—Comonoc ix el dꞌa scꞌol Dios to a dꞌa Egipto on̈ chamcani. Ataꞌ tzon̈ em cꞌojan dꞌa stzꞌey lum chenal chibꞌej, tzon̈ vaꞌi, masanto tzon̈ te bꞌudꞌji. Palta a exxo tic ix on̈ eyicꞌcot dꞌa taquin̈ luum tic yic tzon̈ cham co masanil yuj vejel, xchi ebꞌ.

4 Yuj chiꞌ, ix yalan Jehová dꞌa vin̈aj Moisés chiꞌ:

—A dꞌa satchaan̈ ol vacꞌcot tas ol e vaꞌa. Junjun cꞌu ol bꞌat e molanqꞌue tas ol e vaꞌa, yuj chiꞌ ol vilaꞌ tato ol e cꞌanabꞌajej in checnabꞌil, mato maay. 5 Axo dꞌa svaquil cꞌual, tze molancanqꞌue yic chabꞌoc cꞌual, tze bꞌoancan yic jun cꞌu chiꞌ yedꞌ yic yuquil cꞌual, xchi Jehová.

6 Ix yalan vin̈aj Moisés yedꞌ vin̈aj Aarón chiꞌ dꞌa ebꞌ chon̈abꞌ:

—A dꞌa jun yemcꞌualil tic ol eyojtaquejeli to yel a Jehová ix ex icꞌanelta dꞌa Egipto. 7 Axo dꞌa qꞌuin̈ibꞌalil ol eyilan stziquiquial, yujto ix yabꞌi tas ix eyutej e lolon dꞌa spatic. Palta a on̈ tic, ¿toc ay quelcꞌochi, yuj chiꞌ tzeyal co pecal? xchi ebꞌ vin̈.

8 Ix yalanpax vin̈aj Moisés chiꞌ:

—A dꞌa yemcꞌualil tic ol yacꞌ nocꞌ chibꞌej Jehová e chiꞌa. Axo dꞌa junjun qꞌuin̈ibꞌalil, ol yacꞌan e vael ato syalaꞌ jantac tze vaꞌa, yujto ix yabꞌi tas tzeyalubꞌtan̈ej dꞌa spatic. Vachꞌchom dꞌa co patic tzeyalubꞌtan̈ej eyalani, palta malaj quelcꞌoch a on̈ tic. Val yel a dꞌa spatic Jehová tzeyalubꞌtan̈ej, xchi vin̈.

9 A dꞌa jun rato chiꞌ ix yal vin̈aj Moisés chiꞌ dꞌa vin̈aj Aarón:

—Al dꞌa ebꞌ smasanil to snitzcot sbꞌa ebꞌ dꞌa yichan̈ Jehová, yujto ix yabꞌi tas ix yalubꞌtan̈ej ebꞌ, xchi vin̈.

10 A val yic van slolon vin̈aj Aarón dꞌa ebꞌ yetisraelal chiꞌ, ix yilanbꞌat ebꞌ dꞌa tzꞌinan luum, ix schꞌoxanqꞌue sbꞌa stziquiquial Jehová dꞌa scal jun topan̈ asun. 11 Ix yalan Jehová dꞌa vin̈aj Moisés chiꞌ:

12 —Ix vabꞌ val tas ix yal ebꞌ israel tic dꞌa in patic. Yuj chiꞌ al dꞌa ebꞌ to a ticnaic dꞌa qꞌuicꞌbꞌalil, ol vacꞌ nocꞌ schibꞌej ebꞌ, axo sqꞌuin̈ibꞌi qꞌuicꞌan svacꞌ tas sva ebꞌ, masanto sbꞌudꞌji val scꞌol ebꞌ. Icha chiꞌ ol aj yojtacanel ebꞌ to a in ton Jehová e Diosal in, xchi Jehová.

13 A dꞌa jun yemcꞌualil chiꞌ, ix javi n̈ilnaj nocꞌ ubꞌ, ix majel bꞌaj ay scampamento ebꞌ yuj nocꞌ. Axo dꞌa qꞌuin̈ibꞌalil dꞌa junxo cꞌu, ix em yal acꞌval dꞌa spatictac scampamento ebꞌ chiꞌ. 14 Ayic ix tacji yal acꞌval chiꞌ, ay juntzan̈ tas te cotac ix can dꞌa sat luum, icha qꞌuen cheev yilji. 15 Man̈ yojtacoc juntzan̈ chiꞌ ebꞌ. Ayic ix yilanoch ebꞌ, ix yal-lan ebꞌ dꞌay junjun: ¿Tastaxlaj juntzan̈ tic? xchi ebꞌ. Ix yalan vin̈aj Moisés:

—Aton e vael syacꞌ Jehová tic. 16 Aton jun checnabꞌil ix yacꞌ tic: Syal e molanchaan̈ dꞌa junjun cꞌu, icha jantac tzꞌoch eyuj yuj jayvan̈ ex dꞌa yol e pat. Iqꞌuecqꞌue junjunoc echlabꞌ yic junjun anima, xchi vin̈. 17 Ichaton chiꞌ ix yutej ebꞌ anima chiꞌ. Ay mach nivan ix molanqꞌuei, ay pax mach quenn̈ej. 18 Ato a yechlabꞌil ix acꞌchaji, maj yacꞌ sobre dꞌa ebꞌ nivan ix molanqꞌuei, an̈ejaꞌ cꞌocbꞌil ix yabꞌpax dꞌa ebꞌ quenn̈ej ix molanqꞌuei. Junjun mach ix smolqꞌue jantac sva dꞌa junjun cꞌu.

19 Ix yalan vin̈aj Moisés dꞌa ebꞌ:

—Max yal-laj e molancan yic e qꞌuicꞌan, xchi vin̈.

20 Ay mach maj cꞌanabꞌajanlaj tas ix yal vin̈, ix smolancan jabꞌocxo yic sva ebꞌ qꞌuicꞌan yalani. A tas ix smolcan ebꞌ chiꞌ, ix och aꞌayaxoc, ix qꞌue sjabꞌ dꞌa junxo cꞌu, yuj chiꞌ ix cot yoval vin̈aj Moisés chiꞌ dꞌa ebꞌ maj cꞌanabꞌajan chiꞌ.

21 Junjun qꞌuin̈ibꞌalil smolanqꞌue ebꞌ jantac sva dꞌa jun cꞌu chiꞌ, axo yic sja yoc cꞌu tzꞌulaxbꞌati. 22 Axo dꞌa svaquil cꞌual, junjunto echlabꞌ sobreal syicꞌqꞌue ebꞌ yic sva junjun ebꞌ, syalelcꞌochi to chabꞌchabꞌ echlabꞌ yic junjun ebꞌ. Axo ebꞌ ayoch yajalil dꞌa scal ebꞌ anima chiꞌ, ix bꞌat yal ebꞌ dꞌa vin̈aj Moisés. 23 Yuj chiꞌ ix yalan vin̈:

—A jun chiꞌ a Jehová ix alani, yujto a qꞌuicꞌan scꞌual icꞌoj ip. A jun icꞌoj ip chiꞌ scꞌual yic tzꞌicꞌjichaan̈ Jehová. Tze tzꞌan̈can tas stzꞌan̈chaji yic tze va qꞌuicꞌan, tze mayancan tas smaychaji, tze sicꞌancan yic e qꞌuicꞌan chiꞌ, xchi vin̈.

24 Ix scꞌanabꞌajan ebꞌ anima tas ix yal vin̈aj Moisés chiꞌ. Ix sicꞌancanbꞌat masanil tas sva ebꞌ dꞌa junxo cꞌu. Maj ixtaxbꞌatoc, maj ochpax aꞌayaxoc. 25 Axo dꞌa junxo cꞌu, ix yalan vin̈aj Moisés chiꞌ:

—Vaec e vael can eyuj evi, yujto scꞌual icꞌoj ip ticnaic, tze cꞌanabꞌajej eyicꞌanchaan̈ Jehová. A dꞌa jun cꞌual tic, malaj jabꞌoc tas tze va chiꞌ tzꞌilchaj eyuj dꞌa spatictac campamento tic. 26 Yujto an̈ej dꞌa vaqueꞌ cꞌu dꞌa yol semana syal e molan tas tze vaꞌa, axo dꞌa yuquil cꞌual, man̈xalaj tas sjavi, yujto scꞌual icꞌoj ip, xchi vin̈.

27 Palta ay ebꞌ ix bꞌat sayan yic dꞌa yuquil cꞌual chiꞌ, palta malaj jabꞌoc tas ix ilchaj yuj ebꞌ. 28 Ix yalan Jehová dꞌa vin̈aj Moisés chiꞌ:

—Yelxo val max e cꞌanabꞌajej, ¿tom ol ex ochn̈ej ijan e tenanecꞌ in checnabꞌil yedꞌ in cꞌaybꞌubꞌal? 29 Naec val sicꞌlabꞌil, a in Jehová in svalaꞌ to yovalil tze cꞌanabꞌajej scꞌual icꞌoj ip. Yuj chiꞌ a dꞌa svaquil cꞌual, svacꞌ vael dꞌa chabꞌ cꞌual, yuj chiꞌ a dꞌa jun cꞌual chiꞌ, vachꞌn̈ej eyajecꞌ dꞌa yol bꞌajtac ayex, malaj mach sbꞌat munlajel, xchi dꞌa vin̈.

30 Ichaton chiꞌ ix aji, ix yicꞌan yip ebꞌ anima dꞌa yuquil cꞌual chiꞌ.

31 Maná^* ix yacꞌ ebꞌ israel scuch juntzan̈ vael ix smol chiꞌ. Sacsac yilji icha val sat an̈ culantro. Te chiꞌ svaji, icha ixim cꞌoxox pan ayoch yalchabꞌ dꞌay.

32 Ix lajvi chiꞌ, ix yalan vin̈aj Moisés:

—Ix yal Jehová dꞌayin icha tic: Siqꞌuecbꞌat junoc echlabꞌ maná, yic ol yil ebꞌ eyuninal dꞌa bꞌaqꞌuin̈. Ol yil e vael ebꞌ ix vacꞌ e va dꞌa lum tzꞌinan luum tic, ayic ix ex vicꞌanelta dꞌa Egipto, xchi Jehová, xchi vin̈aj Moisés chiꞌ.

33 Yuj chiꞌ, ix yalan vin̈ dꞌa vin̈aj Aarón:

—Icꞌcot junoc chen, tzacꞌanem junoc echlabꞌ maná dꞌa yool icha yalan Jehová. Slajvi chiꞌ, tza sicꞌancanbꞌat dꞌa yichan̈ Jehová chiꞌ, yic vachꞌ ol yil ebꞌ quin̈tilal, xchi vin̈.

34 Icha ix yutej Jehová yalan dꞌa vin̈aj Moisés chiꞌ, icha chiꞌ ix yutej vin̈aj Aarón, ix sicꞌancanbꞌat vin̈ dꞌa stzꞌey qꞌuen qꞌueen bꞌaj tzꞌibꞌabꞌilcan strato Jehová.

35 Dꞌa 40 abꞌil ix sva maná ebꞌ israel, masanto ix cꞌoch ebꞌ dꞌa lum cajnubꞌal dꞌa smojonal Canaán.

36 A jun echlabꞌ chiꞌ, Gomer sbꞌi, ay am nan̈aloc yoxil litro a aꞌ tzꞌem dꞌa yool.