7 A Jehová co Diosal chiꞌ yacꞌnac val svachꞌcꞌolal dꞌa quibꞌan̈ dꞌa masanil tas co cꞌulej. A dꞌa jun 40 abꞌil tic, ayn̈ejoch quedꞌoc, tzon̈ stan̈vejn̈ej bꞌaj tzon̈ ecꞌ dꞌa jun nivan tzꞌinan luum tic. Malaj bꞌaj ix yacꞌ palta tas dꞌayon̈ yuuj.

8 Icha chiꞌ aj co cotn̈ej dꞌa stitac sluum ebꞌ co cꞌabꞌ coc, aton ebꞌ yin̈tilal vin̈aj Esaú cajan dꞌa Seir. On̈ cotcan dꞌa bꞌe tzꞌecꞌ dꞌa Arabá, scot dꞌa Elat yedꞌ dꞌa Ezión-geber. Co meltzajpax dꞌa bꞌe tzꞌecꞌ dꞌa tzꞌinan lum dꞌa yol yic Moab. 9 Axo yalan Jehová dꞌayin icha tic: Man̈ e tzuntzej ebꞌ moabita, yin̈tilal vin̈aj Lot. Man̈ eyacꞌ oval yedꞌ ebꞌ, yujto malaj jabꞌoc slum ebꞌ dꞌa yol smacbꞌen ol vacꞌ dꞌayex. A in vacꞌnac masanil smacbꞌen vin̈aj Ar dꞌa ebꞌ, xchi dꞌayin. 10 (Ataꞌ cajan ebꞌ emita dꞌa pecaꞌ. Te nivan chon̈abꞌ yaj ebꞌ, chaan̈ steel ebꞌ, lajan val ebꞌ icha ebꞌ yin̈tilal vin̈aj Anac. 11 Refaíta ebꞌ, icha ebꞌ yin̈tilal vin̈aj Anac chiꞌ, palta emita tzꞌaj yalan ebꞌ moabita chiꞌ dꞌa ebꞌ. 12 A dꞌa masanil smacbꞌen Seir, ataꞌ ecꞌnac cajan ebꞌ horeo. Axo ebꞌ yin̈tilal vin̈aj Esaú pechannaquel ebꞌ, satanel ebꞌ, axo ebꞌ cajnajnac dꞌa slum ebꞌ chiꞌ, icha ix co cꞌulej a on̈ israel on̈ tic dꞌa lum luum ix yacꞌ Jehová dꞌayon̈.) 13 Axo aj jun, yalan Jehová: Ixiquec ticnaic, tzex ecꞌ dꞌa yol aꞌ taquin̈ melem scuchan Zered, xchi, yuj chiꞌ on̈ ecꞌ taꞌ.

14 Atax dꞌa yic on̈ ecꞌ dꞌa Cades-barnea, masanto pax dꞌa jun cꞌu on̈ ecꞌta dꞌa yol aꞌ taquin̈ melem Zered chiꞌ, atax taꞌ ix ecꞌ 38 abꞌil, yuj chiꞌ a masanil ebꞌ vin̈ quetchon̈abꞌ stiempo sbꞌat dꞌa oval ayic quelta dꞌa Egipto, toxo ix cham ebꞌ icha ajnac yacꞌan stiꞌ Jehová. 15 A yoval scꞌol Jehová chiꞌ ix cot dꞌa yibꞌan̈ ebꞌ, yuj chiꞌ ix cham ebꞌ smasanil.

16 Ayic man̈xalaj junoc juntzan̈ ebꞌ vin̈ vinac chiꞌ, 17 yalan Jehová dꞌayin: 18 A ticnaic ecꞌan̈ecbꞌat dꞌa smojonal yic Moab dꞌa chon̈abꞌ Ar. 19 Palta ayic tze chalan e bꞌa yedꞌ ebꞌ amonita, ebꞌ yin̈tilal pax vin̈aj Lot, man̈ e tzuntzej ebꞌ, man̈ eyacꞌ oval yedꞌ ebꞌ, yujto malaj jabꞌoc e macbꞌen ol vacꞌ taꞌ, yujto vacꞌnacxo jun luum chiꞌ smacbꞌenoc ebꞌ, xchi dꞌayin. 20 (An̈ejtonaꞌ, a jun luum chiꞌ yic ebꞌ refaíta dꞌa pecaꞌ, yujto ecꞌnac cajan ebꞌ taꞌ, aton ebꞌ scuchan zomzomeo yuj ebꞌ amonita dꞌa pecaꞌ. 21 A jun chiꞌ, te nivan chon̈abꞌ, tzijtum anima ay dꞌay, te chaan̈ steel ebꞌ icha ebꞌ yin̈tilal vin̈aj Anac. A Jehová acꞌannac satel ebꞌ yuj ebꞌ amonita chiꞌ. A ebꞌ amonita chiꞌ pechannaquel ebꞌ, scajnajnaccan ebꞌ taꞌ. 22 Lajan val ajnac icha ajnac ebꞌ yin̈tilal vin̈aj Esaú, ayic scꞌochnac ebꞌ dꞌa lum Seir. A Jehová acꞌannac satel ebꞌ horeo, scannacxon̈ej ebꞌ yin̈tilal vin̈aj Esaú dꞌa slum ebꞌ chiꞌ. 23 Icha pax chiꞌ ajnac ebꞌ aveo ayecꞌ cajan dꞌa slacꞌanil Gaza. A ebꞌ chiꞌ satnaquel ebꞌ dꞌa juneln̈ej yuj ebꞌ filisteo cotnac dꞌa Caftor. Icha chiꞌ ajnac scajnajcan ebꞌ filisteo chiꞌ taꞌ.) 24 Yalanxi Jehová icha tic: Ixiquec, tzex cꞌaxpajecꞌ dꞌa aꞌ taquin̈ melem Arnón, ol vacꞌoch ebꞌ amorreo dꞌa yol e cꞌabꞌ yedꞌ vin̈aj Sehón, cajan dꞌa Hesbón, aton vin̈ sreyal ebꞌ. Aqꞌuec oval yedꞌ ebꞌ, tzeyicꞌanecꞌ sluum ebꞌ. 25 A val ticnaic tzꞌel yich vacꞌanoch junjun chon̈abꞌ dꞌa yolyibꞌan̈qꞌuinal tic dꞌa xivcꞌolal dꞌayex. Ayic ol yabꞌan e pecal ebꞌ, ol ibꞌxoqꞌue ebꞌ, axon̈ej xivelal ol och dꞌa ebꞌ, xchi Jehová chiꞌ.

26 A dꞌa tzꞌinan luum yic Cademot, ataꞌ in checcot juntzan̈ checabꞌ dꞌa vin̈aj Sehón, aton vin̈ rey cajan dꞌa Hesbón, yic vachꞌ syal juntzan̈ tic ebꞌ dꞌa vachꞌilal dꞌa vin̈: 27 Sco nibꞌej tzon̈ ecꞌ dꞌa yol a macbꞌen, an̈ej dꞌa yol nivan bꞌe ol on̈ ecꞌoc, malaj bꞌaj ol on̈ comon bꞌatcan dꞌa yol a chon̈abꞌ chiꞌ. 28 Ol co tup tas ol cabꞌlej yedꞌ a aꞌ ol cuqꞌuej. An̈ej to sco cꞌan dꞌayach to tzon̈ ecꞌ dꞌa yol a macbꞌen chiꞌ, 29 masanto ol yal co cꞌaxpaj dꞌa aꞌ Jordán, ol on̈ cꞌoch dꞌa lum ol yacꞌ Jehová co Diosal dꞌayon̈, icha ix on̈ yutej schaan ecꞌta ebꞌ yin̈tilal vin̈aj Esaú cajan dꞌa Seir yedꞌ ebꞌ moabita cajanpax dꞌa Ar, xin chicot dꞌa vin̈.

30 Palta a vin̈aj Sehón chiꞌ, maj yal-laj scꞌol vin̈ on̈ scha ecꞌta dꞌa yol smacbꞌen chiꞌ, yujto a Jehová co Diosal ix acꞌan scꞌulej vin̈ yic malaj sgana vin̈, yic scan ebꞌ dꞌa yol co cꞌabꞌ, icha chiꞌ ix aji.

31 Yuj chiꞌ yal Jehová dꞌayin icha tic: A val dꞌa jun rato tic svacꞌoch vin̈aj Sehón yedꞌ smacbꞌen dꞌa yol e cꞌabꞌ. Ochan̈ec ticnaic dꞌa yol smacbꞌen tic, yic tzꞌochcan eyicoc, xchi dꞌayin.

32 Ix elta vin̈aj Sehón chiꞌ on̈ scha yedꞌ masanil soldado, yic syacꞌ oval ebꞌ quedꞌoc dꞌa Jahaza. 33 Axo Jehová co Diosal ix acꞌanoch vin̈ dꞌa yol co cꞌabꞌ. Ix co satanel vin̈ yedꞌ yuninal yedꞌ masanil schon̈abꞌ. 34 Masanil junjun chon̈abꞌ dꞌa yol smacbꞌen vin̈ ix acꞌjioch dꞌa yol co cꞌabꞌ, ix co satancanel dꞌa juneln̈ej. Ix co milcham ebꞌ smasanil yedꞌ ebꞌ ix ix yedꞌ masanil unin. Man̈xo junoc pitzan ix can cuuj. 35 An̈ej juntzan̈ tastac ix quicꞌcani, aton masanil nocꞌ nocꞌ yedꞌ juntzan̈ tas ix ilchaj cuuj dꞌa juntzan̈ chon̈abꞌ ix co satel chiꞌ. 36 Ix quiquej slum ebꞌ chiꞌ smasanil, scotn̈ej dꞌa Aroer ay dꞌa span̈anil stitac aꞌ Arnón masanto dꞌa Galaad yedꞌ masanil juntzan̈ chon̈abꞌ ay dꞌa schꞌolanil aꞌ Arnón chiꞌ. Man̈xalaj mach ix stecꞌbꞌej sbꞌa dꞌa quichan̈, yujto a Jehová co Diosal ix acꞌanoch ebꞌ dꞌa yol co cꞌabꞌ. 37 Palta a on̈ tic, maj on̈ ochlaj dꞌa schon̈abꞌ ebꞌ amonita ay dꞌa tzalquixtac, ma pax dꞌa stiꞌ aꞌ Jaboc, icha val ix yutej yalan Jehová dꞌayon̈.