Yaln̈ej mach syaman junoc tas bꞌaj tzꞌem cꞌojan jun vinac to ay tas tzꞌel dꞌay chiꞌ, man̈ vachꞌoc tzꞌajcani masanto sqꞌuicꞌbꞌiemi.
Yaln̈ej mach tzꞌicꞌanbꞌat junoc juntzan̈ tastac chiꞌ, yovalil sjucꞌ spichul, sbꞌicanpaxel sbꞌa, palta man̈ vachꞌoc tzꞌajcani, icha yalan ley masanto sqꞌuicꞌbꞌiemi.
11 Tato a jun vinac ay tas tzꞌel dꞌay chiꞌ, max sbꞌiclaj scꞌabꞌ syaman junocxo mach, a jun ix yamji yuj chiꞌ, yovalil sjuqꞌuel spichul, sbꞌicanpaxel sbꞌa, palta man̈ vachꞌoc tzꞌajcani masanto sqꞌuicꞌbꞌiemi.
12 Tato ay junoc chen syam jun vinac ay tas tzꞌel dꞌay chiꞌ, yovalil smacꞌjipoj jun chen chiꞌ. Tato a junoc te teꞌ yamcꞌabꞌ yaj syam jun vinac chiꞌ, ton̈ej sbꞌicchajel teꞌ.
13 Tato sbꞌoxi scꞌol jun vinac chi, man̈xa tas tzꞌel dꞌay, yovalil stan̈vej uqueoc cꞌual, ichato chiꞌ scanxi vachꞌil dꞌa yichan̈ ley. Slajvi chiꞌ sjucꞌanel spichul, sbꞌicanel sbꞌa dꞌa a aꞌ sqꞌueul sjaj. Icha chiꞌ tzꞌaj sbꞌoxicani, icha yalan ley. 14 Axo dꞌa svajxaquil cꞌual, yovalil syicꞌcot chavan̈oc nocꞌ paramuch yaln̈ej tas macan̈il, scot dꞌa yichan̈ Jehová scꞌoch dꞌa stielxo scajnubꞌ bꞌaj schꞌox sbꞌa, syacꞌan nocꞌ dꞌa junoc vin̈ sacerdote. 15 Jun nocꞌ syacꞌ vin̈ sacerdote chiꞌ silabꞌil yuj yacꞌji tup smul jun anima chiꞌ, axo junxo nocꞌ sn̈usjitzꞌaoc. A vin̈ sacerdote chiꞌ tzꞌacꞌanoch masanil juntzan̈ chiꞌ dꞌa yichan̈ Jehová, yic sacbꞌixican jun vinac ecꞌnac jun yaelal chiꞌ dꞌay.
16 Tato a junoc vinac ton̈ej tzꞌel yin̈atil, yovalil sbꞌiquel sbꞌa, palta man̈ vachꞌoc tzꞌajcani, icha yalan ley, masanto sqꞌuicꞌbꞌiemi.
17 Yaln̈ej tas cꞌapaquil ma tzꞌuum bꞌaj ix och yin̈atil jun vinac chiꞌ, yovalil sjucꞌjieli, man̈ vachꞌoc tzꞌajcani, icha yalan ley masanto sqꞌuicꞌbꞌiemi.
18 Tato a junoc vin̈ vinac yedꞌ junoc ix ix ay tas scꞌulej, yovalil sbꞌiquel sbꞌa ebꞌ, palta man̈ vachꞌoc tzꞌajcan ebꞌ, icha yalan ley masanto sqꞌuicꞌbꞌiemi.
A tas tzꞌaj ebꞌ ix ix ay tas tzꞌel dꞌay
19 Tato a junoc ix ix ayoch dꞌa stiempoal sbꞌislabꞌ uj, man̈ vachꞌoclaj yaj ix dꞌa uqueoc cꞌual.
Yaln̈ej mach syaman ix, man̈ vachꞌoc tzꞌajcani, icha yalan ley masanto sqꞌuicꞌbꞌiemi.
20 Yaln̈ej tas vaynubꞌal bꞌaj tzꞌecꞌ jichan ix ayic ayoch ix dꞌa stiempoal chiꞌ, ma yaln̈ej tas cꞌojnubꞌal bꞌaj tzꞌem cꞌojan ix, man̈ vachꞌoclaj tzꞌajcani.
21-23 Yaln̈ej mach syaman bꞌaj ix ecꞌ jichan ix chiꞌ, ma syaman junoc tas bꞌaj tzꞌem cꞌojan ix, man̈ vachꞌoclaj tzꞌajcani. Yovalil sjuqꞌuel spichul, sbꞌicanel sbꞌa, palta man̈ vachꞌoc tzꞌajcani masanto sqꞌuicꞌbꞌiemi.
24 Tato ay junoc vin̈ vinac svay yedꞌ ix, sbꞌon̈chaj vin̈ yuj tas tzꞌel chiꞌ dꞌa ix, man̈ vachꞌoclaj tzꞌajcan vin̈ dꞌa uqueꞌ cꞌual, an̈ejtonaꞌ man̈ vachꞌoc tzꞌajcan vaynubꞌ bꞌaj svay vin̈ vinac chiꞌ.
25 Tato ay junoc ix ix tzꞌilan uj dꞌa man̈ stiempoaloc, mato te nivan tiempo syacꞌ ix yilani, a jun ix chiꞌ man̈ vachꞌoc tzꞌajcan ix ayic ayto tas tzꞌel chiꞌ dꞌa ix, icha val to aytooch ix dꞌa yilan uj.
26 Yaln̈ej tas vaynubꞌal bꞌaj svay ix, ma cꞌojnubꞌ bꞌaj tzꞌem cꞌojan ix ayic ayto tas tzꞌel chiꞌ dꞌa ix, man̈ vachꞌoc tzꞌajcan juntzan̈ chiꞌ, ichato ayoch ix dꞌa sbꞌislabꞌ uj chiꞌ.
27 Yaln̈ej mach syaman juntzan̈ tastac chiꞌ, man̈ vachꞌoclaj tzꞌajcani, yovalil sjuqꞌuel spichul, sbꞌicanpaxel sbꞌa, palta man̈ vachꞌoc tzꞌajcani masanto sqꞌuicꞌbꞌiemi.
28 Ayic svanaj yilan uj ix chiꞌ, uqueꞌ cꞌual stan̈vej ix, slajvi chiꞌ sbꞌoxican ix, icha yalan ley. 29 Axo dꞌa svajxaquil cꞌual, syicꞌancot chavan̈oc nocꞌ paramuch ix yaln̈ej tas macan̈il, syicꞌancot ix dꞌa junoc vin̈ sacerdote, dꞌa stielxo scajnubꞌ bꞌaj schꞌox sbꞌa Jehová. 30 Jun nocꞌ syacꞌ vin̈ sacerdote chiꞌ silabꞌil yuj yacꞌji tup smul ix, axo junxo nocꞌ sn̈usjitzꞌa nocꞌ. Icha chiꞌ tzꞌaj yacꞌanoch jun silabꞌ chiꞌ vin̈ sacerdote chiꞌ dꞌa yichan̈ Jehová yic tzꞌacꞌji tup smul ix, yuj tas ix el dꞌay. 31 Icha chiꞌ tzꞌaj co sacbꞌitan co bꞌa a on̈ israel on̈ tic dꞌa tas tzon̈ icꞌani, yic max quixtejel scajnubꞌ Jehová ayecꞌ dꞌa co cal tic, tato maay tzon̈ chami, xchi vin̈aj Moisés chiꞌ.
32 Aton juntzan̈ checnabꞌil tic dꞌa ebꞌ vinac ay tas tzꞌel dꞌay, ma ton̈ej tzꞌel yin̈atil, yuj chiꞌ man̈ vachꞌoc tzꞌajcan yuuj 33 yedꞌ dꞌa ebꞌ ix ix ayoch dꞌa sbꞌislabꞌ uj. A juntzan̈ checnabꞌil tic, yovalil scꞌanabꞌajaj yuj ebꞌ ay syaelal icha chiꞌ, vinac, ma ix. Tzꞌochpax jun ley chiꞌ dꞌa yibꞌan̈ junoc vinac svay yedꞌ ix ix to man̈ vachꞌoc yaji, icha yalan ley.