2 Al dꞌa vin̈aj Aarón yedꞌ dꞌa ebꞌ yuninal yedꞌ dꞌa masanil ebꞌ etchon̈abꞌ to in checnabꞌil juntzan̈xo tic:

3 Yaln̈ej mach smilancham junoc nocꞌ vacax, junoc nocꞌ calnel, ma junoc nocꞌ chiva silabꞌoc dꞌa spatiquel campamento, ma dꞌa yool, 4 palta max yicꞌcotlaj nocꞌ dꞌa stielxo in cajnubꞌ bꞌaj tzin chꞌox in bꞌa, yovalil man̈xa yalan yic dꞌa e cal. A jun chiꞌ scotcan dꞌa yibꞌan̈, yujto ton̈ej stobꞌcanem schiqꞌuil nocꞌ taꞌ. 5 Icha chiꞌ tzꞌaj valani yic mantzac e comon milej nocꞌ nocꞌ silabꞌil dꞌa spatiquel campamento, palta to tzeyicꞌcot nocꞌ dꞌa stiel in cajnubꞌ, axo junoc vin̈ sacerdote tzꞌacꞌanoch nocꞌ silabꞌil yic juncꞌolal dꞌa vichan̈. 6 A vin̈ sacerdote chiꞌ stzicanoch schiqꞌuil nocꞌ dꞌa spatictac altar dꞌa vichan̈, aton dꞌa stielxo in cajnubꞌ, sn̈ustzꞌa xepual nocꞌ vin̈ dꞌa vichan̈, sucꞌuqꞌui sjabꞌ svabꞌi. 7 Man̈xa bꞌaqꞌuin̈ tzeyacꞌ junocxo silabꞌ dꞌa ebꞌ enemigo, aton juntzan̈ bꞌaj ochnac ex ejmelal. Yujn̈ej juntzan̈ chiꞌ ex juviel dꞌa vichan̈. A jun tic ley tzꞌajcan dꞌa e cal dꞌa masanil tiempo.

8 Yaln̈ej mach ebꞌ eyetisraelal, ma chꞌoc chon̈abꞌil cajanecꞌ dꞌa e cal, tato syacꞌ junoc silabꞌ stzꞌai, ma yaln̈ej tas silabꞌil, 9 palta to max yicꞌcotlaj dꞌa stielxo in cajnubꞌ bꞌaj tzin chꞌox in bꞌa yic tzꞌacꞌji dꞌayin, a jun anima chiꞌ, man̈xa yalan yic dꞌa e cal.

10 Te ay val yoval in cꞌol dꞌa yaln̈ej mach eyetisraelal ma junoc chꞌoc chon̈abꞌil ayecꞌ dꞌa e cal schiꞌan schiqꞌuil nocꞌ nocꞌ. A in val ol in och ajcꞌolal dꞌay, ol in satanel dꞌa e cal. 11 Yujto masanil nocꞌ nocꞌ yedꞌ anima, a yuj schiqꞌuil pitzan, yuj chiꞌ ix valaꞌ to stobꞌjioch schiqꞌuil nocꞌ dꞌa spatictac altar yic slajvicanel mul. Yujto a dꞌa schiqꞌuil nocꞌ chiꞌ ay sqꞌuinal yuj chiꞌ syal yacꞌan tup mul chiꞌ.

12 Yuj chiꞌ sval dꞌayex israel ex tic to malaj junoc ex, ma ebꞌ chꞌoc chon̈abꞌil ayecꞌ cajan dꞌa e cal syal chiꞌan schiqꞌuil nocꞌ nocꞌ. 13 Yaln̈ej mach ex ma ebꞌ chꞌoc chon̈abꞌil ayecꞌ cajan dꞌa e cal syamchaj junoc nocꞌ nocꞌ yuuj, ma junoc nocꞌ much, aton nocꞌ toxonton schiji, yovalil syicꞌcanel schiqꞌuil nocꞌ, smucancan yedꞌ lum luum. 14 Yujto a chicꞌ chiꞌ icꞌan pitzan nocꞌ, yuj chiꞌ sval dꞌayex to max yal-laj schiji nocꞌ chibꞌej aytooch schiqꞌuil. Yaln̈ej mach schiꞌani, satjiel dꞌa e cal.

15 Yaln̈ej mach ex, ma chꞌoc chon̈abꞌil schiꞌan nocꞌ chibꞌej to ton̈ej schami, mato smiljicham yuj junoc nocꞌ chium nocꞌ, yovalil sjuqꞌuel spichul, sbꞌicanel sbꞌa, palta man̈ vachꞌoc tzꞌajcani masanto sqꞌuicꞌbꞌiemi. 16 Palta tato max sjuqꞌuel spichul, mato max sbꞌiquel sbꞌa, scann̈ej smul chiꞌ dꞌa yibꞌan̈, xa chi, xchi Jehová dꞌa vin̈aj Moisés chiꞌ.