Ix yacꞌ ganar lum Horma ebꞌ israel
21
Ayic ix yabꞌan vin̈ sreyal ebꞌ cananeo ay dꞌa Arad dꞌa yol yic Neguev to van scot ebꞌ israel dꞌa yol bꞌe scꞌoch dꞌa Atarim, ix elta vin̈ yacꞌ oval yedꞌ ebꞌ. Ay ebꞌ ix yamchaj yuj vin̈ ix yicꞌanbꞌat ebꞌ vin̈ dꞌa preso. 2 Ix lajvi chiꞌ, ix yacꞌan stiꞌ ebꞌ israel dꞌa Jehová, ix yalan ebꞌ icha tic: Tato ol ach colvaj quedꞌoc yic scacꞌan ganar jun nación chiꞌ, ol co satcanel junjun chon̈abꞌ dꞌa yol smacbꞌen chiꞌ dꞌa juneln̈ej, xchi ebꞌ. 3 Ix scꞌanabꞌajej Jehová scolvaj icha ix aj scꞌanan ebꞌ chiꞌ, yuj chiꞌ ix yacꞌ ganar ebꞌ cananeo chiꞌ ebꞌ. Ix satcanel ebꞌ cananeo chiꞌ smasanil yedꞌ schon̈abꞌil, yuj chiꞌ Horma* ix sbꞌiejcan jun lugar chiꞌ.Jun yechel chan nabꞌa bronce
4 Ix el ebꞌ israel dꞌa yich vitz Hor chiꞌ, ix ecꞌ ebꞌ dꞌa bꞌe tzꞌecꞌ dꞌa aꞌ Chacchac Mar. Najat ix ecꞌ yoy sbꞌa ebꞌ yujto maj cꞌaxpajecꞌ ebꞌ dꞌa lum Edom. Ayic ayoch ebꞌ dꞌa yol bꞌe chiꞌ, ix chabꞌaxqꞌue scꞌool ebꞌ, 5 ix cot yoval ebꞌ dꞌa Dios yedꞌ dꞌa vin̈aj Moisés. Ix yalan ebꞌ icha tic:
—¿Tas yuj ix on̈ iqꞌuelta dꞌa Egipto? ¿Tom yuj co cham yuj vejel dꞌa taquin̈ luum tic? Malaj tas sco vaꞌa, malaj pax tas scuqꞌuej. Maxtzac techaj co vaan juntzan̈ chucal vael tic, xchi ebꞌ. 6 Yuj val chiꞌ ix acꞌjicot juntzan̈ nocꞌ chan te ov yuj Jehová, yic schiji ebꞌ anima chiꞌ yuj nocꞌ. Tzijtum ebꞌ israel chiꞌ ix cham yuj nocꞌ. 7 Ayic ix yilan ebꞌ icha chiꞌ, ix bꞌat yalan ebꞌ dꞌa vin̈aj Moisés chiꞌ icha tic:
—Toxo ix och co mul a on̈ tic, ix cal chucal lolonel dꞌa Jehová yedꞌ dꞌayach. A ticnaic cꞌan dꞌa Jehová to syiqꞌuel nocꞌ chan tic dꞌa co cal, xchi ebꞌ.
Ix scꞌanan vin̈aj Moisés chiꞌ dꞌa Jehová to syacꞌ nivancꞌolal dꞌa yibꞌan̈ ebꞌ anima chiꞌ. 8 Ix yalan Jehová chiꞌ dꞌa vin̈ icha tic:
—Bꞌo junoc yechel chan dꞌa qꞌuen bronce icha yilji juntzan̈ nocꞌ chiꞌ, tzacꞌanqꞌue dꞌa schon junoc te teꞌ chaan̈ steel, yic vachꞌ ayic schiji ebꞌ anima yuj nocꞌ chan chiꞌ, tato sqꞌue qꞌuelan ebꞌ dꞌa jun yechel chan chiꞌ, maxtzac chamlaj ebꞌ yuj nocꞌ, xchi dꞌa vin̈. 9 Ix sbꞌoan jun yechel chan nabꞌa bronce vin̈aj Moisés chiꞌ, ix yacꞌanqꞌue vin̈ dꞌa schon jun te teꞌ. Yuj chiꞌ yaln̈ej mach schiji yuj nocꞌ chan chiꞌ, sqꞌue qꞌuelan ebꞌ dꞌa jun yechel chan chiꞌ, sbꞌoxican ebꞌ.
A tas ix aj yecꞌ ebꞌ israel dꞌa Moab
10 Ix bꞌeyn̈ejcot ebꞌ israel, ix javi ebꞌ dꞌa Obot. 11 Ix elpax ebꞌ dꞌa Obot chiꞌ, ix bꞌeyn̈ejcot ebꞌ dꞌa yichan̈, ix javi ebꞌ dꞌa Ije-abarim dꞌa tzꞌinan luum dꞌa stojolal bꞌaj sjavi cꞌu dꞌa yol yic Moab. 12 Ix cotn̈ej ebꞌ, ix javi ebꞌ dꞌa jun aꞌ elumaꞌ scuch Zered. 13 Ix bꞌeyn̈ejcot ebꞌ, ix javi ebꞌ dꞌa scꞌaxepalbꞌat jun a aꞌ scuch Arnón. A jun a aꞌ chiꞌ tzꞌecꞌ dꞌa tzꞌinan lum dꞌa yol yic ebꞌ amorreo. Aton jun aꞌ chiꞌ ayoch mojonal yuj ebꞌ Moab yedꞌ ebꞌ amorreo chiꞌ. 14 Aton juntzan̈ lugar chiꞌ sbꞌinaj bꞌaj tzꞌibꞌabꞌilcan yabꞌixal oval yic Jehová, bꞌaj syal icha tic:
On̈ ecꞌta dꞌa chon̈abꞌ Vaheb dꞌa yol yic Sufá, dꞌa yoltac aꞌ Arnón.
15 A jun pacꞌan dꞌa stitac a aꞌ chiꞌ ayoch smojonaloc yic Moab, scꞌoch dꞌa chon̈abꞌ Ar, xchi.
16 Ix el ebꞌ dꞌa aꞌ Arnón chiꞌ, ix cotn̈ej ebꞌ masanto ix javi ebꞌ dꞌa Beer. Aton taꞌ ay jun aꞌ ucꞌbꞌilaꞌ bꞌaj ix yal Jehová dꞌa vin̈aj Moisés icha tic: Molbꞌej masanil anima, a in ol vacꞌ a aꞌ yuqꞌuej ebꞌ, xchi dꞌa vin̈. 17 Aton dꞌa jun tiempoal chiꞌ ix bꞌitan ebꞌ israel icha tic:
Ix qꞌueul a aꞌ bꞌaj molan. Qꞌueocabꞌcot bꞌurnaj a aꞌ. To ol on̈ bꞌitanec yuj a aꞌ ix qꞌueul bꞌurnaj tic.
18 A ebꞌ vin̈ yajal ix joyanqꞌueta aꞌ yedꞌ scꞌococh. A ebꞌ vin̈ nivac yajal dꞌa yol schon̈abꞌ, a yedꞌ scꞌococh ebꞌ vin̈ ix sjacqꞌueta a aꞌ, xchi ebꞌ dꞌa sbꞌit chiꞌ.
Ix bꞌeyn̈ejcot ebꞌ dꞌa tzꞌinan luum masanto ix javi ebꞌ dꞌa Matana. 19 Ix el ebꞌ dꞌa Matana chiꞌ, ix javi ebꞌ dꞌa Nahaliel. Ix el ebꞌ dꞌa Nahaliel chiꞌ, ix javi ebꞌ dꞌa Bamot. 20 Ix el ebꞌ dꞌa Bamot chiꞌ, ix javi ebꞌ dꞌa jun chꞌolan ay dꞌa yol yic Moab, dꞌa stojolal lum nivac vitz dꞌa yol yic Pisga, aton taꞌ nivan chequel lum tzꞌinan luum.
Ix acꞌji ganar vin̈aj rey Sehón yuj ebꞌ israel
21 Ix yacꞌbꞌat schecabꞌ ebꞌ israel dꞌa vin̈aj Sehón sreyal ebꞌ amorreo, ix yalanbꞌat ebꞌ icha tic: 22 ¿Tom max on̈ a chaecꞌ dꞌa yol a macbꞌen? Malaj jabꞌoc tas ol ecꞌ co lobꞌat dꞌa scal eyavbꞌen yedꞌ dꞌa scal eyuva, man̈ ol cucꞌ a aꞌ dꞌa eyucꞌbꞌil aꞌ, an̈ej dꞌa yol nivan bꞌe ol on̈ ecꞌoc, xchi ebꞌ checabꞌ chiꞌ.
23 Maj scha scꞌol vin̈aj Sehón chiꞌ yecꞌ ebꞌ israel dꞌa yol smacbꞌen chiꞌ. An̈ej to ix smolbꞌej masanil ebꞌ soldado vin̈, ix elta vin̈ yacꞌ oval yedꞌ ebꞌ dꞌa tzꞌinan luum, dꞌa Jahaza ix yacꞌ oval ebꞌ. 24 Ix yacꞌan oval ebꞌ israel chiꞌ yedꞌ ebꞌ, ix acꞌji ganar vin̈aj Sehón yedꞌ ebꞌ soldado yuj ebꞌ. Ix icꞌjiecꞌ lum sluum ebꞌ chiꞌ yuj ebꞌ israel chiꞌ. Sbꞌatn̈ej dꞌa stiꞌ aꞌ Arnón, masanto scꞌoch dꞌa stiꞌ aꞌ Jaboc, masanto bꞌaj tzꞌecꞌ smojonal sluum ebꞌ amonita. A jun luum chiꞌ te vachꞌ yaj smacchaj yuj ebꞌ amonita chiꞌ. 25 Icha chiꞌ ix aj yochcan slum ebꞌ amorreo yicoc ebꞌ israel chiꞌ. Ix cajnaj ebꞌ israel dꞌa chon̈abꞌ Hesbón yedꞌ dꞌa juntzan̈xo chon̈abꞌ ay dꞌa spatictac. 26 A Hesbón chiꞌ, aton jun chon̈abꞌ bꞌaj ecꞌnac vin̈aj Sehón sreyal ebꞌ amorreo. A vin̈aj Sehón chiꞌ ix yacꞌn̈ej oval vin̈ yedꞌ ebꞌ vin̈ sreyal Moab dꞌa yalan̈taxo. Ix icꞌjiecꞌ jun macan̈ slum ebꞌ yuj vin̈ scꞌochn̈ej dꞌa aꞌ Arnón. 27 Yuj chiꞌ ix yal ebꞌ slolon dꞌa poesía icha tic:
Cotan̈ec dꞌa Hesbón, aton dꞌa schon̈abꞌ vin̈aj rey Sehón. Bꞌoecxiqꞌue dꞌa schaelal, vachꞌ tzeyutej e bꞌoanoch smuroal.
28 Ato dꞌa Hesbón, dꞌa schon̈abꞌ vin̈aj rey Sehón ix cot ebꞌ ix n̈usantzꞌa chon̈abꞌ Ar dꞌa yol yic Moab yedꞌ ebꞌ nivac yajal yaj dꞌa jun chon̈abꞌ dꞌa pacꞌan dꞌa yibꞌan̈qꞌue aꞌ Arnón.
29 Ex aj Moab, obꞌiltac ex. Toxo ix ex lajviel ex schon̈abꞌ dios Quemos. Aton jun e diosal chiꞌ maj yal-laj scolvaji, yuj chiꞌ ix el lemnaj ebꞌ soldado smasanil, axon̈ej ebꞌ ix ix, ix can dꞌa yol scꞌabꞌ vin̈aj rey Sehón.
30 Toxo ix lajviel yipalil chon̈abꞌ Hesbón. Ix satel ebꞌ ay dꞌa chon̈abꞌ Dibón masanto ix satel ebꞌ ay dꞌa Nofa yedꞌ pax Medeba, xchi jun poesía chiꞌ. 31 Icha chiꞌ ix aj yicꞌancan lum luum ebꞌ israel macbꞌil yuj ebꞌ amorreo.
Ix acꞌji ganar vin̈aj rey Og
32 Ix lajvi chiꞌ ix yacꞌanbꞌat schecabꞌ vin̈aj Moisés dꞌa chon̈abꞌ Jazer yic sbꞌeytzitej ebꞌ tas yaji. Ix acꞌji ganar jun chon̈abꞌ chiꞌ yuj ebꞌ israel yedꞌ masanil juntzan̈ chon̈abꞌ ay dꞌa spatictac. Ix pechjiel masanil ebꞌ cajan taꞌ yuj ebꞌ, aton ebꞌ amorreo. 33 Ix meltzaj ebꞌ, ix bꞌat ebꞌ dꞌa stojolal lum Basán, palta ix elta vin̈aj Og sreyal Basán chiꞌ yedꞌ masanil ebꞌ soldado yacꞌ oval yedꞌ ebꞌ dꞌa Edrei. 34 Yuj chiꞌ ix yal Jehová dꞌa vin̈aj Moisés chiꞌ icha tic: Man̈ ex xiv dꞌa vin̈aj Og chiꞌ, a in ol vacꞌoch vin̈ yedꞌ ebꞌ soldado yedꞌ smacbꞌen tic dꞌa yol e cꞌabꞌ. Icha ix eyutej vin̈aj Sehón sreyal ebꞌ amorreo ay dꞌa Hesbón, icha chiꞌ ol eyutejpax vin̈aj Og tic, xchi dꞌa vin̈. 35 Icha chiꞌ ix aj scham vin̈aj Og yedꞌ yuninal yedꞌ masanil ebꞌ soldado yuj ebꞌ israel, man̈xo junoc ebꞌ ix cani. Ix ochcan sluum ebꞌ yicoc ebꞌ israel chiꞌ.