2 Al masanil juntzan̈ checnabꞌil tic dꞌa ebꞌ etisraelal:

Yaln̈ej mach ex, ma ebꞌ chꞌoc chon̈abꞌil ayecꞌ cajan dꞌa e cal tzꞌacꞌan junoc yuninal silabꞌil dꞌa comon dios scuchan Moloc, a jun chiꞌ yovalil sjulqꞌuenajcham yuj ebꞌ yetchon̈abꞌ. 3 Scotpax voval dꞌa jun anima chiꞌ, tzin satel dꞌa scal ebꞌ yetchon̈abꞌ, yujto ix yixtejbꞌat in cajnubꞌ, ix in spaticaneli, yujto syacꞌ yuninal silabꞌil dꞌa jun comon dios chiꞌ. 4 Tato a ebꞌ yetchon̈abꞌ ton̈ej syilochi, max sjulqꞌuenejcham jun anima chiꞌ ebꞌ, 5 a in val ol vacꞌ yovalil dꞌa jun anima chiꞌ, dꞌa yetbꞌeyum, dꞌa yuninal yedꞌ dꞌa masanil ebꞌ cajan yedꞌ dꞌa yol spat. Ol in satel ebꞌ dꞌa scal ebꞌ yetchon̈abꞌ yedꞌ ebꞌ syaqꞌuem sbꞌa dꞌa comon dios Moloc chiꞌ yedꞌoc. 6 Tato ay mach sbꞌat scꞌanbꞌej sbꞌa dꞌa ebꞌ ajbꞌaal, ma dꞌa ebꞌ scꞌuman spixan ebꞌ chamnac yalani, scꞌanabꞌajan tas syal ebꞌ chiꞌ, ol vacꞌ yovalil dꞌa jun anima chiꞌ, ol in satel dꞌa scal yetchon̈abꞌ.

7 Juneln̈ej tzeyacꞌoch e bꞌa dꞌa yol in cꞌabꞌ, vachꞌn̈ej tzeyutej e bꞌa, yujto a in Jehová in tic, e Diosal in. 8 A val in bꞌeybꞌal tze bꞌeybꞌalej, tze cꞌanabꞌajani, yujto a in Jehová in tzex vacꞌoch vicoc.

9 Yaln̈ej mach sbꞌaj smam snun yovalil schami, a val tzꞌicꞌancot schamel chiꞌ dꞌa yibꞌan̈.

10 Tato ay junoc vin̈ vinac smulan yedꞌ ix yetbꞌeyum junoc yetanimail, yovalil scham jun vinac chiꞌ yedꞌ jun ix ix chiꞌ.

11 Tato ay junoc vin̈ vinac smulan yedꞌ ix yetbꞌeyum smam, syacꞌ qꞌuixvelal smam chiꞌ. A jun vinac chiꞌ yovalil schami, schampax ix ix chiꞌ, a val ebꞌ tzꞌicꞌancot schamel dꞌa yibꞌan̈.

12 Tato ay junoc vin̈ vinac smulan yedꞌ ix yalibꞌ, yovalil scham ebꞌ schavan̈il, yujto yelxo val te chuc scꞌulej ebꞌ. A val ebꞌ tzꞌicꞌancot schamel dꞌa yibꞌan̈.

13 Tato ay junoc vin̈ vinac smulan yedꞌ yetvinaquil, icha scꞌulej yedꞌ junoc ix ix, yovalil scham ebꞌ schavan̈il. A val ebꞌ tzꞌicꞌancot schamel dꞌa yibꞌan̈, yujto yajbꞌentac tas scꞌulej ebꞌ chiꞌ.

14 Tato ay junoc vin̈ vinac tzꞌicꞌan junoc ix ix, syicꞌanpaxqꞌue snun ix ix chiꞌ vin̈, te chuc tas scꞌulej ebꞌ chiꞌ, yuj chiꞌ a jun vin̈ vinac chiꞌ yedꞌ chavan̈ ebꞌ ix ix chiꞌ, sn̈usjitzꞌa ebꞌ. Yuj chiꞌ man̈xa bꞌaj ol bꞌinaj jun bꞌeybꞌal chiꞌ dꞌa e cal.

15 Tato ay junoc vin̈ vinac smulan yedꞌ junoc nocꞌ nocꞌ, a vin̈ chiꞌ yovalil scham vin̈, schampax nocꞌ nocꞌ chiꞌ.

16 Tato ay pax junoc ix ix smulan yedꞌ junoc nocꞌ nocꞌ, a jun ix chiꞌ yovalil scham ix, schampax jun nocꞌ nocꞌ chiꞌ. A val tzꞌicꞌancot schamel dꞌa yibꞌan̈.

17 Tato ay junoc vin̈ vinac syicꞌ yanabꞌ yetbꞌeyumoc, yanabꞌ yuj smam ma yanabꞌ yuj snun, a chavan̈ ebꞌ chiꞌ, dꞌa val yichan̈ ebꞌ yetchon̈abꞌ ebꞌ satjieli, yujto a mach smulan yedꞌ yanabꞌ, yelxo val qꞌuixvelal tas scꞌulej ebꞌ chiꞌ, yuj chiꞌ a mach icha chiꞌ scꞌulej, a smul chiꞌ scotcan dꞌa yibꞌan̈.

18 Tato ay junoc vin̈ vinac ay tas scꞌulej yedꞌ junoc ix ix ayic ayoch ix sbꞌisan uj, malaj yelcꞌoch dꞌa yol sat vin̈ tas tzꞌicꞌan ix chiꞌ, bꞌecanpax scꞌol ix schꞌoxanel syaelal chiꞌ, yuj chiꞌ man̈xaocabꞌ yalan yic ebꞌ schavan̈il dꞌa e cal.

19 Malajocabꞌ junoc vin̈ vinac smulan yedꞌ yanabꞌ smam, ma yedꞌ snulej snun, yujto syacꞌ sqꞌuixvelal vin̈ mach ayto yuj sbꞌa yedꞌoc. A yuj smul ebꞌ chiꞌ scot dꞌa yibꞌan̈ schavan̈il.

20 Tato ay junoc vin̈ vinac smulan yedꞌ ix yetbꞌeyum vin̈ yucꞌtac smam ma vin̈ snulej snun, syacꞌ val qꞌuixvelal jun yicham chiꞌ, a yuj smul ebꞌ chiꞌ scot dꞌa yibꞌan̈ schavan̈il, yuj chiꞌ smiljicham ebꞌ, malaj yin̈tilal ebꞌ scani.

21 Tato ay junoc vin̈ vinac smulan yedꞌ ix yetbꞌeyum vin̈ yucꞌtac, syacꞌ qꞌuixvelal vin̈ yucꞌtac vin̈ chiꞌ, a jun chiꞌ yajbꞌentac, yuj chiꞌ smiljicham ebꞌ, malaj yin̈tilal ebꞌ scani.

22 Bꞌeybꞌalejec in bꞌeybꞌal, tze cꞌanabꞌajan masanil in checnabꞌil tic yic vachꞌ man̈ ol ex in satel dꞌa lum luum bꞌaj ol ex cꞌoch cajan chiꞌ. 23 Man̈ e bꞌeybꞌalej sbꞌeybꞌal ebꞌ anima ol viqꞌuel dꞌa eyichan̈ chiꞌ. A ebꞌ chiꞌ, sbꞌeybꞌalej masanil juntzan̈ chucal tic ebꞌ, yuj chiꞌ tzin chaquel ebꞌ. 24 A in val ix vacꞌ in tiꞌ to ol vacꞌ eyiquejcan slum ebꞌ chiꞌ e macbꞌenoc, lum te yax sat.

A in Jehová e Diosal in, ex in sicꞌnaquelta dꞌa scal juntzan̈xo chon̈abꞌ. 25 Yuj chiꞌ yovalil ay sqꞌuexan̈il nocꞌ nocꞌ vachꞌ yedꞌ nocꞌ man̈ vachꞌoc dꞌa yol e sat yedꞌ dꞌa scal nocꞌ much vachꞌ yedꞌ nocꞌ man̈ vachꞌoc. Yuj chiꞌ man̈ e juel e bꞌa dꞌa vichan̈ yuj e chiꞌan nocꞌ nocꞌ man̈ vachꞌoc chiꞌ, nocꞌ much, nocꞌ sn̈ervi, ma nocꞌ sjachvi dꞌa sat lum tic, aton nocꞌ ix valaꞌ to man̈ vachꞌoc. 26 Palta yovalil vachꞌ tzeyutej e bꞌa dꞌa vichan̈, yujto vachꞌ inn̈ej a in tic. A in Jehová in tic ix ex in siqꞌueli, to chꞌoc eyel dꞌa yichan̈ juntzan̈xo chon̈abꞌ, yic vachꞌ in chon̈abꞌ tzex aji.

27 Tato ay junoc vin̈ vinac ma junoc ix ix dꞌa e cal scꞌuman spixan ebꞌ chamnac yalani, yovalil sjulqꞌuenajchamoc. A val tzꞌicꞌancot schamel chiꞌ dꞌa yibꞌan̈, xchi Jehová, xa chi, xchi dꞌa vin̈aj Moisés chiꞌ.