Juntzan̈ qꞌuin̈ dꞌa junjun abꞌil
16
Ayic ayoch jun uj scuch Abib, ataꞌ tzeyacꞌoch qꞌuin̈ yic tze vaan ixim pan malaj yich yuj eyicꞌanchaan̈ sbꞌi Jehová co Diosal, yujto a dꞌa jun acꞌval dꞌa jun uj chiꞌ yicꞌnac on̈ elta Jehová dꞌa Egipto.2 A dꞌa scꞌual qꞌuin̈ chiꞌ, ataꞌ tzeyacꞌ nocꞌ vacax yedꞌ nocꞌ calnel silabꞌil dꞌa Jehová co Diosal, aton dꞌa jun lugar ol siqꞌueli yic tzꞌoch scajnubꞌoc.
3 A nocꞌ nocꞌ tzeyacꞌ silabꞌil chiꞌ, tze chi nocꞌ, tze vaanpax ixim pan malaj yich, aton ixim tzꞌacꞌan nachajcot yaelal, yujto elan̈chamelxon̈ej ajnac quelta dꞌa Egipto chiꞌ. Yuj chiꞌ, masanil tiempo tze nan̈ejcot jun cꞌu yic quelnaccot dꞌa Egipto chiꞌ. 4 A dꞌa uqueꞌ cꞌual chiꞌ, malajocabꞌ jabꞌoc yich pan ayecꞌ bꞌaj ol ex cajnaj chiꞌ. Yedꞌ pax nocꞌ chibꞌej tzeyacꞌ silabꞌil dꞌa yemcꞌualil dꞌa bꞌabꞌel cꞌu, malaj jabꞌoc nocꞌ scan dꞌa yic qꞌuin̈ibꞌalil dꞌa junxo cꞌu. 5 A nocꞌ e silabꞌ yic qꞌuin̈ chiꞌ, max yal-laj e milancham nocꞌ dꞌa yaln̈ej tas chon̈abꞌil ol yacꞌ Jehová co Diosal dꞌayex. 6 Palta an̈ej dꞌa jun lugar ol siqꞌueli yic tzꞌoch scajnubꞌoc, ataꞌ tze milcham nocꞌ dꞌa yemcꞌualil ayic vanxo sbꞌat cꞌu, aton dꞌa jun hora chiꞌ elnac on̈ cot dꞌa Egipto. 7 A nocꞌ chibꞌej chiꞌ, tze bꞌol nocꞌ, tze chiꞌan nocꞌ dꞌa jun lugar ol siqꞌuel Jehová co Diosal yic tzꞌoch scajnubꞌoc. Axo dꞌa junxo qꞌuin̈ibꞌalil, tzex meltzaj bꞌajtac cajan ex. 8 A dꞌa vaqueꞌ cꞌual chiꞌ, an̈ej ixim pan malaj yich tze vaꞌa. Axo dꞌa yuquil cꞌual, tze molbꞌan e bꞌa yedꞌ nivan tzalajcꞌolal yuj eyicꞌanchaan̈ Jehová co Diosal. A dꞌa jun cꞌu chiꞌ, malaj junoc mach smunlaji.
9 Ayic tzꞌel yich sjochchaj ixim trigo, ataꞌ schajiel yich sbꞌischaj uqueꞌ semana. 10 Axo slajvi uqueꞌ semana chiꞌ, tzꞌochpax qꞌuin̈ yic slajvi jochoj trigo, yuj yicꞌjichaan̈ Jehová. Tzeyacꞌan eyofrenda to tzꞌel dꞌa e cꞌol eyacꞌani, ato syal jantac svachꞌcꞌolal Jehová co Diosal syacꞌ dꞌayex. 11 Tzeyacꞌoch qꞌuin̈ chiꞌ dꞌa yichan̈ Jehová chiꞌ dꞌa jun lugar ol siqꞌueli yic tzꞌoch scajnubꞌoc. Ataꞌ tze molbꞌej e bꞌa yedꞌ ebꞌ eyal eyuninal yedꞌ pax ebꞌ tic: Ebꞌ e checabꞌ, ebꞌ levita cajan dꞌa e cal, ebꞌ chꞌoc chon̈abꞌil, ebꞌ man̈xa smam yedꞌ ebꞌ ix chamnac yetbꞌeyum ayecꞌ cajan dꞌa e cal. 12 Naecpaxcot a ex tic to checabꞌ ajnac ex ecꞌ dꞌa Egipto. Yuj chiꞌ tzeyil val tas tzꞌaj e bꞌeybꞌalan masanil tas syal jun checnabꞌil tic.
Qꞌuin̈ Chinama
13 Ayic toxo ix lajviecꞌ jochoj trigo chiꞌ jun yedꞌ yic toxo ix lajvi e pitzꞌanel yal sat eyuva, tzeyacꞌanoch uqueꞌ cꞌual qꞌuin̈ yic chinama. 14 Tzex tzalaj dꞌa jun qꞌuin̈ chiꞌ yedꞌ ebꞌ eyal eyuninal yedꞌ pax ebꞌ tic: Ebꞌ e checabꞌ, ebꞌ levita, ebꞌ chꞌoc chon̈abꞌil, ebꞌ unin man̈xalaj smam yedꞌ ebꞌ ix ix chamnac yetbꞌeyum ayecꞌ cajan dꞌa e cal. 15 A jun qꞌuin̈ chiꞌ, uqueꞌ cꞌual tzeyacꞌochi yuj eyicꞌanchaan̈ Jehová co Diosal, dꞌa jun lugar ol siqꞌueli yic tzꞌoch scajnubꞌoc, yic vachꞌ ol yacꞌ svachꞌcꞌolal Jehová chiꞌ dꞌa yibꞌan̈ eyavbꞌen yedꞌ dꞌa yibꞌan̈ e munlajel. Icha chiꞌ ol aj eyecꞌ dꞌa tzalajcꞌolal.
16 Masanil ebꞌ vin̈ vinac, yovalil tzꞌoch ebꞌ vin̈ dꞌa yichan̈ Jehová co Diosal dꞌa jun lugar ol siqꞌueli, oxel tzꞌoch ebꞌ vin̈ dꞌa yol abꞌil, aton dꞌa oxeꞌ qꞌuin̈ tic: Qꞌuin̈ yic ixim pan malaj yich, qꞌuin̈ yic slajvi jochoj trigo yedꞌ qꞌuin̈ chinama. Malaj junoc mach scꞌoch dꞌa yichan̈ Jehová tato malaj yofrenda yedꞌnac, 17 palta junjun anima syicꞌbꞌat yofrenda, icha syal jantac svachꞌcꞌolal Jehová co Diosal syacꞌ dꞌay.
Sleyal tas tzꞌaj schꞌolbꞌitaj dꞌa stojolal
18 Ol eyacꞌoch ebꞌ juez yedꞌ ebꞌ yajal dꞌa junjun chon̈abꞌ ol yacꞌ Jehová co Diosal dꞌa junjun eyin̈tilal, yic vachꞌ a ebꞌ ol bꞌoan yaj dꞌa stojolal tastac sqꞌue vaan dꞌa e cal. 19 Mocabꞌ sqꞌuex tojolal ebꞌ dꞌa man̈ stojolaloc. Mocabꞌ chꞌocchꞌococ ebꞌ anima dꞌa yol sat ebꞌ, mocabꞌ scha tumin ebꞌ yic smontaj ebꞌ, yujto a qꞌuen tumin yic montubꞌal chiꞌ tzꞌixtanel spensar ebꞌ aj pensar. An̈ejtonaꞌ yuj qꞌuen tumin chiꞌ sqꞌuex slolonel ebꞌ tojol. 20 An̈ejocabꞌ tojolal tze cꞌulej, ayic ol ex ecꞌ dꞌa sat lum luum ol yacꞌ Jehová co Diosal dꞌayex.