2 Ayic ix bꞌo schaleca vin̈aj Aarón chiꞌ, ix och oro chꞌal dꞌay, lana chꞌal qꞌuicꞌmutzꞌinac, yaxmaquinac, chacchac yedꞌ an̈ lino chꞌal bꞌaybꞌil. 3 Ix sten qꞌuen oro ebꞌ, te jay ix aji. Ix lajvi chiꞌ ix scotac polan qꞌuen ebꞌ, icha an̈ chꞌal ix aj qꞌueen yic syal sjalanbꞌat ebꞌ dꞌa scal juntzan̈xo chꞌal chiꞌ, aton sbꞌoji yuj ebꞌ vachꞌ sbꞌoani. 4 Ix sbꞌoan cꞌapac tzꞌecꞌ bꞌacꞌan ebꞌ dꞌa sjolom sjen̈jabꞌ jun chaleca chiꞌ, yic schalaj sbꞌa cꞌapac yichan̈ yedꞌ cꞌapac spatic. 5 Ix sbꞌoanoch jun tzecꞌul ebꞌ dꞌa jun chaleca chiꞌ, an̈ejpaxaꞌ ix och oro chꞌal dꞌay, lana chꞌal qꞌuicꞌmutzꞌinac, yaxmaquinac yedꞌ chacchac yedꞌ pax an̈ lino chꞌal bꞌaybꞌil, icha val ix aj yalan Jehová dꞌa vin̈aj Moisés.

6 Ix yacꞌanoch qꞌuen cornalina ebꞌ dꞌa syamnubꞌal nabꞌa oro. Ayoch sbꞌi ebꞌ yuninal vin̈aj Israel dꞌa qꞌueen, icha yajoch sletrail junoc sello. 7 Ix yacꞌanoch qꞌuen vin̈aj Bezaleel dꞌa sjolom sjen̈jabꞌ jun chaleca chiꞌ, yic snajicot ebꞌ yuninal vin̈aj Israel chiꞌ, icha ix aj yalan Jehová dꞌa vin̈aj Moisés.

8 Axo pax cꞌapac smacul sn̈iꞌ scꞌol vin̈, ix bꞌojioch stzꞌibꞌul yuj junoc jelan sbꞌoani, icha yic cꞌapac chaleca: Ayoch oro chꞌal dꞌay yedꞌ lana chꞌal qꞌuicꞌmutzꞌinac, yaxmaquinac, chacchac yedꞌ pax lino chꞌal bꞌaybꞌil. 9 Cha pacan̈ ix aji, lajann̈ej ix aj stitac schan̈il ayic pacbꞌilxo. 22 centímetro junjun stitac chiꞌ. 10 A jun chiꞌ, chan̈ tzol ix aj yoch qꞌuen qꞌueen te vachꞌ yilji dꞌay. A dꞌa jun bꞌabꞌel tzol, ayoch qꞌuen rubí, qꞌuen crisólito yedꞌ qꞌuen esmeralda. 11 Axo dꞌa schabꞌil tzol, ayoch qꞌuen granate, qꞌuen zafiro yedꞌ qꞌuen jade. 12 Axo dꞌa yoxil tzol, ayoch qꞌuen jacinto, qꞌuen ágata yedꞌ qꞌuen amatista. 13 Axo dꞌa schan̈il tzol, ayoch qꞌuen topacio, qꞌuen cornalina yedꞌ qꞌuen jaspe. Axo qꞌuen oro ayoch syamlabꞌiloc juntzan̈ qꞌueen chiꞌ. 14 Lajchaveꞌ qꞌueen, aton lajchaveꞌ sbꞌi ebꞌ yuninal vin̈aj Israel. Junjun sbꞌi ebꞌ lajchavan̈ chiꞌ ayoch dꞌa qꞌueen, icha yajoch sletrail junoc sello.

15 A dꞌa cꞌapac smacul sn̈iꞌ scꞌol chiꞌ ix bꞌojioch juntzan̈ cadena nabꞌa oro pachꞌuchꞌabꞌil. 16 Ix bꞌojipax chabꞌ syamlabꞌil dꞌa qꞌuen oro yedꞌ chabꞌ argolla nabꞌa oro. Ix och chabꞌ argolla chiꞌ dꞌa chabꞌ schiquin cꞌapac smacul sn̈iꞌ scꞌol chiꞌ dꞌa yibꞌan̈. 17 Ix ochpax chabꞌ cadena oro dꞌa chabꞌ argolla chiꞌ. 18 A sn̈iꞌ chabꞌ cadena chiꞌ ix och dꞌa chabꞌ syamlabꞌil nabꞌa oro, ix och dꞌa chabꞌ sjolom sjen̈jabꞌ cꞌapac chaleca dꞌa yichan̈. 19 Ix bꞌopax chabꞌxo argolla nabꞌa oro, ix och dꞌa yol chabꞌ schiquin cꞌapac smacul sn̈iꞌ scꞌol chiꞌ dꞌa yalan̈, junn̈ej ix aj yedꞌ cꞌapac chaleca. 20 Ix bꞌoji chabꞌxo argolla nabꞌa oro, ix och dꞌa sn̈itac cꞌapac tzꞌecꞌ dꞌa sjolom sjen̈jabꞌ cꞌapac chaleca, tzꞌemcꞌoch dꞌa yichan̈. Junn̈ej ix can yedꞌ bꞌaj tzꞌemcꞌoch stzꞌisul yedꞌ dꞌa yibꞌan̈qꞌueta bꞌaj tzꞌecꞌ stzecꞌul cꞌapac chaleca chiꞌ. 21 Ix lajvi chiꞌ, junxon̈ej ix ajem qꞌuen argolla ayoch dꞌa cꞌapac yedꞌ qꞌuen ayoch dꞌa cꞌapac smacul sn̈iꞌ scꞌol chiꞌ. Ix tzecꞌchaj syam sbꞌa qꞌuen dꞌa lana chꞌal qꞌuicꞌmutzꞌinac, yic vachꞌ a cꞌapac smacul sn̈iꞌ scꞌol chiꞌ scan dꞌa yibꞌan̈qꞌue jun tzecꞌul ayoch dꞌa cꞌapac chaleca chiꞌ, yic vachꞌ max yactej sbꞌa cꞌapac. Ix bꞌo icha ix aj yalan Jehová dꞌa vin̈aj Moisés. 22 A jun cꞌapac pichul jucan ayoch dꞌa yol cꞌapac chaleca chiꞌ, ix jalchaj bꞌo cꞌapac yedꞌ chꞌal qꞌuicꞌmutzꞌinac. 23 Ix can yolanil sjaj cꞌapac dꞌa snan̈al, ix och stzꞌulil stiꞌ dꞌa sjaj chiꞌ yic max n̈icꞌchaji. 24 Ix och yelvanubꞌ cꞌapac dꞌa stitac dꞌa yoctac, icha yechel sat teꞌ granado, ix bꞌoji yedꞌ lana chꞌal qꞌuicꞌmutzꞌinac, yaxmaquinac, chacchac yedꞌ pax lino chꞌal bꞌaybꞌil. 25 Ix bꞌochajpax yunetac campana, nabꞌa oro ix aji. Ix och dꞌa scal yechel sat teꞌ granado ayoch dꞌa yoctac cꞌapac pichul chiꞌ, 26 syalelcꞌochi, jun yechel sat teꞌ granado chiꞌ, jun yuneꞌ campana, dꞌa stzolal ix ajochi, icha ix aj yalan Jehová dꞌa vin̈aj Moisés. Aton cꞌapac pichul jucan chiꞌ scꞌan vin̈aj Aarón ayic tzꞌoch vin̈ dꞌa yopisio. 27 A cꞌapac spichul vin̈aj Aarón yelxo val te jucan cꞌapac yedꞌ cꞌapac yic ebꞌ yuninal vin̈, nabꞌa lino chꞌal jalbꞌil yuj junoc jalum cꞌapac, a ix och dꞌay. 28 An̈ejaꞌ ix bꞌojipax cꞌapac cꞌox sbꞌacꞌchaji yedꞌ pax juntzan̈xo scꞌoxal yedꞌ cꞌapac yolvex. Lino chꞌal bꞌaybꞌil ix och dꞌa juntzan̈ chiꞌ smasanil. 29 An̈ejaꞌ dꞌa jun tzecꞌul, lino chꞌal bꞌaybꞌil ix och dꞌay, ix bꞌojioch yelvanubꞌ yuj junoc jelan sbꞌoani. Dꞌa an̈ lana chꞌal qꞌuicꞌmutzꞌinac, yaxmaquinac yedꞌ chacchac ix bꞌojioch yelvanubꞌ chiꞌ, icha val ix aj yalan Jehová dꞌa vin̈aj Moisés.

30 Ix sbꞌoanpax jun yelvanubꞌ nabꞌa oro ebꞌ, schꞌoxnabꞌil yopisio dꞌa sat sacerdoteal, ix och juntzan̈ lolonel tic dꞌay icha sello: Yicn̈ej Jehová yaji, xchi. 31 Ix lajvi chiꞌ, ix och jun lana chꞌal qꞌuicꞌmutzꞌinac dꞌay, yic syal stzecꞌjioch jun yelvanubꞌ chiꞌ dꞌa snan̈al sat cꞌapac cꞌox sbꞌacꞌchajochi, icha val ix aj yalan Jehová dꞌa vin̈aj Moisés.

32 Icha chiꞌ ix aj sbꞌochajqꞌue scajnubꞌ Dios bꞌaj schꞌox sbꞌa. Icha val ix aj yalan Jehová dꞌa vin̈aj Moisés chiꞌ, icha val chiꞌ ix aj sbꞌoan ebꞌ israel chiꞌ. 33 Masanil syamcꞌabꞌil scajnubꞌ Dios ix yicꞌcot ebꞌ dꞌa vin̈aj Moisés chiꞌ, aton tic: Syamnubꞌal, smarcoal, sreglail, yoyal yedꞌ pax sbꞌachlabꞌil yich. 34 Cꞌapac cꞌapac tzꞌoch dꞌa yibꞌan̈, nocꞌ tzꞌumal calnel ucꞌnac dꞌa chacchac, nocꞌ tzꞌuum te labꞌabꞌi yedꞌ pax jun cꞌapac cortina tzꞌoch smaculoc teꞌ scaxail trato. 35 Ix yicꞌanpaxcot teꞌ caxa chiꞌ ebꞌ yedꞌ teꞌ regla tzꞌoch sbꞌachlabꞌiloc yedꞌ smacul bꞌaj tzꞌacꞌji tup mul, 36 teꞌ mexa yedꞌ syamcꞌabꞌil yedꞌ ixim pan tzꞌoch dꞌa yichan̈ Jehová. 37 Ix yicꞌanpaxcot jun sbꞌachnubꞌ candil nabꞌa oro ebꞌ yedꞌ pax candil ayoch dꞌa yibꞌan̈ dꞌa stzolal yedꞌ masanil syamcꞌabꞌil yedꞌ aceite yic tzꞌoch scꞌacꞌal candil chiꞌ. 38 Ix yicꞌanpaxcot jun altar nabꞌa oro ebꞌ yedꞌ pax aceite scꞌanchaji ayic sicꞌchajel junoc mach, ma junoc tas tzꞌochcan yicoc Dios yedꞌ incienso sucꞌuqꞌui sjabꞌ, jun cꞌapac cortina yic smacul stiꞌ mantiado, 39 jun altar bronce yedꞌ smallail to bronce paxi, sreglail tzꞌoch sbꞌachlabꞌiloc, syamcꞌabꞌil, jun palangana yedꞌ pax sbꞌachnubꞌ yich. 40 Ix yicꞌanpaxcot cꞌapac cortina ebꞌ, aton cꞌapac tzꞌoch dꞌa spatictac amacꞌ yedꞌ yoyal yedꞌ pax sbꞌachnubꞌ yich, cꞌapac cortina tzꞌoch dꞌa stiꞌ amacꞌ yedꞌ pax schꞌan̈al, yestacail dꞌa spatictac amacꞌ chiꞌ yedꞌ masanil yamcꞌabꞌ scꞌanchaj dꞌa scajnubꞌ Jehová bꞌaj schꞌox sbꞌa. 41 Ix yicꞌanpaxcot cꞌapac pichul ebꞌ, aton cꞌapac scꞌan ebꞌ sacerdote dꞌa yopisio dꞌa yol scajnubꞌ Dios, aton pichul yic yopisio vin̈aj sacerdote Aarón yedꞌ spichul ebꞌ yuninal vin̈ syacꞌoch dꞌa yopisio chiꞌ. 42 Masanil ix sbꞌo ebꞌ israel icha val ix aj yalan Jehová dꞌa vin̈aj Moisés. 43 Ayic ix yilan vin̈aj Moisés chiꞌ to icha chiꞌ ix aj sbꞌoel yuj ebꞌ, ix yalan vachꞌ lolonel vin̈ dꞌa yibꞌan̈ ebꞌ.