Qꞌuin̈ yic spuji qꞌuen trompeta
29
A dꞌa bꞌabꞌel cꞌual yic yuquil uj, tze molbꞌej e bꞌa yic tzex och ejmelal. A dꞌa jun cꞌual chiꞌ malaj junoc mach smunlaji. A jun cꞌual chiꞌ, scꞌual yic spuji qꞌuen trompeta. 2 Tze n̈usantzꞌa juntzan̈ silabꞌ sucꞌuqꞌui sjabꞌ syabꞌ Jehová: Jun nocꞌ quelem vacax, junoc nocꞌ chꞌac calnel yedꞌ ucvan̈ nocꞌ quelemtac calnel jun abꞌil sqꞌuinal. Masanil juntzan̈ nocꞌ nocꞌ chiꞌ, malajocabꞌ jabꞌoc spaltail nocꞌ. 3 Tzeyacꞌanpax ixim harina calabꞌil yedꞌ aceite tzꞌacꞌjitaxon yedꞌoc, lajchaveꞌ libra ixim yedꞌ jun nocꞌ vacax chiꞌ, vajxaqueꞌ libra ixim yedꞌ jun nocꞌ chꞌac calnel chiꞌ, 4 chan̈eꞌ libra ixim yedꞌ junjun nocꞌ quelemtac calnel chiꞌ. 5 Tzꞌacꞌjipax junoc nocꞌ mam chiva silabꞌil yic stupcanel e mul dꞌa eyibꞌan̈. 6 Tzꞌacꞌjipax silabꞌ tzꞌacꞌjitaxon dꞌa junjun uj yedꞌ pax silabꞌ tzꞌacꞌjitaxon dꞌa junjun cꞌu yedꞌ ixim harina yedꞌ vino tzꞌacꞌjitaxoni, icha val ix aj yalan Jehová. A juntzan̈ chiꞌ aton ofrenda sn̈usji, te sucꞌuqꞌui sjabꞌ syabꞌ Jehová.A jun scꞌual yic tzꞌacꞌji tup mul
7 Dꞌa slajun̈il cꞌual yoch yuquil uj chiꞌ, tze molbꞌanpax e bꞌa yuj eyoch ejmelal, tzex och dꞌa tzecꞌojcꞌolal dꞌa jun cꞌu chiꞌ, malaj junoc macan̈ munlajel tze cꞌulej. 8 Tze n̈usantzꞌa juntzan̈ silabꞌ sucꞌuqꞌui sjabꞌ syabꞌ Jehová, jun nocꞌ quelem vacax, jun nocꞌ chꞌac calnel yedꞌ ucvan̈ nocꞌ quelemtac calnel jun abꞌil sqꞌuinal. Masanil juntzan̈ nocꞌ nocꞌ chiꞌ malajocabꞌ jabꞌoc spaltail nocꞌ. 9 Tzeyacꞌanpax ixim harina te vachꞌ, calabꞌil yedꞌ aceite yedꞌoc, lajchaveꞌ libra ixim yedꞌ jun nocꞌ vacax chiꞌ, vajxaqueꞌ libra ixim yedꞌ jun nocꞌ chꞌac calnel chiꞌ, 10 chan̈eꞌ libra ixim yedꞌ junjun nocꞌ quelemtac calnel chiꞌ. 11 Tzeyacꞌanpax junoc nocꞌ mam chiva silabꞌil yuj yacꞌji tup e mul. Tzeyacꞌanpax silabꞌ tzꞌacꞌji dꞌa scꞌual yacꞌji tup mul yedꞌ pax silabꞌ tzꞌacꞌjitaxon dꞌa junjun cꞌu, ixim harina yedꞌ pax vino.
Ofrenda yic qꞌuin̈ Chinama
12 An̈ejaꞌ dꞌa 15 cꞌual yoch yuquil uj tze molbꞌej e bꞌa eyoch ejmelal. A dꞌa jun cꞌu chiꞌ, malaj junoc macan̈ munlajel tze cꞌulej. Uqueꞌ cꞌual tzeyacꞌoch qꞌuin̈ yuj eyicꞌanchaan̈ Jehová. 13-34 A dꞌa junjun cꞌual qꞌuin̈ chiꞌ tze n̈usantzꞌa juntzan̈ nocꞌ nocꞌ dꞌa silabꞌil, te sucꞌuqꞌui sjabꞌ syabꞌ Jehová: Chavan̈ nocꞌ chꞌac calnel yedꞌ 14-oc nocꞌ quelemtac calnel junjun abꞌil sqꞌuinal. Masanil juntzan̈ nocꞌ nocꞌ chiꞌ malajocabꞌ jabꞌoc spaltail nocꞌ. Yedꞌ pax ixim harina calabꞌil yedꞌ aceite tzꞌacꞌji ofrendail: Vajxaqueꞌ libra ixim yedꞌ junjun nocꞌ chꞌac calnel chiꞌ, chan̈eꞌ libra ixim yedꞌ junjun nocꞌ quelemtac calnel chiꞌ. Tzeyacꞌanpax junoc nocꞌ mam chiva silabꞌil yuj yacꞌji tup e mul yedꞌ pax silabꞌ tzꞌacꞌjitaxon dꞌa junjun cꞌu yedꞌ pax ixim harina yedꞌ vino tzꞌacꞌjitaxon yedꞌoc dꞌa ofrendail.
A yedꞌ juntzan̈ nocꞌ nocꞌ chiꞌ, tzeyacꞌpax 13-oc nocꞌ quelemtac vacax dꞌa bꞌabꞌel cꞌu, 12-oc nocꞌ dꞌa schabꞌil cꞌual, 11-oc nocꞌ dꞌa yoxil cꞌual, 10-oc nocꞌ dꞌa schan̈il cꞌual, bꞌalun̈van̈oc nocꞌ dꞌa yoil cꞌual, vajxacvan̈oc nocꞌ dꞌa svaquil cꞌual, ucvan̈oc nocꞌ dꞌa yuquil cꞌual. A yedꞌ junjun nocꞌ quelemtac vacax chiꞌ tzꞌacꞌji lajchaveoc libra ixim harina vachꞌ, calabꞌil yedꞌ aceite. Stzꞌa juntzan̈ nocꞌ chiꞌ silabꞌil, te sucꞌuqꞌui sjabꞌ syabꞌ Jehová.
35 Axo dꞌa svajxaquil cꞌual, tze molbꞌanoch e bꞌa eyoch ejmelal. Malaj munlajel tze cꞌulej dꞌa jun cꞌual chiꞌ. 36 Tze n̈usantzꞌa junoc nocꞌ quelem vacax silabꞌil te sucꞌuqꞌui sjabꞌ syabꞌ Jehová yedꞌ junoc nocꞌ chꞌac calnel yedꞌ ucvan̈oc nocꞌ quelemtac calnel junjun abꞌil sqꞌuinal. Masanil juntzan̈ nocꞌ nocꞌ chiꞌ malajocabꞌ spaltail nocꞌ. 37 An̈ejtonaꞌ tzeyacꞌanpax ixim harina ofrendail yedꞌ vino yedꞌ nocꞌ vacax chiꞌ, nocꞌ chꞌac calnel chiꞌ yedꞌ pax nocꞌ quelemtac calnel chiꞌ icha yalan ley. 38 Tzeyacꞌan junoc nocꞌ mam chiva silabꞌil yuj yacꞌji tup e mul yedꞌ pax silabꞌ tzꞌacꞌjitaxon dꞌa junjun cꞌu yedꞌ ixim harina yedꞌ vino tzꞌacꞌjitaxon yedꞌoc dꞌa ofrendail.
39 Aton juntzan̈ silabꞌ tic yovalil tzeyacꞌ dꞌa Jehová dꞌa juntzan̈ qꞌuin̈ to chequel yaj scꞌual. A yedꞌ juntzan̈ tic syal eyacꞌanpax ofrenda to ix eyacꞌ e tiꞌ eyacꞌani, ma junoc ofrenda ton̈ej tzꞌel dꞌa e cꞌol eyacꞌani. Syal eyacꞌan silabꞌ to stzꞌai, ixim harina, ma vino dꞌa ofrendail, ma silabꞌ yic juncꞌolal.
40 Icha val chiꞌ ix aj yalan vin̈aj Moisés dꞌa ebꞌ israel masanil tas ix yal Jehová dꞌa vin̈.