3-4 —Ilec val lum macbꞌil yuj juntzan̈ chon̈abꞌ tic: Aton Atarot, Dibón, Jazer, Nimra, Hesbón, Eleale, Sebam, Nebo yedꞌ Beón, te vachꞌ sva masanil nocꞌ molbꞌetzal nocꞌ dꞌa juntzan̈ lum luum tic. Yuj scolval Jehová ix quicꞌcanecꞌ luum yic tzꞌochcan lum quicoc a on̈ israel on̈ tic. Eyojtacpaxi to ay juntzan̈ nocꞌ nocꞌ tic molbꞌil cuuj. 5 Yuj chiꞌ tato vachꞌ tze naꞌa, aqꞌuec juntzan̈ lum tic dꞌayon̈, yic max on̈ ecꞌcan dꞌa scꞌaxepal aꞌ Jordán, xchi ebꞌ.

6 Ix yalan vin̈aj Moisés chiꞌ dꞌa ebꞌ:

—¿Tom e gana tzex can dꞌa tic yacbꞌan sbꞌat ebꞌ quetchon̈abꞌ dꞌa oval? 7 ¿Tas yuj tzeyacꞌ chabꞌaxqꞌue scꞌol ebꞌ quetchon̈abꞌ yic max ecꞌ ebꞌ dꞌa jun lum yalnac Jehová to ol yacꞌ dꞌa ebꞌ? 8 Icha val tic yutej sbꞌa ebꞌ co mam quicham ayic in checanbꞌat ebꞌ yil luum ayic ayon̈ecꞌ dꞌa Cades-barnea. 9 Cꞌoch ebꞌ yil jun luum chiꞌ masanto dꞌa schꞌolanil aꞌ Escol. Slajvi chiꞌ yacꞌan chabꞌaxqꞌue scꞌol ebꞌ quetisraelal ebꞌ yic max och ebꞌ dꞌa lum yacꞌnac stiꞌ Jehová yacꞌan dꞌayon̈. 10 Yuj val chiꞌ cot yoval scꞌol Jehová dꞌa jun cꞌu chiꞌ, yuj chiꞌ yacꞌ stiꞌ to 11 a ebꞌ anima 20 abꞌil sqꞌuinal sbꞌeyn̈ejbꞌati ayic yelnaccot ebꞌ dꞌa Egipto, man̈ ol yil-laj lum ebꞌ, lum yacꞌnac stiꞌ yacꞌan dꞌa ebꞌ yin̈tilalcan vin̈aj Abraham, vin̈aj Isaac yedꞌ vin̈aj Jacob, yujto man̈ smasaniloc scꞌol ebꞌ och tzacꞌan yuj tas yalaꞌ. 12 An̈ej vin̈aj Caleb yuninal vin̈aj Jefone yin̈tilal vin̈aj Cenaz yedꞌ vin̈aj Josué yuninal vin̈aj Nun, ol och dꞌa luum, aton ebꞌ vin̈ cꞌanabꞌajan dꞌa smasanil scꞌool tas yal Jehová chiꞌ. 13 Cot yoval Jehová chiꞌ dꞌayon̈, yuj chiꞌ 40 abꞌil on̈ ecꞌ dꞌa tzꞌinan lum yuuj, masanto ix satel masanil ebꞌ maj cꞌanabꞌajani, man̈xo junoc ebꞌ ix cani. 14 A exxo tic, ex yin̈tilal anima pit, e gana tze bꞌeybꞌalej sbꞌeybꞌal ebꞌ co mam quicham chiꞌ yic tze tzuntzanxicot yoval scꞌol Jehová dꞌa quibꞌan̈. 15 Tato malaj e gana tzex och tzacꞌan yuj Jehová chiꞌ, ol ex yactejcan dꞌa jun tzꞌinan luum tic yedꞌ masanil jun chon̈abꞌ tic. Eyuuj val ol on̈ sateloc, xchi vin̈aj Moisés chiꞌ. 16 Yuj chiꞌ, ix snitzanbꞌat sbꞌa ebꞌ dꞌa stzꞌey vin̈aj Moisés chiꞌ, ix yalan ebꞌ icha tic:

—A val tas co gana, to sco bꞌoqꞌue smacteꞌ nocꞌ co calnel yedꞌ nocꞌ co vacax dꞌa tic yedꞌ chon̈abꞌ yic ebꞌ ix quetbꞌeyum yedꞌ cuninal. 17 A on̈xo tic ol cacꞌ lista co bꞌa dꞌa oval. Ol on̈ bꞌabꞌlaj dꞌa yichan̈ ebꞌ quetchon̈abꞌ tic masanto ol yal quicꞌanbꞌat ebꞌ dꞌa lum luum chiꞌ. Axo ebꞌ ix quetbꞌeyum yedꞌ ebꞌ cuninal ol can ebꞌ dꞌa chon̈abꞌ ayoch smuroal tic dꞌa juncꞌolal, yic vachꞌ malaj tas tzꞌutaj ebꞌ yuj ebꞌ anima cajan dꞌa juntzan̈ chon̈abꞌ tic. 18 Masanto ol yal scan ebꞌ quetchon̈abꞌ tic dꞌa sat sluum ichato chiꞌ ol on̈ meltzajxicot dꞌa co pat tic. 19 Yujto a lum ay dꞌa jun cꞌaxep tic quic tzꞌajcan luum, aton dꞌa stojolal bꞌaj sjavi cꞌu tic, yuj chiꞌ a dꞌa scꞌaxepalecꞌ aꞌ Jordán chiꞌ man̈ ol co chalaj lum co luum chiꞌ a on̈ tic, xchi ebꞌ. 20 Ix tacꞌvi vin̈aj Moisés chiꞌ dꞌa ebꞌ:

—Syal eyicꞌancan luum tato tzꞌelcꞌoch icha val tas tzeyal chiꞌ, ol eyacꞌn̈ej oval icha syal Jehová. 21 Tato e masanil a ex tic eyedꞌnac eyamcꞌabꞌ yic oval ol ex ecꞌ dꞌa aꞌ Jordán icha syal Jehová chiꞌ, tzex cann̈ej taꞌ masanto syal yel ebꞌ ajcꞌol chiꞌ eyuuj. 22 Ayic toxo ix eyicꞌcanecꞌ lum luum chiꞌ yuj Jehová, ayic toxo pax ix acꞌji ganar ebꞌ anima taꞌ, ichato chiꞌ ol ex meltzajoc. Icha chiꞌ ol aj e cꞌanabꞌajan bꞌaj tzeyacꞌ e tiꞌ dꞌa Jehová yedꞌ dꞌa ebꞌ eyetchon̈abꞌ tic. 23 Palta tato max e cꞌulej icha chiꞌ jun, a val taꞌ ol eyilaꞌ to ix och e mul dꞌa Jehová, ol cꞌoch scꞌual ol yacꞌanoch yaelal dꞌa eyibꞌan̈ yuj e mul chiꞌ. 24 Bꞌoecqꞌue e chon̈abꞌ yuj ebꞌ ix eyetbꞌeyum yedꞌ ebꞌ eyuninal, tze bꞌoan smacteꞌ nocꞌ e calnel chiꞌ, tze cꞌanabꞌajan masanil tas tzeyal chiꞌ, xchi vin̈aj Moisés chiꞌ dꞌa ebꞌ. 25 Ix tacꞌvi ebꞌ yin̈tilalcan Rubén yedꞌ ebꞌ yin̈tilalcan Gad icha tic:

—A on̈ a checabꞌ on̈ tic, ol co cꞌanabꞌajej masanil tas ix al chiꞌ. 26 A ebꞌ ix quetbꞌeyum yedꞌ ebꞌ co cotac unin yedꞌ masanil nocꞌ co molbꞌetzal nocꞌ, ol can dꞌa juntzan̈ chon̈abꞌ dꞌa Galaad tic. 27 A on̈xo tic jun, ol on̈ bꞌat dꞌa oval bꞌaj ol yal scꞌol Jehová, icha val alan chiꞌ, xchi ebꞌ. 28 Ix yalan vin̈aj Moisés dꞌa vin̈aj sat sacerdote Eleazar yedꞌ dꞌa vin̈aj Josué yuninal vin̈aj Nun yedꞌ dꞌa masanil ebꞌ yajalil chon̈abꞌ dꞌa junjun macan̈ yin̈tilal Israel icha tic:

29 —Tato masanil ebꞌ vinac dꞌa yin̈tilal Gad yedꞌ dꞌa yic Rubén lista yaj yacꞌan oval, ol ecꞌ ebꞌ eyedꞌoc dꞌa yol aꞌ Jordán icha yalan Jehová, masanto ol eyicꞌ lum luum chiꞌ, ichato chiꞌ tzeyacꞌan lum Galaad tic smacbꞌenoc ebꞌ. 30 Tato max bꞌat ebꞌ dꞌa oval chiꞌ eyedꞌoc jun, a dꞌa lum Canaán chiꞌ ol yicꞌ smacbꞌen ebꞌ eyedꞌoc, xchi vin̈aj Moisés chiꞌ.

31 Ix tacꞌvixi ebꞌ yin̈tilalcan Gad yedꞌ ebꞌ yic Rubén chiꞌ icha tic:

—Ol co cꞌulejn̈ej masanil tastac schec Jehová co cꞌulej. 32 Quedꞌnac co yamcꞌabꞌ yic oval ol on̈ ecꞌ dꞌa Canaán chiꞌ icha syal Jehová, palta quic tzꞌajcan lum luum dꞌa stojolal bꞌaj sjavi cꞌu tic, xchi ebꞌ. 33 Yuj chiꞌ a dꞌa ebꞌ yin̈tilalcan Gad yedꞌ dꞌa ebꞌ yic Rubén yedꞌ dꞌa nan̈alxo ebꞌ yin̈tilalcan Manasés yuninal vin̈aj José, ix yacꞌ luum vin̈aj Moisés chiꞌ, aton lum yic vin̈aj Sehón sreyal ebꞌ amorreo, lum yic vin̈aj Og sreyal Basán yedꞌ jantac chon̈abꞌ macbꞌil yuuj yedꞌ jantac smacbꞌen ay dꞌa spatictac. 34 Axo ebꞌ yin̈tilalcan Gad ix laj sbꞌoxiqꞌue chon̈abꞌ Dibón ebꞌ yedꞌ Atarot, Aroer, 35 Atarot-sofán, Jazer, Jogbeha, 36 Bet-nimra yedꞌ Bet-arán. Ix yacꞌanoch smuroal ebꞌ, ix sbꞌoanpax smacteꞌ scalnel ebꞌ. 37 Axo pax ebꞌ yin̈tilalcan Rubén, ix sbꞌoxiqꞌue chon̈abꞌ Hesbón ebꞌ, Eleale, Quiriataim, 38 Nebo, Baal-meón yedꞌ Sibma. Ix sqꞌuexan sbꞌi juntzan̈ chon̈abꞌ ix sbꞌoxiqꞌue ebꞌ chiꞌ. 39 Axo pax ebꞌ yin̈tilal Maquir yuninal Manasés, ix icꞌanpaxcan lum ay dꞌa Galaad. Ix yacꞌ ganar ebꞌ spechanel ebꞌ amorreo taꞌ. 40 Icha chiꞌ ix aj yacꞌan lum Galaad vin̈aj Moisés dꞌa ebꞌ yin̈tilal Maquir, yuj chiꞌ ix cajnaj ebꞌ taꞌ. 41 Axo pax vin̈aj Jair yin̈tilalcan Manasés, ix yacꞌ ganar juntzan̈ scampamento ebꞌ amorreo ebꞌ, ix yacꞌan scuch ebꞌ Havot-jair. 42 Axo jun vin̈ scuchan Noba yedꞌ juntzan̈xo ebꞌ ajun yedꞌoc, ix yacꞌ ganar ebꞌ aj Kenat ebꞌ yedꞌ juntzan̈xo chon̈abꞌ ayoch dꞌa yol smacbꞌen. Ix yacꞌan vin̈ scuch Noba.