2 Al masanil juntzan̈ lolonel tic dꞌa ebꞌ etisraelal:

Vachꞌn̈ej tzeyutej e bꞌa, yujto a in Jehová in tic vachꞌ inn̈ej.

3 Cꞌanabꞌajejec e mam e nun.

Tze cꞌanabꞌajej sleyal juntzan̈ scꞌual icꞌoj ip to vic yaji. A in ton Jehová e Diosal in svalaꞌ.

4 Man̈ eyacꞌoch e pensar dꞌa juntzan̈ yechel comon dios, man̈ e bꞌopaxqꞌue qꞌuen qꞌueen e diosaloc. A in ton Jehová e Diosal in svalaꞌ.

5 Ayic tzeyacꞌan silabꞌ yic e juncꞌolal vedꞌoc, tze cꞌanabꞌajej val icha sleyal, yuj chiꞌ ol in cha dꞌayex. 6 A nocꞌ schibꞌejal nocꞌ tzeyacꞌ silabꞌil chiꞌ, tze chi nocꞌ dꞌa scꞌual chiꞌ yedꞌ dꞌa junxo cꞌu. Tato ayto nocꞌ scan dꞌa schabꞌjial, sn̈uschajtzꞌa nocꞌ. 7 Tato tzato e chi nocꞌ dꞌa schabꞌjial chiꞌ, chucxo dꞌa yol in sat, maxtzac in chalaj silabꞌ chiꞌ dꞌayex. 8 A mach schiꞌan nocꞌ dꞌa schabꞌjial chiꞌ, max tuplaj smul chiꞌ dꞌa yibꞌan̈, yujto comon ix yutej tastac to vic yaji. A jun mach chiꞌ, man̈xalaj yalan yic dꞌa e cal.

9 Ayic tze molanqꞌue sat tas tzeyavej dꞌa e luum, man̈ pilanoc tzeyutej e molanqꞌue dꞌa stitac, man̈ ex ecꞌ dꞌan̈an̈ e sicꞌanqꞌue ixim jolom trigo scan eyuuj. 10 Ayic tze molan sat teꞌ uva, man̈ ex meltzaj e say eyil dꞌa schaelal, man̈ e sicꞌqꞌue sat scꞌajbꞌanemi. A juntzan̈ chiꞌ canocabꞌi, yicxo ebꞌ mebꞌaꞌ yedꞌ ebꞌ chꞌoc chon̈abꞌil yaji. A in ton Jehová e Diosal in svalaꞌ.

11 Man̈ ex elcꞌanoc, man̈ eyal esal lolonel, man̈ eyacꞌ musansatil ebꞌ eyetanimail.

12 Man̈ e loc in bꞌi dꞌa es. Tato icha chiꞌ tze cꞌulej ichato malaj velcꞌoch dꞌayex. A in ton Jehová in svalaꞌ.

13 Man̈ comonoc tzeyixtej ebꞌ eyetanimail, man̈ e toqꞌuecꞌ tastac ay dꞌa ebꞌ. Man̈ eyalaꞌ to ato qꞌuicꞌan tze tup scꞌu ebꞌ vin̈ e munlajvum smunlaj ticnaic.

14 Man̈ e bꞌaj ebꞌ chacan̈, man̈ eyaqꞌuem tas dꞌa yol sbꞌe ebꞌ max uji yilani, palta ayocabꞌ velcꞌoch dꞌa yol e sat. A in ton Jehová in svalaꞌ.

15 Man̈ e bꞌo tas man̈ tojoloc ayic tze bꞌoan yaj junoc lolonel. Man̈ eyacꞌoch e bꞌa yedꞌ ebꞌ mebꞌaꞌ, man̈ eyacꞌpaxoch e bꞌa yedꞌ ebꞌ nivac yelcꞌochi. Te tojoln̈ej tzeyutej e bꞌoanel tas yaj ebꞌ.

16 Man̈ ex alvoc pecal dꞌa scal ebꞌ eyetchon̈abꞌ.

Man̈ e nachaan̈ esal lolonel dꞌa yibꞌan̈ junoc eyetanimail yic smiljichamoc. A in ton Jehová in svalaꞌ.

17 Mocabꞌ chichonoch e cꞌol dꞌa junoc eyetanimail, palta vachꞌ to tze cachaꞌ tzeyacꞌan srazón yic vachꞌ max cotcan dꞌa eyibꞌan̈ yedꞌoc.

18 Man̈ e pac e bꞌa, mocabꞌ chichonn̈ejoch e cꞌol dꞌa ebꞌ eyetchon̈abꞌ. Tze xajanej ebꞌ ay dꞌa spatic schiquin e pat icha tzeyutej e ya ilan e bꞌa. A in ton Jehová in svalaꞌ.

19 Cꞌanabꞌajejec juntzan̈ in checnabꞌil tic.

Man̈ e cha tajnoc nocꞌ e molbꞌetzal nocꞌ yedꞌ junocxo nocꞌ nocꞌ chꞌoc yin̈tilal.

Man̈ e som eyin̈at tzeyavej dꞌa e luum.

Man̈ eyacꞌoch cꞌapac pichul soman schꞌalil yedꞌ junocxo macan̈ an̈ chꞌal.

20 Tato ay junoc ix schecabꞌ junoc mach ayxo strato yedꞌ junocxo vin̈ vinac, palta tato ay junocxo vin̈ smulan yedꞌ ix, tzꞌacꞌji yovalil dꞌa ebꞌ schavan̈il. Max miljichamlaj ebꞌ, yujto mantzac tupji yic tzꞌel ix dꞌa libre. 21 A vin̈ smulan yedꞌ ix chiꞌ, yovalil syicꞌcot junoc nocꞌ chꞌac calnel vin̈ silabꞌil yuj smul chiꞌ dꞌa stielxo in cajnubꞌ bꞌaj tzin chꞌox in bꞌa. 22 Smiljicham nocꞌ, axo junoc vin̈ sacerdote tzꞌacꞌanoch nocꞌ dꞌa vichan̈, yuj stupchaj smul vin̈ chiꞌ.

23 Ayic ol ex cꞌoch dꞌa lum Canaán, ol eyavan masanil macan̈il te avbꞌen teꞌ syacꞌ sat. Oxeꞌ abꞌil max eyamlaj junoc sat teꞌ chiꞌ yic tze loani, yujto ay yovalil dꞌa yol in sat. 24 Axo dꞌa schan̈il abꞌil, masanil sat teꞌ syacꞌ chiꞌ, tzeyacꞌ masanil dꞌayin ofrendail yuj eyacꞌan yuj diosal, yujto vic yaj teꞌ sat chiꞌ. 25 Axo dꞌa yoil abꞌil, eyicxo yaj sat teꞌ chiꞌ yic tze loꞌo. Tato ol e cꞌanabꞌajej sleyal tic, yelxo val ol yacꞌ sat teꞌ. A in ton Jehová e Diosal in svalaꞌ.

26 Man̈ e chi nocꞌ chibꞌej to max el schiqꞌuil.

Man̈ eyacꞌoch e bꞌa e naanel tas tzuji, man̈ eyacꞌpaxoch e bꞌa dꞌa ajchumal.

27 Man̈ setansetanoc tzꞌaj sjoxjiel xil e jolom, man̈ e joxpaxel xil e sat.

28 Man̈ eyacꞌ echnaj e bꞌa yuj cuscꞌolal yuj junoc chamnac, man̈ eyacꞌoch yechel junoc tas dꞌa e nivanil.^* A in ton Jehová in svalaꞌ.

29 Man̈ eyacꞌ qꞌuixvelal ix eyisil, tzeyacꞌanoch ix ajmul ixal dꞌa stemplo juntzan̈ comon dios, yic vachꞌ max ixtaxel sbꞌeybꞌal ebꞌ anima, yic max ixtaxpaxel e chon̈abꞌ yuj ajmulal.

30 Yovalil tze cꞌanabꞌajej sleyal juntzan̈ scꞌual icꞌoj ip to vic yaji. Ayocabꞌ yelcꞌoch in cajnubꞌ dꞌa yol e sat. A in Jehová in svalaꞌ.

31 Man̈ ex bꞌat e cꞌanbꞌej e bꞌa dꞌa ebꞌ ajchum, ma dꞌa ebꞌ scꞌuman spixan ebꞌ chamnac yalani, yic vachꞌ max eyixtejbꞌat e bꞌa. A in Jehová e Diosal in svalaꞌ.

32 Qꞌuean̈ec lin̈an dꞌa yichan̈ ebꞌ ichamtac anima, nivanocabꞌ yelcꞌoch ebꞌ dꞌa yol e sat. Ayocabꞌpax velcꞌoch dꞌa yol e sat. A in ton Jehová in svalaꞌ.

33 Man̈ eyixtej junoc anima chꞌoc chon̈abꞌil ayecꞌ dꞌa e cal. 34 Xajan tzeyutej ebꞌ, ichato eyetchon̈abꞌ ebꞌ. Yaꞌilejec ebꞌ, icha tzꞌaj eyaꞌilan e bꞌa. Tze nacoti to a ex tic najtil ecꞌnac ex dꞌa chꞌoc chon̈abꞌil dꞌa yol yic Egipto. A in ton Jehová e Diosal in svalaꞌ.

35 Man̈ eyixtej ebꞌ anima dꞌa tas tze chon̈oꞌ, tzꞌacanocabꞌ eyechlabꞌ tzeyacꞌlabꞌej, icha e chꞌan̈ ayic tzeyechtan e luum ma juntzan̈xo echlabꞌ tze cꞌanaꞌ. 36 A e libra yedꞌ eyalmul tze cꞌanaꞌ, tzꞌacanocabꞌi. A in ton Jehová e Diosal in ix ex viqꞌuelta dꞌa Egipto, a in svalaꞌ.

37 Yuj val chiꞌ, yovalil tze cꞌanabꞌajej in bꞌeybꞌal yedꞌ masanil in checnabꞌil tic. A in ton Jehová in svalaꞌ, xchi Jehová dꞌa vin̈aj Moisés chiꞌ.