Al dꞌa vin̈ ucꞌtac aj Aarón to max comon och vin̈ dꞌa yol in cajnubꞌ dꞌa jun lugar Vicn̈ej Yaji, aton jun lugar ay dꞌa spaticoch cꞌapac cortina. Max yal-laj scomon cꞌoch vin̈ bꞌaj ay smacul bꞌaj tzꞌacꞌji tup mul, aton smacul teꞌ scaxail in trato, yic max cham vin̈, yujto a in ol in chꞌox in bꞌa dꞌa scal asun dꞌa yibꞌan̈ smacul scaxail in trato chiꞌ. 3 Ayic tzꞌoch vin̈aj Aarón dꞌa yol jun lugar chiꞌ, yovalil syicꞌcot junoc nocꞌ quelem vacax vin̈ yic tzꞌoch silabꞌoc yuj smul yedꞌ junoc nocꞌ chꞌac calnel sn̈usjitzꞌa smasanil. 4 Syacꞌoch spichul vin̈ nabꞌa lino, aton spichul vin̈ jucan, yol svex vin̈, cꞌapac stzecꞌul snan̈al vin̈ yedꞌ sbꞌacꞌul sjolom vin̈. A juntzan̈ pichul chiꞌ te nivan yelcꞌochi, yuj chiꞌ bꞌabꞌel sbꞌiquel sbꞌa vin̈ ichato chiꞌ syacꞌanoch vin̈.

5 Axo ebꞌ eyetisraelal syicꞌcot chavan̈oc nocꞌ mam chiva ebꞌ yic tzꞌacꞌji nocꞌ silabꞌil yuj smul ebꞌ, syicꞌpaxcot junoc nocꞌ chꞌac calnel ebꞌ yic sn̈usjitzꞌaoc. 6 Syicꞌancot nocꞌ quelem vacax chiꞌ vin̈aj Aarón chiꞌ yic tzꞌoch nocꞌ silabꞌoc yuj smul. A jun nocꞌ chiꞌ yic nocꞌ vin̈, yuj yacꞌji tup smul vin̈ yedꞌ masanil ebꞌ ayecꞌ dꞌa yol spat. 7 Slajvi chiꞌ syicꞌanpaxcot chavan̈ nocꞌ mam chiva chiꞌ vin̈ dꞌa yichan̈ in cajnubꞌ bꞌaj tzin chꞌox in bꞌa. 8 Syacꞌanoch suerte vin̈ dꞌa yibꞌan̈ nocꞌ chiva chiꞌ schavan̈il: Jun nocꞌ tzꞌacꞌji silabꞌoc dꞌayin, axo junxo nocꞌ, tzꞌacꞌchajcanoch mul dꞌa yibꞌan̈ nocꞌ, spechchajcanbꞌat nocꞌ dꞌa tzꞌinan luum. 9 A nocꞌ tzꞌem suerte dꞌa yibꞌan̈ to vicoꞌ, syicꞌcot nocꞌ vin̈aj Aarón chiꞌ silabꞌoc yic stupcanel smul ebꞌ israel. 10 Axo junxo nocꞌ chiva chiꞌ, dꞌa spitzanil nocꞌ tzꞌoch dꞌa vichan̈, tzꞌacꞌjicanoch mul dꞌa yibꞌan̈ nocꞌ, tzꞌactajcanbꞌat nocꞌ dꞌa tzꞌinan luum syicꞌancanbꞌat smul ebꞌ israel chiꞌ nocꞌ.

11 Ayic listaxo yaj juntzan̈ tic smasanil, smilancham nocꞌ quelem vacax vin̈aj Aarón chiꞌ, syacꞌan nocꞌ vin̈ silabꞌil yic tzꞌacꞌji tup smul yedꞌ smul masanil ebꞌ ayecꞌ yedꞌ vin̈ dꞌa yol spat. 12 Slajvi chiꞌ, syicꞌancot jun chaynubꞌ yic incienso vin̈, bꞌudꞌan yedꞌ stzacꞌaqꞌuil altar ay dꞌa vichan̈ yedꞌ cha bꞌechan̈oc incienso sucꞌuqꞌui sjabꞌ, syicꞌanoch vin̈ dꞌa yoloch cꞌapac cortina ayoch dꞌa snan̈al in cajnubꞌ. 13 Syacꞌanem incienso chiꞌ vin̈ dꞌa yibꞌan̈ tzacꞌacꞌ dꞌa vichan̈, axo dꞌa yibꞌan̈ smacul bꞌaj tzꞌacꞌji tup mul, aton smacul scaxail in trato, tzꞌoch moyan stabꞌil incienso chiꞌ yic vachꞌ max cham vin̈. 14 Syicꞌancot jabꞌoc schiqꞌuil nocꞌ quelem vacax chiꞌ vin̈, slabꞌanem yiximal scꞌabꞌ vin̈ dꞌa scal chicꞌ chiꞌ, stzicanbꞌat vin̈ dꞌa yibꞌan̈ smacul caxa chiꞌ bꞌaj tzꞌochcꞌoch vin̈ chiꞌ, uquel stzicoch chicꞌ chiꞌ vin̈ dꞌa yichan̈ smacul chiꞌ. 15 Slajvi chiꞌ, tzꞌelxita vin̈, smilancham nocꞌ chiva vin̈, aton nocꞌ tzꞌoch silabꞌil yuj smul ebꞌ israel, syicꞌanoch schiqꞌuil nocꞌ vin̈ dꞌa yoloch cꞌapac cortina chiꞌ, stzicanpaxem schiqꞌuil nocꞌ chiꞌ vin̈ dꞌa yibꞌan̈ smacul caxa chiꞌ yedꞌ dꞌa yichan̈, icha syutej schiqꞌuil nocꞌ quelem vacax vin̈ dꞌa sbꞌabꞌelal. 16 Icha val chiꞌ syutej vin̈aj Aarón chiꞌ sacbꞌitan jun lugar Vicn̈ej Yaji yuj yalxon̈ej tas chucal yedꞌ spitalil ebꞌ israel tic. Icha chiꞌ ol aj sacbꞌican masanil in cajnubꞌ bꞌaj tzin chꞌox in bꞌa, aton jun ayecꞌ eyedꞌoc dꞌa scal chucal tze cꞌulej.

17 Malaj junoc mach ayecꞌ dꞌa yol in cajnubꞌ yacbꞌan ayoch vin̈aj Aarón chiꞌ dꞌa jun lugar Vicn̈ej Yaji yic syacꞌan silabꞌ vin̈ yic stup smul yedꞌ smul masanil ebꞌ ayecꞌ yedꞌ vin̈ dꞌa yol spat yedꞌ smul ebꞌ chon̈abꞌ masanil. 18 Slajvi yelxita vin̈, sacbꞌitan altar vin̈ ayecꞌ dꞌa vichan̈, aton bꞌaj sn̈usjitzꞌa silabꞌ, syicꞌanelta jabꞌoc schiqꞌuil nocꞌ vacax chiꞌ vin̈ yedꞌ jabꞌoc yic nocꞌ mam chiva, syacꞌanoch vin̈ dꞌa schꞌac altar ay dꞌa schiquin schan̈il. 19 Stzicanoch uquel schiqꞌuil nocꞌ nocꞌ chiꞌ vin̈ yedꞌ yiximal scꞌabꞌ dꞌa yibꞌan̈ altar chiꞌ, icha chiꞌ tzꞌaj sacbꞌitan altar chiꞌ vin̈ yuj e mul a ex israel ex tic.

20 Slajvi sacbꞌican jun lugar Vicn̈ej Yaji, in cajnubꞌ yedꞌ pax altar yuj vin̈, schecan vin̈ icꞌjoccot nocꞌ mam chiva pitzan chiꞌ. 21 Slajvi chiꞌ, syacꞌanbꞌat scꞌabꞌ vin̈ schabꞌil dꞌa sjolom nocꞌ, tzꞌoch ijan vin̈ yalanem smul yedꞌ spitalil ebꞌ yetchon̈abꞌ dꞌa yibꞌan̈ nocꞌ. Icha chiꞌ tzꞌaj scan smul ebꞌ dꞌa yibꞌan̈ nocꞌ. Axo jun vin̈ sicꞌbꞌilxoel bꞌat acꞌancan nocꞌ dꞌa tzꞌinan luum bꞌaj te najat. 22 Stijancanbꞌat nocꞌ vin̈ taꞌ, satcanbꞌat nocꞌ dꞌa taquin̈ lum chiꞌ. Icha chiꞌ tzꞌaj yicꞌjicanbꞌat smul chon̈abꞌ Israel yuj nocꞌ, aton bꞌaj man̈xalaj anima tzꞌeqꞌui. 23 Slajvi chiꞌ tzꞌochixta vin̈aj Aarón dꞌa yol in cajnubꞌ yic sqꞌuexanel spichul vin̈ ayochi, cꞌapac nabꞌa lino, cꞌapac ayoch yuj vin̈ a tzꞌochta dꞌa yol jun lugar to Vicn̈ej Yaji, syacꞌancan cꞌapac vin̈ taꞌ. 24 An̈ejaꞌ dꞌa yol in cajnubꞌ chiꞌ sbꞌiquel sbꞌa vin̈, syacꞌanoch spichul vin̈ syacꞌtaxonoch dꞌa yopisio. Slajvi chiꞌ, sn̈usantzꞌa silabꞌ vin̈, aton yic vin̈ yedꞌ silabꞌ yic ebꞌ israel chiꞌ smasanil. Icha chiꞌ tzꞌaj stupcanel smul vin̈ yedꞌ yic ebꞌ yetchon̈abꞌ chiꞌ. 25 A jantac xepual nocꞌ silabꞌ yuj mul, sn̈usjipaxtzꞌa dꞌa yibꞌan̈ altar. 26 Axo vin̈ bꞌat acꞌancan nocꞌ mam chiva dꞌa taquin̈ lum chiꞌ, ayic sjax vin̈, sjuqꞌuel spichul vin̈, sbꞌicanpaxel sbꞌa vin̈. Ichato chiꞌ syal yochta vin̈ dꞌa yol campamento.

27 A nocꞌ quelem vacax yedꞌ nocꞌ mam chiva smiljicham silabꞌil yuj stupcanel mul, aton nocꞌ tzꞌicꞌjicot schiqꞌuil dꞌa yol jun lugar to Vicn̈ej Yaji, tzꞌicꞌjicanbꞌat snivanil nocꞌ dꞌa spatiquel campamento. Ataꞌ sn̈usjitzꞌa nocꞌ yedꞌ stzꞌumal yedꞌ masanil snivanil. 28 A vin̈ sn̈usantzꞌa nocꞌ chiꞌ, yovalil sjuqꞌuel spichul vin̈, sbꞌicanpaxel sbꞌa vin̈, ichato chiꞌ syal yochta vin̈ dꞌa yol campamento.

29 A jun tic ley tzꞌajcan dꞌa e cal dꞌa masanil tiempo ex israel ex, ma ebꞌ chꞌoc chon̈abꞌil ayecꞌ dꞌa e cal. A dꞌa slajun̈il cꞌual dꞌa yuquil uj, tzex och dꞌa tzecꞌojcꞌolal, malaj mach smunlaj dꞌa jun cꞌual chiꞌ, 30 yujto a jun cꞌual chiꞌ, scꞌual yacꞌji silabꞌ yuj e mul yic vachꞌ stupcanel e mul dꞌa vichan̈. 31 A jun cꞌual chiꞌ, scꞌual icꞌoj ip tzꞌajcani yedꞌ tzecꞌojcꞌolal, ley tzꞌajcan dꞌa e cal dꞌa masanil tiempo. 32 A yuj chiꞌ a ol cham vin̈ sat sacerdote, axo junoc ebꞌ yuninal vin̈ tzꞌochcan sqꞌuexuloc. Tzꞌacꞌchajqꞌue aceite dꞌa sjolom, tzꞌacꞌjipax silabꞌ yuj yochcan yopisio, syacꞌanoch spichul te nivan yelcꞌochi. 33 A tzꞌacꞌan silabꞌ yic sacbꞌitan jun lugar to Vicn̈ej Yaji, in cajnubꞌ bꞌaj tzin chꞌox in bꞌa yedꞌ altar. Syacꞌanpax silabꞌ yic stup smul ebꞌ sacerdote yedꞌ ex israel ex tic. 34 A jun tic ley tzꞌajcan dꞌa e cal dꞌa masanil tiempo. Junel tzꞌacꞌji silabꞌ tic dꞌa yol junjun abꞌil yic slajviel e mul a ex chon̈abꞌ israel ex tic, xchi Jehová.

Icha val ix aj yalan Jehová, icha chiꞌ ix yutej vin̈aj Moisés chiꞌ yalani.