Jun altar yic incienso
30
Ix yalanxi Jehová: Acꞌ bꞌojoc junoc altar bꞌaj stzꞌa incienso. A teꞌ acacia tzꞌoch dꞌay. 2 A scꞌatul 45 centímetro tzꞌaji, 45 centímetro tzꞌajpax sat, axo steel, 90 centímetro tzꞌaji. An̈ejaꞌ sbꞌoqꞌue schꞌac altar chiꞌ dꞌa junjun schiquintac, yaman tzꞌaj yedꞌ altar chiꞌ. 3 Tzꞌoch qꞌuen oro yelxo val vachꞌ dꞌa altar chiꞌ: Dꞌa yibꞌan̈ yedꞌ dꞌa spatictac schan̈il pacꞌan̈ yedꞌ dꞌa schꞌaac chiꞌ, sqꞌuepax tzalan qꞌuen oro chiꞌ dꞌa yibꞌan̈ stitac. 4 A dꞌa yalan̈ stitac chiꞌ, ataꞌ tzꞌoch chabꞌchabꞌoc argolla nabꞌa oro dꞌa schabꞌil pacꞌan̈. A dꞌa yool chiꞌ tzꞌecꞌ teꞌ sbꞌachlabꞌil yic syal sbꞌachchaji. 5 A teꞌ bꞌachlabꞌ chiꞌ, a teꞌ acacia tzꞌochi, tzꞌoch qꞌuen oro dꞌa spatic teꞌ. 6 Tzaqꞌuem jun altar chiꞌ dꞌa yichan̈elta cꞌapac cortina ayoch yen̈uloc scaxail in trato, aton teꞌ caxa ay smacul bꞌaj tzꞌacꞌji tup mul. Ataꞌ ol in chꞌox in bꞌa dꞌayex. 7 A vin̈aj Aarón ol n̈usantzꞌa incienso sumumi sjabꞌ dꞌa yibꞌan̈ altar chiꞌ, junjun qꞌuin̈ibꞌalil ayic sbꞌochajoch candil. 8 Sn̈usanpax vin̈ a tzꞌemxican cꞌu, aton dꞌa yorail yoch scꞌacꞌal candil. A jun tic ol ujocn̈ej dꞌa vichan̈ ayic ol bꞌeyn̈ejbꞌat tiempo. 9 Malaj junoc comon incienso ol n̈usjoctzꞌa dꞌa yibꞌan̈ jun altar chiꞌ, malaj pax junoc silabꞌ, ofrenda dꞌa ixim trigo, ma ofrenda dꞌa yic secchajem vino ol sn̈uschaj dꞌay. 10 An̈ej junel dꞌa yol abꞌil stzicoch chicꞌ vin̈aj Aarón dꞌa schꞌac altar chiꞌ, aton schiqꞌuil nocꞌ silabꞌ smiljicham yuj yacꞌji lajvoc mul. Junjun abꞌil tzuji jun tic dꞌa masanil tiempo. A jun altar chiꞌ, vic yaji, xchi Jehová.A qꞌuen tumin syacꞌ ebꞌ vin̈ vinac sbꞌischaji
11 Ix yalanxi Jehová dꞌa vin̈aj Moisés chiꞌ icha tic:
12 Ayic ol icꞌanchaan̈ sbꞌisul ebꞌ etchon̈abꞌ israel chiꞌ, junjun ebꞌ ol stup dꞌayin yuj sqꞌuinal, yic malaj junoc ilya te ov ol javoc dꞌa yibꞌan̈ ebꞌ to scham ebꞌ yuuj, yuj bꞌaj sbꞌischaj chiꞌ. 13 Masanil ebꞌ stzꞌibꞌchaj chiꞌ, yovalil nan̈al siclo qꞌuen plata syacꞌ ebꞌ yic stupan ebꞌ dꞌayin, icha qꞌuen siclo scꞌanchaj dꞌa in cajnubꞌ, aton 20 gera. 14 Masanil ebꞌ stzꞌibꞌchaj sbꞌi chiꞌ, aton ebꞌ 20 abꞌil sqꞌuinal sbꞌeyn̈ejbꞌati, aton ebꞌ chiꞌ tzꞌacꞌan jun bꞌaj stupchaj chiꞌ dꞌayin. 15 Ayic stupan ebꞌ chiꞌ dꞌayin yuj sqꞌuinal, vachꞌchom ebꞌ bꞌeyum, ma ebꞌ mebꞌaꞌ lajann̈ej tzꞌaj yacꞌan ebꞌ. Nan̈al siclo syacꞌ junjun ebꞌ. 16 Ichato chiꞌ smolchaj masanil qꞌuen plata syacꞌ ebꞌ anima chiꞌ stojoloc yuj sqꞌuinal. A dꞌa mantiado bꞌaj tzin chꞌox in bꞌa tzꞌoch yopisio qꞌueen. A yuj chiꞌ, ol ex in nacoti, aton yuj tas tzeyacꞌ yuj e qꞌuinal chiꞌ, xchi Jehová.
Jun qꞌuen palangana nabꞌa bronce
(Ex 38.8)
17 Ix yalanxi Jehová dꞌa vin̈aj Moisés chiꞌ icha tic:
18-19 Acꞌ bꞌojoc junoc qꞌuen nivan palangana yedꞌ sbꞌachnubꞌ yich, nabꞌa bronce tzꞌaji. A dꞌa scal snan̈al altar yedꞌ mantiado bꞌaj tzin chꞌox in bꞌa scan qꞌueen. Sbꞌudꞌchaj qꞌuen yedꞌ a aꞌ. Ataꞌ syicꞌqꞌueta aꞌ vin̈aj Aarón yedꞌ ebꞌ yuninal yic sbꞌican scꞌabꞌ ebꞌ yedꞌ yoc. 20 Ayic tzꞌoch ebꞌ dꞌa yol mantiado, ma ayic scꞌoch ebꞌ dꞌa altar yic sn̈usan yofrenda dꞌa vichan̈, yovalil sbꞌic scꞌabꞌ ebꞌ yedꞌ yoc, yic max cham ebꞌ. 21 A jun tic, ley tzꞌajcan dꞌa yibꞌan̈ vin̈aj Aarón yedꞌ yin̈tilal, ayic ol bꞌeyn̈ejbꞌat tiempo, xchi Jehová.
A aceite scꞌanchaj yic sicꞌchaj junoc anima
(Ex 37.29)
22 Ix yalanxi Jehová dꞌa vin̈aj Moisés chiꞌ icha tic:
23 Sicꞌchajocabꞌel juntzan̈oc avbꞌen teꞌ man̈xo jantacoc svachꞌil sjabꞌ: Lajchaveoc libra stzatajil teꞌ mirra te vachꞌ, vaqueoc libra canela, vaqueoc libra teꞌ cálamo yelxo val vachꞌ, 24-25 yedꞌ pax lajchaveoc libra teꞌ casia. A echlabꞌ scꞌanchaj dꞌa juntzan̈ chiꞌ, aton icha echlabꞌ scꞌanchaj dꞌa in cajnubꞌ. Scalaj juntzan̈ chiꞌ yedꞌ nan̈aloc schan̈il litro aceite yic teꞌ olivo, icha val tzꞌaj sbꞌoan junoc bꞌoum perfume. Icha chiꞌ tzꞌaj a bꞌoan aceite scꞌanchaji a sicꞌchajel junoc mach ma junoc tas to vic tzꞌajcani. 26 Succhajoch aceite chiꞌ dꞌa mantiado bꞌaj tzin chꞌox in bꞌa, dꞌa teꞌ caxa yic trato, 27 dꞌa teꞌ mexa yedꞌ dꞌa syamcꞌabꞌil dꞌa sbꞌachnubꞌ candil yedꞌ syamcꞌabꞌil, dꞌa altar yic incienso, 28 dꞌa altar bꞌaj stzꞌa silabꞌ yedꞌ syamcꞌabꞌil yedꞌ pax dꞌa jun qꞌuen nivan palangana yedꞌ sbꞌachnubꞌal. 29 Icha chiꞌ tzꞌaj a sicꞌancanoch masanil juntzan̈ chiꞌ yic vachꞌ vic tzꞌajcani. Masanil tastac tzꞌoch tennaj dꞌay, vicxo tzꞌajcani.
30 A jun aceite chiꞌ tza sucpaxoch dꞌa vin̈aj Aarón yedꞌ pax dꞌa ebꞌ yuninal vin̈. Icha chiꞌ tzꞌaj sicꞌchajcanoch ebꞌ sacerdoteal dꞌayin. 31 Tzalan dꞌa masanil ebꞌ etisraelal: Ayic ol bꞌeyn̈ejbꞌat tiempo, aton jun aceite tic ol cꞌanchaj dꞌa tastac to vic ol ajcanoc. 32 Man̈ comonoc succhajoch dꞌa junoc comon anima. Man̈ comonoc sbꞌoji junocxo macan̈ aceite lajan yedꞌ jun tic. A jun tic vic tzꞌajcani, yuj chiꞌ man̈ comonoc tze yamaꞌ. 33 Tato ay junoc mach sbꞌoan junocxo macan̈ aceite lajan yedꞌ jun tic, ma sucoch dꞌa junoc comon anima, a jun chiꞌ yovalil tzꞌicꞌjicanel dꞌa scal ebꞌ yetchon̈abꞌ, xchi Jehová, xa chi dꞌa ebꞌ.
A jun incienso
(Ex 37.29)
34 Ix yalanxi Jehová dꞌa vin̈aj Moisés chiꞌ icha tic:
Icꞌchajocabꞌcot masanil juntzan̈ tastac chiꞌ, lajann̈ej ol aj yechlabꞌil: Stzatajil teꞌ estacte, sjoxal nocꞌ micꞌ scuch uña, stzatajil teꞌ gálbano te vachꞌ sjabꞌ yedꞌ pax stzatajil teꞌ incienso yelxo val te vachꞌ. 35 A yedꞌ juntzan̈ chiꞌ tzacꞌ bꞌojoc incienso. Vachꞌ tzꞌaj scalaji, icha val tzꞌaj sbꞌoji yuj junoc bꞌoum perfume. Vachꞌ tzꞌaj sbꞌat yatzꞌamil, malajocabꞌ spaltail, yujto vic yaji. 36 Chocꞌ tzꞌaj stenjipoj jabꞌoc, tzacꞌanoch dꞌa yol mantiado dꞌa yichan̈ teꞌ scaxail in trato bꞌaj tzin chꞌox in bꞌa dꞌayex. A jun incienso chiꞌ, nivanocabꞌ yelcꞌoch dꞌa yol e sat. 37 Man̈ e bꞌo junocxo icha val jun ix e bꞌo tic. Tze nacoti to a inn̈ej ay vicoꞌ. 38 Tato ay junocxo mach sbꞌoan dꞌa yol yicoꞌ, yic syabꞌ sjabꞌ, a jun chiꞌ tojoln̈ej yicꞌjicanel dꞌa scal ebꞌ yetchon̈abꞌ, xchi Jehová.