6 A jun chaleca chiꞌ, a an̈ lino bꞌaybꞌil sbꞌochaj yuj junoc jelan schꞌalvi, tzꞌoch oro icha chꞌal dꞌa scal yedꞌ lana chꞌal qꞌuicꞌmutzꞌinac, yaxmaquinac yedꞌ chacchac. 7 Tzꞌecꞌ bꞌacꞌan scꞌabꞌ dꞌa sjolom sjen̈jabꞌ yic syil-laj sbꞌa cꞌapac yichan̈ yedꞌ cꞌapac spatic. 8 Sbꞌopax jun stzecꞌul yic stzecꞌjioch jun chaleca chiꞌ, junn̈ej tzꞌaj yedꞌoc. A jun stzecꞌul chiꞌ, a an̈ lino bꞌaybꞌil bꞌaj sbꞌoji. Tzꞌoch qꞌuen oro icha chꞌal dꞌa scal yedꞌ lana chꞌal qꞌuicꞌmutzꞌinac, yaxmaquinac yedꞌ chacchac.

9 Tzacꞌ bꞌo chabꞌoc cotac pachan̈ qꞌuen cornalina te vachꞌ. A dꞌa qꞌuen tzꞌoch sbꞌi ebꞌ yuninal vin̈aj Israel. 10 Stzolal tzꞌaj yochi icha ix aj yalji ebꞌ, vaqueꞌ tzꞌoch dꞌa junjun qꞌueen. 11 A mach tzꞌacꞌanoch juntzan̈ bꞌi chiꞌ dꞌa qꞌueen, aton junoc toxonton smunlaj dꞌa bꞌoꞌoj qꞌueen, te vachꞌ tzꞌaj sbꞌoi. Icha yajoch sletrail junoc sello, icha val chiꞌ tzꞌajoch bꞌi chiꞌ dꞌa qꞌueen. 12 A dꞌa cꞌapac sjolom sjen̈jabꞌ jun chaleca chiꞌ tzꞌacꞌjioch qꞌueen. A yopisio juntzan̈ qꞌuen chiꞌ yic snachajcot ebꞌ yin̈tilal Israel. Icha chiꞌ tzꞌaj yicꞌanecꞌ sbꞌi ebꞌ israel chiꞌ vin̈aj Aarón dꞌa sjolom sjen̈jabꞌ ayic tzꞌochcꞌoch vin̈ dꞌa vichan̈ yic tzin naancot ebꞌ. 13 Sbꞌochajpax chabꞌ syamlabꞌil qꞌuen chiꞌ, nabꞌa oro tzꞌoch dꞌay. 14 Sbꞌochajpax chabꞌ cadena nabꞌa oro cꞌotzotzi tzꞌaj spachꞌuchꞌaji, tzꞌoch dꞌa juntzan̈ syamlabꞌil chiꞌ.

15 Axo cꞌapac yic sn̈iꞌ scꞌool, tzꞌoch yopisio yic snachajel tas in gana, lajan val tzutej icha val tzꞌaj sbꞌo chaleca chiꞌ. A an̈ lino bꞌaybꞌil tzꞌoch dꞌay, aton an̈ bꞌobꞌil yuj junoc jelan schꞌalvi. Tzꞌoch qꞌuen oro icha chꞌal dꞌa scal yedꞌ lana chꞌal qꞌuicꞌmutzꞌinac, yaxmaquinac yedꞌ chacchac. 16 Cha pacan̈ tzꞌaji, lajann̈ej sat stitac schan̈il, 22 centímetro junjun stitac chiꞌ. 17 Tzꞌoch qꞌuen qꞌueen teꞌ vachꞌ yilji dꞌa cꞌapac sn̈iꞌ scꞌool chiꞌ, chan̈ tzol tzꞌajoch qꞌueen. A dꞌa bꞌabꞌel tzol, tzꞌoch junoc qꞌuen rubí, junoc qꞌuen crisólito yedꞌ junoc qꞌuen esmeralda. 18 Axo dꞌa schabꞌil tzol, tzꞌoch junoc qꞌuen granate, junoc qꞌuen zafiro yedꞌ junoc qꞌuen jade. 19 Axo pax dꞌa yoxil tzol, tzꞌoch junoc qꞌuen jacinto, junoc qꞌuen ágata yedꞌ junoc qꞌuen amatista. 20 Axo pax dꞌa schan̈il tzol, tzꞌoch junoc qꞌuen topacio, junoc qꞌuen cornalina yedꞌ pax junoc qꞌuen jaspe. Masanil juntzan̈ qꞌueen chiꞌ, oron̈ej syamlabꞌil tzꞌochi. 21 Yovalil lajchaveꞌ juntzan̈ qꞌueen chiꞌ sbꞌoi, yujto lajchaveꞌ sbꞌi ebꞌ yin̈tilal Israel. A dꞌa junjun qꞌuen qꞌueen chiꞌ, ataꞌ tzꞌoch sbꞌi junjun macan̈ ebꞌ, icha yajoch sletrail junoc sello, icha val chiꞌ tzꞌaj yoch bꞌi chiꞌ dꞌa qꞌueen.

22 A juntzan̈ qꞌuen cadena oro pachꞌuchꞌabꞌil toxo ix bꞌinaji, aton qꞌuen tzꞌoch yopisio dꞌa cꞌapac sn̈iꞌ scꞌool. 23 Sbꞌochajpax chabꞌ argolla nabꞌa oro, tzꞌoch dꞌa chabꞌ schiquin cꞌapac sn̈iꞌ scꞌol chiꞌ dꞌa yibꞌan̈. 24 Tzꞌoch qꞌuen cadena oro chiꞌ schabꞌil dꞌa chabꞌ argolla chiꞌ. 25 Tzꞌoch chabꞌ sn̈iꞌ qꞌuen cadena chiꞌ dꞌa qꞌuen syamlabꞌil qꞌuen qꞌueen ayoch dꞌa sjolom sjen̈jabꞌ cꞌapac chaleca, yic scan cꞌapac sn̈iꞌ scꞌol chiꞌ dꞌa yichan̈. 26 Sbꞌopax chabꞌ argolla nabꞌa oro, tzꞌoch dꞌa chabꞌ schiquin cꞌapac smacul sn̈iꞌ scꞌol chiꞌ dꞌa yalan̈, junn̈ej scan yedꞌ jun chaleca chiꞌ. 27 Sbꞌochajpax chabꞌ argolla oro, tzꞌoch dꞌa sn̈itac cꞌapac tzꞌecꞌ dꞌa sjolom sjen̈jabꞌ cꞌapac chaleca dꞌa yichan̈. Junn̈ej scan qꞌuen yedꞌ bꞌaj tzꞌemcꞌoch stzꞌisul stiꞌ cꞌapac chiꞌ, palta dꞌa yibꞌan̈qꞌueta bꞌaj tzꞌecꞌ stzecꞌul snan̈al cꞌapac chaleca, aton jun tzecꞌul te vachꞌ yilji. 28 Icha chiꞌ schalan sbꞌa qꞌuen argolla yic cꞌapac sn̈iꞌ scꞌool yedꞌ qꞌuen yic cꞌapac chaleca chiꞌ. A junoc an̈ chꞌal pachꞌuchꞌabꞌil qꞌuicꞌmutzꞌinac tzꞌoch schꞌan̈aloc yic syam sbꞌa, yic vachꞌ a cꞌapac sn̈iꞌ scꞌol chiꞌ scan dꞌa yibꞌan̈qꞌueta stzecꞌul snan̈al cꞌapac chaleca chiꞌ, yic max yactej sbꞌa cꞌapac. 29 Yuj chiꞌ, ayic tzꞌoch vin̈aj Aarón chiꞌ dꞌa yol in cajnubꞌ dꞌa vichan̈ yedꞌnac sbꞌi ebꞌ yin̈tilal Israel vin̈, yic tzin nacot ebꞌ dꞌa masanil tiempo, yujto ayoch sbꞌi ebꞌ dꞌa cꞌapac smacul sn̈iꞌ scꞌool. A yopisio cꞌapac smacul sn̈iꞌ scꞌol chiꞌ, yic tzꞌojtacajeli tas snibꞌej in cꞌool. 30 Tzacꞌpaxoch qꞌuen Urim yedꞌ qꞌuen Tumim dꞌa yol cꞌapac smacul sn̈iꞌ scꞌol chiꞌ, yuj chiꞌ yedꞌnac qꞌueen vin̈aj Aarón dꞌa sn̈iꞌ scꞌool ayic tzꞌoch vin̈ dꞌa vichan̈. Icha chiꞌ tzꞌaj yicꞌanbꞌat juntzan̈ chiꞌ vin̈ dꞌa vichan̈, yic syal snachajeli tas snibꞌej in cꞌool scꞌulej ebꞌ etchon̈abꞌ.

31 A junoc cꞌapac pichul jucan qꞌuicꞌmutzꞌinac, a tzacꞌ bꞌojoc, yic ol yacꞌoch vin̈aj Aarón chiꞌ dꞌa yol cꞌapac chaleca. 32 Scan yolanil dꞌa snan̈al bꞌaj sqꞌue sjolom vin̈. A dꞌa stitac bꞌaj tzꞌolji sjaj cꞌapac chiꞌ, ataꞌ tzꞌoch junoc cꞌapac stzꞌuliloc stiꞌ, yic vachꞌ max n̈icꞌchaji. 33-34 A jun cꞌapac pichul jucan qꞌuicꞌmutzꞌinac chiꞌ, tzꞌoch yelvanubꞌ cꞌapac dꞌa masanil stitac dꞌa yoctac. Icha sat teꞌ granado yilji yelvanubꞌ cꞌapac stitac tzꞌoch chiꞌ. Sbꞌoji yelvanubꞌ cꞌapac chiꞌ dꞌa lana chꞌal qꞌuicꞌmutzꞌinac yedꞌ lana chꞌal yaxmaquinac yedꞌ pax lana chꞌal chacchac. Tzꞌochpax yunetac campana nabꞌa oro dꞌa scal yechel sat teꞌ granado dꞌa smasanil stitac chiꞌ. 35 Ayic tzꞌoch vin̈aj Aarón dꞌa vichan̈ dꞌa in cajnubꞌ, yovalil ayoch jun cꞌapac chiꞌ yuj vin̈ yic scꞌan̈ juntzan̈ yunetac campana ayoch dꞌa stitac cꞌapac chiꞌ, ayic tzꞌoch vin̈ yedꞌ pax yic tzꞌelta vin̈, yic vachꞌ max cham vin̈.

36 Tzacꞌan bꞌojoc junoc qꞌuen oro jaylechinac yelvanubꞌoc, tzꞌoch juntzan̈ lolonel tic dꞌa qꞌueen, icha junoc sello: Yicn̈ej Jehová Yaji, xchi. 37 Tzꞌoch jun qꞌuen oro jaylechinac chiꞌ dꞌa snan̈al sat scꞌox vin̈aj Aarón chiꞌ, stzecꞌchajoch qꞌuen yedꞌ junoc chꞌal bꞌaybꞌil qꞌuicꞌmutzꞌinac. 38 Yedꞌnacocabꞌn̈ej qꞌuen vin̈aj Aarón dꞌa snan̈al sat yic tzin cha yofrenda ebꞌ etchon̈abꞌ syacꞌ dꞌayin a in Jehová in tic, vachꞌchom man̈ ichaoc dꞌa smojal syutej ebꞌ yacꞌani, palta yuj jun qꞌueen chiꞌ, tzin cha yofrenda ebꞌ chiꞌ.

39 Tzacꞌ bꞌojoc junocxo cꞌapac pichul yelxo val te jucan. A lino vachꞌ tzꞌoch dꞌay, lino pax junoc cꞌox bꞌaybꞌil sbꞌoi. An̈ejaꞌ cꞌapac tzecꞌul, vachꞌ tzꞌaj yochpax stzꞌibꞌul cꞌapac yuj junoc jelan stzꞌisani. 40 Tzacꞌpax bꞌojoc spichul ebꞌ yuninal vin̈aj Aarón chiꞌ, aton sjucan pichul ebꞌ, stzecꞌul ebꞌ yedꞌ scꞌox ebꞌ. Yic vachꞌ yilji ebꞌ, yic nivan pax yelcꞌoch ebꞌ.

41 Icha chiꞌ tzutej acꞌanoch spichul vin̈ ucꞌtac aj Aarón chiꞌ yedꞌ ebꞌ yuninal. Slajvi chiꞌ tzacꞌanqꞌue aceite dꞌa sjolom ebꞌ, yic tzꞌochcan yopisio ebꞌ dꞌa sacerdoteal dꞌayin. 42 Tzacꞌanpax bꞌojoc yol svex ebꞌ, tzꞌemcꞌoch dꞌa xubꞌ ebꞌ, sqꞌuepaxcꞌoch dꞌa snan̈al ebꞌ, yic vachꞌ tzꞌaj smuschaj snivanil ebꞌ. Lino cꞌapac tzꞌoch dꞌa yol svex ebꞌ chiꞌ 43 Syacꞌoch cꞌapac yolvex chiꞌ vin̈aj Aarón chiꞌ yedꞌ ebꞌ yuninal ayic tzꞌoch ebꞌ dꞌa yol mantiado bꞌaj tzin chꞌox in bꞌa, ma ayic tzꞌoch ebꞌ dꞌa slacꞌanil altar dꞌa yol mantiado chiꞌ ayic ayoch ebꞌ dꞌa yopisio, yic vachꞌ max och smul ebꞌ yic max cham ebꞌ. A jun tic, ley tzꞌajcan dꞌa vin̈aj Aarón yedꞌ dꞌa yin̈tilal dꞌa masanil tiempo.