2 Abꞌi, a dꞌa scal yin̈tilal vin̈aj Judá ix in sicꞌcanel vin̈aj Bezaleel, yuninal vin̈aj Uri, yixchiquin vin̈aj Hur. 3 Toxo ix vacꞌoch Vespíritu dꞌa vin̈, yic jelan snaanel vin̈, yic ol yal sbꞌoanqꞌue yaln̈ej tastac vin̈. 4 Ol snaanelta vin̈ sbꞌoan yechel jantac munlajel ol bꞌoꞌoc, icha dꞌa qꞌuen oro, dꞌa qꞌuen plata yedꞌ dꞌa qꞌuen bronce, 5 yedꞌ pax sbꞌoan qꞌuen qꞌueen vin̈ vachꞌ yilji, sbꞌoan te teꞌ dꞌa yaln̈ej tas munlajelal. 6 Axo vin̈aj Aholiab, yuninal vin̈aj Ahisamac, yin̈tilal vin̈aj Dan, a vin̈ ol colvaj yedꞌ vin̈aj Bezaleel chiꞌ. Masanil ebꞌ aytaxon sjelanil, ix in vachꞌ aqꞌuej sjelanil ebꞌ yic a ebꞌ ol bꞌoan masanil tastac sval tic dꞌayach: 7 Aton cꞌapac mantiado bꞌaj tzin chꞌox in bꞌa, teꞌ scaxail in trato yedꞌ smacul bꞌaj tzꞌacꞌji tup mul, masanil syamcꞌabꞌil dꞌa yol mantiado chiꞌ, 8 teꞌ mexa yedꞌ jantac syamcꞌabꞌil, jun sbꞌachnubꞌ candil nabꞌa oro yedꞌ syamcꞌabꞌil, jun altar bꞌaj sn̈uschaj incienso, 9 jun altar bꞌaj stzꞌa silabꞌ yedꞌ syamcꞌabꞌil, jun nivan palangana yedꞌ sbꞌachnubꞌ yich, 10 cꞌapac pichul jalbꞌil nivan yelcꞌochi, aton spichul vin̈aj sacerdote Aarón yedꞌ pax spichul ebꞌ yuninal vin̈, aton pichul scꞌan ebꞌ dꞌa yopisio. 11 Sbꞌopax aceite ebꞌ scꞌanchaji ayic tzꞌochcan junoc mach, ma junoc tas vicoc. Sbꞌopax incienso man̈xo jantacoc svachꞌil scꞌanchaj dꞌa in cajnubꞌ. A juntzan̈ chiꞌ, yovalil sbꞌo ebꞌ icha val ix aj valan dꞌayach, xchi Jehová dꞌa vin̈aj Moisés chiꞌ.

12 Ix yalanxi Jehová dꞌa vin̈aj Moisés chiꞌ:

13 Al dꞌa ebꞌ etchon̈abꞌ to yovalil scꞌanabꞌajej jun scꞌual icꞌoj ip ebꞌ, yujto vic yaji. Yujto a jun cꞌu chiꞌ yechel in trato yajcanoch dꞌa co cal eyedꞌoc dꞌa masanil tiempo yic vachꞌ tzeyojtaquejeli to a in Jehová in tic ix ex in sicꞌcanel vicoc.

14 Nivanocabꞌ yelcꞌoch jun scꞌual icꞌoj ip chiꞌ dꞌa yol e sat. A mach max cꞌanabꞌajan jun cꞌual icꞌoj ip chiꞌ, yovalil schami. Yaln̈ej mach smunlaj dꞌa jun cꞌu chiꞌ, yovalil schami. 15 Vaquen̈ej cꞌual tzex munlaji, axo dꞌa yuquil cꞌual, scꞌual icꞌoj ip, vicn̈ej yaji. Yaln̈ej mach smunlaj dꞌa jun cꞌu chiꞌ, tojoln̈ej schami. 16-17 Yuj chiꞌ, yovalil tze cꞌanabꞌajej jun cꞌual icꞌoj ip chiꞌ. A jun chiꞌ yechel in trato tzꞌajcan dꞌa masanil tiempo dꞌa co cal eyedꞌoc, yujto a in Jehová in dꞌa vaqueꞌ cꞌual in bꞌonac satchaan̈ yedꞌ sat luum tic, axo dꞌa yuquil cꞌual vochnac vaan in munlaji, vicꞌannac vip, xchi Jehová.

18 Ayic ix lajvi slolon Jehová yedꞌ vin̈aj Moisés dꞌa jolom vitz Sinaí, ix yacꞌan chabꞌ pachan̈ qꞌueen dꞌa vin̈, bꞌaj tzꞌibꞌabꞌiloch strato, to a val Dios ix tzꞌibꞌani.