2 Yuj chiꞌ ix cotxi yoval ebꞌ dꞌa vin̈aj Moisés chiꞌ:

—A ticnaic, acꞌ a aꞌ cuqꞌuej, xchi ebꞌ.

—¿Tas yuj scot eyoval dꞌayin? ¿Tas yuj tzeyacꞌ proval Jehová? xchi vin̈.

3 Palta axo ebꞌ chon̈abꞌ yelcꞌolal scham ebꞌ yuj taquin̈tial, yuj chiꞌ ix qꞌue yav ebꞌ dꞌa vin̈aj Moisés chiꞌ, ix yalan ebꞌ:

—¿Tas yuj ix on̈ iqꞌuelta dꞌa Egipto? ¿Tom yuj co cham yuj taquin̈tial yedꞌ ebꞌ cuninal yedꞌ pax nocꞌ co molbꞌetzal nocꞌ? xchi ebꞌ.

4 Yuj chiꞌ ix tevi vin̈aj Moisés chiꞌ dꞌa Jehová icha tic:

—Mamin, ¿tas val svutej ebꞌ anima tic? Ijan val tzin sjulqꞌuenej ebꞌ, xchi vin̈.

5 Ix tacꞌvi Jehová dꞌa vin̈:

—A ticnaic, bꞌabꞌlajan̈ dꞌa yichan̈ ebꞌ anima chiꞌ, tzicꞌanbꞌat jayvan̈oc ebꞌ yichamtac vinaquil chon̈abꞌ chiꞌ edꞌoc. Tzicꞌanpaxbꞌat teꞌ a cꞌococh, teꞌ acꞌlabꞌejnac a macꞌan sat aꞌ Nilo. 6 A in ol in bꞌabꞌlaj dꞌa ichan̈ dꞌa qꞌuen tenam dꞌa Horeb, axo ol ach cꞌoch taꞌ, tza macꞌan sat qꞌueen yedꞌ teꞌ a cꞌococh chiꞌ, ol elul aꞌ dꞌa sat qꞌueen, ol yucꞌan aꞌ ebꞌ anima chiꞌ, xchi dꞌa vin̈.

Icha chiꞌ ix yutej vin̈aj Moisés chiꞌ dꞌa yichan̈ ebꞌ yichamtac vinaquil chon̈abꞌ Israel. 7 Meriba ix yacꞌ vin̈ sbꞌiej jun lugar chiꞌ, yujto chuc ix yal ebꞌ dꞌa spatic vin̈. Masah pax ix yacꞌ vin̈ sbꞌiej, yujto ix yacꞌ proval Jehová ebꞌ, ix yalan ebꞌ: Mato val ayecꞌ Jehová dꞌa co cal, mato maay, xchi ebꞌ.

8 Ayic ayecꞌ ebꞌ israel dꞌa Refidim chiꞌ, ataꞌ ix cꞌoch ebꞌ amalecita yacꞌ oval yedꞌ ebꞌ. 9 Yuj chiꞌ ix yal vin̈aj Moisés dꞌa vin̈aj Josué:

—Siqꞌuel jantacoc ebꞌ co soldado yic sbꞌat ebꞌ yacꞌ oval yedꞌ ebꞌ amalecita. A qꞌuicꞌan tzin bꞌat dꞌa chon tzalan, vedꞌnac teꞌ cꞌococh, teꞌ syacꞌlabꞌej Dios, xchi vin̈.

10 Ix scꞌanabꞌajan vin̈aj Josué chiꞌ, ix bꞌat yacꞌan oval vin̈ yedꞌ ebꞌ amalecita chiꞌ. Axo vin̈aj Moisés chiꞌ yedꞌ vin̈aj Aarón yedꞌ pax vin̈aj Hur, ix bꞌat ebꞌ vin̈ dꞌa chon tzalan chiꞌ. 11 A syicꞌanqꞌue scꞌabꞌ vin̈aj Moisés dꞌa chaan̈, scan ebꞌ amalecita dꞌa yalan̈ yuj ebꞌ israel. Axo syicꞌanxiem scꞌabꞌ vin̈, ijan scan ebꞌ vin̈ israel dꞌa yalan̈. 12 Palta ste cꞌunbꞌi scꞌabꞌ vin̈ sbꞌat jecan, yuj chiꞌ ix say jun qꞌuen qꞌueen vin̈aj Aarón yedꞌ vin̈aj Hur chiꞌ. A dꞌa yibꞌan̈ qꞌueen ix em cꞌojan vin̈aj Moisés chiꞌ, axo ebꞌ vin̈ ix yamanqꞌue scꞌabꞌ vin̈ chiꞌ, junjun ebꞌ vin̈ dꞌa stzꞌeytac vin̈ masanto ix bꞌat cꞌu. 13 Icha chiꞌ ix aj yacꞌan lajvoc ebꞌ amalecita vin̈aj Josué chiꞌ.

14 Ix lajvi chiꞌ, ix yalan Jehová dꞌa vin̈aj Moisés chiꞌ:

—Tzꞌibꞌchajocabꞌcan jun abꞌix tic yic ol nachajcotoc. Tzalanpax dꞌa vin̈aj Josué chiꞌ to a in ol in satel masanil ebꞌ amalecita dꞌa juneln̈ej, man̈xa bꞌaj ol nachajcot ebꞌ, xchi dꞌa vin̈.

15 Ix lajvi chiꞌ, ix sbꞌoanqꞌue jun altar vin̈aj Moisés chiꞌ, ix yacꞌan vin̈ sbꞌiej icha tic: A Jehová bꞌabꞌel cuuj dꞌa oval. 16 Ix yalan vin̈ icha tic: