Ix ulecꞌ vin̈aj Jetro yil vin̈aj Moisés
18
A vin̈aj Jetro, sn̈iꞌ vin̈aj Moisés, sacerdote yaj dꞌa Madián. Ix yabꞌ vin̈ jantac tas ix scꞌulej Dios yedꞌ vin̈aj Moisés yedꞌ pax chon̈abꞌ Israel, ayic ix icꞌjielta ebꞌ yuuj dꞌa Egipto. 2 A vin̈aj Moisés chiꞌ, yacꞌnac meltzaj ix yetbꞌeyum vin̈, aton ix Séfora yedꞌ chavan̈ yuninal vin̈ dꞌa vin̈aj Jetro chiꞌ. Ix chaji ebꞌ yuj vin̈aj Jetro chiꞌ. 3 (A vin̈ sbꞌabꞌel unin vin̈aj Moisés chiꞌ, Gersón sbꞌi vin̈, yujto ix yal vin̈: Ton̈ej tzin bꞌeyecꞌ dꞌa scal ebꞌ chꞌoc chon̈abꞌil, xchi vin̈. 4 Axo vin̈ schabꞌil scuch Eliezer, yujto ix yal vin̈: Ayn̈ejoch sDiosal in mam vedꞌoc, a ix in colanel dꞌa qꞌuen yespada vin̈ sreyal Egipto, xchi vin̈.)5 Axo ix yabꞌan vin̈aj Jetro to a dꞌa tzꞌinan luum ay scampamento vin̈aj Moisés chiꞌ, dꞌa yich vitz bꞌaj schꞌox sbꞌa Dios. Ataꞌ ix bꞌat vin̈aj Jetro chiꞌ yil vin̈ yedꞌnac ix Séfora yetbꞌeyum vin̈aj Moisés chiꞌ vin̈. Yedꞌnacpax ebꞌ yuninal vin̈aj Moisés chiꞌ vin̈. 6 Ix yalanbꞌat vin̈ dꞌa vin̈aj Moisés chiꞌ:
—A in Jetro a n̈iꞌ in tic, van in cꞌoch ach vilaꞌ, ajun ix etbꞌeyum vedꞌoc yedꞌ pax ebꞌ vin̈ eyuninal schavan̈il, xchibꞌat vin̈.
7 Dꞌa elan̈chamel ix elta vin̈aj Moisés scha vin̈ sn̈iꞌ chiꞌ, ix em n̈ojan vin̈ dꞌa yichan̈ vin̈, ix stzꞌubꞌanelta stiꞌ vin̈. Ix lajvi yacꞌlan stzatzil scꞌol ebꞌ, ix och ebꞌ dꞌa yol smantiado vin̈aj Moisés chiꞌ. 8 Ix yalan vin̈aj Moisés chiꞌ dꞌa vin̈ sn̈iꞌ chiꞌ tas ix utaj vin̈ sreyal Egipto yedꞌ masanil ebꞌ aj Egipto yuj Jehová ayic ix scolanel ebꞌ chon̈abꞌ israel. Ix yalanpax vin̈ yuj jantac yaelal ix yil yedꞌ ebꞌ anima chiꞌ dꞌa yoltac bꞌe yedꞌ tas ix aj scolji ebꞌ yuj Jehová. 9 Ix te tzalaj scꞌol vin̈aj Jetro chiꞌ, a ix yabꞌan scolval Dios vin̈ dꞌa chon̈abꞌ Israel, ayic ix scolanelta ebꞌ dꞌa yol scꞌabꞌ ebꞌ aj Egipto. 10 Ix yalan vin̈:
—Alchajocabꞌ vachꞌ lolonel dꞌa Jehová, aton ix ex colanel dꞌa yol scꞌabꞌ ebꞌ aj Egipto yedꞌ dꞌa yol scꞌabꞌ vin̈ rey, ix ex yicꞌanelta dꞌa yalan̈ smandar ebꞌ. 11 A ticnaic sicꞌlabꞌil val snachajel vuuj to a Jehová yelxo val ecꞌal dꞌa yibꞌan̈ juntzan̈xo dios, yujto ix ex coljiel yuj dꞌa yol scꞌabꞌ ebꞌ aj Egipto, vachꞌchom ix ste iqꞌuejchaan̈ sbꞌa ebꞌ dꞌa yichan̈, xchi vin̈aj Jetro chiꞌ.
12 Ix lajvi chiꞌ, ix sn̈usan jun nocꞌ silabꞌ vin̈aj Jetro chiꞌ dꞌa Dios, ix yacꞌanpax juntzan̈xo silabꞌ vin̈ dꞌay. Ix ja vin̈aj Aarón yedꞌ ebꞌ yichamtac vinaquil chon̈abꞌ bꞌaj ayecꞌ vin̈ sn̈iꞌ vin̈aj Moisés chiꞌ, ix va ebꞌ dꞌa yichan̈ Jehová.
Ix sicꞌjiel juntzan̈ ebꞌ juez yuj vin̈aj Moisés
13 Axo dꞌa junxo cꞌual, ix em cꞌojan vin̈aj Moisés, ix och ijan vin̈ schꞌolbꞌitan tastac yaj yoval ebꞌ chon̈abꞌ. Pilan cꞌu ayecꞌ ebꞌ anima chiꞌ dꞌa yichan̈ vin̈. 14 Ayic ix yilan vin̈aj Jetro yuj tas syutej vin̈aj Moisés sbꞌoan yaj yoval ebꞌ anima chiꞌ, ix yalan vin̈ dꞌa vin̈:
—¿Tas yuj icha chiꞌ tzutej ebꞌ anima tic? ¿Tas yuj a achn̈ej tza bꞌo yaj yoval ebꞌ smasanil? Ay ebꞌ ton̈ej tzꞌecꞌ tiempo dꞌay, pilan cꞌu stan̈vej ebꞌ, xchi vin̈aj Jetro chiꞌ.
15 Ix tacꞌvi vin̈aj Moisés chiꞌ:
—Sjavi ebꞌ anima tic dꞌayin yic tzin cꞌanbꞌan dꞌa Dios yuj ebꞌ. 16 Ayic syacꞌan oval ebꞌ sjavipax ebꞌ dꞌayin, tzin chꞌolbꞌitan mach tzꞌecꞌ dꞌa yibꞌan̈ yedꞌ mach yel syalaꞌ, slajvi chiꞌ svalan schecnabꞌil yedꞌ scꞌaybꞌubꞌal Dios dꞌa ebꞌ, xchi vin̈.
17 Ix yalan vin̈ sn̈iꞌ vin̈ chiꞌ:
—Man̈ vachꞌoc icha tzutej chiꞌ. 18 Tzach te cꞌunbꞌi, ste cꞌunbꞌipax ebꞌ anima tic. Yelxo tzꞌecꞌ yibꞌan̈ a munlaji, an̈ejtonaꞌ man̈ ol ach tzacꞌvanpaxlaj a chꞌocoj. 19 Abꞌ tas ol val dꞌayach, a Dios ol colvaj edꞌoc. A ach tzach och dꞌa yichan̈ Dios yuj ebꞌ anima, tzalan dꞌay yuj tastac scꞌulej ebꞌ. 20 Vachꞌ to tza cꞌaybꞌej ebꞌ dꞌa sley Jehová, tzalani tas ol aj sbꞌeybꞌat ebꞌ yedꞌ tas ol scꞌulej ebꞌ. 21 A jun tas vachꞌ tza cꞌulej ticnaic to tza siqꞌuel jayvan̈oc ebꞌ vin̈ ay xivcꞌolal dꞌa Dios, ebꞌ vin̈ jelan spensar, ebꞌ vin̈ tojol spensar, ebꞌ vin̈ man̈ comonoc scꞌananel tumin dꞌa anima. Tzacꞌanoch yopisio ebꞌ vin̈ dꞌa yibꞌan̈ junjunoc macan̈ anima. Ay ebꞌ vin̈ tzacꞌoch yajaliloc dꞌa junoc mil anima, ay pax ebꞌ vin̈ tzacꞌoch yajaliloc dꞌa junoc cien, ay pax ebꞌ vin̈ an̈ej dꞌa junoc 50 bꞌaj tzacꞌochi, ay pax ebꞌ vin̈ an̈ej dꞌa lajun̈van̈oc bꞌaj tzacꞌochi. 22 A ebꞌ vin̈ tic ol bꞌoan yaj yoval ebꞌ anima. Tato quenn̈ej yaj yoval anima chiꞌ, sbꞌoꞌocabꞌ yaj ebꞌ vin̈. Tato nivan yaj jun, yicꞌocabꞌcot ebꞌ dꞌa ichan̈. Tato icha chiꞌ ol utej, ol colvaj jabꞌoc ebꞌ yicꞌanel jun munlajel tic dꞌa ibꞌan̈. 23 Tato tza cꞌanabꞌajej a cꞌulan jun tic, tato schapax scꞌol Dios to icha chiꞌ ol ajoc, icha chiꞌ ol aj stechaj uuj. An̈ejtonaꞌ ebꞌ anima tic ol meltzaj ebꞌ dꞌa tzalajcꞌolal dꞌa yedꞌtal junjun, xchi vin̈aj Jetro chiꞌ.
24 Ix scꞌanabꞌajan vin̈aj Moisés tas ix yal vin̈ sn̈iꞌ chiꞌ. 25 Yuj chiꞌ ix sicꞌanel ebꞌ te ay spensar vin̈, ebꞌ jelan dꞌa scal ebꞌ yetchon̈abꞌ, ix yacꞌanoch yopisio ebꞌ vin̈ dꞌa yibꞌan̈ junjun mil anima, dꞌa yibꞌan̈ cien, dꞌa yibꞌan̈ 50 yedꞌ dꞌa yibꞌan̈ lajun̈vaan̈. 26 A ebꞌ vin̈ chiꞌ ayn̈ejoch dꞌa yibꞌan̈ schꞌolbꞌitan yaj ebꞌ anima. A oval te nivan yaji, tzꞌicꞌchajbꞌat dꞌa yichan̈ vin̈aj Moisés chiꞌ. Axo pax oval quenn̈ej yaj jun, a ebꞌ vin̈ sbꞌoan yaji. 27 Ix stacꞌlancan sbꞌa vin̈aj Jetro yedꞌ vin̈aj Moisés chiꞌ, ix pax vin̈ dꞌa schon̈abꞌ.