2 Al dꞌa ebꞌ etisraelal to spac sbꞌa ebꞌ dꞌa ebꞌ aj Madián, slajvi chiꞌ ol ach chamoc, xchi dꞌa vin̈.

3 Ix yalan vin̈aj Moisés chiꞌ dꞌa ebꞌ yetchon̈abꞌ chiꞌ icha tic:

—Aqꞌuec lista e bꞌa jayvan̈oc ex dꞌa oval, tze satanel ebꞌ aj Madián yuj spactzitaj schucal ebꞌ dꞌa Jehová. 4 Junjun in̈tilal, mil vinac syacꞌbꞌat dꞌa oval, xchi vin̈.

5 Yuj chiꞌ ix sicꞌjiel mil ebꞌ soldado dꞌa junjun in̈tilal. Ay 12 mil ebꞌ dꞌa smasanil, yedꞌnacxoqꞌue syamcꞌabꞌ junjun ebꞌ yic oval. 6 Ichaton chiꞌ ix aj schecjibꞌat ebꞌ dꞌa oval yuj vin̈aj Moisés. Ix bꞌatpax vin̈aj Finees, yuninal vin̈aj sacerdote Eleazar yedꞌ ebꞌ. A vin̈ edꞌjinac juntzan̈ yamcꞌabꞌ to yic Dios yaji yedꞌ qꞌuen trompeta spuji yic tzꞌoch ebꞌ yacꞌ oval. 7 Ix yacꞌan oval ebꞌ yedꞌ ebꞌ madianita icha ix aj yalan Jehová dꞌa vin̈aj Moisés chiꞌ. Ix smilancham masanil ebꞌ vin̈ vinac ebꞌ. 8 Dꞌa scal ebꞌ ix cham chiꞌ, ix cham vin̈aj Evi, vin̈aj Requem, vin̈aj Zur, vin̈aj Hur yedꞌ vin̈aj Reba, aton ovan̈ ebꞌ vin̈ yajal dꞌa Madián. Ix champax vin̈aj Balaam yuninal vin̈aj Beor. 9 Ix icꞌjicot masanil ebꞌ ix ix aj Madián preso yuj ebꞌ israel yedꞌ masanil ebꞌ scotac unin ebꞌ, nocꞌ smolbꞌetzal nocꞌ ebꞌ yedꞌ masanil tastac ay dꞌa ebꞌ. 10 Ix n̈usjitzꞌa schon̈abꞌ ebꞌ yedꞌ scampamento ebꞌ yuj ebꞌ israel chiꞌ. 11 Masanil ix yiqꞌuecꞌ ebꞌ soldadoal israel chiꞌ, ebꞌ anima yedꞌ masanil nocꞌ smolbꞌetzal nocꞌ ebꞌ, 12 ix yicꞌcot ebꞌ, ix yacꞌan ebꞌ dꞌa vin̈aj Moisés, dꞌa vin̈aj sacerdote Eleazar yedꞌ pax dꞌa ebꞌ yetchon̈abꞌ ebꞌ. A dꞌa yacꞌlical Moab dꞌa stiꞌ aꞌ Jordán dꞌa yichan̈ Jericó ayecꞌ scampamento ebꞌ.

13 Ix elta vin̈aj Moisés, vin̈aj sacerdote Eleazar yedꞌ masanil ebꞌ yichamtac vinaquil chon̈abꞌ scha ebꞌ dꞌa spatiquel campamento chiꞌ. 14 Palta axo vin̈aj Moisés ix cot yoval vin̈ dꞌa ebꞌ ayoch yajalil dꞌa junjun mil yedꞌ dꞌa junjun cien ebꞌ soldado ix meltzaj dꞌa oval chiꞌ. 15 Ix yalan vin̈ dꞌa ebꞌ icha tic:

—¿Tas yuj maj e milcham juntzan̈ ebꞌ ix ix tic? 16 A yuj tas ix yal vin̈aj Balaam, a val ebꞌ ix ix tic ix icꞌanbꞌat ebꞌ quetisraelal dꞌa ajmulal. Ix och smul ebꞌ dꞌa Jehová yuj yoch ebꞌ ejmelal dꞌa comon dios Baal dꞌa Peor. Yuj chiꞌ tzijtum ebꞌ ix cham yuj jun ilya. 17 A ticnaic mileccham masanil ebꞌ vinac unin yedꞌ masanil ebꞌ ix ix to ayxo vinac ix ecꞌ dꞌa spatic. 18 Axo ebꞌ ix cobꞌestac mantalaj vinac tzꞌecꞌ dꞌa spatic, man̈ e milcham ebꞌ ix, canocabꞌ ebꞌ ix eyedꞌoc. 19 E masanil mach ex ix e milcham anima, ma ix eyam junoc chamnac, canan̈ec uqueoc cꞌual dꞌa spatiquel campamento. A ex tic yedꞌ ebꞌ preso yaj eyuuj, yovalil tze bꞌiquel e bꞌa dꞌa schabꞌjial yedꞌ dꞌa svacꞌjial. 20 Tze jucꞌanel e pichul yedꞌ masanil tastac bꞌobꞌil dꞌa nocꞌ tzꞌuum, ma dꞌa xil nocꞌ chiva yedꞌ dꞌa te teꞌ, xchi vin̈ dꞌa ebꞌ.

21 Ix yalan vin̈aj sacerdote Eleazar dꞌa masanil ebꞌ ix xidꞌecꞌ dꞌa oval chiꞌ icha tic:

—Aton jun ley ix yacꞌ Jehová dꞌa vin̈aj Moisés tic: 22-23 A masanil tastac to max tzꞌa yuj cꞌacꞌ, icha qꞌuen oro, qꞌuen plata, qꞌuen bronce, qꞌuen hierro, qꞌuen estaño, ma qꞌuen plomo, yovalil tzꞌecꞌ dꞌa cal cꞌacꞌ, slajvi chiꞌ tze bꞌicanel dꞌa a aꞌ sacbꞌitan tastac tzꞌoch vicoc. A pax tastac to stzꞌabꞌat jun, an̈ej yedꞌ a aꞌ chiꞌ tze sacbꞌitej. 24 Axo dꞌa svacꞌjial, yovalil tze juqꞌuel e pichul, icha chiꞌ tzꞌaj e sacbꞌicaneli. Ichato chiꞌ syal eyoch dꞌa yol campamento, xchi Jehová dꞌa vin̈aj Moisés, xchi vin̈aj Eleazar chiꞌ.

25 Ix yalan Jehová dꞌa vin̈aj Moisés chiꞌ icha tic:

26 A vin̈aj sacerdote Eleazar yedꞌ ebꞌ yajal yaj dꞌa junjun macan̈il ebꞌ chon̈abꞌ, ol och ebꞌ edꞌoc yic tze bꞌis ebꞌ anima yedꞌ masanil nocꞌ nocꞌ ix yicꞌcot ebꞌ dꞌa chon̈abꞌ Madián. 27 Cha macan̈ tzeyutej. Tze pojanecꞌ junoc macan̈ dꞌa scal ebꞌ soldado ix xidꞌecꞌ dꞌa oval chiꞌ, axo junxo macan̈, spojchajecꞌ dꞌa scal ebꞌ anima. 28 A dꞌa junjun macan̈ syicꞌ ebꞌ soldado chiꞌ, junjun vic tzeyiqꞌuel dꞌa junjun 500 anima, dꞌa junjun 500 nocꞌ nocꞌ, vachꞌchom nocꞌ vacax, nocꞌ bꞌuru, nocꞌ calnel ma nocꞌ chiva. 29 A dꞌa vin̈aj sacerdote Eleazar tzacꞌ juntzan̈ chiꞌ icha ofrenda dꞌayin. 30 A dꞌa nan̈alxo yic ebꞌ anima chiꞌ, junjun tzeyiqꞌuel dꞌa junjun 50 ebꞌ anima yedꞌ dꞌa junjun 50 nocꞌ nocꞌ, vachꞌchom nocꞌ vacax, nocꞌ bꞌuru, nocꞌ calnel, ma nocꞌ chiva ma yedꞌ yaln̈ej tas molbꞌetzal nocꞌ. Tzeyacꞌ juntzan̈ nocꞌ nocꞌ chiꞌ dꞌa ebꞌ levita aton ebꞌ yilumal in cajnubꞌ, xchi dꞌa vin̈.

31 Ix scꞌanabꞌajej vin̈aj Moisés yedꞌ vin̈aj sacerdote Eleazar icha val ix aj yalan Jehová chiꞌ. 32-35 Aton slistail masanil tastac ix yicꞌcot ebꞌ soldado tic, chꞌoc pax tastac ix yicꞌ junjun ebꞌ: 675 mil nocꞌ calnel, 72 mil nocꞌ vacax, 61 mil nocꞌ bꞌuru yedꞌ 32 mil ebꞌ ix cobꞌestac. 36 Yuj chiꞌ nan̈al val juntzan̈ chiꞌ ix yicꞌ ebꞌ soldado. 337 mil 500 nocꞌ calnel ix yicꞌ ebꞌ. 37 A dꞌa juntzan̈ nocꞌ chiꞌ, 675 nocꞌ ix yacꞌ ebꞌ dꞌa Jehová. 38 A dꞌa 36 mil nocꞌ vacax yic ebꞌ soldado, ix acꞌji 72 nocꞌ dꞌa Jehová. 39 A dꞌa 30 mil 500 nocꞌ bꞌuru yic ebꞌ soldado, ix acꞌji 61 nocꞌ dꞌa Jehová. 40 A dꞌa ebꞌ ix 16 mil cobꞌestac yic ebꞌ soldado, ix acꞌji 32 ebꞌ ix dꞌa Jehová. 41 Masanil juntzan̈ chiꞌ ix yacꞌ vin̈aj Moisés dꞌa vin̈aj sacerdote Eleazar, aton tas to yictaxon Jehová yaji, icha val ix aj yalan Jehová. 42-46 Icha val sbꞌisul ix yicꞌ ebꞌ soldado chiꞌ, icha chiꞌ ix yacꞌ vin̈aj Moisés dꞌa ebꞌ anima chiꞌ: 337 mil 500 nocꞌ calnel, 36 mil nocꞌ vacax, 30 mil 500 nocꞌ bꞌuru yedꞌ 16 mil ebꞌ ix cobꞌestac.

47 A dꞌa nan̈alxo chiꞌ, junjun ix yiqꞌuel vin̈aj Moisés dꞌa junjun 50. Lajann̈ej ix yutejpax ebꞌ anima vin̈ yedꞌ nocꞌ nocꞌ. Ix yacꞌan vin̈ dꞌa ebꞌ levita smunlaj dꞌa scajnubꞌ Jehová, icha val ix aj yalan Jehová chiꞌ. 48 Axo ebꞌ yajal yaj dꞌa junjun mil yedꞌ dꞌa junjun cien ebꞌ soldado chiꞌ, ix bꞌat ebꞌ yal dꞌa vin̈aj Moisés. 49 Ix yalan ebꞌ icha tic: A on̈ tic ix co bꞌis ebꞌ soldado ayoch dꞌa yol co cꞌabꞌ, malaj junoc ebꞌ ix satbꞌati, tzꞌacann̈ej ebꞌ. 50 Yedꞌnac masanil qꞌuen oro ix ilchaj yuj ebꞌ, qꞌuen brazaletes, pulseras, colcꞌabꞌ, uchiquin yedꞌ juntzan̈xo qꞌuen qꞌueen vachꞌ yilji. A juntzan̈ tic scacꞌ dꞌa Jehová, yujto ix colvaj quedꞌoc, yuj chiꞌ ix on̈ meltzaj co masanil, xchi ebꞌ.

51 Ix schaan masanil qꞌuen oro chiꞌ vin̈aj Moisés yedꞌ vin̈aj Eleazar dꞌa ebꞌ, aton masanil qꞌuen oro ayoch yelvanubꞌoc snivanil ebꞌ. 52 Masanil qꞌuen oro ix yacꞌ ebꞌ yajal chiꞌ, oxeꞌ quintal yedꞌ 68 libra yalil qꞌueen. 53 Junjun soldado ayn̈ej jabꞌjabꞌoc tastac ix yicꞌaꞌ, aton tastac ix yicꞌ ebꞌ dꞌa ebꞌ ajcꞌol chiꞌ. 54 Axo vin̈aj Moisés yedꞌ vin̈aj Eleazar chiꞌ ix chaan qꞌuen oro ix yicꞌcot ebꞌ yajal soldado chiꞌ. Ix yicꞌanbꞌat qꞌuen ebꞌ vin̈ dꞌa scajnubꞌ Jehová bꞌaj schꞌox sbꞌa, yic vachꞌ snachajcot ebꞌ israel yuj Jehová chiꞌ.