—Tzach qꞌueta dꞌa lum vitz bꞌaj ayinecꞌ tic yedꞌ vin̈aj Aarón, vin̈aj Nadab yedꞌ vin̈aj Abiú yedꞌ pax 70-oc ebꞌ yichamtac vinaquil e chon̈abꞌ. A ebꞌ chiꞌ najatto scan ebꞌ yaqꞌuem sbꞌa dꞌayin. 2 A achxon̈ej syal a qꞌueul dꞌa in tzꞌey, axo pax ebꞌ vin̈ chiꞌ, max yal-laj sqꞌueta ebꞌ vin̈ yedꞌ pax ebꞌ chon̈abꞌ max yal-laj sqꞌueta ebꞌ edꞌoc, xchi dꞌa vin̈.

3 Ix lajvi chiꞌ, ix emixta vin̈aj Moisés chiꞌ, ix yalan vin̈ dꞌa ebꞌ anima tas leyal ix yacꞌ Jehová yedꞌ tas ix yutej yalani. Axo masanil ebꞌ anima chiꞌ, junn̈ej ix aj stacꞌvi ebꞌ.

—Masanil tas ix yal Jehová chiꞌ, ol co cꞌanabꞌajej, xchi ebꞌ.

4 Ix lajvi chiꞌ, ix stzꞌibꞌan vin̈aj Moisés masanil tas ix yal Jehová. Axo ix sacbꞌinaj dꞌa junxo cꞌu, ix qꞌue vaan vin̈, ix sbꞌoan jun altar vin̈ dꞌa yich vitz chiꞌ, ix yacꞌanqꞌue lin̈an lajchaveꞌ qꞌuen qꞌueen vin̈. A junjun qꞌuen qꞌueen chiꞌ, junjun macan̈ yin̈tilal Israel schꞌox qꞌueen. 5 Dꞌa elan̈chamel ix schecan juntzan̈ ebꞌ vin̈ quelemtac vinac vin̈aj Moisés chiꞌ yic smilan nocꞌ toro ebꞌ silabꞌoc yic stzꞌa dꞌa smasanil yedꞌ juntzan̈xo silabꞌ yic schꞌoxan sjuncꞌolal ebꞌ yedꞌ Jehová. 6 Axo vin̈aj Moisés chiꞌ ix chaan nan̈al schiqꞌuil nocꞌ, ix yacꞌanem vin̈ dꞌa yol juntzan̈ yedꞌtal, axo nan̈alxo, ix stzicanoch vin̈ dꞌa altar chiꞌ. 7 Ix yicꞌanqꞌue vin̈ bꞌaj tzꞌibꞌabꞌil strato Dios, ix yavtan vin̈ dꞌa scal ebꞌ chon̈abꞌ. Ix lajvi yavtan vin̈, ix yalan ebꞌ chon̈abꞌ chiꞌ icha tic:

—Masanil tas syal Jehová, ol co cꞌanabꞌajej, xchi ebꞌ.

8 Ix lajvi chiꞌ, ix yicꞌancot schiqꞌuil nocꞌ vin̈, aton ix yacꞌcanem vin̈ dꞌa yol juntzan̈ yedꞌtal chiꞌ, ix stzicanbꞌat vin̈ dꞌa yibꞌan̈ ebꞌ anima chiꞌ. Ix yalan vin̈ icha tic:

—A jun chicꞌ tic schꞌoxani to tzꞌochcan yopisio jun strato Jehová ix sbꞌo quedꞌoc tic, aton masanil tas ix yal dꞌayon̈, xchi vin̈.

9 Ix lajvi chiꞌ, ix qꞌuex vin̈ dꞌa lum vitzal Sinaí chiꞌ. Ajun vin̈aj Aarón, vin̈aj Nadab, vin̈aj Abiú yedꞌ pax 70 ebꞌ yichamtac vinaquil chon̈abꞌ ix qꞌue yedꞌ vin̈. 10 Ataꞌ ix yil sDiosal ebꞌ vin̈. A dꞌa yalan̈ yoc, toxon̈ej scopopi icha qꞌuen zafiro te vachꞌ yilji, icha syaxil satchaan̈. 11 Malaj tas ix utaj ebꞌ vin̈ yuj yipalil Dios. Ix yil Dios ebꞌ vin̈, ix va ebꞌ vin̈, ix yucꞌan aꞌ ebꞌ vin̈ dꞌa yichan̈.

12 Ix yalan Jehová dꞌa vin̈aj Moisés chiꞌ icha tic:

—Qꞌuean̈cot dꞌa jolom vitz bꞌaj ayinecꞌ tic, tza tan̈van taꞌ, ataꞌ ol vacꞌ chabꞌ qꞌuen qꞌueen dꞌayach, aton qꞌuen bꞌaj tzꞌibꞌabꞌiloch juntzan̈ checnabꞌil vuuj, yic tzꞌoch e cꞌaybꞌubꞌaloc, xchi dꞌa vin̈.

13 Ix qꞌue vin̈aj Moisés dꞌa lum vitz chiꞌ yedꞌ vin̈aj Josué vin̈ scolvaj yedꞌ vin̈. 14 Ayic manto bꞌatlaj vin̈, ix yalan vin̈ dꞌa ebꞌ yichamtac vinaquil chon̈abꞌ chiꞌ:

—Canan̈ec dꞌa tic masanto ol on̈ emxuloc. Ayecꞌ vin̈aj Aarón yedꞌ vin̈aj Hur eyedꞌoc. Tato ay tas e gana sbꞌoi, a ebꞌ vin̈ tic ol bꞌoan dꞌayex, xchi vin̈aj Moisés chiꞌ.

15 Ix lajvi chiꞌ, ix qꞌue ebꞌ vin̈ schavan̈il. Dꞌa elan̈chamel ix och moynaj jun asun dꞌa lum vitz chiꞌ. 16 Axo stziquiquial Jehová ix javi dꞌa yibꞌan̈ lum vitzal Sinaí chiꞌ, vaqueꞌ val cꞌual ix och oyan asun dꞌa luum. Axo dꞌa yuquil cꞌual ix avtajqꞌue vin̈aj Moisés yuj Jehová dꞌa scal asun chiꞌ. 17 Ix schꞌox sbꞌa stziquiquial Jehová dꞌa scal jun asun dꞌa lum vitz chiꞌ, dꞌa yichan̈ ebꞌ chon̈abꞌ. A stziquiquial chiꞌ, lajan yilji icha junoc cꞌacꞌ te ov stzꞌabꞌat smasanil yuuj. 18 Ix lajvi chiꞌ, ix bꞌat vin̈aj Moisés dꞌa scal jun asun chiꞌ. Ix qꞌue vin̈ dꞌa slajvubꞌalxo sjolom lum vitz chiꞌ. 40 cꞌual yedꞌ 40 acꞌval ix can vin̈ taꞌ.