A tas tzꞌaj yoch ebꞌ sacerdote dꞌa yopisio
29
Ix yalanxi Jehová: Ayic schaanel yich yopisio vin̈aj Aarón yedꞌ ebꞌ yuninal dꞌa sacerdoteal dꞌayin, aton juntzan̈ tic tza bꞌo yuj ebꞌ: Tzicꞌcot junoc nocꞌ quelem vacax yedꞌ chavan̈oc nocꞌ chꞌac calnel malaj jabꞌoc spaltail. 2 Yedꞌ ixim harina yic trigo te vachꞌ, malaj yich sbꞌat dꞌa scal, aton dꞌa ixim tzacꞌ bꞌojoc ixim pan yedꞌ cꞌoxox pan calabꞌil yedꞌ aceite yedꞌ pax cꞌoxox pan jay sbꞌon̈chajoch aceite dꞌay. 3 Slajvi chiꞌ tzꞌem ixim dꞌa yol junoc yuneꞌ mooch, tzicꞌanbꞌat dꞌa in cajnubꞌ yedꞌ nocꞌ quelem vacax yedꞌ pax chavan̈ nocꞌ chꞌac calnel chiꞌ. 4 Slajvi chiꞌ, tzicꞌanbꞌat vin̈aj Aarón yedꞌ ebꞌ yuninal dꞌa yichan̈ mantiado bꞌaj tzin chꞌox in bꞌa. Ataꞌ sbꞌiquel sbꞌa ebꞌ. 5 Slajvi chiꞌ, tzicꞌanpaxbꞌat cꞌapac pichul yic sacerdoteal. Tzacꞌanoch cꞌapac dꞌa vin̈aj Aarón chiꞌ, aton cꞌapac pichul yelxo val te jucan yedꞌ junxo cꞌapac jucan, cꞌapac chaleca yedꞌ cꞌapac smacul sn̈iꞌ scꞌool, tzacꞌanoch stzecꞌul snan̈al jun chaleca chiꞌ. 6 Slajvi chiꞌ, tza bꞌacꞌanoch scꞌox vin̈ dꞌa sjolom. A dꞌa snan̈al sat scꞌox vin̈ chiꞌ tzacꞌoch jun oro jay lechinac, aton schꞌoxan yechel to vic yaj vin̈. 7 Slajvi chiꞌ tzicꞌancot aceite scꞌanchaji ayic sicꞌchajel junoc mach tzꞌochcan vicoc. Tzacꞌanqꞌue dꞌa sjolom vin̈aj Aarón chiꞌ yic tzꞌochcan vin̈ sacerdoteal. 8 Slajvi chiꞌ, sjapax ebꞌ yuninal vin̈ chiꞌ dꞌa a tzꞌey, tzacꞌanoch spichul ebꞌ jucan. 9 Tza bꞌoanoch stzecꞌul vin̈aj Aarón yedꞌ ebꞌ yuninal, tza bꞌoanqꞌue scꞌox ebꞌ. Ichaton chiꞌ tzꞌaj yochcan yopisio ebꞌ dꞌa masanil tiempo. 10 Slajvi chiꞌ, tzicꞌanbꞌat nocꞌ quelem vacax dꞌa yichan̈ mantiado bꞌaj tzin chꞌox in bꞌa, yic vachꞌ syacꞌqꞌue scꞌabꞌ vin̈aj Aarón yedꞌ ebꞌ yuninal dꞌa sjolom nocꞌ. 11 A dꞌa yichan̈ mantiado chiꞌ tza milcham nocꞌ dꞌa vichan̈. 12 Tzicꞌanqꞌueta jabꞌoc schiqꞌuil nocꞌ yedꞌ yiximal a cꞌabꞌ, tza sucanoch dꞌa schꞌac altar ayqꞌue dꞌa schiquintac, axo masanil chicꞌ scan chiꞌ, tza tobꞌcanecꞌ dꞌa yichtac altar chiꞌ. 13 Axo masanil xepuꞌ ayoch dꞌa schꞌan̈tzaꞌ nocꞌ yedꞌ dꞌa yibꞌan̈ seyubꞌ nocꞌ yedꞌ pax dꞌa stut nocꞌ, tzꞌiqꞌueli tza n̈usantzꞌa dꞌa yibꞌan̈ altar. 14 Axo nocꞌ chibꞌej chiꞌ yedꞌ stzꞌumal nocꞌ, stzaꞌ nocꞌ, masanil juntzan̈ chiꞌ tza n̈ustzꞌa dꞌa spatiquel campamento, yujto a jun nocꞌ chiꞌ silabꞌ yaj yic tzꞌacꞌji tup mul.15 Slajvi chiꞌ, tzicꞌancot junoc nocꞌ chꞌac calnel, syacꞌanqꞌue scꞌabꞌ vin̈aj Aarón yedꞌ ebꞌ yuninal chiꞌ dꞌa sjolom nocꞌ. 16 Tza milancham nocꞌ, tza tzicanoch schiqꞌuil nocꞌ dꞌa schan̈il pacꞌan̈ altar. 17 Slajvi chiꞌ, tza cotac xicanbꞌat nocꞌ, smaxchajel nocꞌ yol scꞌool, nocꞌ yoc, junn̈ej tzꞌaj yedꞌ nocꞌ cotac xicabꞌil chiꞌ yedꞌ pax nocꞌ sjolom. 18 Tza n̈usantzꞌa nocꞌ silabꞌil dꞌa yibꞌan̈ altar dꞌa vichan̈ yuj vicꞌjichaan̈, aton jun silabꞌ sn̈usjitzꞌa smasanil, sumumi sjabꞌ svabꞌi.
19 Slajvi chiꞌ, tzicꞌancot junxo nocꞌ calnel, syacꞌanqꞌue scꞌabꞌ vin̈aj Aarón yedꞌ ebꞌ yuninal dꞌa sjolom nocꞌ, 20 tza milancham nocꞌ. Tzicꞌanqꞌue jabꞌoc schiqꞌuil nocꞌ, tza sucanecꞌ dꞌa sjayil schiquin vin̈aj Aarón yedꞌ ebꞌ yuninal. Aton dꞌa schiquin ebꞌ dꞌa svachꞌ. Tza sucpaxecꞌ jabꞌoc dꞌa smam scꞌabꞌ ebꞌ yedꞌ dꞌa smam yoc ebꞌ dꞌa svachꞌ. Slajvi chiꞌ tza tzicancanem masanil schiqꞌuil nocꞌ chꞌac calnel chiꞌ dꞌa spatictac altar chiꞌ. 21 Axo schiqꞌuil nocꞌ calnel ayoch dꞌa yibꞌan̈ altar chiꞌ tzicꞌqꞌue jabꞌoc, tza tzicanbꞌat dꞌa yibꞌan̈ vin̈aj Aarón yedꞌ dꞌa spichul vin̈ yedꞌ dꞌa yibꞌan̈ ebꞌ yuninal vin̈ yedꞌ pax dꞌa spatictac spichul ebꞌ. Icha pax chiꞌ tzꞌutaj aceite scꞌanchaji yic sicꞌchaj junoc mach tzꞌochcan vicoc. Icha val chiꞌ tzꞌaj sicꞌchajcanel vin̈aj Aarón yedꞌ ebꞌ yuninal yedꞌ spichul ebꞌ.
22 Slajvi chiꞌ, tzicꞌanel xepuꞌ ayoch dꞌa sn̈e nocꞌ chꞌac calnel chiꞌ, dꞌa nocꞌ schꞌan̈tzaꞌ yedꞌ dꞌa yibꞌan̈ seyubꞌ nocꞌ, tzicꞌanpaxcot chabꞌ nocꞌ stut yedꞌ pax xepuꞌ ayoch dꞌay yedꞌ pax nocꞌ sbꞌacꞌchil xubꞌ dꞌa svachꞌ yujto a jun nocꞌ chꞌac calnel chiꞌ, aton nocꞌ scꞌanchaji yic tzꞌochcan ebꞌ sacerdote dꞌa yopisio. 23 Tzicꞌanpaxqꞌueta ixim pan malaj yich, aton ixim ayem dꞌa yol mooch dꞌa vichan̈, junoc ixim pan setan setan yaji, junoc ixim calabꞌil yedꞌ aceite yedꞌ junoc ixim cꞌoxox. 24 Masanil juntzan̈ chiꞌ tzacꞌoch dꞌa yol scꞌabꞌ vin̈aj Aarón yedꞌ dꞌa ebꞌ yuninal, sbꞌachchajoch dꞌa vichan̈. 25 Slajvi chiꞌ, tzicꞌanecꞌ dꞌa yol scꞌabꞌ ebꞌ, tza n̈usantzꞌa dꞌa yibꞌan̈ altar chiꞌ. Junn̈ej tzꞌaj stzꞌa yedꞌ nocꞌ chꞌac calnel van stzꞌa silabꞌil, sumumi sjabꞌ svabꞌi. Sn̈usjitzꞌa jun ofrenda chiꞌ yuj vicꞌjichaan̈. 26 A nocꞌ chꞌac calnel scꞌanchaji ayic tzꞌoch vin̈aj Aarón dꞌa yopisio, tzicꞌcanel sn̈iꞌ scꞌol nocꞌ. Tza bꞌachanqꞌue dꞌa vichan̈ a in Jehová in tic, yujto ic tzꞌajcan jun macan̈ nocꞌ chibꞌej chiꞌ.
27 Tza pojanel nocꞌ sn̈iꞌ scꞌol yedꞌ nocꞌ xubꞌ ix a bꞌachqꞌue dꞌa vichan̈, aton yic nocꞌ ix och yopisio ayic ix ochcan vin̈aj Aarón yedꞌ ebꞌ yuninal dꞌa sacerdoteal. 28 A chabꞌ macan̈ nocꞌ chibꞌej chiꞌ, yic vin̈aj Aarón yedꞌ ebꞌ yuninal tzꞌajcani, aton ofrenda syacꞌ ebꞌ eyetisraelal. Aton chabꞌ macan̈ nocꞌ chiꞌ syacꞌ ebꞌ dꞌayin yofrendaoc yic juncꞌolal.
29-30 A spichul vin̈aj Aarón syacꞌoch dꞌa yopisio, scann̈ej dꞌa ebꞌ yin̈tilal vin̈. A junoc yin̈tilal vin̈ scan dꞌa yopisio, ayic tzꞌoch dꞌa yol mantiado bꞌaj tzin chꞌox in bꞌa, yuj in yacꞌan servil dꞌa yol jun lugar A Inn̈ej Ay Vicoꞌ, an̈ej juntzan̈ pichul chiꞌ syacꞌoch ebꞌ dꞌa uqueꞌ cꞌual ayic tzꞌochcan ebꞌ sacerdoteal.
31 Tzicꞌanpaxbꞌat nocꞌ calnel ix bꞌinaji yic tzꞌochcan yopisio ebꞌ. A dꞌa jun lugar sicꞌbꞌilpaxeli, ataꞌ tza tzꞌan̈ nocꞌ. 32 A vin̈aj Aarón yedꞌ ebꞌ yuninal schiꞌan nocꞌ chibꞌej chiꞌ, svaanpax juntzan̈ ixim pan ayem dꞌa yol jun yuneꞌ mooch chiꞌ dꞌa yichan̈ mantiado bꞌaj tzin chꞌox in bꞌa. 33 Aton ebꞌ schiꞌan nocꞌ ix acꞌji yic tzꞌacꞌji tup schucal ebꞌ, aton yic ix sicꞌchajel ebꞌ yedꞌ schaancan yopisio ebꞌ dꞌa sacerdoteal, palta malaj junoc chꞌoc animail syal schiꞌan juntzan̈ chiꞌ, yujto vic yaji. 34 Tato ayto nocꞌ chibꞌej chiꞌ yedꞌ ixim pan chiꞌ scan dꞌa jun cꞌu chiꞌ, tza n̈uscantzꞌaoc. Malaj junocxo mach syal schiꞌani ma svaani, yujto vic yaji.
35 Masanil juntzan̈ tic tza bꞌo dꞌa vin̈aj Aarón yedꞌ dꞌa ebꞌ yuninal icha val tzꞌaj valan dꞌayach tic. Uqueꞌ cꞌual syicꞌ yuj acꞌancanoch yopisio ebꞌ chiꞌ. 36 Junjun nocꞌ quelem vacax tzacꞌ silabꞌil dꞌa junjun cꞌu, yic tzꞌacꞌji lajvoc smul ebꞌ. Icha chiꞌ tzꞌaj a sacbꞌitan altar dꞌa vichan̈, tza sucanpaxoch aceite dꞌa yibꞌan̈ yic tzꞌochcan yopisio. 37 Uqueꞌ cꞌual tzacꞌ silabꞌ dꞌa yibꞌan̈ altar chiꞌ, yic tzꞌacꞌji lajvoc mul. Icha val chiꞌ tzꞌaj yochcan jun altar chiꞌ vicoc, tzꞌoch dꞌa yopisio. Yaln̈ej tastac tzꞌoch tennaj dꞌa jun altar chiꞌ, vicxo tzꞌajcani.
Ofrenda tzꞌacꞌji dꞌa junjun cꞌu
38 Junjun cꞌu yovalil sn̈usji chavan̈ nocꞌ calnel jun abꞌil sqꞌuinal silabꞌil dꞌa yibꞌan̈ altar. 39 Jun nocꞌ tza n̈ustzꞌa dꞌa qꞌuin̈ibꞌalil, junxo nocꞌ tza n̈ustzꞌa dꞌa yemcꞌualil. 40 Tzacꞌ chan̈eoc libra harina te vachꞌ yedꞌ nocꞌ stzꞌa dꞌa qꞌuin̈ibꞌalil chiꞌ, tza calej ixim harina chiꞌ yedꞌ junoc litro aceite yic sat teꞌ olivo, tza secanem junoc litro vino ofrendail. 41 An̈ejaꞌ icha chiꞌ tzutejpax junxo nocꞌ calnel chiꞌ dꞌa yemcꞌualil, ixim harina yedꞌ vino ofrendail. A juntzan̈ ofrenda sn̈usjitzꞌa chiꞌ, te sumumi sjabꞌ svabꞌi. 42 A juntzan̈ silabꞌ chiꞌ, ol sn̈usn̈ejtzꞌa ebꞌ dꞌa vichan̈ dꞌa masanil tiempo dꞌa stojolal stiꞌ mantiado bꞌaj tzin chꞌox in bꞌa, ayic tzin lolon eyedꞌoc. 43 Ataꞌ ol in chꞌox in bꞌa dꞌa ebꞌ etisraelal, yuj chiꞌ vic ol ajcan jun mantiado chiꞌ, yuj in tziquiquial. 44 A in val tzin sicꞌcanoch jun mantiado chiꞌ vicoc yedꞌ yaltaril. Tzin sicꞌpaxcanel vin̈aj Aarón yedꞌ ebꞌ yuninal chiꞌ yic tzꞌochcan ebꞌ sacerdoteal dꞌayin. 45 Ol in cajnaj dꞌa scal ebꞌ etisraelal, yujto e Diosal in. 46 Icha val chiꞌ ol aj snachajel yuj ebꞌ to a in ton Jehová in sDiosal in ebꞌ edꞌoc, a in ix ex viqꞌuelta dꞌa Egipto yic tzin cajnaj dꞌa e cal, a in Jehová e Diosal in tic, xchi Jehová.