4 Ix yalanxi vin̈aj Moisés chiꞌ dꞌa masanil ebꞌ chon̈abꞌ israel icha tic: A juntzan̈ tic ix yal Jehová: 5 Tzeyacꞌ junoc ofrenda dꞌay. A mach tzꞌel val dꞌa scꞌol yacꞌani, syal yicꞌancot qꞌuen oro, qꞌuen plata yedꞌ qꞌuen bronce, 6 an̈ chꞌal qꞌuicꞌmutzꞌinac, an̈ yaxmaquinac, an̈ chac chꞌal, an̈ lino te vachꞌ yedꞌ xil nocꞌ chiva bꞌaybꞌil. 7 Syalpax eyicꞌancot stzꞌumal nocꞌ chꞌac calnel ucꞌnac yedꞌ chacchac, nocꞌ tzꞌuum te labꞌabꞌi yedꞌ pax teꞌ acacia. 8 Tzeyicꞌpaxcot yaceiteal sat teꞌ olivo tzꞌem dꞌa yol candil, perfume sbꞌat dꞌa scal aceite tzꞌacꞌjioch dꞌa junoc tzꞌochcan yicoc Jehová, sbꞌatpax dꞌa scal incienso sucꞌuqꞌui sjabꞌ. 9 Tzeyicꞌpaxcot qꞌuen cornalina yedꞌ juntzan̈ qꞌuen qꞌueen yelxo val vachꞌ yilji tzꞌoch yelvanubꞌoc schaleca vin̈ sat sacerdote, tzꞌochpax yelvanubꞌ jun smacul sn̈iꞌ scꞌool vin̈.

10 Masanil ebꞌ vin̈ vinac jelan sbꞌoan tastac vachꞌ yilji, cotocabꞌ ebꞌ vin̈, yic sbꞌoan tas ebꞌ vin̈ ix schec Jehová sbꞌoi: 11 Aton mantiado scajnubꞌ Jehová yedꞌ pax juntzan̈ tzꞌoch dꞌa yibꞌan̈ yedꞌ pax sganchoal, smarcoal, sreglail, yoyal yedꞌ sbꞌachnubꞌal yich. 12 Sbꞌopax teꞌ scaxail trato, sreglail tzꞌoch sbꞌachlabꞌiloc, smacul bꞌaj tzꞌacꞌji tup mul, junoc cortina tzꞌoch smaculoc, 13 teꞌ mexa yedꞌ regla tzꞌoch sbꞌachlabꞌiloc yedꞌ pax syamcꞌabꞌil, ixim pan tzꞌacꞌjioch dꞌa yichan̈ Jehová. 14 Sbꞌopax sbꞌachnubꞌal candil yedꞌ masanil syamcꞌabꞌil yedꞌ pax uqueꞌ candil yedꞌ aceite tzꞌem dꞌa yol juntzan̈ candil chiꞌ. 15 Sbꞌojipax altar yic incienso, regla tzꞌoch sbꞌachlabꞌiloc, aceite scꞌanchaji yic tzꞌoch dꞌa junoc tzꞌochcan yicoc Jehová, incienso sucꞌuqꞌui sjabꞌ, cꞌapac cortina yic smacul stiꞌ scajnubꞌ Jehová. 16 Sbꞌopax junoc altar bꞌaj stzꞌa silabꞌ, smallail jun altar chiꞌ nabꞌa bronce yedꞌ sreglail yedꞌ masanil syamcꞌabꞌil. Sbꞌo jun palangana yedꞌ sbꞌachnubꞌal. 17 Sbꞌopax cꞌapac cortina tzꞌecꞌ oyan dꞌa spatic yamaqꞌuil scajnubꞌ Jehová chiꞌ yedꞌ yoyal yedꞌ pax sbꞌachnubꞌal yich yedꞌ cꞌapac cortina tzꞌoch smaculoc stiꞌ amacꞌ chiꞌ. 18 Sbꞌo yestacail yedꞌ schꞌan̈al syamanem dꞌa spatictac jun scajnubꞌ Jehová chiꞌ yedꞌ dꞌa yamaqꞌuil. 19 Sbꞌopax cꞌapac pichul jalbꞌil syacꞌoch ebꞌ sacerdote dꞌa yol scajnubꞌ Jehová. Aton pichul syacꞌoch vin̈aj sacerdote Aarón to yicn̈ej yopisio vin̈ yaji yedꞌ pax spichul ebꞌ yuninal vin̈, aton syacꞌoch ebꞌ a tzꞌoch ebꞌ dꞌa yopisio, xchi vin̈aj Moisés chiꞌ.

20 Ix lajvi yalan masanil juntzan̈ chiꞌ vin̈aj Moisés chiꞌ, ix bꞌat ebꞌ smasanil dꞌa yoltac smantiado. 21 A ebꞌ ix el val dꞌa scꞌool, ix laj yacꞌ silabꞌ ebꞌ yic sbꞌoji scajnubꞌ Jehová, aton bꞌaj schꞌox sbꞌa yedꞌ masanil tas tzꞌoch yopisio yedꞌ cꞌapac pichul yic yopisio ebꞌ sacerdote. 22 Ix laj javi ebꞌ vin̈ vinac yedꞌ ebꞌ ix ix yedꞌ silabꞌ dꞌa Jehová, ato syalaꞌ jantac ix el dꞌa scꞌol ebꞌ yacꞌani, ix ul yacꞌan ebꞌ dꞌa vin̈aj Moisés chiꞌ. Ix yicꞌancot qꞌuen yelvanubꞌ pichul ebꞌ, qꞌuen colcꞌabꞌ, qꞌuen ton̈, qꞌuen uchiquin yedꞌ juntzan̈ocxo nabꞌa oro. Ix yacꞌan ebꞌ dꞌa Jehová. 23 Masanil ebꞌ ay chꞌal qꞌuicꞌmutzꞌinac dꞌay, chꞌal yaxmaquinac, chac chꞌal, lino te vachꞌ, xil nocꞌ chiva bꞌaybꞌil, stzꞌumal nocꞌ chꞌac calnel ucꞌnac yedꞌ chacchac yedꞌ pax nocꞌ tzꞌuum te labꞌabꞌi, ix laj yicꞌcot ebꞌ dꞌa Jehová. 24 Ay pax mach ix el dꞌa scꞌool yicꞌancot qꞌuen plata yedꞌ qꞌuen bronce yofrendaoc dꞌa Jehová. A ebꞌ ay teꞌ acacia dꞌay, ix yicꞌpaxcot teꞌ ebꞌ, yic scꞌanchaj teꞌ dꞌa scajnubꞌ Dios. 25 Axo ebꞌ ix ix syal sbꞌoan an̈ chꞌal, ix yicꞌcot chꞌal qꞌuicꞌmutzꞌinac ebꞌ ix, chꞌal yaxmaquinac, chac chꞌal yedꞌ lino te vachꞌ. 26 Ay ebꞌ ix ix jelan ix el val dꞌa scꞌool, ix och ijan ebꞌ ix sbꞌoan xil nocꞌ chiva dꞌa chꞌalil. 27 Axo ebꞌ yichamtac vinaquil chon̈abꞌ, ix yicꞌcot qꞌuen cornalina ebꞌ yedꞌ pax juntzan̈xo qꞌuen qꞌueen te vachꞌ yic tzꞌoch yelvanubꞌoc schaleca vin̈ sat sacerdote yedꞌ yochpax yelvanubꞌoc jun smacul sn̈iꞌ scꞌool vin̈. 28 Ix yicꞌpaxcot perfume ebꞌ, aceite scꞌanchaj dꞌa candil, aceite scꞌanchaj dꞌa junoc tzꞌochcan yicoc Jehová yedꞌ incienso sucꞌuqꞌui sjabꞌ.

29 Masanil ebꞌ chon̈abꞌ israel, ebꞌ vin̈ vinac yedꞌ ebꞌ ix ix to ix el val dꞌa scꞌool, ix yacꞌ scolval ebꞌ dꞌa masanil jun munlajel ix yal Jehová dꞌa vin̈aj Moisés chiꞌ.

30 Ix yal vin̈aj Moisés dꞌa masanil ebꞌ yetchon̈abꞌ: A Jehová toxo ix sicꞌanel vin̈aj Bezaleel, yuninal vin̈aj Uri, yixchiquin vin̈aj Hur, dꞌa yin̈tilal Judá. 31 Ix yacꞌanoch Yespíritu Dios chiꞌ dꞌa vin̈ yic syacꞌan sjelanil spensar vin̈ yedꞌ yojtacanel vin̈ yic syalpax snachajel yuj vin̈ 32 sbꞌoan yechel tas sbꞌoꞌo, icha dꞌa qꞌuen oro, qꞌuen plata yedꞌ qꞌuen bronce. 33 Ix acꞌjipax sjelanil vin̈ yic sbꞌoanpax qꞌuen qꞌueen yelxo val vachꞌ, yic sbꞌoanpaxem yechel te teꞌ yelxo val vachꞌ tzꞌaji yedꞌ yoch yelvanubꞌ teꞌ. 34 Ix yacꞌan sjelanil Jehová dꞌa vin̈ yedꞌ dꞌa vin̈aj Aholiab, yuninal vin̈aj Ahisamac, dꞌa yin̈tilal Dan, yic scꞌaybꞌan juntzan̈xo ebꞌ scolvaj yedꞌ ebꞌ. 35 Ix acꞌji sjelanil ebꞌ yuj Jehová, yic sbꞌoan masanil tastac ebꞌ to yelxo val vachꞌ yilji: Yic sbꞌoan yechel, yic sbꞌoanoch yelvanubꞌ yedꞌ an̈ chꞌal qꞌuicꞌmutzꞌinac, an̈ chꞌal yaxmaquinac, an̈ chac chꞌal yedꞌ lino chꞌal te vachꞌ. Ix acꞌji sjelanil ebꞌ sbꞌoan junoc tas vachꞌ yedꞌ schꞌoxan yechel junocxo yaln̈ej tas munlajelal.