—A ticnaic a achxo ol a tzey chabꞌoc qꞌuen qꞌueen, icha val qꞌuen ix vacꞌ dꞌayach dꞌa sbꞌabꞌelal, aton qꞌuen ix a macꞌpojoc. Ol in tzꞌibꞌanxioch dꞌa qꞌueen, icha val tas ix in tzꞌibꞌejoch dꞌa qꞌuen bꞌabꞌel chiꞌ. 2 Tza bꞌoan a bꞌa dꞌa qꞌuin̈ibꞌalil qꞌuicꞌan, tzach javi dꞌa vichan̈ dꞌa jolom vitz tic. 3 Malaj junoc mach syal sqꞌueta edꞌoc, malaj junoc mach syal yecꞌ dꞌa spatictac lum vitz tic. Max yalpaxlaj yecꞌ nocꞌ calnel yedꞌ nocꞌ vacax vael dꞌa yichtac luum, xchi dꞌa vin̈.

4 Ix lajvi chi, ix stzeyan chabꞌ qꞌuen qꞌueen vin̈ icha qꞌuen ix schaꞌ dꞌa sbꞌabꞌelal dꞌa Jehová. Axo dꞌa qꞌuin̈ibꞌalil dꞌa junxo cꞌu, ix yicꞌanbꞌat qꞌuen vin̈, ix bꞌat vin̈ dꞌa jolom vitz Sinaí, icha val ix yutej Jehová yalan dꞌa vin̈. 5 Ix lajvi chiꞌ, ix emul Jehová dꞌa stzꞌey vin̈ dꞌa scal asun dꞌa jolom vitz chiꞌ, ix yalan sbꞌi dꞌa vin̈. 6 Ix ecꞌbꞌat Jehová dꞌa yichan̈ vin̈, te chaan̈ ix yal icha tic:

—A in ton Jehová in. Jehová in bꞌi. Te vachꞌ in cꞌool, tzꞌocꞌ in cꞌol dꞌa anima. Man̈ elan̈chameloc scot voval. Te nivan tzin xajanej ebꞌ anima, svacꞌn̈ejelcꞌoch tas svalaꞌ. 7 A tas vachꞌ valnaccan dꞌa ebꞌ e mam eyicham, ol vacꞌn̈ejelcꞌoch dꞌayex a ex yin̈tilexcan ebꞌ tic dꞌa masanil tiempo. Svacꞌan nivancꞌolal e chucal e mul yedꞌ e pital. Palta max ecꞌbꞌatlaj vacꞌan syaelal junoc mach yuj smul bꞌaj juneln̈ej pit syutej sbꞌa dꞌayin, svacꞌn̈ejcan yaelal dꞌa yibꞌan̈ yuninal yedꞌ yixchiquin, masanto dꞌa schan̈il macan̈ yin̈tilal, xchi Jehová.

8 Dꞌa elan̈chamel ix em n̈ojan vin̈aj Moisés chiꞌ, ix emcꞌoch snan̈al sat vin̈ dꞌa sat luum dꞌa yichan̈ Jehová chiꞌ, ix yalan vin̈ icha tic:

9 —Mamin Vajalil, tato yel tzach tzalaj vedꞌoc, tzach bꞌatn̈ej quedꞌoc, vachꞌchom a jun chon̈abꞌ tic te pit, palta acꞌ nivancꞌolal co chucal tzꞌoch dꞌa ichan̈, tzon̈ a chaancan a chon̈abꞌoc, xchi vin̈.

10 Ix yalan Jehová dꞌa vin̈aj Moisés chiꞌ:

—Chaabꞌ tas ol valaꞌ: A ticnaic, tzin bꞌocan jun in trato tic dꞌa yichan̈ masanil ebꞌ etchon̈abꞌ. Ol in bꞌo tastac te satubꞌtac to mantalaj bꞌaj tzuji dꞌa junocxo nación dꞌa yolyibꞌan̈qꞌuinal tic. Ol yil masanil ebꞌ etchon̈abꞌ ebꞌ ajun tic edꞌoc tastac ol in cꞌulej eyuuj, to satubꞌtac yilji. 11 Cꞌanabꞌajejec masanil tas svalcan tic dꞌayex. A in ol viqꞌuel ebꞌ amorreo, ebꞌ cananeo, ebꞌ hitita, ebꞌ ferezeo, ebꞌ heveo yedꞌ ebꞌ jebuseo dꞌa eyichan̈. 12 Ayic ol ex cꞌoch dꞌa sat lum luum chiꞌ, malajocabꞌ bꞌaqꞌuin̈ tze bꞌo junoc e trato yedꞌ ebꞌ anima taꞌ. Tato scan ebꞌ dꞌa e cal, yel ol ex yixtejel ebꞌ. 13 A val tas ol e cꞌulej to ol e macꞌpoj yaltar ebꞌ yedꞌ yechel sdiosal ebꞌ. Tze chꞌacanel te teꞌ yechel sdiosal ebꞌ scuchan Asera. 14 Man̈ ex lesalvoc dꞌa junoc comon dios, yujto a in Jehová in, yelxo val te ov in dꞌa juntzan̈ chiꞌ. Yelxo val ste cot voval dꞌayex tato tzex och ejmelal dꞌa junoc chꞌoc diosal. 15 Man̈ e bꞌolaj junoc e trato yedꞌ ebꞌ anima ayecꞌ dꞌa sat lum chiꞌ. Tato tze bꞌo e trato chiꞌ yedꞌ ebꞌ axo yic tzꞌoch ebꞌ ejmelal dꞌa sdiosal chiꞌ, syacꞌan silabꞌ ebꞌ dꞌay, tzex yavtej ebꞌ, tze vaan tas syacꞌ ebꞌ silabꞌoc chiꞌ. 16 Talaj syicꞌlaj sbꞌa yisil ebꞌ yedꞌ ebꞌ eyuninal, axo yic tzꞌem n̈ojan ebꞌ ix dꞌa sdiosal chiꞌ, scuchbꞌajem n̈ojan ebꞌ eyuninal chiꞌ yuj ebꞌ ix dꞌa juntzan̈ comon dios chiꞌ. Tato icha chiꞌ man̈xalaj tzꞌaj velcꞌoch dꞌa yol sat ebꞌ eyuninal chiꞌ.

17 Man̈ e bꞌo junoc e diosal yedꞌ qꞌuen qꞌueen sbꞌochaj dꞌa molde.

18 Tze yacꞌoch qꞌuin̈ yic ixim pan malaj yich. Uqueꞌ cꞌual tze va jun pan chiꞌ, icha val ix aj vacꞌan e cꞌaybꞌej. A stiempoal, chequel yajcani, aton uj Abib, yujto a dꞌa jun uj chiꞌ elnaquexcot dꞌa Egipto.

19 Masanil ebꞌ bꞌabꞌel vinac unin, vic yaj ebꞌ. Vicpax sbꞌabꞌel yuneꞌ nocꞌ e vacax, yuneꞌ nocꞌ e calnel yedꞌ yuneꞌ nocꞌ e chiva tato vinac. 20 Axo pax sbꞌabꞌel yuneꞌ nocꞌ e bꞌuru, syal yacꞌji junoc yuneꞌ calnel sqꞌuexuloc nocꞌ. Tato malaj junoc sqꞌuexul nocꞌ tzeyacꞌaꞌ, yovalil smacꞌji qꞌuichaj sjaj nocꞌ. An̈ejaꞌ pax yuj e bꞌabꞌel vinac unin, yovalil tzeyacꞌ junoc nocꞌ yuneꞌ calnel sqꞌuexuloc. Malaj junoc mach sja dꞌayin dꞌa qꞌuin̈ tato malaj jabꞌoc yofrenda yedꞌnac.

21 Dꞌa vaqueꞌ cꞌual tzex munlaji, axo dꞌa yuquil cꞌual tzeyicꞌan eyip, vachꞌchom stiempoal munlajel, ma stiempoal smolchajqꞌue sat eyavbꞌen, yovalil tzeyicꞌ eyip.

22 Tzeyacꞌoch qꞌuin̈ yic sbꞌabꞌel sat ixim e trigo scꞌanbꞌi, aton qꞌuin̈ Pentecostés. Tzeyacꞌanpaxoch junxo qꞌuin̈ yic slajviqꞌue ixim yic lajvubꞌ abꞌil.

23 Masanil ebꞌ vinac, yovalil oxel sjavi ebꞌ dꞌa vichan̈ dꞌa yol junjun abꞌil dꞌa juntzan̈ qꞌuin̈ tic, a in Jehová e Diosal in tic svalaꞌ.

24 Ol viqꞌuel masanil juntzan̈xo nación dꞌa eyichan̈, ol vacꞌ levanbꞌoc e luum. Malaj mach syal yicꞌanecꞌ lum e luum chiꞌ, yacbꞌan ayecꞌ ebꞌ vinac dꞌa vichan̈ oxel dꞌa yol abꞌil.

25 Ayic tzeyacꞌan e silabꞌ dꞌayin, man̈ eyacꞌ schiqꞌuil nocꞌ nocꞌ yedꞌ ixim pan aybꞌat yich dꞌa scal. A nocꞌ silabꞌ yic jun qꞌuin̈ yic tze naancoti ayic ex vicꞌannaquelta dꞌa Egipto, tato ayto nocꞌ scani, man̈ e sicꞌcanbꞌat dꞌa junxo cꞌu.

26 A sbꞌabꞌel sat eyavbꞌen yovalil tzeyicꞌcot dꞌa in cajnubꞌ.

Man̈ e tzꞌan̈ nocꞌ yunetac chiva dꞌa scal yal yim snun, xchi Jehová.

27 Ix yalanxi Jehová dꞌa vin̈aj Moisés chiꞌ: Tzꞌibꞌej masanil juntzan̈ lolonel tic, yujto a ayoch yichbꞌaniloc in trato ix vacꞌ edꞌoc yedꞌ pax ebꞌ etchon̈abꞌ, xchi.

28 A vin̈aj Moisés chiꞌ, 40 cꞌual yedꞌ 40 acꞌval ix ecꞌ vin̈ yedꞌ Jehová dꞌa jolom vitz Sinaí. Malaj val jabꞌoc tas ix sva vin̈, malaj pax jabꞌoc tas ix yuqꞌuej vin̈ dꞌa jun tiempoal chiꞌ. Ix stzꞌibꞌanoch slolonelal strato Jehová yedꞌ ebꞌ chon̈abꞌ israel dꞌa qꞌuen qꞌueen, aton lajun̈eꞌ checnabꞌil.

29 Ix lajvi chi, ix emixta vin̈aj Moisés chiꞌ dꞌa jolom vitz Sinaí chiꞌ, yedꞌnacxopax chabꞌ pachan̈ qꞌuen qꞌueen vin̈, aton qꞌuen bꞌaj tzꞌibꞌabꞌiloch checnabꞌil chiꞌ. Man̈ yojtacoc vin̈ tato toxon̈ej sveei yilji sat, yujto ix lolon vin̈ yedꞌ Jehová. 30 Axo ix yilan vin̈aj Aarón yedꞌ masanil ebꞌ yetchon̈abꞌ to toxon̈ej sveei yilji sat vin̈, ix te xivqꞌue ebꞌ smasanil scꞌoch dꞌa stzꞌey vin̈. 31 Ix yavtancot ebꞌ anima chiꞌ vin̈, ichato chiꞌ ix snitzanoch sbꞌa vin̈aj Aarón yedꞌ ebꞌ yichamtac vinaquil chon̈abꞌ dꞌa stzꞌey vin̈, ix lolon vin̈ dꞌa ebꞌ.

32 Ix lajvi chiꞌ, ix snitzancot sbꞌa masanil ebꞌ chon̈abꞌ, ix och ijan vin̈ yalan masanil checnabꞌil ix yacꞌ Jehová dꞌa vin̈, aton juntzan̈ ix bꞌat schaemta vin̈ dꞌa jolom vitz Sinaí chiꞌ. 33 A ix lajvi slolon vin̈ dꞌa ebꞌ anima chiꞌ, ix smacan sat vin̈ dꞌa jun cꞌapac. 34 Axo yic tzꞌoch vin̈ yic slolon yedꞌ Jehová, syiqꞌuel jun cꞌapac chiꞌ vin̈. Axo tzꞌelxul vin̈, syalanxi vin̈ dꞌa ebꞌ chon̈abꞌ tas checnabꞌilal schec Jehová chiꞌ yal dꞌa ebꞌ. 35 Ayic van slolon vin̈ dꞌa ebꞌ chiꞌ, syilan ebꞌ to veei yilji sat vin̈. Slajvi yalan schecnabꞌil Jehová vin̈ dꞌa ebꞌ, smacanxi sat vin̈ dꞌa jun cꞌapac chiꞌ. Ato yic tzꞌoch vin̈ lolonel dꞌa yichan̈ Jehová, syicꞌanxiel vin̈.