A juntzan̈ qꞌuin̈ tic, valnaccani to vicn̈ej yaji, aton yic tze molbꞌan e bꞌa yic tzin eyicꞌanchaan̈.

3 Vaqueꞌ cꞌual tzex munlaji, axo dꞌa yuquil cꞌual man̈xa junoc tas tze cꞌulej. Tzeyicꞌ eyip, tze molbꞌan e bꞌa eyoch ejmelal dꞌayin yaln̈ej bꞌaj ayex eqꞌui. Aton jun cꞌual icꞌoj ip chiꞌ vicn̈ej yaji.

4 Aton juntzan̈ qꞌuin̈ tic nivan yelcꞌochi yuj in eyicꞌanchaan̈ ayic tze molbꞌan e bꞌa eyoch ejmelal dꞌa scꞌual valnaccani.

5 A qꞌuin̈ yic tze naancoti ayic ex vicꞌanelta dꞌa Egipto, tzꞌel yich dꞌa yemcꞌualil dꞌa 14 yoch bꞌabꞌel uj. Aton jun qꞌuin̈ chiꞌ tzeyacꞌochi yic tzin eyicꞌanchaan̈.

6 Axo dꞌa 15 yoch jun uj chiꞌ, tzeyacꞌanpaxoch qꞌuin̈ yic ixim pan malaj yich yuj in eyicꞌanchaan̈. Uqueꞌ cꞌual an̈ej ixim pan malaj yich tze vaꞌa. 7 A val dꞌa sbꞌabꞌel cꞌual chiꞌ, tze molbꞌanoch e bꞌa ejmelal dꞌa vichan̈. Malaj junoc macan̈ munlajel tze bꞌo dꞌa jun chiꞌ. 8 A dꞌa uqueꞌ cꞌual chiꞌ, tze n̈usn̈ejtzꞌa silabꞌ dꞌayin. A dꞌa yuquil cꞌual tze molbꞌanoch e bꞌa ejmelal dꞌayin. Malaj junoc macan̈ munlajel tze bꞌoꞌo, xchi Jehová dꞌa vin̈aj Moisés chiꞌ.

9 Ix yalanpax Jehová dꞌa vin̈aj Moisés chiꞌ:

10 Al dꞌa ebꞌ etisraelal icha tic: Ayic ayexxo ecꞌ dꞌa sat lum luum ol vacꞌ chiꞌ dꞌayex, ayic ol e chaanel yich e jochan ixim e trigo, a jun bꞌabꞌel manoja tze joch chiꞌ, tzeyicꞌcot dꞌa ebꞌ vin̈ sacerdote. 11 Axo dꞌa junxo cꞌu ayic slajvicanecꞌ scꞌual icꞌoj ip, syacꞌan ebꞌ sacerdote chiꞌ ofrendail tas tzeyacꞌ chiꞌ, sbꞌachanochta ebꞌ dꞌa vichan̈, yic vachꞌ tzin cha dꞌayex. 12 A dꞌa scꞌual tzeyacꞌ ixim e trigo chiꞌ ofrendail dꞌayin, ataꞌ tze n̈uspaxtzꞌa junoc nocꞌ calnel silabꞌil dꞌa vichan̈, nocꞌ jun abꞌil sqꞌuinal, mocabꞌa jabꞌoc spaltail nocꞌ. 13 Tzeyicꞌanpaxcot lajun̈eoc libra ixim harina te vachꞌ calabꞌil yedꞌ aceite, yic stzꞌa ofrendail to sucꞌuqꞌui sjabꞌ svabꞌi. Tzeyacꞌanpax junoc litro vino ofrendail, secjiem dꞌa yibꞌan̈ juntzan̈ ofrenda chiꞌ. 14 A ixim acꞌ trigo sjochchaj chiꞌ, max yal-laj e vaan ixim dꞌa panil. Max yalpaxlaj e bꞌolan ixim e cꞌuxuꞌ, ma eyax cꞌuxani, masanto dꞌa jun scꞌual a tzeyacꞌan ixim bꞌabꞌel manoja ofrendail dꞌayin e Diosal in. A jun tic ley tzꞌajcan dꞌayex dꞌa masanil tiempo yaln̈ej bꞌaj ayex eqꞌui.

15 Axo dꞌa junxo cꞌu ayic toxo ix lajvicanecꞌ scꞌual icꞌoj ip, ayic tzeyicꞌancot jun manoja ixim trigo ofrendail, aton dꞌa jun cꞌu chiꞌ tze bꞌis uqueꞌ semana. 16 Axo dꞌa junxo cꞌu, ma dꞌa 50 cꞌual yic toxo ix tzꞌacvi uqueꞌ cꞌual icꞌoj ip chiꞌ, ataꞌ tzeyacꞌpax junocxo ofrenda dꞌa ixim trigo chiꞌ dꞌayin. 17 Tzeyicꞌcot chabꞌoc ixim pan ofrendail ichataxon ixim eyic tze vaꞌa. Vajxaqueꞌ libra ixim harina te vachꞌ tzꞌoch dꞌa junjun ixim, ayocabꞌ bꞌat yich dꞌa scal ixim. A ixim pan chiꞌ sbꞌachjioch ixim dꞌa vichan̈ ofrendail dꞌa ixim bꞌabꞌel tzꞌeluli yaln̈ej bꞌaj cajan ex eqꞌui. 18 Yedꞌ ixim pan chiꞌ, syacꞌ ucvan̈oc nocꞌ quelemtac calnel ebꞌ eyetchon̈abꞌ, jun abꞌil sqꞌuinal junjun nocꞌ yedꞌ jun nocꞌ quelem vacax yedꞌ pax chavan̈oc nocꞌ chꞌac calnel. Malajocabꞌ jabꞌoc spaltail juntzan̈ nocꞌ nocꞌ chiꞌ. A nocꞌ chiꞌ sn̈usjitzꞌa smasanil dꞌayin Jehová in tic, junn̈ej tzꞌaj stzꞌa yedꞌ ixim eyofrenda trigo yedꞌ pax ofrenda dꞌa vino. A jun ofrenda stzꞌa chiꞌ sucꞌuqꞌui sjabꞌ svabꞌi.

19 Tzeyacꞌanpax junoc nocꞌ mam chiva silabꞌil yuj stupcanel e mul. Tzeyacꞌanpax chavan̈oc nocꞌ calnel junjun abꞌil sqꞌuinal ofrendail yuj e chꞌoxanel e juncꞌolal vedꞌoc. 20 A vin̈ sacerdote sbꞌachanoch chavan̈ nocꞌ calnel dꞌa vichan̈ a in Jehová in tic yedꞌ ixim pan ix bꞌo dꞌa ixim trigo ix bꞌabꞌlaj jochchaji, a jun ofrenda chiꞌ vic yaji, scan dꞌa vin̈ sacerdote chiꞌ.

21 A dꞌa scꞌual jun qꞌuin̈ chiꞌ malaj junoc macan̈ munlajel syal e bꞌoani. Tze molbꞌanoch e bꞌa eyoch ejmelal dꞌayin. A jun tic ley tzꞌajcan dꞌa e cal yedꞌ dꞌa scal eyin̈tilal dꞌa masanil tiempo yaln̈ej bꞌajtil ayex eqꞌui.

22 Ayic scꞌoch stiempoal e jochan ixim e trigo, man̈ e sicꞌqꞌue ixim scan dꞌa scal yoc yedꞌ ixim ay dꞌa stitac, yujto a juntzan̈ chiꞌ yic ebꞌ mebꞌaꞌ yaji yedꞌ ebꞌ chꞌoc chon̈abꞌil ayecꞌ dꞌa e cal. A in Jehová e Diosal in svalaꞌ, xchi dꞌa vin̈.

23 Ix yalanpax Jehová dꞌa vin̈aj Moisés chiꞌ icha tic:

24 Al dꞌa ebꞌ etchon̈abꞌ icha tic: A dꞌa sbꞌabꞌel cꞌual yic yuquil uj, tzeyicꞌ eyip, tze molbꞌanoch e bꞌa ejmelal dꞌayin, spuji qꞌuen trompeta yic tze naancot in vachꞌcꞌolal. 25 Yovalil tze n̈ustzꞌa junoc nocꞌ silabꞌ dꞌayin. Malaj junoc ex tzex munlaj dꞌa jun cꞌu chiꞌ, xchi dꞌa vin̈.

26 Ix yalanpax Jehová dꞌa vin̈aj Moisés chiꞌ icha tic:

27 A dꞌa slajun̈il cꞌual yoch yuquil uj, aton dꞌa scꞌual yic tzꞌacꞌjican lajvoc e mul, tze molbꞌejoch e bꞌa ejmelal dꞌayin. Tzex ochpax dꞌa tzecꞌojcꞌolal, tze n̈usantzꞌa ofrenda silabꞌil dꞌayin a in Jehová in tic. 28 Man̈ ex munlaj dꞌa jun cꞌu chiꞌ, yujto a val dꞌa jun cꞌu chiꞌ stupcanel e mul dꞌa vichan̈ a in Jehová e Diosal in tic. 29 Tato ay junoc mach max cꞌanabꞌajan yoch dꞌa tzecꞌojcꞌolal dꞌa jun cꞌu chiꞌ, yovalil satjiel dꞌa e cal. 30 An̈ejtonaꞌ, yaln̈ej mach smunlaj dꞌa jun cꞌu chiꞌ, tzin sateli.

31 Malaj junoc mach smunlaj dꞌa junoc yaln̈ej tas munlajelal dꞌa jun cꞌu chiꞌ. A jun tic ley tzꞌajcan dꞌa e cal yedꞌ dꞌa scal ebꞌ eyin̈tilal dꞌa masanil tiempo yaln̈ej bꞌajtil ayex eqꞌui. 32 A jun cꞌu chiꞌ, aton val yic tzeyicꞌan eyip, yic tzex ochpax dꞌa tzecꞌojcꞌolal, tzꞌel yich dꞌa val sbꞌalun̈il cꞌual yoch uj dꞌa qꞌuicꞌbꞌalil, masanto dꞌa qꞌuicꞌbꞌalil dꞌa junxo cꞌu, xchi dꞌa vin̈.

33 Ix yalanpax Jehová dꞌa vin̈aj Moisés chiꞌ icha tic:

34 Al dꞌa ebꞌ etchon̈abꞌ: Ayic 15 yoch yuquil uj, tze chaan uqueꞌ cꞌual sqꞌuin̈al chinama yuj in eyicꞌanchaan̈. 35 Tze molbꞌanoch e bꞌa ejmelal dꞌa bꞌabꞌel cꞌu. A dꞌa jun cꞌual chiꞌ, malaj junoc mach smunlaji. 36 A dꞌa uqueꞌ cꞌual chiꞌ, junjun cꞌu tze n̈usantzꞌa silabꞌ dꞌayin, axo dꞌa svajxaquil cꞌual, tze molbꞌanoch e bꞌa ejmelal, tze n̈usantzꞌa silabꞌ, yujto in qꞌuin̈ yaji, malaj junoc mach smunlaji. 37 (Aton dꞌa juntzan̈ qꞌuin̈ tic tzin eyicꞌchaan̈ a in Jehová in tic. Tze molbꞌanoch e bꞌa ejmelal, tze n̈usantzꞌa silabꞌ. Ay silabꞌ sn̈usjitzꞌaoc yedꞌ ofrenda dꞌa tas svaji. Tzꞌacꞌjipax vino silabꞌil yedꞌ ofrendail. Junjun macan̈ juntzan̈ silabꞌ tic tzꞌacꞌji, ato aꞌ scꞌual albꞌilcani. 38 Chꞌoc yel juntzan̈ silabꞌ chiꞌ dꞌa yichan̈ juntzan̈ tzꞌacꞌji dꞌa scꞌual icꞌoj ip valnac. Chꞌoc yel juntzan̈ silabꞌ chiꞌ dꞌa yichan̈ silabꞌ tzꞌacꞌjitaxoni. Chꞌoc yel pax dꞌa yichan̈ e silabꞌ tzeyacꞌ e tiꞌ eyacꞌani yedꞌ dꞌa eyofrenda tzꞌel dꞌa e cꞌol eyacꞌan dꞌayin a in Jehová in tic.)

39 Axo dꞌa 15-xo yoch yuquil uj, ayic toxo ix molchaj sat avbꞌen tzꞌel dꞌa sat lum luum, tzeyacꞌanoch sqꞌuin̈al dꞌa vichan̈ dꞌa uqueꞌ cꞌual. A bꞌabꞌel cꞌu, scꞌual icꞌoj ip, an̈ejtonaꞌ pax dꞌa yucubꞌixial. 40 A dꞌa bꞌabꞌel cꞌu chiꞌ, tzeyicꞌcot sattac te teꞌ te vachꞌ, xiltac apacꞌ, scꞌabꞌ teꞌ tacꞌu ay dꞌa titac aꞌ yedꞌ scꞌabꞌ juntzan̈xo teꞌ cꞌayum xiil yic tzeyacꞌanoch qꞌuin̈ yic chinama. Icha val chiꞌ tzꞌaj eyacꞌan tzalajbꞌoc e cꞌol dꞌa uqueꞌ cꞌual chiꞌ dꞌa vichan̈ a in Jehová e Diosal in tic. 41 Dꞌa yuquil uj dꞌa junjun abꞌil, tzeyacꞌanoch jun qꞌuin̈ chiꞌ dꞌa uqueꞌ cꞌual yuj in eyicꞌanchaan̈. A jun tic ley tzꞌajcan dꞌa e cal yedꞌ dꞌa scal ebꞌ eyin̈tilal dꞌa masanil tiempo. 42 A dꞌa uqueꞌ cꞌual chiꞌ, e masanil a ex israel ex tic, yovalil tzex cajnaj dꞌa yoltac chinama, 43 yic vachꞌ syojtaquejn̈ejel ebꞌ eyin̈tilal bꞌaqꞌuin̈ to a dꞌa yoltac chinama ix ex cajnaji ayic ix ex vicꞌanelta dꞌa Egipto. A in Jehová e Diosal in svalaꞌ, xchi dꞌa vin̈.

44 Icha val chiꞌ ix aj yacꞌan vin̈aj Moisés yojtacanel ebꞌ chon̈abꞌ israel juntzan̈ nivac qꞌuin̈ tzꞌochi yuj yicꞌjichaan̈ Jehová.