2 Axo vin̈aj Moisés ix avtancot vin̈aj Bezaleel yedꞌ vin̈aj Aholiab chiꞌ yedꞌ pax masanil ebꞌ vin̈ ix acꞌji sjelanil spensar yuj Jehová yic sbꞌoan yaln̈ej tastac vachꞌ yilji, aton ebꞌ tzꞌel dꞌa scꞌol scolvaj dꞌa jun munlajel chiꞌ. 3 A ebꞌ vin̈ chiꞌ ix chaan masanil ofrenda ix yicꞌcot ebꞌ chon̈abꞌ israel dꞌa vin̈aj Moisés, yic tzꞌel yich munlajel yuj sbꞌo scajnubꞌ Dios. Axo ebꞌ tzꞌel val dꞌa scꞌol yacꞌan yofrenda, junjun qꞌuin̈ibꞌal syicꞌancot yofrenda ebꞌ chiꞌ. 4 Axo ebꞌ vin̈ munlajvum chiꞌ, ix yactejcan smunlajel ebꞌ vin̈, ix bꞌat ebꞌ vin̈ yal dꞌa vin̈aj Moisés chiꞌ: 5 Toxo ix ecꞌ yibꞌan̈ yicꞌancot yofrenda ebꞌ anima, man̈ ol lajvoclaj masanil tas ix yicꞌcot ebꞌ tic dꞌa munlajel ix yal Jehová to sbꞌoi, xchi ebꞌ vin̈.

6 Ayic ix yabꞌan vin̈aj Moisés to icha chiꞌ, ix yalanel vin̈ dꞌa scal anima dꞌa campamento to maxtzac yicꞌcotlaj yofrenda ebꞌ yuj sbꞌo scajnubꞌ Dios. Icha chiꞌ ix aj svanaj yicꞌancot yofrenda ebꞌ chiꞌ, 7 yujto toxo ix tzꞌacvi jantac tas ol och dꞌa scajnubꞌ Dios, aytopax tas olto canoc.

8 A dꞌa scal ebꞌ munlajvum chiꞌ, ataꞌ ay ebꞌ jelan spensar sbꞌoanqꞌue scajnubꞌ Dios. Lajun̈eꞌ jen̈an cꞌapac lino bꞌaybꞌil schꞌalil ix sbꞌo ebꞌ. Dꞌa an̈ chꞌal qꞌuicꞌmutzꞌinac, an̈ chꞌal yaxmaquinac yedꞌ pax an̈ chac chꞌal ix sbꞌoꞌoch yechel querubín ebꞌ dꞌa junjun jen̈an lino chiꞌ. 9 A junjun jen̈an chiꞌ, 12 metro steel yedꞌ nan̈alxo, chabꞌ metro sat. Lajann̈ej ix aj yechel smasanil. 10 Oyeꞌ jen̈an cꞌapac ix tzꞌischaj yam sbꞌa yic junxon̈ej jen̈an tzꞌaji. An̈ejaꞌ icha chiꞌ ix aj stzꞌischaj syam sbꞌa oyexo jen̈an. 11 Ix lajvi chiꞌ, ix tzꞌischajoch xoyjabꞌ an̈ qꞌuicꞌmutzꞌinac chꞌal dꞌa stiꞌ cꞌapac bꞌabꞌel jen̈an chiꞌ yic syamnubꞌaloc. An̈ejaꞌ icha chiꞌ ix aj yochpax dꞌa stiꞌ junxo schabꞌil jen̈an chiꞌ. 12 Ix och xoyjabꞌ 50 qꞌuicꞌmutzꞌinac chꞌal dꞌa jun pacꞌan̈ stiꞌ, junjun jen̈an cꞌapac lajann̈ej ix aj schalan sbꞌa cꞌapac. 13 Ix bꞌopax 50 qꞌuen syamnubꞌal nabꞌa oro yic syal yil-lan sbꞌa cꞌapac chabꞌ jen̈an chiꞌ yic vachꞌ junxon̈ej tzꞌajcan cꞌapac. 14 Ix bꞌoxi uxlucheꞌ jen̈an xil nocꞌ chiva, yic a tzꞌoch dꞌa yibꞌan̈ scajnubꞌ Dios. 15 Ay 13 metro steel yedꞌ nan̈alxo yedꞌ chabꞌ metro sat. Lajann̈ej ix aj yechel smasanil. 16 Ix tzꞌischaj yam sbꞌa oyeꞌ jen̈an yic junxon̈ej tzꞌaji. Ix tzꞌischajpax syam sbꞌa vaquexo, yic junxon̈ej pax jen̈an tzꞌaji. 17 Ix och xoyjabꞌ 50 syamnubꞌal dꞌa jun pacꞌan̈ stiꞌ jun bꞌabꞌel jen̈an. Ix ochpax 50 syamnubꞌal dꞌa stiꞌ junxo schabꞌil jen̈an chiꞌ. 18 Ix bꞌopax 50 syamnubꞌ nabꞌa bronce, yic syil-laj sbꞌa chabꞌ jen̈an chiꞌ, yic junxon̈ej jen̈an tzꞌaji.

19 Ix bꞌojipax stzꞌumal nocꞌ chꞌac calnel ucꞌnac yedꞌ chacchac, yic tzꞌem dꞌa yibꞌan̈ jun jen̈an xil nocꞌ chiva chiꞌ yedꞌ junxo macan̈ tzꞌuum te labꞌabꞌi yic tzꞌem dꞌa yibꞌan̈ jun jen̈an stzꞌumal nocꞌ chꞌac calnel chiꞌ. 20 Ix sbꞌopax juntzan̈ teꞌ marco ebꞌ, yic tzꞌoch dꞌa spatic scajnubꞌ Dios, lin̈an tzꞌajoch junjun teꞌ. Masanil teꞌ, a teꞌ acacia bꞌaj ix el teꞌ. 21 Nan̈al yoil metro steel junjun teꞌ marco chiꞌ, axo slevanil sat teꞌ, 70 centímetro. 22 Ix can chabꞌchabꞌ yoc junjun teꞌ marco chiꞌ yic tzꞌem lin̈an. Lajann̈ej ix ajcan scal yoc teꞌ chiꞌ. Icha chiꞌ ix aj teꞌ marco chiꞌ smasanil tzꞌoch dꞌa spatic scajnubꞌ Dios chiꞌ. 23 Ay 20 teꞌ ix sbꞌo ebꞌ yic tzꞌoch dꞌa stojolal sur. 24 Ix bꞌoji 40 qꞌuen plata sbꞌachnubꞌoc yich teꞌ 20 chiꞌ yuj ebꞌ, chabꞌchabꞌ qꞌuen dꞌa yich junjun teꞌ, junjun qꞌuen dꞌa junjun yoc teꞌ. 25 An̈ejtonaꞌ ix bꞌoji 20-xo teꞌ marco chiꞌ yic tzꞌoch dꞌa jun pacꞌan̈xo, aton dꞌa stojolal norte. 26 An̈ejaꞌ 40 qꞌuen plata ix bꞌo sbꞌachnubꞌoc yich teꞌ, yic chabꞌchabꞌ qꞌuen tzꞌoch dꞌa yich junjun teꞌ. 27 Axo yic jun pacꞌan̈ yol schiquin dꞌa stojolal bꞌaj tzꞌem cꞌu, vaqueꞌ teꞌ marco chiꞌ ix bꞌoji. 28 Ix sbꞌopax chabꞌ teꞌ marco chiꞌ ebꞌ yic tzꞌoch teꞌ dꞌa junjun yesquinail jun pacꞌan̈ chiꞌ. 29 A chabꞌ teꞌ marco chiꞌ, nubꞌubꞌi ix aj teꞌ, dꞌa yich masanto sqꞌuecꞌoch bꞌaj syil-laj sbꞌa yuj junoc argolla, aton teꞌ chiꞌ ix och dꞌa chabꞌ yesquinail. 30 Vajxaqueꞌ teꞌ marco ix bꞌoi yic tzꞌoch dꞌa jun schiquin chiꞌ yedꞌ 16 sbꞌachnubꞌal yich nabꞌa plata, chabꞌchabꞌ sbꞌachnubꞌal yich junjun teꞌ. 31 Ix sbꞌoanpax oyeꞌ teꞌ regla ebꞌ dꞌa teꞌ acacia, teꞌ tzꞌoch dꞌa spatic teꞌ marco dꞌa junoc pacꞌan̈ cajnubꞌ chiꞌ. 32 Oyeꞌ pax teꞌ yic tzꞌoch dꞌa junxo pacꞌan̈ yedꞌ oyeꞌ pax teꞌ yic tzꞌoch dꞌa junxo pacꞌan̈ dꞌa yol schiquin dꞌa spatic, dꞌa stojolal bꞌaj tzꞌem cꞌu. 33 A teꞌ regla tzꞌoch chiꞌ, a dꞌa snan̈al teꞌ marco chiꞌ tzꞌecꞌ junoc teꞌ masanto scꞌaxpajecꞌcꞌoch teꞌ dꞌa junxo schiquin. 34 Ix och qꞌuen oro dꞌa spatictac teꞌ marco chiꞌ. Ix bꞌopax qꞌuen argolla nabꞌa oro bꞌaj tzꞌecꞌ teꞌ regla chiꞌ. Ix ochpax qꞌuen oro dꞌa spatictac teꞌ regla chiꞌ.

35 Ix sbꞌopax jun cꞌapac cortina ebꞌ yedꞌ an̈ lino. Ix bꞌojioch yechel querubín dꞌa cꞌapac yuj junoc jelan sbꞌoani. A dꞌa an̈ chꞌal qꞌuicꞌmutzꞌinac, an̈ yaxmaquinac yedꞌ an̈ chac chꞌal ix bꞌojioch yechel querubín chiꞌ. 36 Ix sbꞌoan chan̈eꞌ te oy ebꞌ dꞌa teꞌ acacia, ix yacꞌoch qꞌuen oro ebꞌ dꞌa spatic teꞌ. Ix bꞌopax chan̈eꞌ sbꞌachnubꞌal yich teꞌ, nabꞌa plata ix aji. Ix yacꞌanoch qꞌuen gancho nabꞌa oro ebꞌ dꞌa schon teꞌ yic sqꞌue locan cꞌapac cortina chiꞌ.

37 Ix sbꞌoanpax jun cꞌapac cortina ebꞌ yic tzꞌoch smaculoc mantiado chiꞌ. A jun cꞌapac cortina chiꞌ dꞌa an̈ lino chꞌal ix sbꞌo ebꞌ. Yedꞌ an̈ chꞌal qꞌuicꞌmutzꞌinac, an̈ chꞌal yaxmaquinac yedꞌ an̈ chac chꞌal, ix bꞌochajoch stzꞌibꞌul yuj junoc jelan sbꞌoani. 38 Ix bꞌojipax oyeꞌ teꞌ oy, ix em qꞌuen oro dꞌa schon teꞌ yedꞌ pax sganchoal. Ix bꞌopax oyeꞌ sbꞌachnubꞌal yich teꞌ, nabꞌa bronce ix aji.