2 Al dꞌa ebꞌ etisraelal to syacꞌ junoc ofrenda ebꞌ dꞌayin. A jun ofrenda chiꞌ, tzꞌicꞌjichaan̈ dꞌa scal ebꞌ to tzꞌel val dꞌa scꞌol yacꞌani. 3 A tastac ol icꞌchajqꞌue vaan chiꞌ, aton juntzan̈ tic: Qꞌuen oro, qꞌuen plata, qꞌuen bronce, 4 an̈ chꞌal qꞌuicꞌmutzꞌinac, an̈ chꞌal yaxmaquinac, an̈ chac chꞌal, an̈ chꞌal lino yelxo val vachꞌ, xil nocꞌ chiva chꞌalbꞌil, 5 stzꞌumal nocꞌ chꞌac calnel ucꞌnac yedꞌ chacchac, nocꞌ tzꞌuum teꞌ labꞌabꞌi, pax teꞌ acacia, 6 aceite scꞌanji dꞌa candil, perfume, yaceiteal sat teꞌ olivo scꞌanji ayic sicꞌchajcanoch junoc mach, ma junoc tas vicoc, incienso sucꞌuqꞌui sjabꞌ, 7 qꞌuen cornalina yedꞌ juntzan̈xo qꞌuen qꞌueen te vachꞌ yilji tzꞌoch dꞌa cꞌapac schaleca vin̈ sat sacerdote yedꞌ dꞌa cꞌapac ayoch dꞌa sn̈iꞌ scꞌol spichul vin̈. 8 Tze bꞌoan junoc in cajnubꞌ, yic vachꞌ tzin cajnaj dꞌa e cal. 9 Palta a bꞌaj ol in ecꞌ cajan chiꞌ yedꞌ masanil tastac ol cꞌanchaj dꞌa yool, yovalil ol e bꞌo icha val yaj yechel ol in chꞌox dꞌayach.

10 Bꞌoocabꞌ junoc caxa, a teꞌ acacia tzꞌoch dꞌay. Jun metro yedꞌ 10 centímetro tzꞌaj scꞌatul, 70 centímetro tzꞌaj sat, 70 centímetro pax tzꞌaj schaan̈il. 11 Tzꞌoch qꞌuen oro te vachꞌ dꞌa yool yedꞌ dꞌa spatic, tzꞌoch qꞌuen dꞌa stitac dꞌa yibꞌan̈ bꞌaj tzalanqꞌuei. 12 Sbꞌopax chan̈eoc qꞌuen argolla nabꞌa oro, tzꞌoch dꞌa yoc schan̈il, chabꞌ dꞌa junjun pacꞌan̈. 13 Sbꞌochajpaxoch sbꞌachlabꞌil. A teꞌ acacia tzꞌochi, tzꞌochpax qꞌuen oro dꞌa spatic teꞌ. 14 Tzꞌecchajecꞌ teꞌ dꞌa yol juntzan̈ qꞌuen argolla tzꞌoch dꞌa spacꞌultac teꞌ caxa chiꞌ, aton yedꞌ juntzan̈ teꞌ chiꞌ syal sbꞌachjiqꞌue teꞌ caxa chiꞌ. 15 Scan teꞌ dꞌa yol qꞌuen argolla ayoch dꞌa teꞌ caxa chiꞌ, maxtzac icꞌchajel-laj teꞌ. 16 A dꞌa yol teꞌ caxa chiꞌ tzacꞌcanem qꞌuen qꞌueen bꞌaj ayoch in trato ol vacꞌ dꞌayach.

17 Sbꞌochajpax smacul teꞌ caxa chiꞌ. Aton dꞌa smacul teꞌ chiꞌ stzicjiecꞌ chicꞌ yic tzꞌacꞌji tup mul. A qꞌuen oro te vachꞌ tzꞌoch dꞌay, jun metro yedꞌ 10 centímetro tzꞌaj scꞌatul, 70 centímetro tzꞌaj sat. 18 Axo dꞌa chabꞌ stitac jun smacul chiꞌ, tzꞌoch junjun yechel querubín, nabꞌa oro tzꞌaji, stenjibꞌo dꞌa qꞌuen martillo. 19 A jun smacul chiꞌ yedꞌ juntzan̈ yechel querubín chiꞌ, junn̈ej tzꞌaji. Junjun juntzan̈ querubín chiꞌ scan dꞌa junjun stiꞌ jun smacul chiꞌ. 20 Dꞌan̈dꞌumbꞌa tzꞌaj juntzan̈ querubín chiꞌ, tzꞌem qꞌuelan dꞌa yibꞌan̈ jun smacul teꞌ caxa chiꞌ. Axo scꞌaxil, syil-laj sbꞌa sn̈iꞌ dꞌa yibꞌan̈ smacul chiꞌ. 21 A qꞌuen qꞌueen bꞌaj ayoch in trato ol vacꞌ chiꞌ dꞌayach, a dꞌa yol teꞌ caxa chiꞌ ol acꞌcanem qꞌueen, ichato chiꞌ tzacꞌanoch smacul teꞌ chiꞌ. 22 A dꞌa scal juntzan̈ yechel querubín ay dꞌa yibꞌan̈ smacul teꞌ caxa chiꞌ, ataꞌ ol in chꞌox in bꞌa dꞌayach, ol vacꞌ ojtaquejel smasanil checnabꞌil ol vacꞌ a cꞌanabꞌajej yedꞌ ebꞌ etisraelal.

23 Sbꞌochajpax junoc teꞌ mexa, a teꞌ acacia bꞌaj sbꞌo teꞌ. 90 centímetro tzꞌaj scꞌatul, 45 tzꞌaj sat, 65 tzꞌaj steel. 24 Tzꞌoch qꞌuen oro dꞌa teꞌ, sbꞌopax junoc nabꞌa oro tzꞌecꞌ oyan dꞌa spatic teꞌ yoc schan̈il. 25 Sbꞌopaxqꞌue stitac teꞌ, tzꞌecꞌ oyan dꞌa yibꞌan̈, uqueꞌ centímetro sqꞌuei, tzꞌoch qꞌuen oro dꞌay. 26 Sbꞌopax chan̈eoc argolla nabꞌa oro tzꞌoch dꞌa schiquintac schan̈il. 27 A dꞌa slacꞌanil bꞌaj ayem stitac chiꞌ, ataꞌ tzꞌoch juntzan̈ qꞌuen argolla chiꞌ. A dꞌa yol qꞌuen argolla chiꞌ tzꞌecꞌ sbꞌachlabꞌil teꞌ, yic syal yicꞌchajbꞌat teꞌ mexa chiꞌ. 28 A teꞌ sbꞌachlabꞌil teꞌ mexa chiꞌ, a dꞌa teꞌ acacia bꞌaj sbꞌo teꞌ, tzꞌochpax qꞌuen oro dꞌa teꞌ. 29 Sbꞌopax plato, nivac cuchara, xalu yedꞌ ucꞌabꞌ bꞌaj schaji ofrenda aꞌ yaji. Nabꞌa oro tzꞌoch dꞌa juntzan̈ tic smasanil. 30 Sbꞌojiem jun mexa chiꞌ dꞌa vichan̈, tzꞌem ixim pan vic yaj dꞌa yibꞌan̈.

31 Sbꞌochajpax junoc sbꞌachnubꞌal candil, nabꞌa oro tzꞌaji. A dꞌa qꞌuen martillo stenchaj bꞌoꞌoc. A scꞌojnubꞌ bꞌaj tzꞌem bꞌachan yedꞌ steꞌal yedꞌ pax scopail, icha sfloral tzꞌajochi, junn̈ej yaman tzꞌaji. 32 A dꞌa stzꞌeytac, oxox scꞌabꞌ tzꞌelta. 33 A dꞌa junjun scꞌabꞌ tzꞌelta dꞌa jun steꞌal chiꞌ, yovalil ay oxeꞌ sfloral icha sfloral teꞌ almendro. 34 An̈ejaꞌ dꞌa jun steꞌal chiꞌ, ay chan̈eꞌ sfloral icha sfloral teꞌ almendro chiꞌ. 35 A dꞌa yalan̈ bꞌaj ayelta junjun scꞌabꞌ chiꞌ, scan junjun sfloral. 36 A juntzan̈ sfloral yedꞌ scꞌabꞌ chiꞌ, junn̈ej tzꞌaj yedꞌ jun sbꞌachnubꞌal chiꞌ, nabꞌa oro tzꞌaji, stenjibꞌo dꞌa qꞌuen martillo. 37 Sbꞌochajpax uqueꞌ candil, tzꞌacꞌchajem dꞌa yedꞌtal yic syacꞌ saquilqꞌuinal dꞌa yichan̈. 38 A qꞌuen syamlabꞌil bꞌaj tzꞌicꞌchajel stan̈il cꞌapac bꞌaj tzꞌoch scꞌacꞌal yedꞌ qꞌuen splatoal, nabꞌa oro tzꞌaji. 39 Tzꞌoch oxeoc arroba oro dꞌa jun bꞌachnubꞌ candil chiꞌ yedꞌ syamcꞌabꞌil. 40 Scham val ilani to icha yaj yechel tzin chꞌox dꞌayach dꞌa jolom vitz tic, icha chiꞌ tzꞌaj sbꞌoi.