2 Yuj chiꞌ, ix yalan Jehová dꞌayin: Man̈ ex xivoc, yujto a jun vin̈ chiꞌ yedꞌ soldado yedꞌ schon̈abꞌ toxo ix vacꞌoch dꞌa yol e cꞌabꞌ yic tze sataneli, icha ix eyutej vin̈aj Sehón sreyal ebꞌ amorreo cajan dꞌa Hesbón, xchi dꞌayin.

3 Icha chiꞌ ix yutej Jehová co Diosal yacꞌan vin̈aj Og chiꞌ yedꞌ schon̈abꞌ dꞌa yol co cꞌabꞌ. Ix co milancham ebꞌ smasanil, man̈xalaj junoc pitzan ix can cuuj. 4 Ix cacꞌanpax ganar masanil junjun chon̈abꞌ dꞌa yol smacbꞌen vin̈. Man̈xa junoc maj cacꞌ ganar, syalelcꞌochi, masanil yol yic Argob dꞌa yol smacbꞌen vin̈aj Og dꞌa Basán, 60 chon̈abꞌ chiꞌ smasanil. 5 Masanil juntzan̈ chon̈abꞌ chiꞌ, te chaan̈ yajoch smuroal, spuertail yedꞌ qꞌuen qꞌueen cꞌatanoch syamnubꞌaloc spuertail chiꞌ. Tzijtum pax chon̈abꞌ malaj smuroal ix co sateli. 6 Masanil juntzan̈ chiꞌ ix co sateli, icha ix co cꞌulej yedꞌ vin̈aj Sehón sreyal Hesbón. Yuj chiꞌ ix co satel masanil ebꞌ vin̈ vinac yedꞌ ebꞌ ix ix yedꞌ masanil ebꞌ unin. 7 Axon̈ej nocꞌ smolbꞌetzal nocꞌ ebꞌ cajcꞌol chiꞌ yedꞌ masanil tastac ay dꞌa ebꞌ ix quicꞌcani.

8 Icha val chiꞌ ix aj yacꞌji slum ebꞌ amorreo dꞌa yol co cꞌabꞌ dꞌa jun tiempoal chiꞌ, aton ebꞌ cajan dꞌa stojolal bꞌaj sjavi cꞌu dꞌa aꞌ Jordán, sbꞌatn̈ej dꞌa aꞌ taquin̈ melem Arnón, masanto scꞌoch dꞌa svitzal Hermón. 9 (A jun vitz chiꞌ Sirión sbꞌi yuj ebꞌ aj Sidón, axo ebꞌ amorreo, Senir sbꞌi yuj ebꞌ.) 10 Masanil juntzan̈ chon̈abꞌ dꞌa yol smacbꞌen vin̈aj Og dꞌa Basán, ix cacꞌ ganar, aton juntzan̈ chon̈abꞌ dꞌa lum pan̈an, masanil dꞌa yol yic Galaad yedꞌ Basán, masanto dꞌa Salca yedꞌ Edrei. 11 (Axon̈ej vin̈aj rey Og yin̈tilal ebꞌ anima chan̈ steel aycan dꞌa jun lugar chiꞌ. A scaxail vin̈ yic smuquil, nabꞌa qꞌueen. Chan̈eꞌ val metro steel, quenxon̈ej man̈ chabꞌoc metro sat, chequelto dꞌa chon̈abꞌ Rabá dꞌa yol yic ebꞌ amonita.)^*

12 A lum luum ix co maccan dꞌa jun tiempoal chiꞌ, ix vacꞌ lum yicoc ebꞌ junjun chon̈abꞌil dꞌa yin̈tilalcan Rubén yedꞌ dꞌa ebꞌ yin̈tilalcan Gad, aton lum scotn̈ej dꞌa Aroer, dꞌa stitac aꞌ taquin̈ melem Arnón, masanto sjavi dꞌa snan̈al svitzal lum Galaad. 13 Axo janicꞌxo lum Galaad chiꞌ jun, masanil lum Basán, aton smacbꞌen vin̈aj Og dꞌa yalan̈taxo yedꞌ pax lum Argob, ojtacabꞌil to slum ebꞌ refaíta. A lum chiꞌ ix vacꞌ dꞌa nan̈al yin̈tilalcan Manasés. 14 (A vin̈aj Jair, yin̈tilal Manasés chiꞌ ix icꞌancan lum Argob, masanto dꞌa smojonal lum Gesur yedꞌ Maaca. Ix yacꞌanoch sbꞌi vin̈ dꞌa Basán chiꞌ, yuj chiꞌ Havot-Jair ix sbꞌiejn̈ejcani.) 15 A dꞌa vin̈aj Maquir ix vacꞌ lum Galaad chiꞌ. 16 Axo dꞌa yin̈tilalcan Rubén yedꞌ dꞌa yic Gad ix vacꞌ lum ay dꞌa snan̈al Galaad yedꞌ aꞌ taquin̈ melem Arnón. A dꞌa snan̈al yol chꞌolan ay smojonal, masanto scꞌoch dꞌa aꞌ taquin̈ melem Jaboc, aton dꞌa smojonal yic ebꞌ amonita. 17 A smojonal bꞌaj tzꞌem cꞌu, aton aꞌ Jordán, scꞌochn̈ej dꞌa aꞌ n̈ajabꞌ Cineret, masanto scꞌoch dꞌa aꞌ mar yic Arabá, aton aꞌ mar Muerto, aton dꞌa yich svitzal Pisga, dꞌa stojolal bꞌaj sjavi cꞌu dꞌa aꞌ mar Muerto chiꞌ.

18 A dꞌa jun tiempoal chiꞌ, ix vacꞌ juntzan̈ checnabꞌil tic dꞌa ebꞌ yin̈tilalcan Rubén, dꞌa ebꞌ yic Gad yedꞌ dꞌa nan̈alxo ebꞌ yin̈tilalcan Manasés. Ix valan icha tic: A Jehová co Diosal ix acꞌan jun luum tic e macbꞌenoc. Axo masanil ebꞌ vin̈ vinac syal yacꞌan oval dꞌa e cal, bꞌabꞌlajocabꞌ ebꞌ vin̈ dꞌa yichan̈ ebꞌ quetisraelal tic. 19 Axon̈ej ebꞌ ix eyetbꞌeyum yedꞌ ebꞌ eyuninal scan dꞌa e chon̈abꞌ ix vacꞌ chiꞌ yedꞌ nocꞌ e molbꞌetzal nocꞌ. Vojtac to tzijtum nocꞌ nocꞌ molbꞌil eyuuj. 20 Colvajan̈ec yedꞌ ebꞌ quetisraelal, masanto ol yicꞌcan lum luum ebꞌ ol yacꞌ Jehová, aton dꞌa scꞌaxepalecꞌ aꞌ Jordán tic. Aton val yic ol yacꞌan sjuncꞌolal Jehová dꞌa ebꞌ, icha ix yutej yacꞌan dꞌayex tic, ichato chiꞌ ol yal e paxta dꞌa e lum ix vacꞌ tic, xin chi dꞌa ebꞌ.

21 A dꞌa vin̈aj Josué ix vacꞌ jun checnabꞌil tic: Ix quil val tastac ix scꞌulej Jehová co Diosal yedꞌ chavan̈ rey tic. Icha chiꞌ ol yutoc dꞌa masanil ebꞌ rey dꞌa yoltac smacbꞌen bꞌaj ol ach ecꞌn̈ej. 22 Man̈ ach xivoc, yujto a Jehová co Diosal ol acꞌan oval cuuj, xin chi dꞌa vin̈.

23 A dꞌa jun tiempoal chiꞌ ix in tevi dꞌa Jehová, ix valan icha tic: 24 Mamin Jehová, a ach ix a chael yich a chꞌoxani to te nivan elcꞌochi, ix a chꞌoxan a poder dꞌayin a checabꞌ in tic. Malaj junocxo Dios dꞌa satchaan̈, ma dꞌa sat luum tic syal scꞌulan tastac satubꞌtac icha tza cꞌulej tic. 25 Yuj chiꞌ tzin tevi dꞌayach to tzin a chaecꞌ dꞌa junxo scꞌaxepalecꞌ aꞌ Jordán, yujto tzin nibꞌej svil jun tzalquixtac man̈xo jantacoc svachꞌil yedꞌ svitzaltac Líbano, xin chi. 26 Palta eyujn̈ej ix cot yoval Jehová chiꞌ dꞌayin. Maj schalaj yabꞌ tas ix in cꞌan chiꞌ dꞌay, palta ix yal dꞌayin icha tic: Cꞌocbꞌilxo chiꞌ, man̈xo al jun lolonel chiꞌ dꞌayin. 27 An̈ej tzach qꞌue dꞌa jolom vitz Pisga, scham val ilancanbꞌat lum dꞌa norte, dꞌa sur, bꞌaj sjavi cꞌu yedꞌ bꞌaj tzꞌem cꞌu, yujto man̈xo ol ach cꞌaxpajecꞌ dꞌa aꞌ Jordán chiꞌ. 28 Yuj chiꞌ tza cꞌaybꞌej val vin̈aj Josué sicꞌlabꞌil, yujto a vin̈ ol cuchbꞌan in chon̈abꞌ tic. A vin̈ ol pojanecꞌ jun lum tzilcanbꞌat tic, xchi Jehová chiꞌ dꞌayin.

29 Icha chiꞌ ix aj co can dꞌa chꞌolan dꞌa yichan̈ Bet-peor.