A sbꞌit vin̈aj Moisés
15
Ix lajvi chiꞌ, ix sbꞌitan jun bꞌit vin̈aj Moisés chiꞌ yedꞌ masanil ebꞌ israel dꞌa yichan̈ Jehová, ix yalani:Sco bꞌitej sbꞌi Jehová, yujto te satubꞌtac ix aj yacꞌan ganar oval. Ix mucchajcan nocꞌ chej dꞌa yol aꞌ mar yedꞌ ebꞌ vin̈ edꞌjinac nocꞌ.
2 A jun co bꞌit tic yic Jehová, yujto a co Columal yaji, yuj chiꞌ squicꞌchaan̈. Ol cal vachꞌ lolonel dꞌa co Diosal, sDiosal pax ebꞌ co mam quicham, yuj chiꞌ smoj val quicꞌanchaan̈.
3 Te jelan yacꞌan oval, Jehová ton val sbꞌi.
4 Ix mucchajcanem scarruaje vin̈ sreyal Egipto yedꞌ ebꞌ soldado dꞌa yol aꞌ yuj Jehová. Yedꞌ ebꞌ capitán nivan yelcꞌochi, ix bꞌatcan ebꞌ dꞌa yich aꞌ Chacchac Mar.
5 Icha val qꞌuen qꞌueen ix aj sbꞌatcan ebꞌ dꞌa yich aꞌ, ix mucchajcanem ebꞌ.
6 Mamin Jehová, yelxo val ay a poder. Ix acꞌ ganar ebꞌ ayoch ajcꞌolal dꞌayon̈.
7 A yedꞌ a nivan poder ix a macꞌ telvoc ebꞌ sgana syacꞌ oval edꞌoc. Ayic ix cot oval, icha val stzꞌabꞌat an̈ ac, icha chiꞌ ix aj slajvicanel ebꞌ uuj.
8 Yedꞌ ipalil ix a puꞌanbꞌat icꞌ, yuj chiꞌ ix spojbꞌat sbꞌa aꞌ mar. Icha tzꞌalqꞌueen ix ajcan aꞌ dꞌa junjun stitac jun bꞌe taquin̈ chiꞌ, icha val to tzatzxon̈ej ix ajcan aꞌ.
9 Ix yalan ebꞌ ajcꞌol chiꞌ icha tic: Ol on̈ tzacꞌlaj dꞌa spatic ebꞌ masanto ol yal syamchaj ebꞌ cuuj. Ol quicꞌanecꞌ tastac ay dꞌa ebꞌ, ol co pucaneqꞌui, ichato ol cacꞌ bꞌudꞌjoc co cꞌool yuuj. Ol quicꞌanqꞌueta qꞌuen quespada dꞌa yol yatut, ol co satanel ebꞌ, xchi ebꞌ.
10 Ayic ix a puꞌanbꞌat icꞌ dꞌa yibꞌan̈ aꞌ mar, ix mucchajcan ebꞌ vin̈ yuj aꞌ, ix bꞌatcan ebꞌ vin̈ dꞌa yich aꞌ icha qꞌuen plomo.
11 Mamin Jehová, malaj junoc dios syal slajbꞌan sbꞌa edꞌoc. Nivan elcꞌochi, yujto a achxon̈ej ochi. Man̈xa junocxo mach syal schꞌoxan milagro yedꞌ tas satubꞌtac icha tza cꞌulej.
12 Ix a chꞌox a poder, ichato ix turjibꞌat ebꞌ yuj aꞌ mar.
13 Yuj a nivan vachꞌcꞌolal tzon̈ a cuchbꞌan a on̈ a chon̈abꞌ on̈ ix a colcanel tic. Yedꞌ a poder tzon̈ icꞌanbꞌat dꞌa a cajnubꞌ to ictaxon yaji.
14 Ayic ol yabꞌan jun tic juntzan̈xo nación, ol ibꞌxocqꞌue ebꞌ yuj xivelal, ol xivcanqꞌue ebꞌ filisteo.
15 A ebꞌ yajalil ebꞌ aj Edom, ol satcanbꞌat scꞌol ebꞌ. A ebꞌ yajal dꞌa Moab, ol lucloncan ebꞌ yuj xivelal. Icha pax chiꞌ ebꞌ cananeo, ol laj scꞌubꞌejel sbꞌa ebꞌ, 16 yujto ol te xivcanqꞌue ebꞌ, ol sicbꞌoccanel ebꞌ.
Mamin Jehová, icha qꞌuen qꞌueen ol ajcan ebꞌ yuj a poder, masanto ol on̈ ecꞌbꞌat a on̈ a chon̈abꞌ on̈ colbꞌilel uj tic.
17 Mamin Jehová, ol on̈ icꞌbꞌat a on̈ a chon̈abꞌ on̈ tic edꞌoc dꞌa jun vitz to ic yaji, jun lugar to a ach ix a sicꞌcaneli bꞌaj ol ach ajoc, aton jun a cajnubꞌ to a nanaccani.
18 Ach Jehová, Rey ach dꞌa masanil tiempo, xchi ebꞌ israel dꞌa sbꞌit.
A sbꞌit ix María
19 Ayic ix cot scarruaje vin̈ sreyal Egipto yedꞌ juntzan̈ ebꞌ edꞌjinac nocꞌ chej dꞌa yol aꞌ mar, ix mucjicanem ebꞌ dꞌa yol aꞌ yuj spoder Jehová. Axo pax ebꞌ israel jun, yelxo val vachꞌ ix aj yecꞌ ebꞌ dꞌa yol jun bꞌe taquin̈ dꞌa snan̈al aꞌ. 20 Yuj chiꞌ, a ix María schecabꞌ Dios, yanabꞌ vin̈aj Aarón, ix yicꞌqꞌue jun spandereta ix. Masanil ebꞌ ix yetisraelal ix yedꞌnacqꞌue spandereta ebꞌ ix, ix qꞌue cheneljoc ebꞌ ix yedꞌ ix. 21 Ix bꞌitan ix María dꞌa yichan̈ ebꞌ ix icha tic:
Co bꞌitejec sbꞌi Jehová, yujto te satubꞌtac ix aj yacꞌan ganar oval. Ix mucchajcan nocꞌ chej dꞌa yol aꞌ mar yedꞌ ebꞌ vin̈ edꞌjinac nocꞌ, xchi ix.
A jun a aꞌ cꞌaꞌ
22 Ix lajvi chiꞌ, ix yicꞌanel ebꞌ israel vin̈aj Moisés dꞌa stiꞌ aꞌ Chacchac Mar chiꞌ, ix cot ebꞌ dꞌa taquin̈ luum yic Shur. Oxeꞌ cꞌual ix bꞌey ebꞌ, malaj bꞌaj ix ilchaj a aꞌ yuj ebꞌ. 23 Ix lajvi chiꞌ, ix javi ebꞌ dꞌa jun scuch Mara. Ay jun aꞌ taꞌ, palta maj yal-laj yucꞌan aꞌ ebꞌ yujto yelxo val te cꞌaꞌ aꞌ, yuj chiꞌ Mara ix sbꞌiejcan jun lugar chiꞌ yuj ebꞌ.
24 Ix och ijan ebꞌ anima chiꞌ schichon scꞌol dꞌa spatic vin̈aj Moisés chiꞌ, ix laj yalan ebꞌ: ¿Tas ol cucꞌ ticnaic? xchi ebꞌ. 25 Yuj chiꞌ, ix scꞌanan scolval Jehová vin̈aj Moisés chiꞌ. Axo Jehová chiꞌ ix chꞌoxan jun te teꞌ dꞌa vin̈, ix yacꞌanem teꞌ vin̈ dꞌa yol aꞌ, ix bꞌo aꞌ yuj teꞌ.
Ataꞌ ix yacꞌ jun sley Jehová dꞌa ebꞌ israel, yic syilaꞌ tato scꞌanabꞌajej ebꞌ. 26 Ix yalan Jehová: Tato tze cꞌanabꞌajej tas sval a in Jehová in tic, tze cꞌulan tas syal in checnabꞌil yedꞌ masanil in cꞌaybꞌubꞌal, man̈ ol vacꞌcotlaj ilya dꞌa eyibꞌan̈ icha juntzan̈ ix vacꞌcot dꞌa yibꞌan̈ ebꞌ aj Egipto, yujto a in Jehová in tzex van̈tej, xchi.
27 Ix lajvi chiꞌ, ix javi ebꞌ dꞌa Elim bꞌaj ay lajchaveꞌ sjaj a aꞌ yedꞌ 70 teꞌ palma. Ataꞌ ix sbꞌoqꞌue scampamento ebꞌ dꞌa stitac a aꞌ chiꞌ.