Ebꞌ max yal-laj svaan ofrenda tzꞌacꞌji dꞌa Jehová
22
Ix lolonxi Jehová dꞌa vin̈aj Moisés chiꞌ, ix yalani:2 Al dꞌa vin̈aj Aarón yedꞌ dꞌa ebꞌ yin̈tilal to syaꞌilej val sbꞌa ebꞌ yedꞌ ofrenda syacꞌ ebꞌ eyetisraelal dꞌayin, yic man̈ chucoc tzꞌaj in bꞌinaj yuj ebꞌ. A in val Jehová in svalaꞌ.
3 Al dꞌa ebꞌ to a ticnaic yedꞌ dꞌa masanil tiempo, yaln̈ej mach junoc yin̈tilal ebꞌ tzꞌicꞌancot juntzan̈ silabꞌ dꞌa vichan̈, aton juntzan̈ syacꞌ ebꞌ eyetisraelal dꞌayin, tato man̈ vachꞌoc yaj jun tzꞌicꞌancot jun silabꞌ chiꞌ icha yalan ley, yovalil tzꞌicꞌjiel dꞌa yopisio dꞌa vichan̈. A in val Jehová in svalaꞌ.
4 Malaj pax junoc yin̈tilal vin̈aj Aarón chiꞌ syal svaan tastac to vic yaji tato ay lepra dꞌay, ma ay tas tzꞌel dꞌa svinaquil, palta ato yic vachꞌxo yaji icha yalan ley, ichato chiꞌ syal svaani.
Tato syam junoc tas to man̈ vachꞌoc, junoc chamnac, ma junoc vinac tzꞌel yin̈atil, man̈ vachꞌoc tzꞌajcani. 5 Man̈ vachꞌoc tzꞌajcani tato syam junoc nocꞌ nocꞌ man̈ vachꞌoc dꞌa yichan̈ ley, ma syam junoc anima man̈ vachꞌoc pax yaj yuj yaln̈ej tasi. 6 Tato man̈ vachꞌoc yaji, max yal-laj svaan junoc tas to vic yaji, masanto sbꞌiquel sbꞌa. 7 Ato yic tzꞌem cꞌu, vachꞌxo yaji. Ichato chiꞌ tzaxo yal svaan masanil tas to vic yaji yujto yictaxon yaji. 8 A ebꞌ yin̈tilal vin̈aj Aarón chiꞌ max yal-laj schiꞌan schibꞌejal junoc nocꞌ nocꞌ ebꞌ, aton nocꞌ ton̈ej schami, ma nocꞌ scham yuj nocꞌ caltacteꞌal nocꞌ, yic man̈ chucoc scan ebꞌ. A in Jehová in svalaꞌ.
9 Al dꞌa ebꞌ to scꞌanabꞌajej in checnabꞌil ebꞌ, yic max och smul ebꞌ, yic max champax ebꞌ. Tato malaj yelcꞌoch in checnabꞌil chiꞌ dꞌa yol sat ebꞌ, scot juntzan̈ tic dꞌa yibꞌan̈ ebꞌ, yujto a in Jehová in ix in sicꞌcanel ebꞌ.
10 Malaj mach syal svaan tastac to vic yaji tato malaj yuj sbꞌa yedꞌ ebꞌ vin̈ sacerdote.
Ebꞌ ton̈ej ayecꞌ posado dꞌa ebꞌ, ma ebꞌ ton̈ej smunlaj dꞌa ebꞌ, max yal-laj svaan ebꞌ.
11 Tato ay junoc schecabꞌ junoc vin̈ sacerdote manbꞌil yuuj, mato ay pax ebꞌ tzꞌalji dꞌa yol scuenta vin̈, a ebꞌ chiꞌ syal svaan ebꞌ masanil tas to vic yaji.
12 Tato a ix yisil junoc vin̈ sacerdote syicꞌ junoc vinac chꞌoc yel dꞌa scal ebꞌ sacerdote, maxtzac yal-laj svaan juntzan̈ ofrenda chiꞌ ix, aton juntzan̈ tzꞌacꞌji dꞌa ebꞌ vin̈ sacerdote chiꞌ. 13 Palta tato chamnacxo vin̈ yetbꞌeyum ix, mato spucnac sbꞌa ix yedꞌ vin̈ yetbꞌeyum chiꞌ, malaj pax junoc yuneꞌ ix, meltzajnac ix yic scajnajxi ix yedꞌ vin̈ smam chiꞌ, ichataxon ayic cobꞌesto ix, syal svaan svael vin̈ smam ix chiꞌ. Axo pax juntzan̈xo ebꞌ man̈ yin̈tiloc ebꞌ sacerdote, max yal-laj svaan ebꞌ.
14 Tato ay junoc mach comonn̈ej schiꞌan nocꞌ chibꞌej to vic yaji, tato man̈ yojtacoc to vic yaji, yovalil syacꞌ sqꞌuexul dꞌa jun vin̈ sacerdote chiꞌ, syacꞌan jabꞌocxo dꞌa yibꞌan̈ jun ix yacꞌ sqꞌuexul chiꞌ. 15 Palta a ebꞌ vin̈ sacerdote yovalil man̈ comonoc schaꞌ ebꞌ vin̈ chijoc tastac syacꞌ ebꞌ eyetchon̈abꞌ dꞌayin. 16 Tato ay junoc mach comonn̈ej schiꞌan nocꞌ chibꞌej vic yaj chiꞌ, man̈ ton̈ejoc syiloch vin̈ sacerdote chiꞌ, palta yovalil a jun ix chiꞌan nocꞌ chiꞌ, syacꞌ nocꞌ silabꞌ yic spacoc jun smul chiꞌ, yujto a in Jehová in ix in sicꞌcanel juntzan̈ nocꞌ chibꞌej chiꞌ vicoc, xchi dꞌa vin̈.
Sleyal yuj nocꞌ nocꞌ tzꞌacꞌji silabꞌil
17 Ix yalanxi Jehová dꞌa vin̈aj Moisés chiꞌ:
18 Al dꞌa vin̈aj Aarón yedꞌ dꞌa ebꞌ yuninal yedꞌ dꞌa masanil ebꞌ eyetisraelal masanil juntzan̈ tic: Tato ay ex, ma ebꞌ chꞌoc chon̈abꞌil ayecꞌ cajan dꞌa e cal, tzeyacꞌ junoc nocꞌ nocꞌ yic sn̈usjitzꞌa silabꞌil dꞌayin, vachꞌchom yuj bꞌaj ix eyacꞌ e tiꞌ eyacꞌani, mato ton̈ej tzꞌel dꞌa e cꞌol eyacꞌani, 19 yovalil a junoc nocꞌ smam malaj jabꞌoc spaltail tzeyacꞌaꞌ yic vachꞌ tzin cha jun silabꞌ chiꞌ. A junoc nocꞌ toro, ma junoc nocꞌ chꞌac calnel, ma junoc nocꞌ mam chiva tzeyacꞌaꞌ, 20 palta man̈oc junoc nocꞌ ayoch syabꞌil. Tato yaꞌay nocꞌ, max in chalaj nocꞌ.
21 Yaln̈ej mach ex tzeyacꞌ junoc silabꞌ yic juncꞌolal dꞌayin, vachꞌchom yuj bꞌaj ix eyacꞌ e tiꞌ eyacꞌani, ma ton̈ej tzꞌel dꞌa e cꞌol eyacꞌani, yovalil a junoc nocꞌ vacax, ma junoc nocꞌ calnel, ma junoc nocꞌ chiva, malaj spaltail tzeyacꞌaꞌ, yic vachꞌ tzin cha dꞌayex. 22 Man̈ eyacꞌ junoc nocꞌ nocꞌ penaay dꞌayin, icha nocꞌ malaj yol sat, nocꞌ lajvinac, nocꞌ qꞌuiich, nocꞌ elnac junoc macan̈ snivanil, ma ay syaxcꞌail, ma junoc yabꞌil dꞌay. A juntzan̈ nocꞌ icha chiꞌ, max yal-laj sn̈usjitzꞌa nocꞌ dꞌa valtar. 23 A mach ex tzꞌel dꞌa e cꞌol eyacꞌan junoc nocꞌ silabꞌ dꞌayin, a junoc nocꞌ vacax, ma junoc nocꞌ calnel syal eyacꞌani, vachꞌchom man̈ lajanoc steel yoc nocꞌ. Palta tato a junoc silabꞌ ix eyacꞌ e tiꞌ eyacꞌani, max in chalaj nocꞌ icha chiꞌ yaji. 24 A junoc nocꞌ lajvinac sqꞌueen, ma pojnac, ma icꞌbꞌilel sqꞌueen nocꞌ chiꞌ, max yal-laj eyacꞌan nocꞌ silabꞌil dꞌayin. Man̈ e bꞌeybꞌalej eyacꞌan juntzan̈ nocꞌ chiꞌ silabꞌil dꞌayin. 25 Man̈ e cha juntzan̈ nocꞌ nocꞌ icha chiꞌ dꞌa ebꞌ chꞌoc chon̈abꞌil yic tzꞌoch silabꞌil dꞌayin, yujto man̈ tzꞌacanoc yaj nocꞌ, max in chapaxlaj nocꞌ, xchi dꞌa vin̈.
26 Ix yalanxi Jehová chiꞌ dꞌa vin̈:
27 Ayic tzꞌalji junoc nocꞌ yuneꞌ vacax, ma junoc nocꞌ yuneꞌ calnel, ma junoc nocꞌ yuneꞌ chiva, uqueꞌ cꞌual yovalil scan nocꞌ yedꞌ snun, axo dꞌa svajxaquil cꞌual, tzaxo yal sn̈usjitzꞌa nocꞌ silabꞌil dꞌa vichan̈.
28 Max yal-laj junn̈ej cꞌual tzꞌaj smiljicham junoc nocꞌ snun yedꞌ nocꞌ yuneꞌ.
29 Tato tzꞌacꞌji junoc silabꞌ dꞌayin yuj acꞌoj yuj diosal, ujocabꞌ icha dꞌa sleyal yic vachꞌ tzin chaꞌa. 30 An̈ejtonaꞌ, tze chibꞌat nocꞌ dꞌa jun cꞌual chiꞌ, max yal-laj scan nocꞌ dꞌa junocxo cꞌu. A in Jehová in svalaꞌ.
31 Bꞌeybꞌalejec in checnabꞌil, tze cꞌanabꞌajanpaxi. A in Jehová in svalaꞌ.