2 Al jun checnabꞌil tic dꞌa ebꞌ etchon̈abꞌ chiꞌ: A dꞌa stiempoal chequel yajcani, scꞌanabꞌajej ebꞌ yacꞌan juntzan̈ ofrenda sn̈usjitzꞌa silabꞌil dꞌayin, te sucꞌuqꞌui sjabꞌ svabꞌi, xchi dꞌa vin̈.

3-8 Ix yalan vin̈aj Moisés chiꞌ dꞌa ebꞌ yetchon̈abꞌ chiꞌ yuj juntzan̈ ofrenda yovalil sn̈ustzꞌa ebꞌ yuj yicꞌjichaan̈ Jehová. Junjun cꞌu sn̈usjitzꞌa chatacvan̈ nocꞌ quelemtac calnel jun abꞌil sqꞌuinal, malaj jabꞌoc spaltail. Jun nocꞌ sn̈usjitzꞌa dꞌa qꞌuin̈ibꞌalil, axo junxo nocꞌ dꞌa yemcꞌualil. Yovalil tzꞌacꞌji chan̈eꞌ libra ixim harina te vachꞌ, scalaj yedꞌ junoc litro aceite yic sat teꞌ olivo ofrendail yedꞌ junjun nocꞌ. Tzꞌacꞌjipax junjun litro vino yedꞌ junjun nocꞌ calnel chiꞌ, secchajem bꞌaj ay scajnubꞌ Jehová yuj yicꞌjichaan̈. A dꞌa lum vitzal Sinaí ix schec Jehová acꞌjoc juntzan̈ silabꞌ tic dꞌa junjun cꞌu, aton ofrenda sucꞌuqꞌui sjabꞌ syabꞌ Jehová.

9 A dꞌa scꞌual icꞌoj ip, yovalil syacꞌ chavan̈ocxo nocꞌ quelemtac calnel ebꞌ, aton nocꞌ jun abꞌil sqꞌuinal, malaj jabꞌoc spaltail yedꞌ vajxaqueꞌ libra ixim harina te vachꞌ calabꞌil yedꞌ aceite dꞌa ofrendail dꞌa ixim trigo. Tzꞌacꞌjipax vino yedꞌoc, ichataxon tzꞌaj yacꞌji. 10 Masanil juntzan̈ silabꞌ chiꞌ tzꞌacꞌji dꞌa scꞌual icꞌoj ip, palta chꞌoc yel dꞌa yichan̈ silabꞌ tzꞌacꞌjitaxon dꞌa junjun cꞌu yedꞌ pax vino tzꞌacꞌjitaxon yedꞌoc.

11 A dꞌa bꞌabꞌel cꞌual yic junjun uj tzeyacꞌ chavan̈ nocꞌ quelemtac vacax silabꞌil yedꞌ jun nocꞌ chꞌac calnel yedꞌ ucvan̈ nocꞌ quelemtac calnel jun abꞌil sqꞌuinal. Masanil nocꞌ tic, mocabꞌa jabꞌoc spaltail nocꞌ. 12 A yedꞌ junjun nocꞌ vacax chiꞌ tzeyacꞌ lajchaveoc libra ixim harina te vachꞌ, tze calan yedꞌ aceite. Axo yedꞌ nocꞌ chꞌac calnel chiꞌ tzeyacꞌ vajxaqueoc libra ixim harina te vachꞌ, calabꞌil yedꞌ aceite. 13 Axo yedꞌ junjun nocꞌ quelemtac calnel chiꞌ, chan̈eꞌ libra ixim harina te vachꞌ calabꞌil yedꞌ aceite tzeyacꞌaꞌ. Aton jun ofrenda sn̈usjitzꞌa chiꞌ, sucꞌuqꞌui sjabꞌ syabꞌ Jehová. 14 Axo vino tzꞌacꞌjitaxon dꞌa ofrendail, chabꞌ litro tzꞌacꞌji yedꞌ junjun nocꞌ vacax chiꞌ, nan̈al schabꞌil litro dꞌa jun nocꞌ chꞌac calnel chiꞌ, junjun litro dꞌa junjun nocꞌ quelemtac calnel chiꞌ. Aton juntzan̈ ofrenda chiꞌ yovalil tzꞌacꞌji dꞌa junjun uj dꞌa yol abꞌil. 15 A yedꞌ silabꞌ sn̈usjitzꞌa chiꞌ, tzꞌacꞌjipax junoc nocꞌ mam chiva dꞌa Jehová silabꞌil yuj mul yedꞌ vino tzꞌacꞌjitaxon yedꞌoc.

16 Dꞌa 14 yoch bꞌabꞌel uj dꞌa yol abꞌil, ataꞌ tzꞌoch qꞌuin̈ yic tze naancoti ayic eyelnac libre yuj Jehová. 17 Axo dꞌa 15 yoch uj chiꞌ, ataꞌ tzꞌoch uqueꞌ cꞌual qꞌuin̈, aton taꞌ svaji ixim pan malaj yich. 18 A dꞌa bꞌabꞌel cꞌu dꞌa uqueꞌ cꞌual chiꞌ tzꞌoch jun nivan molanil yuj eyoch ejmelal. A dꞌa jun cꞌu chiꞌ, malaj junoc macan̈ munlajel tze cꞌulej. 19 Chavan̈ nocꞌ quelemtac vacax tzꞌacꞌji silabꞌil, jun nocꞌ chꞌac calnel yedꞌ ucvan̈ nocꞌ quelemtac calnel junjun abꞌil sqꞌuinal. Masanil nocꞌ chiꞌ, malajocabꞌ jabꞌoc spaltail nocꞌ. 20 A yedꞌ juntzan̈ silabꞌ chiꞌ tzꞌacꞌji juntzan̈xo ofrenda tzꞌacꞌjitaxon yedꞌoc, ixim harina calabꞌil yedꞌ aceite, tzꞌacꞌji icha tic: Lajchaveꞌ libra ixim yedꞌ junjun nocꞌ vacax chiꞌ, vajxaqueꞌ libra ixim yedꞌ jun nocꞌ chꞌac calnel chiꞌ, 21 chan̈eꞌ libra ixim yedꞌ junjun nocꞌ quelemtac calnel chiꞌ. 22 Tzꞌacꞌjipax junoc nocꞌ mam chiva silabꞌil yuj mul yic stupcanel e mul dꞌa eyibꞌan̈. 23 Masanil juntzan̈ chiꞌ tzꞌacꞌji yedꞌ jun silabꞌ sn̈usjitzꞌa dꞌa qꞌuin̈ibꞌalil dꞌa junjun cꞌu. 24 Icha chiꞌ tzꞌaj dꞌa junjun cꞌu dꞌa uqueꞌ cꞌual qꞌuin̈ chiꞌ. Sn̈usjitzꞌa juntzan̈ ofrenda chiꞌ, sucꞌuqꞌui sjabꞌ syabꞌ Jehová. Palta chꞌoc pax yaj silabꞌ tzꞌacꞌjitaxon dꞌa junjun cꞌu yedꞌ pax vino tzꞌacꞌjitaxon yedꞌoc. 25 Axo dꞌa yuquil cꞌual, tzꞌochpax junxo nivan molanil yuj eyoch ejmelal. A dꞌa jun cꞌu chiꞌ, malaj junoc macan̈ munlajel tze cꞌulej.

26 Ayic toxo ix ecꞌbꞌat uqueꞌ semana yecꞌ qꞌuin̈ yic tze naancot eyelnac libre yuj Jehová, tzeyacꞌan eyofrenda yuj sbꞌabꞌel sat eyavbꞌen tze moloꞌ. Tze molbꞌej e bꞌa e masanil yuj eyoch ejmelal dꞌa Jehová, malaj junoc macan̈ munlajel tze cꞌulej. 27 Tzeyacꞌpax junoc silabꞌ te vachꞌ dꞌa Jehová sucꞌuqꞌui sjabꞌ syabꞌi: Chavan̈ nocꞌ quelemtac vacax, junoc nocꞌ chꞌac calnel, ucvan̈oc nocꞌ quelemtac calnel jun abꞌil sqꞌuinal, 28 yedꞌ ixim harina te vachꞌ calabꞌil yedꞌ aceite tzꞌacꞌjitaxoni, lajchaveꞌ libra ixim yedꞌ junjun nocꞌ vacax chiꞌ, vajxaqueꞌ libra ixim yedꞌ jun nocꞌ chꞌac calnel chiꞌ, 29 chan̈eꞌ libra ixim yedꞌ junjun nocꞌ quelemtac calnel chiꞌ. 30 Tzeyacꞌanpax junoc nocꞌ mam chiva silabꞌil yuj e mul. 31 A yedꞌ juntzan̈ silabꞌ chiꞌ tzꞌacꞌjin̈ej ofrenda dꞌa ixim harina yedꞌ vino. Tzeyacꞌanpax silabꞌ tzꞌacꞌjitaxon dꞌa junjun cꞌu. Masanil nocꞌ tzꞌacꞌji chiꞌ, yovalil malaj jabꞌoc spaltail nocꞌ.