2 Tato ay junoc vin̈ eyetchon̈abꞌ tze manaꞌ yic tzꞌoch e checabꞌoc, an̈ej vaqueꞌ abꞌil smunlaj vin̈ eyedꞌoc, axo dꞌa yuquil abꞌil tzeyacꞌanel vin̈ dꞌa libre, yicxo sbꞌa vin̈. Malaj tumin syacꞌ vin̈ yic tzeyacꞌanel vin̈ dꞌa libre chiꞌ. 3 Tato schꞌocojiln̈ej vin̈ cꞌochnac dꞌayex, an̈ejaꞌ schꞌocojil vin̈ sbꞌati. Tato ay ix yetbꞌeyum vin̈ yedꞌnac jun, an̈ejaꞌ syicꞌbꞌat ix vin̈ yedꞌoc. 4 Tato a ex ix e man vin̈ chiꞌ, a ex ix eyacꞌoch yetbꞌeyum vin̈, scan ix ix chiꞌ yedꞌ ebꞌ unin eyedꞌoc, schꞌocoj vin̈ sbꞌati. 5 Tato syal vin̈ checabꞌ chiꞌ jun: Malaj in gana tzin el dꞌa libre yujto xajan vin̈ in patrón yedꞌ ix vetbꞌeyum yedꞌ pax ebꞌ vuninal vuuj, tato xchi vin̈, 6 tzeyicꞌbꞌat vin̈ dꞌa yichan̈ ebꞌ yajal. Tzꞌoch lin̈an vin̈ dꞌa smarcoal spuertail sdespacho ebꞌ vin̈ yajal chiꞌ, tzeyolan schiquin vin̈ dꞌa qꞌuen ol-labꞌ, tzꞌochcan yechel vin̈ to scan vin̈ eyedꞌoc dꞌa juneln̈ej.

7 Tato ay junoc mach schon̈el yisil dꞌa checabꞌoc, max yal-laj yacꞌjiel ebꞌ ix dꞌa libre ichoc ebꞌ vin̈ vinac. 8 Tato a vin̈ spatrón ix chiꞌ maj chaanlaj scꞌol yoch ix yetbꞌeyumoc icha yaj strato ebꞌ yujto malaj sgana vin̈ dꞌa ix, syal smanjixiel ix yuj junoc scꞌabꞌyoc. Vachꞌchom malaj sgana vin̈ patrón chiꞌ syicꞌlaj sbꞌa yedꞌ ix, palta max yal-laj schon̈an ix vin̈ dꞌa junoc chꞌoc chon̈abꞌil. 9 Tato a vin̈ patrón chiꞌ smanan ix yic tzꞌoch ix yetbꞌeyumoc junoc yuninal, ichaocabꞌ yisil syutej ix. 10 Palta tato a vin̈ spatrón ix chiꞌ tzꞌicꞌan ix yetbꞌeyumoc, syicꞌan junocxo ix vin̈, mocabꞌ emnaquil tzꞌaj ix bꞌabꞌel chiꞌ, palta yovalil syacꞌ svael ix vin̈ yedꞌ spichul ix, svaypax vin̈ yedꞌ ix. 11 Tato max scꞌanabꞌajej vin̈ yacꞌan oxeꞌ tastac tic, tzꞌactajel ix, man̈xa pax tas stup ix yic tzꞌactajeli.

12 A mach smilancham junoc anima, yovalil smiljipaxchamoc. 13 Palta tato man̈ scꞌanoc scꞌol ix milvaji, tato stiempoalxo scham jun anima chiꞌ, a in Jehová in ol val dꞌayex bꞌaj ol bꞌat scꞌubꞌejel sbꞌa jun mach ix milancham anima chiꞌ. 14 Palta a mach scham val snaani smilancham yetanimail, vachꞌchom bꞌaj ay valtar sbꞌat scol sbꞌa, tzꞌicꞌchajelta, smiljichamoc.

15 A mach smacꞌan smam ma snun, yovalil schami.

16 Tato ay mach tzꞌelcꞌanbꞌat junoc anima, tato toxo ix schon̈bꞌati, ma aytoecꞌ yedꞌoc, ayic syamchaj jun elcꞌum anima chiꞌ, yovalil schami. 17 A mach sbꞌajan smam snun, macꞌjocabꞌ chamoc.

18 Tato ay chavan̈oc syacꞌ oval, tato ay junoc vin̈ slajvi yuj junxo vin̈ chiꞌ, taxon̈ej qꞌueen syacꞌlabꞌej vin̈, ma yedꞌ scꞌabꞌ, an̈ejto max chami, palta te nivan ix aj yabꞌan syail, 19 axo dꞌa jayeoc cꞌual tzaxo yal yecꞌxi yedꞌ scꞌococh. A vin̈ smacꞌvaj chiꞌ, yovalil stup vin̈ bꞌaj tzꞌan̈taj vin̈ slajvi chiꞌ yedꞌ pax scꞌu vin̈, palta max acꞌjiochlaj chamel dꞌa yibꞌan̈ vin̈.

20 Tato ay junoc vin̈ patrón smacꞌan schecabꞌ yedꞌ te teꞌ, taxon̈ej vinac ma ix, axo tzꞌaji schami, yovalil tzꞌoch chamel dꞌa yibꞌan̈ vin̈. 21 Palta tato tzato ecꞌ jun checabꞌ chiꞌ chabꞌ oxeocxo cꞌual, ichato chiꞌ schami, maxtzac acꞌjiochlaj chamel dꞌa yibꞌan̈ vin̈ patrón chiꞌ, yujto yic yaj jun schecabꞌ chiꞌ.

22 Tato ay chavan̈oc vinac van yacꞌan oval, syamchajcꞌoch junoc ix ix to yabꞌixxo dꞌa scal oval chiꞌ yuj ebꞌ, tzꞌel unin chiꞌ dꞌa spatic ix, palta malaj jabꞌoc tzꞌicꞌan ix, a vin̈ tzꞌoch smul chiꞌ stupan jantac scꞌan vin̈ yetbꞌeyum ix, an̈ejton pax aꞌ, ato syalaꞌ tas tzꞌaj schꞌolbꞌitaj yuj ebꞌ vin̈ juez. 23 Palta tato ay tas tzꞌicꞌan ix jun, ato syalaꞌ tas tzꞌicꞌan ix chiꞌ, icha pax chiꞌ tzꞌutajpax vin̈ tzꞌoch smul chiꞌ. Tato scham ix, schampax vin̈. 24 Tato tzꞌixtax yol sat ix, ma qꞌuen ye ix, ma scꞌabꞌ ix, ma yoc ix, 25 ta stzꞌa ix, ma slajvi ix, ma ton̈ej syaxlaꞌ snivanil ix, an̈ejaꞌ icha val tzꞌutaj ix chiꞌ, icha val chiꞌ tzꞌutajpax vin̈ vinac chiꞌ.

26 Tato ay junoc mach smacꞌanpoj yol sat junoc vin̈ schecabꞌ, ma junoc ix schecabꞌ, tzꞌactajel vin̈ checabꞌ ma ix checabꞌ sqꞌuexuloc jun yol sat ix poj chiꞌ. 27 Tato ay junoc mach smacꞌanel qꞌuen ye junoc schecabꞌ, tzꞌactajel jun checabꞌ chiꞌ sqꞌuexuloc qꞌuen ye chiꞌ.

28 Tato ay junoc nocꞌ toro stecancham junoc anima, yovalil sjuljicham nocꞌ, max chijilaj schibꞌejal nocꞌ, palta malaj tas tzꞌoch dꞌa yibꞌan̈ vin̈ yajal nocꞌ chiꞌ. 29 Palta tato yojtac vin̈ yajal nocꞌ chiꞌ to ovtaxon nocꞌ dꞌa anima, max yetzbꞌanpax nocꞌ vin̈, tato stecjicham junoc anima yuj nocꞌ, yovalil sjuljicham nocꞌ, schampax vin̈ yajal nocꞌ chiꞌ. 30 Tato schaji tupchaj jun chamel chiꞌ, stup vin̈ yajal nocꞌ chiꞌ, ato syalaꞌ jantac scꞌan ebꞌ aj chamnac chiꞌ, tato icha chiꞌ maxtzac chamlaj vin̈. 31 Aton val juntzan̈ ley tic tzꞌoch yopisio tato ay junoc uninabꞌil ma isilabꞌil stecjicham yuj nocꞌ vacax. 32 Tato a junoc vin̈ checabꞌ, ma junoc ix checabꞌ stecjicham yuj nocꞌ, yovalil tzꞌacꞌchaj 30 siclo qꞌuen plata dꞌa vin̈ spatrón jun checabꞌ chiꞌ, sjuljipaxcham nocꞌ vacax chiꞌ.

33 Qꞌuinaloc ay junoc mach max smacchej stiꞌ aꞌ yucꞌlabꞌ aꞌ, ma sjoy junoc olan, max smacchejpax stiꞌ, sbꞌat junoc nocꞌ vacax, ma junoc nocꞌ bꞌuru dꞌa yool, 34 yovalil stup vin̈ ay yic jun olan chiꞌ dꞌa vin̈ aj nocꞌ chiꞌ, scan nocꞌ ix cham chiꞌ dꞌa vin̈ ay yic olan chiꞌ.

35 Tato ay junoc nocꞌ storo junoc mach stecancham nocꞌ storo junocxo, yovalil schon̈jiel nocꞌ ix tecvaj chiꞌ, spucanecꞌ qꞌuen stojol nocꞌ chiꞌ ebꞌ dꞌa spatic. An̈ejaꞌ spucpaxecꞌ nocꞌ ix tecjicham chiꞌ ebꞌ. 36 Tato yojtacxo vin̈ ay yic nocꞌ ix tecvaj chiꞌ to toxonton ov nocꞌ, max stan̈vanpax nocꞌ vin̈, yovalil syacꞌ junocxo nocꞌ vin̈ sqꞌuexuloc nocꞌ ix cham chiꞌ, scan nocꞌ chamnac chiꞌ dꞌa vin̈.