Ix bꞌochaj jun altar nabꞌa bronce
38
Ix sbꞌoanpax jun altar vin̈aj Bezaleel chiꞌ, aton jun bꞌaj stzꞌa silabꞌ. Dꞌa teꞌ acacia ix sbꞌo vin̈. Lajann̈ej ix aj yechel schan̈il pacꞌan̈, chabꞌ metro yedꞌ 25 centímetro junjun pacꞌan̈. Jun metro yedꞌ 25 centímetro ix ajqꞌue schaan̈il. 2 Ix bꞌojipaxqꞌue chan̈eꞌ schꞌaac dꞌa schiquintac schan̈il, yaman ix aj yedꞌ jun altar chiꞌ. Ix pichchaj teꞌ dꞌa qꞌuen bronce. 3 Masanil syamcꞌabꞌil jun altar chiꞌ, nabꞌa bronce ix aji: Aton yedꞌtal bꞌaj tzꞌicꞌchajel qꞌuen taan̈, qꞌuen pala, qꞌuen nivac ucꞌabꞌ, qꞌuen tenedor yedꞌ yedꞌtal teꞌ tzacꞌacꞌ. 4 Ix bꞌojipax jun qꞌuen malla nabꞌa bronce, ix acꞌjioch qꞌuen dꞌa yalan̈ stiꞌ dꞌa yool. Dꞌa snan̈al jun altar chiꞌ ix och qꞌueen. 5 Ix bꞌopax chan̈eꞌ argolla nabꞌa bronce, ix och dꞌa junjun yesquinail qꞌuen malla chiꞌ. Ix elcꞌoch qꞌuen dꞌa spatic jun altar chiꞌ, a dꞌa yol qꞌuen tzꞌecꞌ teꞌ sbꞌachlabꞌil. 6 Ix bꞌopax sbꞌachlabꞌil jun altar chiꞌ dꞌa teꞌ acacia, ix ochpax qꞌuen bronce dꞌa spatictac teꞌ. 7 Ix ecchajecꞌ teꞌ dꞌa yol qꞌuen argolla ayoch dꞌa stzꞌeytac jun altar chiꞌ yic syal sbꞌachchaji. A jun altar chiꞌ, chemteꞌ ix och dꞌay, ix can yolanil dꞌa yool.Ix bꞌoji jun nivan palangana nabꞌa bronce
(Ex 30.18)
8 A yedꞌ qꞌuen nen nabꞌa bronce scꞌan ebꞌ ix ix ayoch yilumaloc stiꞌ cꞌapac mantiado, a yedꞌ qꞌuen ix sbꞌo jun nivan palangana vin̈aj Bezaleel yedꞌ sbꞌachnubꞌal yich.
Ix bꞌoji yamaqꞌuil scajnubꞌ Dios
9 Ix sbꞌopax cꞌapac cortina vin̈aj Bezaleel yic tzꞌoch smaculoc spatictac amacꞌ dꞌa scajnubꞌ Dios. A dꞌa stojolal sur, ix och 45 metro cꞌapac cortina chiꞌ, aton chꞌal lino bꞌaybꞌil ayoch dꞌa cꞌapac. 10 Ix bꞌopax 20 yoyal yedꞌ 20 pax sbꞌachnubꞌal yich nabꞌa bronce. Axo dꞌa schon teꞌ ix em juntzan̈ qꞌuen qꞌueen nabꞌa plata yedꞌ yargollail. 11 Ix bꞌopax cꞌapac cortina yic stojolal norte, 45 metro cꞌapac yedꞌ 20 oy yedꞌ pax sbꞌachnubꞌal yich nabꞌa bronce yedꞌ qꞌuen ayem dꞌa schon yoyal nabꞌa plata yedꞌ yargollail. 12 Ix bꞌopax cꞌapac cortina yic stojolal bꞌaj tzꞌem cꞌu, 22 metro yedꞌ nan̈alxo sat cꞌapac yedꞌ lajun̈eꞌ yoyal yedꞌ pax sbꞌachnubꞌal yich yedꞌ qꞌuen ayem dꞌa schon yoyal nabꞌa plata yedꞌ yargollail. 13 An̈ejtonaꞌ dꞌa stojolal bꞌaj sqꞌueul cꞌu, 22 metro yedꞌ nan̈alxo sat, ix bꞌopax cꞌapac cortina yic tzꞌoch dꞌay. 14 A dꞌa jun pacꞌan̈ bꞌaj tzon̈ ochi, ay uqueꞌ metro cꞌapac cortina ayochi yedꞌ oxeꞌ yoyal yedꞌ pax sbꞌachnubꞌal yich. 15 Axo pax dꞌa junxo pacꞌan̈, ay pax uqueꞌ metro cꞌapac yedꞌ oxeꞌ yoyal yedꞌ pax sbꞌachnubꞌal yich. 16 Masanil juntzan̈ cꞌapac cortina chiꞌ, chꞌal lino bꞌaybꞌil ayoch dꞌa cꞌapac. 17 Masanil pax sbꞌachnubꞌal yich oy chiꞌ, nabꞌa bronce ix aji. Axo qꞌuen ayem dꞌa schon oy chiꞌ nabꞌa plata yedꞌ yargollail. 18 A cꞌapac cortina ix och smaculoc stiꞌ amacꞌ chiꞌ, nan̈al sbꞌalun̈il metro sat cꞌapac, axo steel cꞌapac, chabꞌ metro yedꞌ 25 centímetro. Bꞌobꞌilpaxoch yelvanubꞌ cꞌapac, jalbꞌil dꞌa an̈ chꞌal qꞌuicꞌmutzꞌinac, an̈ chꞌal yaxmaquinac, an̈ chac chꞌal yedꞌ pax lino chꞌal bꞌaybꞌil. Lajann̈ej yedꞌ masanil cꞌapac ayoch dꞌa amacꞌ. 19 Ay chan̈eꞌ yoyal yedꞌ chan̈eꞌ sbꞌachnubꞌal yich nabꞌa bronce, axo qꞌuen ayem dꞌa schon yoyal, nabꞌa plata yedꞌ yargollail. 20 Masanil yestacail scajnubꞌ Dios chiꞌ yedꞌ yic cꞌapac cortina ayoch dꞌa spatictac amacꞌ, nabꞌa bronce.
A qꞌuen qꞌueen ix cꞌanchaj dꞌa scajnubꞌ Dios
21 Ix yalanxi vin̈aj Moisés chiꞌ to sbꞌo slistail jantac qꞌuen oro, qꞌuen plata yedꞌ qꞌuen bronce ix och dꞌa scajnubꞌ Jehová, aton bꞌaj sicꞌchaj scaxail trato. A ebꞌ levita ix bꞌoan slistail chiꞌ. A vin̈aj Itamar yuninal vin̈aj Aarón ix cuchbꞌan ebꞌ. 22 A vin̈aj Bezaleel, yuninal vin̈aj Uri, yixchiquin vin̈aj Hur, yin̈tilal Judá ix bꞌoan masanil tastac ix yal Jehová dꞌa vin̈aj Moisés to sbꞌoi. 23 Axo vin̈aj Aholiab yuninal vin̈aj Ahisamac, yin̈tilal Dan ix colvaj yedꞌ vin̈aj Bezaleel chiꞌ. A vin̈aj Aholiab chiꞌ tenum qꞌueen vin̈, jalum cꞌapac vin̈, syalpax sbꞌoanoch yelvanubꞌ yedꞌ an̈ chꞌal qꞌuicꞌmutzꞌinac vin̈, an̈ chꞌal yaxmaquinac, an̈ chac chꞌal yedꞌ an̈ lino chꞌal te vachꞌ.
24 Masanil qꞌuen oro ix cꞌanchaji yic ix bꞌo scajnubꞌ Dios, dꞌa ofrendail ix aj smoljiem qꞌueen. A qꞌuen oro chiꞌ, 21 quintal yedꞌ 95 libraxo qꞌueen, icha yalil qꞌuen echlabꞌ scꞌanchaj dꞌa scajnubꞌ Dios.
25 Axo qꞌuen plata ix molchajemi, a ix icꞌchajqꞌue vaan sbꞌisul ebꞌ anima, 75 quintal yedꞌ chabꞌxo arroba qꞌueen, icha yalil qꞌuen echlabꞌ scꞌanchaj dꞌa scajnubꞌ Dios. 26 Masanil ebꞌ vinac ix tzꞌibꞌchaji, ebꞌ 20 abꞌilxo sqꞌuinal, 603 mil yedꞌ 550 ebꞌ dꞌa smasanil. Junjun ebꞌ chiꞌ nan̈al siclo plata ix yacꞌ ebꞌ, icha yalil qꞌuen echlabꞌ scꞌanchaj dꞌa scajnubꞌ Dios. 27 A qꞌuen plata ix och dꞌa sbꞌachnubꞌal yich smarcoal yedꞌ sbꞌachnubꞌoc yoyal bꞌaj tzꞌoch cꞌapac cortina, 75 quintal qꞌueen dꞌa smasanil. Masanil juntzan̈ qꞌuen plata chiꞌ ix och dꞌa cien sbꞌachnubꞌal chiꞌ, syalelcꞌochi 75 libra ix och dꞌa junjun. 28 A yedꞌ chabꞌxo arroba plata chiꞌ ix sbꞌo qꞌuen gancho vin̈aj Bezaleel ix och dꞌa teꞌ oy yedꞌ smacul sjolom oy chiꞌ yedꞌ qꞌuen argolla.
29 Masanil qꞌuen bronce ix acꞌchaj ofrendail dꞌa Jehová, ay am 53 quintal yedꞌ lajun̈exo libra qꞌueen. 30 A dꞌa qꞌuen bronce chiꞌ ix bꞌo sbꞌachnubꞌal yich yoyal bꞌaj ix can stiꞌ mantiado bꞌaj schꞌox sbꞌa Dios. An̈ejtonaꞌ dꞌa qꞌuen ix bꞌo jun altar nabꞌa bronce yedꞌ pax smallail. Nabꞌa bronce smasanil syamcꞌabꞌil jun altar chiꞌ, 31 yedꞌ pax sbꞌachnubꞌal yich yoyal smacul spatictac amacꞌ yedꞌ yestacail oyanoch dꞌa scajnubꞌ Dios yedꞌ yestacail spatictac yamaqꞌuil cajnubꞌ chiꞌ.