A smojonal chon̈abꞌ Israel
34
Ix yalanxi Jehová dꞌa vin̈aj Moisés chiꞌ icha tic:2 Al juntzan̈ checnabꞌil tic dꞌa ebꞌ etisraelal. Toxo val ol ex och dꞌa lum Canaán chiꞌ, eyic ol aj luum. Aton smojonal luum tic:
3 A smojonal lum dꞌa sur tzꞌecꞌ dꞌa tzꞌinan luum Zin dꞌa stitac lum yic Edom. Schael yich dꞌa stojolal sur dꞌa aꞌ mar Muerto. 4 Sqꞌuen̈ej dꞌa sur chiꞌ masanto dꞌa yich lum vitz Acrabim, tzꞌecꞌn̈ejcꞌoch dꞌa Zin masanto scꞌoch dꞌa Cades-barnea. Slajvi chiꞌ, sbꞌatn̈ejpax dꞌa Hasar-adar, masanto scꞌoch dꞌa Asmón. 5 Sbꞌatxi dꞌa Asmón chiꞌ masanto scꞌoch dꞌa aꞌ elumaꞌ yic Egipto, slajvicancꞌoch dꞌa aꞌ mar Mediterráneo. 6 A smojonal dꞌa stojolal bꞌaj sbꞌat cꞌu, aton aꞌ mar Mediterráneo chiꞌ. 7 Axo smojonal dꞌa norte, schael dꞌa aꞌ mar Mediterráneo chiꞌ masanto scꞌoch dꞌa jolom vitz Hor. 8 Tzꞌelxi dꞌa jolom vitz Hor chiꞌ masanto bꞌaj tzꞌochcꞌoch sbꞌeal chon̈abꞌ Hamat, masanto dꞌa Zedad. 9 Sbꞌat dꞌa Zedad chiꞌ, tzꞌecꞌ dꞌa Zifrón masanto scꞌoch dꞌa Hazar-enán.
10 Axo smojonal dꞌa stojolal bꞌaj sjavi cꞌu, schael dꞌa Hazar-enán masanto scꞌoch dꞌa Sefam. 11 Tzꞌelxi dꞌa Sefam chiꞌ, masanto scꞌoch dꞌa Ribla dꞌa stojolal bꞌaj sjavi cꞌu dꞌa Aín. Slajvi chiꞌ tzꞌemn̈ej jun mojon chiꞌ dꞌa stojolal bꞌaj sjavi cꞌu dꞌa aꞌ n̈ajabꞌ Cineret, 12 sbꞌatn̈ej dꞌa aꞌ Jordán masanto scꞌoch dꞌa aꞌ mar Muerto.
A masanil juntzan̈ chiꞌ, aton smojonal lum e luum chiꞌ, xchi Jehová, xa chi dꞌa ebꞌ, xchi dꞌa vin̈.
A tas ol aj spojchajecꞌ lum luum
13 Ix yal juntzan̈ checnabꞌil tic vin̈aj Moisés dꞌa ebꞌ israel:
Aton jun luum tic ol e pojecꞌ dꞌa e patic, aton lum ix yal Jehová to ol pojchajecꞌ dꞌa scal ebꞌ nan̈al slajun̈il eyin̈tilal, yujto toxo ix schacan smacbꞌen nan̈al yoxil in̈tilal, 14-15 aton ebꞌ yin̈tilal Rubén yedꞌ ebꞌ yic Gad yedꞌ nan̈alxo ebꞌ yic Manasés. Toxo ix scha lum yic ebꞌ, aton lum ay dꞌa stojolal bꞌaj sjavi cꞌu dꞌa aꞌ Jordán dꞌa yichan̈ Jericó, xchi vin̈aj Moisés chiꞌ.
16 Ix yalanxi Jehová dꞌa vin̈aj Moisés chiꞌ icha tic:
17 A ebꞌ ol pojanecꞌ lum luum chiꞌ dꞌa e cal, aton vin̈ sacerdote Eleazar yedꞌ vin̈aj Josué yuninal vin̈aj Nun. 18 Palta yovalil tzeyavtej junjunoc ebꞌ yajal yaj dꞌa junjun eyin̈tilal ayic spojchajecꞌ luum chiꞌ. 19 Aton ebꞌ vin̈ tic yovalil ol avtajoc:
A dꞌa yin̈tilal Judá, a vin̈aj Caleb yuninal vin̈aj Jefone.
20 Axo dꞌa yin̈tilal Simeón, a vin̈aj Semuel yuninal vin̈aj Amiud.
21 Axo dꞌa yin̈tilal Benjamín, a vin̈aj Elidad yuninal vin̈aj Quislón.
22 Axo dꞌa yin̈tilal Dan, a vin̈aj Buqui yuninal vin̈aj Jogli, aton vin̈ yajal yaji.
23 Axo dꞌa yin̈tilal Manasés yuninal vin̈aj José, a vin̈aj Haniel yuninal vin̈aj Efod, aton vin̈ yajal yaji.
24 Axo dꞌa yin̈tilal Efraín yuninal pax vin̈aj José chiꞌ, a vin̈aj Kemuel yuninal vin̈aj Siftán, aton vin̈ yajal yaji.
25 Axo dꞌa yin̈tilal Zabulón, a vin̈aj Elizafán yuninal vin̈aj Parnac, aton vin̈ yajal yaji.
26 Axo dꞌa yin̈tilal Isacar, a vin̈aj Paltiel yuninal vin̈aj Azán, aton vin̈ yajal yaji.
27 Axo dꞌa yin̈tilal Aser, a vin̈aj Ahiud yuninal vin̈aj Selomi, aton vin̈ yajal yaji.
28 Axo dꞌa yin̈tilal Neftalí, a vin̈aj Pedael yuninal vin̈aj Amiud, aton vin̈ yajal yaji, xchi dꞌa vin̈.
29 Aton juntzan̈ ebꞌ vin̈ tic ix schec Jehová spojecꞌ lum Canaán dꞌa scal ebꞌ yin̈tilalcan Israel.