2 Ix yal Jehová tato ay junoc vin̈ vinac syacꞌ stiꞌ yacꞌan junoc tas dꞌa Jehová, mato syacꞌ stiꞌ dꞌa junoc tas ol scꞌulej, yovalil scꞌanabꞌajej scꞌulan tas ix yal chiꞌ. Max yal sqꞌuexan tas ix yal chiꞌ. 3 Tato a junoc ix cobꞌes aytoecꞌ yedꞌ smam, syacꞌ stiꞌ yacꞌan junoc tas dꞌa Jehová, mato syacꞌ stiꞌ dꞌa junoc tas man̈ ol scꞌulej, 4 tato malaj tas syal vin̈ smam ix chiꞌ ayic syabꞌan vin̈ to ay stiꞌ ix ix yacꞌaꞌ, yovalil scꞌanabꞌajej ix scꞌulan bꞌaj ix yacꞌ stiꞌ chiꞌ. 5 Palta tato aꞌ vin̈ smam ix chiꞌ tzꞌacꞌan yovalil ayic syabꞌan vin̈ to ay stiꞌ ix ix yacꞌaꞌ, tato icha chiꞌ, man̈xo yovaliloc scꞌulej ix bꞌaj ix yacꞌ stiꞌ chiꞌ. Maxtzac acꞌjilaj pural ix yuj Jehová bꞌaj ix yacꞌ stiꞌ chiꞌ.

6 Tato ay junoc ix ix syacꞌ stiꞌ dꞌa Jehová vachꞌchom ix cham val snaani, ma jun elan̈chamel ix yal ix to scꞌulej junoc tasi, slajvi yacꞌan stiꞌ ix chiꞌ tzꞌoch yetbꞌeyum ix, 7 tato ayic syabꞌan vin̈ yetbꞌeyum ix bꞌaj ix yacꞌ stiꞌ chiꞌ, malajn̈ej tas syal vin̈ yuuj, yovalil scꞌanabꞌajej ix bꞌaj ix yacꞌ stiꞌ chiꞌ. 8 Palta tato ayic syabꞌan vin̈ yetbꞌeyum ix chiꞌ jun, malaj sgana vin̈, man̈ yovaliloc scꞌanabꞌajej ix bꞌaj ix yacꞌ stiꞌ chiꞌ, max acꞌjipaxlaj pural ix yuj Jehová scꞌanabꞌajani.

9 Tato a ebꞌ ix chamnac yetbꞌeyum, ma ebꞌ ix spucnac sbꞌa yedꞌ yetbꞌeyum syacꞌ stiꞌ dꞌa junoc tas dꞌa Jehová, yovalil scꞌanabꞌajej ebꞌ ix. 10 Tato a junoc ix ix ay yetbꞌeyum syacꞌ stiꞌ scꞌulan junoc tasi, mato syacꞌ stiꞌ dꞌa junoc tas man̈ ol scꞌulej, 11 tato ayic syabꞌan vin̈ yetbꞌeyum ix chiꞌ, malajn̈ej tas syal vin̈, a ix chiꞌ yovalil scꞌanabꞌajej ix bꞌaj ix yacꞌ stiꞌ chiꞌ. 12 Palta tato ayic syabꞌan vin̈ yetbꞌeyum ix chiꞌ, tato malaj sgana vin̈, man̈ yovaliloc scꞌanabꞌajej ix scꞌulan bꞌaj ix yacꞌ stiꞌ chiꞌ. Max acꞌjilaj pural ix yuj Jehová scꞌulani.

13 A vin̈ etbꞌeyumabꞌil chiꞌ, syal yalan vin̈ tato syal scꞌanabꞌajan ix bꞌaj ix yacꞌ stiꞌ chiꞌ mato maay. 14 Tato ayxo jun chabꞌoc cꞌual yabꞌan jun chiꞌ vin̈, malajn̈ejpax tas syal vin̈, yovalil scꞌanabꞌajej ix scꞌulan bꞌaj ix yacꞌ stiꞌ chiꞌ. 15 Tato ayic toxo ix ecꞌ tiempo, ichato chiꞌ syalan vin̈ to max scꞌanabꞌajej ix, axo dꞌa yibꞌan̈ vin̈ scan smul ix bꞌaj maj scꞌanabꞌajej stiꞌ ix syacꞌ chiꞌ, xchi Jehová, xchi vin̈aj Moisés chiꞌ.

16 Aton juntzan̈ ley ix yal Jehová dꞌa vin̈aj Moisés yuj tas val tzꞌaj vin̈ vinac yedꞌ ix yetbꞌeyum, ma ebꞌ vin̈ mamabꞌil yedꞌ ebꞌ ix yisil cobꞌesto aytoecꞌ yedꞌoc, tato syacꞌ stiꞌ ebꞌ ix dꞌa Jehová.