Al dꞌa ebꞌ sacerdote, ebꞌ yin̈tilal vin̈aj Aarón, mocabꞌ cꞌoch ebꞌ dꞌa stzꞌey junoc chamnac yic man̈ chucoc scan ebꞌ dꞌa yichan̈ ley, vachꞌchom ayto yuj sbꞌa ebꞌ yedꞌ jun chamnac chiꞌ. 2 An̈ej tato a snun, ma smam, ma junoc yuninal, ma junoc yisil, ma junoc yucꞌtac, 3 ma junoc yanabꞌ ebꞌ cobꞌes ayecꞌ cajan yedꞌoc, a schami, syal scꞌoch ebꞌ dꞌa stzꞌey jun chamnac chiꞌ. 4 Palta max yal-laj scꞌoch ebꞌ dꞌa stzꞌey junoc chamnac scꞌabꞌ yoc ix yetbꞌeyum ebꞌ.

5 Mocabꞌ sjoxel xil sjolom ebꞌ, mocabꞌ sjoxpaxel xil stiꞌ ebꞌ, mocabꞌ yacꞌpax echnaj snivanil ebꞌ yuj schamel junoc anima. 6 Palta vachꞌn̈ejocabꞌ syutej sbꞌa ebꞌ yujto vicn̈ej yaj ebꞌ. Mocabꞌ chucoc in bꞌinaj yuj ebꞌ, yujto a ebꞌ sn̈usantzꞌa silabꞌ, syacꞌan ixim pan ebꞌ ofrendail dꞌayin, yuj chiꞌ yovalil vachꞌn̈ejocabꞌ syutej sbꞌa ebꞌ.

7 Max yalpaxlaj yicꞌan junoc ix ajmul ix ebꞌ, ma junoc ix ix ayxo vinac ix ecꞌ dꞌay, ma junoc ix ix spucnac sbꞌa yedꞌ yetbꞌeyum, yujto sicꞌbꞌilel ebꞌ yic tzꞌochcan vicoc. 8 Chꞌococabꞌ yel ebꞌ dꞌa yol e sat, yujto a ebꞌ tzꞌacꞌanoch ixim pan ofrendail dꞌa vichan̈, yujto a in Jehová in vachꞌ inn̈ej, a in ix in sicꞌcanel ebꞌ yic vachꞌ tzꞌajcan ebꞌ.

9 Tato ay junoc ebꞌ ix yisil junoc ebꞌ sacerdote chiꞌ tzꞌoch dꞌa ajmul ixal, syacꞌ qꞌuixvelal smam ix chiꞌ, yovalil sn̈usjitzꞌa ix.

10 A vin̈ sat sacerdote ix icꞌjiqꞌuechaan̈ dꞌa scal ebꞌ yucꞌtac ayic ix acꞌjiqꞌue aceite dꞌa sjolom, ayic ix acꞌchajoch spichul vin̈ te nivan yelcꞌochi, max yal-laj toxon̈ej sbꞌat tzican xil sjolom vin̈, max yalpaxlaj sn̈icꞌanbꞌat spichul vin̈ yuj schꞌoxanel scuscꞌolal. 11 Max yalpaxlaj scꞌoch vin̈ bꞌaj ayecꞌ junoc chamnac, vachꞌchom smam, ma snun yic max yixtejbꞌat sbꞌa vin̈. 12 A yuj schamel ebꞌ chiꞌ max yal-laj yel vin̈ dꞌa in cajnubꞌ, max yalpaxlaj to syixtejbꞌat in cajnubꞌ chiꞌ vin̈, yujto ix acꞌjioch aceite dꞌa vin̈ yic sicꞌchajcaneli, yic tzꞌochcan vicoc. A in Jehová in svalaꞌ.

13 A vin̈ sat sacerdote, a junoc ix cobꞌes mantalaj vinac tzꞌecꞌ dꞌay, a ix syicꞌ vin̈. 14 Max yal-laj yicꞌlan sbꞌa vin̈ yedꞌ junoc ix chamnacxo yetbꞌeyum, ma yedꞌ junoc ix spucnac sbꞌa yedꞌ yetbꞌeyum, ma yedꞌ junoc ix ayxo vinac tzꞌecꞌ dꞌay, ma yedꞌ junoc ix ajmul ix. Palta yovalil a junoc ix cobꞌes ix syicꞌ vin̈, junoc ix yetchon̈abꞌ vin̈, 15 yic man̈ malajoc tzꞌaj yelcꞌoch ebꞌ yuninal vin̈ dꞌa scal ebꞌ yetchon̈abꞌ, yujto a in Jehová in ix in sicꞌcanel vin̈, xchi Jehová, dꞌa vin̈aj Moisés chiꞌ.

16 Ix yalanxi Jehová dꞌa vin̈aj Moisés chiꞌ icha tic:

17 Al dꞌa vin̈aj Aarón: Ticnaic yedꞌ dꞌa masanil tiempo, malaj junoc ebꞌ yin̈tilal vin̈ ay palta dꞌa snivanil ol yal yacꞌan yofrenda ebꞌ yetchon̈abꞌ dꞌayin. 18-20 Yuj chiꞌ yel val malaj junoc ay spaltail snivanil chiꞌ ol yal yoch dꞌa jun opisio chiꞌ: Aton ebꞌ max yal yilani, ebꞌ tzꞌem sbꞌeyi, ebꞌ palta sn̈iꞌ ma schiquin, ebꞌ qꞌuichajnac xubꞌ ma scꞌabꞌ, ebꞌ n̈ojanemi sbꞌeyi, ebꞌ tzapan steel yujto nenetac yoc ebꞌ yedꞌ scꞌabꞌ, ebꞌ ayoch yaax dꞌa yol sat, ebꞌ aycan sjechꞌal junoc yabꞌil dꞌay, ebꞌ ay yaxcꞌa dꞌa snivanil yedꞌ ebꞌ macꞌbꞌilpoj sn̈olobꞌ sqꞌueen. 21 Malaj junoc ebꞌ yin̈tilal vin̈aj Aarón chiꞌ ay palta dꞌa snivanil syal yoch dꞌa vichan̈ yedꞌ silabꞌ to sn̈usjitzꞌaoc. Tato ay palta dꞌa snivanil chiꞌ, max yal-laj yacꞌan ofrenda dꞌayin. 22 Syal svaan juntzan̈ ofrenda chiꞌ ebꞌ yedꞌ masanil juntzan̈ tastac to vic yaji, 23 palta max yal-laj yoch ebꞌ dꞌa in cajnubꞌ, ma scꞌoch ebꞌ dꞌa stzꞌey altar, yic max yixtejbꞌat in cajnubꞌ chiꞌ ebꞌ, yujto a in Jehová in, vic yaj juntzan̈ tastac chiꞌ, xchi Jehová dꞌa vin̈aj Moisés chiꞌ.

24 Yuj chiꞌ masanil juntzan̈ tic ix yal vin̈aj Moisés dꞌa vin̈aj Aarón yedꞌ dꞌa ebꞌ yuninal vin̈ yedꞌ dꞌa masanil ebꞌ yetisraelal.