2 Yujto te malaj a aꞌ syucꞌ ebꞌ israel chiꞌ, yuj chiꞌ ix qꞌue yav ebꞌ smasanil dꞌa vin̈aj Moisés yedꞌ dꞌa vin̈aj Aarón. 3 Ix yalan ebꞌ dꞌa vin̈aj Moisés chiꞌ icha tic:

—Octom on̈ chamcan yedꞌ ebꞌ quetchon̈abꞌ ix chamcan yuj Jehová. 4 ¿Tas yuj ix on̈ eyicꞌcot dꞌa taquin̈ luum tic? ¿Tom e gana tzon̈ champax a on̈ tic yedꞌ nocꞌ co molbꞌetzal nocꞌ? 5 ¿Tas yuj ix on̈ eyiqꞌuelta dꞌa yol yic Egipto, ix on̈ eyicꞌancot dꞌa jun lugar man̈xo jantacoc schucal tic? A dꞌa tic max yacꞌlaj ixim trigo, teꞌ higo, teꞌ uva, teꞌ granado, malaj pax jabꞌoc a aꞌ syal cucꞌani, xchi ebꞌ. 6 Ayic ix yabꞌan juntzan̈ lolonel chiꞌ vin̈aj Moisés yedꞌ vin̈aj Aarón chiꞌ, ix snitzanel sbꞌa ebꞌ vin̈, ix bꞌat ebꞌ vin̈ dꞌa stiꞌ scajnubꞌ Jehová. Ataꞌ ix bꞌat em n̈ojan ebꞌ vin̈ dꞌa sat luum. Axo dꞌa jun rato chiꞌ ix schꞌox sbꞌa stziquiquial Jehová dꞌa slacꞌanil ebꞌ vin̈. 7 Ix yalan Jehová chiꞌ dꞌa vin̈aj Moisés chiꞌ icha tic:

8 —Icꞌbꞌat teꞌ a cꞌococh, tzalan dꞌa vin̈ ucꞌtac aj Aarón chiꞌ to tzꞌoch vin̈ edꞌoc yic tze molanbꞌat ebꞌ anima, tzex bꞌat bꞌaj ay jun qꞌuen nivan tenam. Dꞌa yichan̈ ebꞌ tzal dꞌa qꞌueen to tzꞌelta a aꞌ dꞌa sat qꞌueen, axo dꞌa yichan̈ masanil ebꞌ anima chiꞌ ol elul aꞌ, ol yucꞌan aꞌ ebꞌ yedꞌ nocꞌ smolbꞌetzal nocꞌ chiꞌ, xchi Jehová.

9 Ix yicꞌanelta te cꞌococh vin̈aj Moisés dꞌa yichan̈ Jehová icha ix aj yalani. 10 Ix smolbꞌanbꞌat ebꞌ anima chiꞌ ebꞌ vin̈ dꞌa yichan̈ qꞌuen tenam chiꞌ. Ix yalan vin̈aj Moisés chiꞌ dꞌa ebꞌ icha tic:

—Abꞌec, a ex to te pit ex tic: ¿Yovalil am val squiqꞌuelta a aꞌ dꞌa sat qꞌuen tenam tic, scacꞌan aꞌ eyuqꞌuej? xchi vin̈. 11 Ix lajvi yalan vin̈ icha chiꞌ, ix yicꞌanchaan̈ scꞌabꞌ vin̈, ix spajanoch chael teꞌ scꞌococh vin̈ dꞌa sat qꞌuen tenam chiꞌ, ix elul chulnaj a aꞌ chiꞌ. Ix yucꞌan aꞌ ebꞌ yedꞌ nocꞌ smolbꞌetzal nocꞌ chiꞌ. 12 Ix lajvi chiꞌ, ix yalan Jehová dꞌa vin̈aj Moisés yedꞌ dꞌa vin̈aj Aarón chiꞌ icha tic:

—Yujto a ex tic max in eyacꞌ val och dꞌa e cꞌool, maj e chꞌox dꞌa yichan̈ ebꞌ eyetchon̈abꞌ tic to A inxon̈ej Ochi, yuj chiꞌ man̈oc exlaj ol eyicꞌoch ebꞌ anima tic dꞌa sat lum luum chiꞌ bꞌaj ix valaꞌ to ol vacꞌ dꞌayex, xchi dꞌa ebꞌ vin̈. 13 Meriba^* ix sbꞌiejcan jun lugar chiꞌ, yujto ataꞌ ix yalubꞌtan̈ej ebꞌ israel dꞌa spatic Jehová. Ix schꞌoxan Jehová chiꞌ to Axon̈ej Ochi.

14 Ayic ayecꞌ vin̈aj Moisés dꞌa Cades, ix schecanbꞌat jayvan̈ ebꞌ vin̈ vinac vin̈ dꞌa vin̈ sreyal Edom yic bꞌat yalan ebꞌ vin̈ icha tic: A on̈ israel on̈ tic, ayto cuj co bꞌa edꞌoc, scalbꞌat dꞌayach: Ojtac jantac syail ix quil dꞌa Egipto. 15 An̈ejtonaꞌ ojtacpaxi tas aj scꞌochnaccan ebꞌ co mam quicham taꞌ dꞌa pecaꞌ. Axo dꞌa slajvubꞌalxo tic, ix yacꞌ val och yaelal ebꞌ vin̈ aj Egipto chiꞌ dꞌa yibꞌan̈ ebꞌ co mam quicham yedꞌ dꞌa quibꞌan̈. 16 Yuj chiꞌ ix co cꞌan scolval Jehová quedꞌoc. Ix yabꞌ yel cav, yuj chiꞌ ix yacꞌancot yángel yic ix on̈ yicꞌanelta dꞌa Egipto chiꞌ. A ticnaic ayon̈ ecꞌ dꞌa chon̈abꞌ Cades bꞌaj ay smojonal a macbꞌen. 17 Yuj chiꞌ scal dꞌayach, tope val tzꞌel dꞌa a cꞌool tzon̈ a chaecꞌ dꞌa yol a macbꞌen tic. Man̈ ol on̈ ecꞌlaj dꞌa scal yavbꞌen ebꞌ anima ay dꞌa yol a macbꞌen tic. Malaj a aꞌ dꞌa eyucꞌbꞌil aꞌ ol cuqꞌuej. An̈ej dꞌa yol nivan bꞌe ol on̈ bꞌatoc. Malaj bꞌaj ol on̈ el bꞌesnaj dꞌa yol nivan bꞌe chiꞌ masanto ol on̈ cꞌaxpajecꞌ dꞌa yol a nación tic, xchibꞌat vin̈aj Moisés chiꞌ. 18 Ix tacꞌvi vin̈ sreyal Edom chiꞌ icha tic:

—Man̈ ex cꞌaxpajecꞌ dꞌa yol in nación tic. Tato ol ex ecꞌ dꞌa yibꞌan̈, ol ex cꞌaxpajecꞌoc, ol in elbꞌat dꞌa e patic yedꞌ ebꞌ in soldado, xchi vin̈ dꞌa ebꞌ. 19 Ix yalanpax ebꞌ israel chiꞌ icha tic:

—Maay, a on̈ tic an̈ej dꞌa yol nivan bꞌe ol on̈ bꞌatoc. Tato ay bꞌaj ol cuqꞌuej a aꞌ yedꞌ nocꞌ co molbꞌetzal nocꞌ dꞌa eyucꞌlabꞌa, ol co tup dꞌayach. An̈ej val to co gana tzon̈ cꞌaxpajecꞌ dꞌa a lugar tic dꞌa vachꞌil, xchibꞌat ebꞌ. 20 Ix tacꞌvixi vin̈ sreyal Edom chiꞌ icha tic:

—Malaj permiso e cꞌaxpajeqꞌui, xchi vin̈. Ix bꞌat vin̈ yedꞌ masanil ebꞌ soldado smac ebꞌ israel chiꞌ. Yedꞌnac syamcꞌabꞌ ebꞌ soldado chiꞌ yic oval, te tecꞌanpax ebꞌ. 21 Yuj chiꞌ ix say junxo bꞌe ebꞌ israel bꞌaj ix bꞌati.

22 Masanil ebꞌ israel ix el ebꞌ dꞌa Cades, ix cot ebꞌ dꞌa stojolal lum vitzal Hor dꞌa sat smojonal Edom. 23 Ataꞌ ix yal Jehová dꞌa vin̈aj Moisés yuj vin̈aj Aarón icha tic: 24 A ticnaic, toxo ol cham vin̈aj Aarón, man̈ ol cꞌochlaj vin̈ dꞌa sat lum ix valaꞌ to ol vacꞌ dꞌayex, yujto a ex tic e chavan̈il ix e pitej e bꞌa dꞌa in checnabꞌil ix vacꞌ dꞌayex dꞌa stiꞌ aꞌ Meriba. 25 A ticnaic, icꞌbꞌat vin̈aj Aarón chiꞌ yedꞌ vin̈ yuninal scuch Eleazar dꞌa jolom vitz Hor chiꞌ. 26 Ataꞌ ol iqꞌuel spichul vin̈aj Aarón chiꞌ scꞌan dꞌa sacerdoteal, tzacꞌancanoch dꞌa vin̈aj Eleazar chiꞌ, yujto a vin̈aj Aarón chiꞌ ol cham vin̈ taꞌ, xchi dꞌa vin̈. 27 Ix scꞌanabꞌajan vin̈aj Moisés tas ix yal Jehová chiꞌ, dꞌa val yichan̈ masanil anima ix icꞌjibꞌat vin̈aj Aarón yedꞌ vin̈aj Eleazar chiꞌ yuj vin̈ dꞌa jolom vitz Hor chiꞌ. 28 Ataꞌ ix yiqꞌuel spichul vin̈aj Aarón chiꞌ vin̈, ix yacꞌanoch vin̈ dꞌa vin̈aj Eleazar dꞌa jolom vitz chiꞌ. Ataꞌ ix chamcan vin̈aj Aarón chiꞌ. Ix lajvi chiꞌ, ix emixta vin̈aj Moisés yedꞌ vin̈aj Eleazar chiꞌ. 29 Axo ix yabꞌan masanil ebꞌ israel to toxo ix cham vin̈aj Aarón chiꞌ, jun ujal ix och ebꞌ dꞌa cuscꞌolal yuj vin̈.