—Al juntzan̈ lolonel tic dꞌa ebꞌ yin̈tilal vin̈aj Jacob, aton ebꞌ etisraelal: 4 Scham val eyilan tas ix vutej ebꞌ anima dꞌa Egipto yedꞌ tas ix vutej ex vicꞌanelta, ayic ex vicꞌancot bꞌaj ayex ecꞌ tic. Ichato yibꞌan̈ scꞌaxil nocꞌ nivac chꞌacbꞌa ayexqꞌuei ayic ix ex ja dꞌa tic. 5 Tato te cꞌanabꞌajum tzeyutej e bꞌa dꞌayin, tze cꞌanabꞌajan in trato, in chon̈abꞌ ex toni, sicꞌbꞌil ex el vuj dꞌa scal juntzan̈xo chon̈abꞌ. Vic jun yolyibꞌan̈qꞌuinal tic smasanil, 6 palta a exxo tic, jun chon̈abꞌil sacerdote tzex ajcani yic tzin eyacꞌan servil, jun chon̈abꞌ anima to vicn̈ej yaji, xchi Jehová, xa chi dꞌa ebꞌ.

7 Ix lajvi chiꞌ, ix emixta vin̈aj Moisés dꞌa jolom vitz Sinaí chiꞌ, ix yavtancot ebꞌ yichamtac vinaquil chon̈abꞌ vin̈. Ix och ijan vin̈ yalan tas ix yal Jehová chiꞌ. 8 Masanil ebꞌ israel ix tacꞌvi icha tic:

—Masanil tas schec Jehová co cꞌulej, ol co cꞌulejn̈ej, xchi ebꞌ. Ix lajvi chiꞌ, ix bꞌat yalanxi vin̈aj Moisés dꞌa Jehová tas ix yal ebꞌ chon̈abꞌ chiꞌ. 9 Ix yalanxi Jehová chiꞌ dꞌa vin̈:

—A ticnaic, ol in chꞌox in bꞌa dꞌayach dꞌa scal jun nivan qꞌuicꞌal asun, ol in lolon edꞌoc, yic vachꞌ ol yabꞌ ebꞌ anima, ol ach yacꞌanoch ebꞌ dꞌa scꞌool dꞌa masanil tiempo, xchi. Ix yalanxi vin̈aj Moisés chiꞌ dꞌa Jehová tas ix yutej yalan ebꞌ chon̈abꞌ chiꞌ. 10 Ix yalanxi Jehová:

—Ixic, tzal dꞌa ebꞌ anima to sacbꞌitej sbꞌa ebꞌ ticnaic yedꞌ qꞌuicꞌan, sjucꞌanel spichul ebꞌ yujto ol och ebꞌ ejmelal dꞌa vichan̈. 11 Axo chabꞌej tzin emuli, tzin chꞌoxan in bꞌa dꞌa masanil chon̈abꞌ dꞌa jolom vitz Sinaí. 12 Tzaqꞌuem yechel dꞌa yichtac vitz tic, tzalan dꞌa ebꞌ to nivanocabꞌ yelcꞌoch jun vitz tic dꞌa yol sat ebꞌ. Max yal-laj sqꞌueta ebꞌ dꞌay, max yal ste javi ebꞌ dꞌa stzꞌey, tato ay junoc mach sjavi dꞌa stzꞌey, yovalil schami. 13 Malaj mach syal smacꞌancham jun anima chiꞌ yedꞌ scꞌabꞌ. Sjulqꞌuenaj chami, ma sjuljicham yedꞌ jul-labꞌ. Taxon̈ej anima ma junoc nocꞌ nocꞌ, tojoln̈ej schami. Ato ol puchaj schꞌaac nocꞌ calnel, ichato chiꞌ syal snitzancot sbꞌa ebꞌ anima dꞌa slacꞌanil lum vitz tic, xchi Jehová.

14 Ix lajvi chiꞌ, ix paxta vin̈aj Moisés dꞌa jolom vitz chiꞌ, ix ul yalan vin̈ dꞌa ebꞌ israel chiꞌ to sacbꞌitej sbꞌa ebꞌ, sjucꞌanpaxel spichul ebꞌ. 15 Ix yalan vin̈aj Moisés chiꞌ dꞌa ebꞌ:

—A ticnaic sacbꞌitejec e bꞌa, yujto tzex och ejmelal dꞌa Jehová chabꞌej. Man̈xo ex vay yedꞌ ebꞌ ix eyetbꞌeyum dꞌa chabꞌ cꞌual tic, xchi vin̈ dꞌa ebꞌ.

16 Axo ix sacbꞌi dꞌa schabꞌjial, ix ecꞌ copnaj lebꞌlon, ix macꞌvaj cꞌu, ay jun nivan asun qꞌuicꞌ dꞌa jolom vitz chiꞌ. Ix lajvi chi, ix yabꞌan ebꞌ anima te chaan̈ ix ocꞌ jun qꞌuen trompeta dꞌa jolom vitz chiꞌ. Masanil ebꞌ anima ayecꞌ dꞌa yol campamento chiꞌ, ix xivqꞌue ebꞌ. 17 Ix lajvi chiꞌ, ix yicꞌanbꞌat masanil ebꞌ anima vin̈aj Moisés chiꞌ dꞌa spatiquel campamento chiꞌ, ix bꞌat schaan Dios ebꞌ, ix can oyan ebꞌ dꞌa slacꞌanil yich lum vitz chiꞌ. 18 Ix te qꞌue stabꞌil lum vitzal Sinaí chiꞌ, ix emul Jehová dꞌa scal jun nivan cꞌacꞌ. Icha val sqꞌue stabꞌil junoc horno, icha val chiꞌ sqꞌue stabꞌil, ix te ibꞌxiqꞌue jun vitz chiꞌ. 19 Axo qꞌuen trompeta chiꞌ, juntac el spuji qꞌueen, ste qꞌuechaan̈ sjaj qꞌueen. Aton taꞌ ix lolon vin̈aj Moisés yedꞌ Jehová. Te chaan̈ syutej tacꞌvoc sbꞌa Jehová chiꞌ dꞌa vin̈.

20 A val dꞌa schaan̈il sjolom lum vitz chiꞌ, ataꞌ ix emul Jehová, ix yalan dꞌa vin̈aj Moisés chiꞌ to sqꞌue vin̈ bꞌaj ayecꞌ chiꞌ, yuj chiꞌ ix qꞌue vin̈. 21 Ix yalan Jehová dꞌa vin̈:

—A ticnaic eman̈ dꞌa yich vitz chiꞌ, bꞌat alan dꞌa ebꞌ anima to max ecꞌta ebꞌ in yil bꞌaj aycanem jun yechel, axo talaj tzꞌaji, tzijtum ebꞌ schami. 22 An̈ejaꞌ ebꞌ sacerdote tzꞌochtaxon dꞌa in lacꞌanil, yovalil sacbꞌitej sbꞌa ebꞌ. Tato maay, axo talaj tzꞌaji, svachꞌ satel ebꞌ, xchi dꞌa vin̈.

23 Ix tacꞌvi vin̈aj Moisés chiꞌ dꞌay:

—A ebꞌ chon̈abꞌ chiꞌ, max yal-laj sqꞌueta ebꞌ dꞌa lum vitz tic, yujto a ach ix alaꞌ to tzꞌem yechel bꞌaj syal sjavi ebꞌ yuj schꞌoxani to nivan yelcꞌochi, xchi vin̈.

24 Ix yalanxi Jehová dꞌa vin̈ icha tic:

—Eman̈xi, axo tzach qꞌueuli edꞌnacocabꞌ vin̈aj Aarón. Axo ebꞌ sacerdote yedꞌ masanil ebꞌ chon̈abꞌ, max cꞌaxpajecꞌtalaj ebꞌ bꞌaj aycanem yechel chiꞌ uuj, yic max javi ebꞌ bꞌaj ayinecꞌ tic, tato maay, xim miltachamlaj ebꞌ, xchi Jehová.

25 Ix emta vin̈aj Moisés chiꞌ, ix ul yalan vin̈ dꞌa ebꞌ chon̈abꞌ tas ix yal Jehová chiꞌ.