2 A in ton Jehová e Diosal in, ix ex viqꞌuelta dꞌa yol yic Egipto bꞌaj ayex och checabꞌoc, bꞌaj man̈ eyicoc e bꞌa.

3 Malajocabꞌ junocxo dios bꞌaj tzex och ejmelal, palta an̈ejocabꞌ dꞌayin.

4 Man̈ e bꞌo yechel junoc tas e diosaloc, junoc tas ay dꞌa satchaan̈, tas ay dꞌa sat luum tic, ma tastac ay dꞌa yoltac a aꞌ. 5 Man̈ ex em n̈ojan dꞌay, man̈ eyacꞌpaxem e bꞌa dꞌay, yujto a in Jehová e Diosal in, ste cot voval dꞌayex tato tzex och ejmelal dꞌa junocxo tasi. Ol vacꞌoch syaelal ebꞌ mamabꞌil malaj velcꞌoch dꞌay. Ol vacꞌanpax yaelal dꞌa yibꞌan̈ yuninal ebꞌ, yixchiquin ebꞌ yedꞌ yin̈tilal ebꞌ. 6 Axo ebꞌ tzin xajanani, ebꞌ scꞌanabꞌajan in checnabꞌil, ol in xajanej ebꞌ yedꞌ ebꞌ yin̈tilal ebꞌ yic ol bꞌeyn̈ejbꞌatoc.

7 Man̈ comonoc tze loc in bꞌi a in Jehová e Diosal in tic, ma tzeyacꞌ bꞌinaj in bꞌi dꞌa junoc tas dꞌa ichn̈ej taꞌ, yujto ol vacꞌ yaelal dꞌa mach icha chiꞌ scꞌulej.

8 Nivanocabꞌ yelcꞌoch scꞌual icꞌoj ip dꞌayex yuj in eyicꞌanchaan̈. 9 Vaqueꞌ cꞌual tzex munlaj dꞌa e munlajel, 10 axo dꞌa yuquil cꞌual, scꞌual icꞌoj ip. A jun cꞌu chiꞌ vic yaji. Man̈ ex munlaj dꞌa jun cꞌu chiꞌ yedꞌ ebꞌ eyuninal, ebꞌ eyisil, ma ebꞌ vin̈ e checabꞌ, ma ebꞌ ix e checabꞌ, ma nocꞌ e molbꞌetzal nocꞌ, nocꞌ smunlaji, ma ebꞌ chꞌoc chon̈abꞌil ayecꞌ dꞌa e cal, mocabꞌ munlaj ebꞌ. 11 Yujto a in Jehová in tic, dꞌa vaqueꞌ cꞌual ix in bꞌo satchaan̈ yedꞌ sat luum yedꞌ aꞌ mar yedꞌ masanil tastac ay dꞌay. Axo dꞌa yuquil cꞌual, ix och vaan in munlaji, yuj chiꞌ a jun yuquil cꞌual chiꞌ vic yaji, yuj yochpax e vachꞌiloc.

12 Ayocabꞌ yelcꞌoch e mam e nun dꞌa e sat, yic vachꞌ snajatbꞌi e qꞌuinal dꞌa sat lum luum ol vacꞌ dꞌayex.

13 Man̈ e milcham ebꞌ eyetanimail.

14 Man̈ ex em ajmulal dꞌa yol scꞌabꞌ eyetbꞌeyum junjun ex.

15 Man̈ ex elcꞌanoc.

16 Man̈ e naqꞌue lolonel dꞌa spatic ebꞌ eyetanimail.

17 Man̈ e nibꞌejoch spat ebꞌ eyetanimail. Man̈ e nibꞌejpaxoch ix yetbꞌeyum ebꞌ, vin̈ schecabꞌ ebꞌ, ma ix schecabꞌ ebꞌ, nocꞌ svacax ebꞌ, nocꞌ sbꞌuru ebꞌ, ma junocxo tas ay dꞌa ebꞌ eyetanimail chiꞌ, man̈ e nibꞌejochi, xchi Jehová.

18 Masanil ebꞌ israel ix yabꞌ val ebꞌ smacꞌvaj cꞌu. Ix yilan ebꞌ yecꞌ copoljoc cꞌacꞌ, ix yabꞌanpax ebꞌ te chaan̈ ix puji jun qꞌuen trompeta. Ix yilan val ebꞌ sqꞌue stabꞌil lum vitzal Sinaí, ix ibꞌxiqꞌue ebꞌ yuj xivelal, ix snitzanel sbꞌa ebꞌ. 19 Yuj chiꞌ ix yal ebꞌ dꞌa vin̈aj Moisés:

—A ach tzach lolon dꞌayon̈. Ol co cꞌanabꞌajan tas ol yal Jehová Dios chiꞌ dꞌayach. Mocxobꞌ lolon dꞌayon̈, tato maay, ol on̈ chamoc, xchi ebꞌ anima chiꞌ.

20 Ix tacꞌvi vin̈aj Moisés chiꞌ:

—Man̈ ex xivoc, ton̈ej tzulecꞌ Dios chiꞌ yic tzex yacꞌan proval, yic vachꞌ ayn̈ej e xivcꞌolal dꞌay, yic man̈ ol ochn̈ej e mul, xchi vin̈.

21 Yuj chiꞌ a ebꞌ chon̈abꞌ chiꞌ, najat ayel ebꞌ, axo vin̈aj Moisés chiꞌ ix snitzbꞌat sbꞌa vin̈ dꞌa slacꞌanil jun asun qꞌuicꞌ bꞌaj ayecꞌ Dios chiꞌ.

22 Ix yalan Jehová dꞌa vin̈aj Moisés chiꞌ:

Al juntzan̈ lolonel tic smasanil dꞌa ebꞌ etisraelal: A ex tic ix eyilaꞌ chajtil ix vutej in lolonemta dꞌayex dꞌa satchaan̈. 23 Man̈ e bꞌo qꞌuen oro ma qꞌuen plata e diosaloc yic bꞌaj tzex och ejmelal, icha tzꞌaj eyacꞌanem e bꞌa dꞌayin. 24 Bꞌoec junoc altar dꞌayin, nabꞌa luum tzeyacꞌoch dꞌay, yic bꞌaj tze n̈ustzꞌa nocꞌ calnel, ma nocꞌ vacax tzeyacꞌ silabꞌil dꞌayin, ma bꞌaj tze n̈ustzꞌa ofrenda yic e juncꞌolal vedꞌoc. Yaln̈ej bꞌaj ol in chꞌox dꞌayex yic tzex och ejmelal dꞌayin, ataꞌ ol vacꞌ in vachꞌcꞌolal dꞌa eyibꞌan̈. 25 Tato a qꞌuen qꞌueen tzeyacꞌoch dꞌa junoc altar chiꞌ, man̈ e tzeylaj qꞌueen, tato tzeyacꞌoch qꞌuen tzeybꞌil chiꞌ, man̈ vachꞌoc dꞌa yol in sat. 26 A jun altar tze bꞌo chiꞌ, man̈ eyacꞌoch scꞌoochal bꞌaj tzex qꞌuei, yic vachꞌ max ilji e nivanil, xa chi dꞌa ebꞌ, xchi dꞌa vin̈.