Jun altar nabꞌa bronce
27
Sbꞌochajpax junoc altar dꞌa teꞌ chemteꞌ nabꞌa acacia, lajann̈ej tzꞌaj yechel schan̈il pacꞌan̈. Chabꞌ metro yedꞌ 25 centímetro tzꞌaj junjun pacꞌan̈, jun metro yedꞌ 25 centímetro tzꞌaj schaan̈il. 2 Sbꞌochajqꞌue junjun schꞌaac dꞌa junjun schiquintac. A juntzan̈ schꞌaac chiꞌ yaman tzꞌaj yedꞌ jun altar chiꞌ, spichchaj teꞌ dꞌa qꞌuen bronce. 3 Masanil jantac syamcꞌabꞌil altar chiꞌ, nabꞌa bronceocabi: Aton yedꞌtal bꞌaj tzꞌicꞌchajel qꞌuen ticꞌaqꞌuil taan̈, qꞌuen pala, qꞌuen nivac ucꞌabꞌ, qꞌuen tenedor yedꞌ pax yedꞌtal bꞌaj tzꞌem te tzacꞌacꞌ. 4 Sbꞌopax junoc qꞌuen malla nabꞌa bronce, tzꞌochpax junjun argolla bronce dꞌa junjun yesquinail qꞌueen. 5 Tzꞌelcꞌoch qꞌuen yesquinail chiꞌ dꞌa spatictac jun altar chiꞌ dꞌa yalan̈ jun oyanoch dꞌa stitac. A qꞌuen malla chiꞌ, dꞌa snan̈al jun altar chiꞌ sbꞌojiem qꞌueen. 6 Sbꞌopax juntzan̈oc sbꞌachlabꞌil jun altar chiꞌ. A teꞌ acacia tzꞌochi, tzꞌochpax bronce dꞌa spatic teꞌ. 7 A teꞌ sbꞌachlabꞌil chiꞌ, yovalil tzꞌecꞌ teꞌ dꞌa yol qꞌuen argolla ayoch dꞌa schabꞌil pacꞌan̈ yic vachꞌ sbꞌachjibꞌati. 8 A jun altar chiꞌ, olan tzꞌajcan yool, icha yechel ix in chꞌox dꞌayach dꞌa jolom vitz tic.A yamaqꞌuil scajnubꞌ Dios
9 Sbꞌochajpax cꞌapac cortina lino te vachꞌ bꞌaybꞌil, yic tzꞌoch oyan smaculoc yamaqꞌuil ay dꞌa spatictac in cajnubꞌ chiꞌ. A dꞌa jun pacꞌan̈ dꞌa stojolal sur, 45 metro tzꞌajbꞌat dꞌin̈an cꞌapac cortina chiꞌ. 10 Tzꞌoch 20 teꞌ oy, 20 pax sbꞌachnubꞌal yich nabꞌa bronce, axo dꞌa schon junjun teꞌ oy chiꞌ, tzꞌem jun qꞌuen nabꞌa plata ayoch juntzan̈ argolla dꞌay. 11 Icha pax chiꞌ dꞌa stojolal norte, yovalil tzꞌochpax cꞌapac cortina dꞌa scꞌatul chiꞌ smasanil. 45 metro tzꞌaji, 20 pax teꞌ yoyal tzꞌochi yedꞌ 20 sbꞌachnubꞌal yich nabꞌa bronce, tzꞌem jun qꞌuen nabꞌa plata, ayoch juntzan̈ argolla dꞌay dꞌa schon junjun teꞌ oy chiꞌ. 12 Axo dꞌa stojolal bꞌaj tzꞌem cꞌu, a cꞌapac cortina tzꞌoch dꞌay, 22 metro yedꞌ nan̈alxo tzꞌaj sat yedꞌ lajun̈eꞌ yoyal yedꞌ pax lajun̈eꞌ sbꞌachnubꞌal yich. 13 Axo pax dꞌa stojolal bꞌaj sjavi cꞌu dꞌa jun amacꞌ chiꞌ, 22 metro yedꞌ nan̈alxo sat. Tzꞌochpax cꞌapac cortina dꞌay. 14 A dꞌa jun pacꞌan̈ stiꞌ amacꞌ chiꞌ, ay uqueꞌ metro cꞌapac cortina tzꞌochi yedꞌ oxeꞌ yoyal yedꞌ pax oxeꞌ sbꞌachnubꞌal yich. 15 An̈ejaꞌ dꞌa junxo pacꞌan̈ stiꞌ, ay pax uqueꞌ metro cꞌapac cortina tzꞌochi, ay oxeꞌ oy yedꞌ oxeꞌ sbꞌachnubꞌal yich. 16 Axo dꞌa stiꞌ amacꞌ chiꞌ, ataꞌ sbꞌojioch junoc cꞌapac cortina nabꞌa lino bꞌaybꞌil, nan̈al sbꞌalun̈il metro sat cꞌapac. Sbꞌoji yelvanubꞌ cꞌapac yuj junoc jelan sbꞌoani. A dꞌa an̈ qꞌuicꞌmutzꞌinac chꞌal, an̈ chꞌal yaxmaquinac, an̈ chac chꞌal sbꞌochaj yelvanubꞌ chiꞌ. 17 Masanil teꞌ oy dꞌa spatic yichan̈ amacꞌ chiꞌ, tzꞌem qꞌuen qꞌueen nabꞌa plata ayoch argolla dꞌay dꞌa schon teꞌ. Axo pax sbꞌachnubꞌal yich teꞌ, nabꞌa bronce. 18 A jun amacꞌ chiꞌ, 45 metro scꞌatul, 22 metro yedꞌ nan̈alxo sat, lajann̈ej schapacꞌan̈il. Axo pax cꞌapac cortina ayqꞌue dꞌa chaan̈, chabꞌ metro yedꞌ 25 centímetro steel cꞌapac. A cꞌapac cortina chiꞌ, aton lino vachꞌ bꞌaybꞌil. Axo sbꞌachnubꞌ yich te oy chiꞌ, nabꞌa bronce. 19 Masanil yestacail in cajnubꞌ chiꞌ yedꞌ estaca ayoch dꞌa amacꞌ chiꞌ, nabꞌa bronce tzꞌaji.
Aceite yic candil
20 Al dꞌa ebꞌ etisraelal to syicꞌcot aceite ebꞌ, aton aceite vachꞌ tzꞌel dꞌa sat teꞌ olivo, yic vachꞌ ayn̈ej yaceiteal juntzan̈ candil. 21 A vin̈aj Aarón yedꞌ ebꞌ yuninal ayoch dꞌa yibꞌan̈ sbꞌoanoch scꞌacꞌal candil chiꞌ, yic vachꞌ copanel scꞌacꞌal dꞌa vichan̈ tzꞌecꞌ acꞌval dꞌa yol mantiado bꞌaj tzin chꞌox in bꞌa dꞌa yichan̈elta cꞌapac cortina ayoch yen̈uloc teꞌ scaxail in trato. A jun tic, juneln̈ej ley tzꞌajcan dꞌa e cal a ex israel ex tic yedꞌ pax dꞌa ebꞌ eyin̈tilal.