A tas ix aj sbꞌeycot ebꞌ israel
33
Icha tic aj sbꞌeycot ebꞌ israel, ayic yelta tzololoc ebꞌ dꞌa Egipto. A vin̈aj Moisés yedꞌ vin̈aj Aarón cuchbꞌan ebꞌ. 2 Icha tas ix yal Jehová, ix stzꞌibꞌejcan vin̈aj Moisés tastac sbꞌi juntzan̈ lugar bꞌajtac ix laj sbꞌo scampamento ebꞌ, bꞌajtac ix laj ecꞌ ebꞌ. Icha tic aj quelta, xchi vin̈aj Moisés chiꞌ.3-4 A on̈ israel on̈ tic, on̈ elta dꞌa Ramesés dꞌa yol yic Egipto dꞌa 15 yoch bꞌabꞌel uj dꞌa yol abꞌil. Aton dꞌa jun acꞌval chiꞌ schꞌoxel Jehová to malaj yelcꞌoch juntzan̈ sdiosal ebꞌ aj Egipto chiꞌ, miljipaxcham masanil ebꞌ sbꞌabꞌel vinac unin ebꞌ yuj Jehová chiꞌ. Yacbꞌan van smucancan schamnac ebꞌ chiꞌ, quelta dꞌa yichan̈ ebꞌ smasanil. Te ayxo quip, te cꞌacꞌxo co cꞌool. 5 Ayic quel dꞌa Ramesés chiꞌ, co javi dꞌa Sucot.
6 Quelxi dꞌa Sucot chiꞌ, co javi dꞌa Etam dꞌa stitac tzꞌinan luum. 7 Co qꞌuexbꞌeancot co bꞌa dꞌa Pi-hahirot ay dꞌa stojolal bꞌaj sja cꞌu dꞌa Baal-zefón, coch vaan taꞌ dꞌa yichan̈ Migdol.
8 Quelxi dꞌa Pi-hahirot chiꞌ, co cꞌaxpajecꞌ dꞌa aꞌ mar, co javi dꞌa tzꞌinan luum. Oxeꞌ cꞌual bꞌey on̈ dꞌa taquin̈ lum yic Etam co javi dꞌa Mara.
9 Quelxi dꞌa Mara chiꞌ, co javi dꞌa Elim bꞌaj ay lajchaveꞌ sjaj a aꞌ, ay pax 70 teꞌ palma taꞌ. Ataꞌ ochon̈ vaan.
10 Quelxi dꞌa Elim chiꞌ, co javi dꞌa slacꞌanil aꞌ Chacchac Mar.
11 Quelxi dꞌa aꞌ Chacchac Mar chiꞌ, co javi dꞌa tzꞌinan lum Zin.
12-36 Ayic quel dꞌa tzꞌinan lum Zin chiꞌ, quecꞌta dꞌa Dofca, dꞌa Alús yedꞌ dꞌa Refidim, bꞌaj malaj a aꞌ cuqꞌuej.
Quecꞌpax dꞌa tzꞌinan lum Sinaí, dꞌa Quibrot-hataava, dꞌa Hazerot, dꞌa Ritma, dꞌa Rimón-peres, dꞌa Limna, dꞌa Rissa, dꞌa Ceelata, dꞌa vitz Sefer, dꞌa Harada, dꞌa Macelot, dꞌa Tahat, dꞌa Tara, dꞌa Mitca, dꞌa Hasmona, dꞌa Moserot, dꞌa Bene-jaacán, dꞌa Hor bꞌaj ay vitzal Gidgad, dꞌa Jotbata, dꞌa Abrona, dꞌa Ezión-geber yedꞌ dꞌa tzꞌinan lum Zin aton Cades.
37 Quelxi dꞌa Cades chiꞌ co javi dꞌa svitzal Hor dꞌa smojonal Edom. 38 Ato aꞌ aj yalan Jehová, qꞌue vin̈aj sacerdote Aarón dꞌa jolom vitz Hor chiꞌ. Ataꞌ chamnaccan vin̈. Cham vin̈ dꞌa sbꞌabꞌel cꞌu yic yoil uj ayic 40 abꞌil schajiel yich sbꞌischaj scꞌual yictax quelnacta dꞌa Egipto.
39 Ay 123 abꞌil sqꞌuinal vin̈aj Aarón chiꞌ ayic schamnac vin̈.
40 A vin̈ sreyal cananeo aj Arad cajan dꞌa Neguev dꞌa yol yic Canaán, yabꞌnac val specal vin̈ tas ajnac co javi dꞌa jun lugar chiꞌ.
41-44 Quelxi dꞌa vitzal Hor chiꞌ, quecꞌ dꞌa Zalmona, dꞌa Punón, dꞌa Obot yedꞌ dꞌa Ije-abarim dꞌa smojonal yic Moab.
45-47 Quelxi dꞌa Dibón-gad, quecꞌ dꞌa Almón-diblataim yedꞌ dꞌa svitzaltac yic Abarim, dꞌa stojolal bꞌaj sjavi cꞌu dꞌa Nebo.
48 Quelxi dꞌa svitzaltac yic Abarim chiꞌ, co javi dꞌa yacꞌlical Moab dꞌa stiꞌ aꞌ Jordán dꞌa yichan̈ Jericó. 49 A co campamento dꞌa stiꞌ aꞌ Jordán chiꞌ bꞌatn̈ej dꞌa Bet-jesimot masanto dꞌa Abel-sitim, dꞌa yacꞌlical Moab chiꞌ.
Sleyal tas ol aj spojchajecꞌ lum Canaán
50 A dꞌa yacꞌlical Moab dꞌa stiꞌ aꞌ Jordán, dꞌa yichan̈ Jericó, ix lolon Jehová dꞌa vin̈aj Moisés, ix yalan icha tic:
51 Al juntzan̈ tic dꞌa ebꞌ etchon̈abꞌ: A val ol ex ecꞌ dꞌa aꞌ Jordán ayic ol ex och dꞌa lum Canaán chiꞌ, 52 tze pechel masanil ebꞌ anima cajan dꞌa juntzan̈ nación chiꞌ. Tze macꞌanpoj masanil juntzan̈ yechel bꞌobꞌil yuj ebꞌ, bꞌaj syal sbꞌa, aton qꞌuen comon qꞌuen tzeybꞌil yuj ebꞌ, ma qꞌuen qꞌueen bꞌobꞌil dꞌa yol molde. Tze macꞌanpoj juntzan̈ tas ay dꞌa juntzan̈ lugar chaan̈ bꞌaj tzꞌoch ebꞌ ejmelal. 53 Ayic ol eyacꞌan ganar juntzan̈ nación chiꞌ, tze bꞌoanem cajan e bꞌa taꞌ, yujto a in svacꞌ dꞌayex yic tzex cajnaj dꞌay. 54 Palta yovalil dꞌa suerteal tzꞌaj e pojanecꞌ luum, dꞌa scal junjun macan̈, jun yic junjun in̈tilal. A junoc macan̈ nivan sbꞌisul, nivan luum tzꞌacꞌji dꞌay. Axo pax junoc quenn̈ej sbꞌisul, quenn̈ej pax luum tzꞌacꞌji dꞌay. Junjun macan̈ scan bꞌaj syal suerte. 55 Ayic ol ex cajnaj taꞌ, tato man̈ ol e pechel masanil ebꞌ anima cajan dꞌa luum chiꞌ, ol ex yixtej ebꞌ icha junoc cꞌalem sbꞌat dꞌa yol e sat, ma icha junoc teꞌ qꞌuiix sbꞌat dꞌa yol e bꞌacꞌchil. 56 Ol javoc dꞌa eyibꞌan̈ vuuj tas dꞌin̈antaxon sja dꞌa yibꞌan̈ ebꞌ, xchi Jehová chiꞌ dꞌa vin̈.