8 Masanil juntzan̈ chiꞌ, lajann̈ej tzꞌaji, 13 metro yedꞌ nan̈alxo tzꞌaj steel, axo sat chabꞌ metro tzꞌaji. 9 Slajvi chiꞌ, stzꞌischaj syam sbꞌa oyeoc jen̈an, junn̈ej jen̈an tzꞌajcani. Stzꞌischajpax syam sbꞌa vaquexo jen̈an chiꞌ. A jun svaquil jen̈an, nan̈al spacchajemta dꞌa yichan̈ mantiado chiꞌ. 10 Sbꞌochajoch xoyjabꞌ 50-oc syamnubꞌal dꞌa jun pacꞌan̈oc stitac jun bꞌabꞌel jen̈an, tzꞌochpax 50-oc syamnubꞌal dꞌa jun pacꞌan̈oc stiꞌ dꞌa jun schabꞌil jen̈an. 11 Sbꞌopax 50-oc syamnubꞌal nabꞌa bronce, yic syal syamlan sbꞌa schabꞌil jen̈an, yic junxon̈ej jen̈an tzꞌajcani. 12 Yujto uxlucheꞌ jen̈an yaj xil nocꞌ chiva chiꞌ, yuj chiꞌ ayto nan̈alxo jen̈an tzꞌemcan pacan dꞌa spatic yedꞌ dꞌa yichan̈. 13 A jun chiꞌ, ecꞌto jun metro steel dꞌa yichan̈ cꞌapac yalan̈, nan̈al metro ecꞌto dꞌa junjun stitac, yic smuschaj stitac cꞌapac aycan dꞌa yalan̈ chiꞌ. 14 Sbꞌojipax stzꞌumal nocꞌ calnel ucꞌnac dꞌa chacchac, yic sqꞌue dꞌa yibꞌan̈ jun jen̈an xil nocꞌ chiva chiꞌ yedꞌ junocxo macan̈ tzꞌuum teꞌ labꞌabꞌi yic tzꞌoch dꞌa yibꞌan̈ jun chiꞌ.

15 Sbꞌochajpax juntzan̈ teꞌ marco yic tzꞌoch dꞌa spatic in cajnubꞌ, lin̈an tzꞌajoch junjun teꞌ. Masanil teꞌ, a teꞌ acacia bꞌaj tzꞌelta teꞌ. 16 Nan̈al yoil metro tzꞌaj steel junjun teꞌ, 65 centímetro tzꞌaj sat teꞌ. 17 Scan chabꞌchabꞌoc yoc teꞌ bꞌaj tzꞌem lin̈an. Lajann̈ej tzꞌajcan scal. Icha chiꞌ tzꞌaj teꞌ tzꞌoch dꞌa spatic in cajnubꞌ chiꞌ smasanil. 18 Ayic sbꞌoel teꞌ chiꞌ, 20 teꞌ tzꞌoch dꞌa stojolal sur, 19 sbꞌojiem 40 sbꞌachnubꞌ yich teꞌ nabꞌa plata tzꞌaji, chabꞌchabꞌ tzꞌajcan dꞌa yalan̈ junjun teꞌ, junjun dꞌa junjun yoc teꞌ. 20 Icha chiꞌ tzꞌajpax junxo pacꞌan̈ dꞌa stojolal norte, 20 pax teꞌ sbꞌojiochi. 21 An̈ejaꞌ 40 sbꞌachnubꞌ yich teꞌ sbꞌoji, nabꞌa plata tzꞌaji, chabꞌchabꞌ tzꞌemcan dꞌa yich junjun teꞌ. 22 Axo dꞌa junxo pacꞌan̈ yol schiquin dꞌa stojolal bꞌaj tzꞌem cꞌu, vaqueꞌ teꞌ sbꞌojiochi. 23 Sbꞌopax chabꞌocxo teꞌ, junjun teꞌ tzꞌoch dꞌa junjun yesquinail jun pacꞌan̈ chiꞌ. 24 A chabꞌ teꞌ marco chiꞌ, nubꞌubꞌi tzꞌaj teꞌ, dꞌa yich masanto sqꞌuecꞌoch bꞌaj syil-laj sbꞌa yuj junoc argolla, aton teꞌ chiꞌ tzꞌoch dꞌa chabꞌ yesquinail dꞌa jun pacꞌan̈ chiꞌ. 25 A yuj chabꞌxo teꞌ chiꞌ, vajxaqueꞌ tzꞌaj teꞌ marco chiꞌ dꞌa smasanil yedꞌ 16 sbꞌachnubꞌ yich teꞌ. Chabꞌchabꞌ sbꞌachnubꞌ yich junjun teꞌ. 26 Sbꞌochajpax oyeoc teꞌ regla tzꞌoch dꞌa spatic teꞌ marco dꞌa junoc pacꞌan̈ in cajnubꞌ. A teꞌ acacia sbꞌochaj reglail chiꞌ. 27 Sbꞌochajpax oyeoc teꞌ tzꞌoch dꞌa junxo pacꞌan̈. An̈ejtonaꞌ sbꞌochaj oyeoc teꞌ tzꞌoch dꞌa jun pacꞌan̈ dꞌa spatic, dꞌa stojolal bꞌaj tzꞌem cꞌu. 28 A teꞌ regla tzꞌecꞌ dꞌa snan̈al teꞌ marco chiꞌ, sbꞌat teꞌ dꞌa jun schiquin masanto scꞌaxpajecꞌcꞌoch teꞌ dꞌa junxo schiquin. 29 Slajvi chiꞌ, tzꞌoch qꞌuen oro dꞌa spatictac teꞌ marco chiꞌ, tzꞌochpax qꞌuen argolla nabꞌa oro bꞌaj tzꞌecꞌ teꞌ regla chiꞌ. Tzꞌochpax qꞌuen oro dꞌa teꞌ regla chiꞌ. 30 Sbꞌochajqꞌue in cajnubꞌ icha yaj yechel tzin chꞌox dꞌayach dꞌa jolom vitz tic. 31 Sbꞌochajpax junoc cꞌapac cortina nabꞌa lino bꞌaybꞌil. Sbꞌojioch yechel querubín dꞌa cꞌapac yuj junoc mach jelan sbꞌoani. A dꞌa an̈ qꞌuicꞌmutzꞌinac chꞌal, an̈ chꞌal yaxmaquinac yedꞌ pax an̈ chac chꞌal sbꞌojioch yechel querubín chiꞌ. 32 Slajvi chiꞌ, sqꞌue locan cꞌapac dꞌa chan̈eꞌ teꞌ oy ayqꞌue qꞌuen gancho nabꞌa oro dꞌa schon. A teꞌ oy chiꞌ a teꞌ acacia, yovalil tzꞌochpax qꞌuen oro dꞌa spatic teꞌ, tzꞌempax teꞌ dꞌa yibꞌan̈ chan̈eꞌ sbꞌachnubꞌ yich nabꞌa plata. 33 A jun cꞌapac cortina chiꞌ smacan snan̈al jun lugar scuch Vic Yaji yedꞌ junxo lugar scuch A Inn̈ej Ay Vicoꞌ. Sqꞌue locan cꞌapac dꞌa yalan̈ bꞌaj ayoch qꞌuen syamnubꞌal nabꞌa oro ayoch dꞌa yibꞌan̈, axo dꞌa spaticoch cꞌapac cortina chiꞌ tzꞌacꞌchajoch teꞌ scaxail trato. 34 Slajvi chiꞌ, tza macan teꞌ scaxail trato yedꞌ smacul, tzꞌochcan teꞌ dꞌa jun lugar scuch A Inn̈ej Ay Vicoꞌ. 35 A dꞌa yichan̈elta cꞌapac cortina chiꞌ, a dꞌa co vachꞌ scan teꞌ mexa yic ixim pan. Axo pax dꞌa co qꞌuexan̈ scan jun bꞌachnubꞌ candil, qꞌuelcꞌumbꞌa tzꞌaj yedꞌ teꞌ mexa chiꞌ.

36 Axo dꞌa stiꞌ in cajnubꞌ chiꞌ, ataꞌ sbꞌojioch junoc cꞌapac cortina nabꞌa lino bꞌaybꞌil. Yedꞌ an̈ qꞌuicꞌmutzꞌinac chꞌal, an̈ chꞌal yaxmaquinac, an̈ chac chꞌal sbꞌochaj yelvanubꞌ yuj junoc jelan sbꞌoani. 37 Sbꞌopax oyeꞌ teꞌ oy dꞌa teꞌ acacia, tzꞌoch qꞌuen oro dꞌa spatic teꞌ. An̈ejtonaꞌ tzꞌochpax qꞌuen gancho nabꞌa oro dꞌa schon teꞌ yic vachꞌ sqꞌue locan cꞌapac cortina chiꞌ. Sbꞌojipaxem oyeꞌ bꞌachnubꞌ yich nabꞌa bronce bꞌaj tzꞌem teꞌ oy chiꞌ.