2 Al juntzan̈ checnabꞌil tic smasanil dꞌa ebꞌ etisraelal:

A in Jehová e Diosal in. 3 Man̈ e bꞌeybꞌalej sbꞌeybꞌal ebꞌ aj Egipto, aton jun chon̈abꞌ bꞌaj ecꞌnac ex cajan.

Man̈ e bꞌeybꞌalejpax sbꞌeybꞌal ebꞌ aj Canaán, aton bꞌaj van ex vicꞌanbꞌati.

4 Cꞌanabꞌajejec in checnabꞌil, tze cꞌanabꞌajan e bꞌeybꞌalan in cꞌaybꞌubꞌal. A in ton Jehová e Diosal in svalaꞌ.

5 Bꞌeybꞌalejec in checnabꞌil yedꞌ in cꞌaybꞌubꞌal. A mach ol cꞌanabꞌajanoc, ol schan̈ej sqꞌuinal yuuj. A in ton Jehová in svalaꞌ.

6 Malajocabꞌ junoc vin̈ vinac smulan yedꞌ junoc ix ix to ayto yuj sbꞌa yedꞌoc. A inton Jehová in svalaꞌ.

7 Malajocabꞌ junoc mach syacꞌ qꞌuixvelal smam, smulan yedꞌ snun, yelxo val te chuc yujto snun ton val.

8 Malajocabꞌ junoc vin̈ vinac smulan yedꞌ ix yetbꞌeyum smam yic max yacꞌ qꞌuixvelal smam chiꞌ.

9 Malajocabꞌ junoc vin̈ vinac smulan yedꞌ yanabꞌ: Yanabꞌ yuj smam, ma yuj snun, vachꞌchom dꞌa yol spat aljinac ix, mato chꞌoc bꞌaj aljinac, man̈ smojoc smulan yedꞌ ix.

10 Malajocabꞌ junoc vin̈ vinac syacꞌ qꞌuixvelal sbꞌa smulan yedꞌ ix yixchiquin, yixchiquin yuj yuninal, ma yuj yisil. Max yal-laj smulan yedꞌoc.

11 Malajocabꞌ junoc vin̈ vinac smulan yedꞌ ix yuneꞌ ix yisil smam, yisil val smam chiꞌ, schabꞌil yanabꞌ yaj ix, max yal-laj smulan yedꞌ ix.

12 Malajocabꞌ junoc vin̈ vinac smulan yedꞌ ix yanabꞌ smam, yujto aꞌ och smam chiꞌ yedꞌ ix.

13 Malajocabꞌ junoc vin̈ vinac smulan yedꞌ ix snulej ix snun, yujto aꞌ och ix snun vin̈ chiꞌ yedꞌ ix.

14 Malajocabꞌ junoc vin̈ vinac syacꞌ qꞌuixvelal yucꞌtac smam smulan yedꞌ ix yetbꞌeyum vin̈, yujto ichato ayto yuj sbꞌa yedꞌ ix.

15 Malajocabꞌ junoc vin̈ vinac smulan yedꞌ ix yalibꞌ, yujto yetbꞌeyum ix vin̈ yuninal vin̈, max yal-laj smulan vin̈ yedꞌ ix.

16 Malajocabꞌ junoc vin̈ vinac syacꞌ qꞌuixvelal yucꞌtac yuj smulan yedꞌ ix yetbꞌeyum vin̈ yucꞌtac chiꞌ.

17 Tato ay junoc vin̈ vinac tzꞌicꞌan junoc ix ix, max yal-laj smulan vin̈ yedꞌ ix yuneꞌ ix, to schabꞌil yisil yaj ix. Max yalpaxlaj smulan vin̈ yedꞌ ix yixchiquin ix, yixchiquin yuj junoc vin̈ yuneꞌ ix, ma yuj junoc ix yuneꞌ ix. Yelxo val te chuc icha chiꞌ, yujto yicn̈ej ix yaj ebꞌ chiꞌ.

18 Malajocabꞌ junoc vin̈ vinac syicꞌqꞌue snulej yetbꞌeyum, max yal-laj yicꞌani yacbꞌan pitzanto ix yetbꞌeyum chiꞌ, yic vachꞌ max och ajcꞌolal dꞌa scal ebꞌ ix. 19 Malajocabꞌ junoc vin̈ vinac ay tas scꞌulej yedꞌ junoc ix ix ayic ayoch ix dꞌa stiempoal yic sbꞌisan uj.

20 Malajocabꞌ junoc vin̈ vinac smulan yedꞌ ix yetbꞌeyum junocxo vinac, man̈ vachꞌoc scan ebꞌ dꞌa yichan̈ ley.

21 Malajocabꞌ junoc vin̈ vinac sn̈usantzꞌa junoc yuninal silabꞌoc dꞌa jun comon dios scuchan Moloc. Tato scꞌulej icha chiꞌ, malaj velcꞌoch dꞌa yol sat. A in Jehová in sval tic.

22 Malajocabꞌ junoc vin̈ vinac smulan yedꞌ junoc yetvinaquil, icha scꞌulej yedꞌ junoc ix ix, a jun chiꞌ te yajbꞌentac.

23 Malajocabꞌ junoc vin̈ vinac smulan yedꞌ nocꞌ nocꞌ, malajocabꞌ junoc mach syixtejbꞌat sbꞌa dꞌa icha chiꞌ. Malajocabꞌ pax junoc ix ix smulan yedꞌ junoc nocꞌ nocꞌ, yujto yelxo val man̈xo smojoc.

24 Malajocabꞌ mach syixtejbꞌat sbꞌa yedꞌ juntzan̈ tic, yujto a dꞌa smasanil juntzan̈ tic, syixtejbꞌat sbꞌa juntzan̈ anima ol viqꞌuel dꞌa eyichan̈ tic. 25 Yuj juntzan̈ chiꞌ, man̈xo pax vachꞌoc yaj sluum ebꞌ, van vacꞌan yovalil dꞌa ebꞌ, van vacꞌan satjocpaxel ebꞌ dꞌa sluum chiꞌ. 26-28 Masanil juntzan̈ chiꞌ, sbꞌeybꞌalej juntzan̈ anima cajan dꞌa jun luum chiꞌ, ayic manto ex cꞌoch cajan a ex tic. Yuj chiꞌ yelxo val man̈ vachꞌoc yaj jun luum chiꞌ yuj ebꞌ. Palta a ex israel ex tic yedꞌ ebꞌ chꞌoc chon̈abꞌil ayecꞌ cajan dꞌa e cal, yovalil tze bꞌeybꞌalej, tze cꞌanabꞌajanpax in checnabꞌil tic. Man̈ e cꞌulej masanil juntzan̈ tastac man̈ vachꞌoc scꞌulej ebꞌ chiꞌ, yic vachꞌ max ex satjipax el a ex tic dꞌa jun luum chiꞌ. 29 A mach sbꞌeybꞌalan juntzan̈ tastac yajbꞌentac chiꞌ, yovalil satjiel dꞌa e cal. 30 Yuj val chiꞌ bꞌeybꞌalejec in checnabꞌil, man̈ e bꞌeybꞌalej juntzan̈ bꞌeybꞌal yajbꞌentac chiꞌ, aton juntzan̈ sbꞌeybꞌalaji ayic manto ex cꞌochlaj taꞌ, man̈ eyixtejbꞌat e bꞌa dꞌa icha chiꞌ. A in Jehová e Diosal in svalaꞌ, xchi Jehová dꞌa vin̈aj Moisés chiꞌ.