Ley yuj tas tzꞌaj sbꞌo oval
23
Man̈ eyal esal lolonel dꞌa spatic ebꞌ eyetanimail. Man̈ junn̈ejoc tzeyutej e bꞌa yedꞌ junoc mach chuc spensar yic tzeyacꞌanoch e bꞌa testigoal dꞌa tas man̈ yeloc.2 Man̈ eyacꞌoch e bꞌa yedꞌ ebꞌ scꞌulan chucal. Man̈ eyacꞌoch e bꞌa testigoal dꞌa es yedꞌ ebꞌ anima scꞌulan chucal. 3 Vachꞌchom mebꞌaꞌ junoc anima, palta tato ay smul, man̈ eyacꞌ och e bꞌa yedꞌoc.
4 Tato a junoc vin̈ ayoch ajcꞌolal dꞌayex ay junoc nocꞌ svacax, ma nocꞌ sbꞌuru satnacbꞌati, tzꞌilchaj nocꞌ eyuuj, iqꞌuecbꞌat nocꞌ dꞌa vin̈. 5 Yovalil tzex colvaj dꞌa mach schichonoch scꞌol dꞌayex. Tato tzeyilaꞌ to stelvi nocꞌ sbꞌuru dꞌa yalan̈ yicatz, tzeyicꞌqꞌue vaan nocꞌ yedꞌoc.
6 Tato ay junoc anima mebꞌaꞌ snibꞌej schꞌolbꞌitaj yaj yoval, man̈ e tenecꞌ dꞌay. 7 Man̈ e cha junoc esal lolonel dꞌa spatic junoc anima. Man̈ eyacꞌoch chamel dꞌa yibꞌan̈ junoc anima malaj smul, yujto a in ol vacꞌ spac dꞌa mach icha chiꞌ scꞌulej.
8 Man̈ e cha qꞌuen tumin dꞌa elcꞌaltac yic tze bꞌoan yaj junoc oval, yujto a yuj qꞌuen tumin chiꞌ tzeyacꞌ musansatil e bꞌa, tze qꞌuexancan tas tojol dꞌa tas man̈ tojoloc.
9 Man̈ eyixtej anima chꞌoc chon̈abꞌil, yujto a ex tic najtil ix ex ecꞌ dꞌa chꞌoc chon̈abꞌil dꞌa Egipto. Eyojtacxo syaelal tzꞌutaj anima dꞌa chꞌoc chon̈abꞌil.
Yovalil scan lum luum junoc abꞌil
10 Vaqueꞌ abꞌil tzex munlaj dꞌa sat lum luum, tze molanqꞌue sat tas tzeyavej. 11 Axo dꞌa yuquil abꞌil, tzeyactancan luum. A jantacto tastac sqꞌuibꞌqꞌue dꞌa sat luum, yicxo ebꞌ mebꞌaꞌ ayecꞌ dꞌa yol e chon̈abꞌ chiꞌ yedꞌ nocꞌ cꞌultaquil nocꞌ. Vachꞌchom teꞌ eyuva ma teꞌ eyolivo, man̈xo e mesaꞌ.
12 Vaqueꞌ cꞌualn̈ej tzex munlaji, axo dꞌa yuquil cꞌual tzeyicꞌan eyip. Yedꞌ pax nocꞌ e vacax, nocꞌ e bꞌuru yedꞌ ebꞌ e checabꞌ tzꞌalji dꞌa yol e cuenta yedꞌ ebꞌ chꞌoc chon̈abꞌil smunlaj eyedꞌoc syicꞌpax yip.
13 Cꞌanabꞌajejec masanil tas ix val tic dꞌayex. Man̈ eyal e bꞌa dꞌa juntzan̈ comon dios, man̈ e locpax sbꞌi.
Oxeꞌ nivac qꞌuin̈
14 Oxel tzeyacꞌoch qꞌuin̈ dꞌa yol junjun abꞌil yic tzin eyicꞌanchaan̈. 15 A dꞌa uj Abib tzeyacꞌoch sqꞌuin̈al ixim pan malaj yich, icha ix vutej valan dꞌayex. Dꞌa uqueꞌ cꞌual tze va ixim pan malaj yich, yujto a dꞌa jun uj chiꞌ ix ex elta dꞌa Egipto. Malajocabꞌ junoc mach sja dꞌa vichan̈ tato malaj jabꞌoc yofrenda yedꞌnac.
16 Tzeyacꞌanpaxoch qꞌuin̈ ayic tzꞌelul sbꞌabꞌel sat tas tzeyavej. An̈ejaꞌ tzeyacꞌanpaxoch junxo qꞌuin̈ ayic slajvicanqꞌue masanil sat tastac tzeyavej chiꞌ.
17 A in Jehová e Yajalil in tic svalaꞌ to a dꞌa oxeꞌ qꞌuin̈ chiꞌ yovalil sjavi masanil ebꞌ vin̈ vinac dꞌa vichan̈.
18 Ayic tzeyacꞌan nocꞌ nocꞌ silabꞌil dꞌayin, man̈ eyacꞌlaj schiqꞌuil nocꞌ yedꞌ ixim pan aybꞌat yich. Man̈ e sicꞌbꞌat xepual nocꞌ silabꞌ chiꞌ dꞌa junocxo cꞌual.
19 A val sbꞌabꞌel sat eyavbꞌen vachꞌ tzꞌel dꞌa sat lum luum, aꞌ tzeyicꞌbꞌat dꞌa in cajnubꞌ, a in Jehová e Diosal in svalaꞌ.
Man̈ e tzꞌan̈ nocꞌ yunetac chiva dꞌa scal yal yim snun.
Jun yángel Jehová
20 Ol in checbꞌat jun vángel dꞌa eyichan̈ yic vachꞌ tzex tan̈vaj yuj dꞌa yoltac bꞌe, ol ex yicꞌanbꞌat dꞌa jun lugar bꞌaj vachꞌxo yaj vuuj, bꞌaj ol ex ajoc. 21 Scham val eyilani, man̈ e pitej e bꞌa dꞌay, palta tze cꞌanabꞌajej tas syalaꞌ. Ichato aꞌ ol munlaj in qꞌuexuloc, man̈ ol ex yacꞌlaj nivancꞌolal tato man̈ ol e cꞌanabꞌajej dꞌay. 22 Tato tze cꞌanabꞌajej dꞌay, tze cꞌulan tas syal dꞌa in qꞌuexuloc, ol in och ajcꞌolal dꞌa mach ayoch ajcꞌolal dꞌayex. Ol in och tecꞌtecꞌ dꞌa yichan̈ mach sgana stecꞌbꞌej sbꞌa dꞌa eyichan̈. 23 A jun vángel chiꞌ ol bꞌabꞌlaj dꞌa eyichan̈. Ol ex yicꞌanbꞌat dꞌa sat lum sluum ebꞌ amorreo, ebꞌ hitita, ebꞌ ferezeo, ebꞌ cananeo, ebꞌ heveo yedꞌ ebꞌ jebuseo. Juneln̈ej ol in satcanel ebꞌ. 24 Man̈ ex em n̈ojan dꞌa yichan̈ sdiosal juntzan̈ chon̈abꞌ chiꞌ. Man̈ ex empax cuman dꞌay, man̈ e bꞌeybꞌalej sbꞌeybꞌal ebꞌ chon̈abꞌ chiꞌ dꞌa eyicꞌanchaan̈ sdiosal ebꞌ. A tas smoj tze cꞌulej, to tze macꞌpoj sdiosal ebꞌ chiꞌ yedꞌ masanil qꞌuen qꞌueen ayoch dꞌay. 25 A inn̈ej Jehová e Diosal in bꞌaj tzeyaqꞌuem e bꞌa. Tato icha chiꞌ tzeyutej e bꞌa, ol vacꞌ tas tze vaꞌa yedꞌ tas tzeyuqꞌuej. Najat pax ol viqꞌuel ilya dꞌa e cal. 26 Najat pax ol vutoc e qꞌuinal. A dꞌa yol junjun e chon̈abꞌil chiꞌ, malaj junoc ix ix ton̈ej ol el yuneꞌ, man̈ junoc ebꞌ ix to man̈ ol unevoc.
27 Ol vacꞌ xivqꞌue scꞌol ebꞌ anima tzex chacani. Ol vacꞌ somchaj spensar ebꞌ chon̈abꞌ tzeyacꞌ oval yedꞌoc yedꞌ masanil ebꞌ ayoch ajcꞌolal dꞌayex, ol el lemnaj ebꞌ dꞌayex. 28 Ol vacꞌ somchaj scꞌol ebꞌ eyajcꞌool yuj xivelal ayic manto ex cꞌochlaj, yuj chiꞌ ol el lemnaj ebꞌ heveo, ebꞌ cananeo yedꞌ pax ebꞌ hitita dꞌayex.
29 Man̈ junocn̈ej abꞌil ol aj vicꞌanel ebꞌ dꞌa eyichan̈, yic vachꞌ max ixtaxbꞌat lum luum yic man̈ ol te qꞌuibꞌpax sbꞌisul nocꞌ cꞌultaquil nocꞌ tzꞌacꞌan chucal dꞌayex. 30 Cꞌojancꞌolaln̈ej ol aj vicꞌanel ebꞌ anima chiꞌ dꞌa sat luum, masanto ayic ol qꞌuibꞌ e bꞌisul, yic tze macan lum masanil. 31 Toxo ix vacꞌcanem stzꞌacan̈il bꞌaj ol ecꞌ lum e luum chiꞌ. Schael yich bꞌaj ay aꞌ Chacchac Mar, masanto scꞌoch dꞌa aꞌ Éufrates, sbꞌatxon̈ej dꞌa aꞌ mar Mediterráneo, masanto dꞌa taquin̈ luum. Ol vacꞌanoch ebꞌ cajan dꞌa sat luum chiꞌ dꞌa yol e cꞌabꞌ. A exxo ol e pechel ebꞌ dꞌa sat luum chiꞌ.
32 Man̈ val e bꞌo junoc e trato yedꞌ ebꞌ, man̈ ex ochpax ejmelal dꞌa sdiosal ebꞌ. 33 Man̈xo pax e chacan ebꞌ dꞌa yol e chon̈abꞌ, yic vachꞌ max ex scuchbꞌej ebꞌ e cꞌulan chucal dꞌayin. Tato tzeyaqꞌuem e bꞌa dꞌa sdiosal ebꞌ chiꞌ, a ex val tzeyixtejbꞌat e bꞌa syal chiꞌ, xchi Jehová dꞌa vin̈aj Moisés chiꞌ.