A jun abꞌil yic tzꞌacꞌji lajvoc bꞌoc
15
Dꞌa yuctaquil abꞌil tzeyactan e cꞌanan meltzaj e tastac aybꞌat majanil. 2 A jun tic, icha tic yaji: Masanil mach to ay tas ix yacꞌ majanil dꞌa junoc quetchon̈abꞌ, man̈xoocabꞌ scꞌanbꞌej, yujto a jun abꞌil chiꞌ ix yal Jehová to maxtzac yal-laj scꞌanbꞌajxi tas aybꞌat majanil. 3 A dꞌa junoc chꞌoc chon̈abꞌil syal e cꞌanbꞌanxi tas ix eyacꞌ majanil chiꞌ. Axo pax dꞌa junoc quetchon̈abꞌ jun, man̈xo e cꞌanbꞌej. 4 Tato ol e cꞌulej icha chiꞌ, malaj mach ol bꞌat mebꞌail dꞌa yibꞌan̈ dꞌa e cal, yujto ol yacꞌ svachꞌcꞌolal Jehová co Diosal dꞌa eyibꞌan̈ dꞌa lum luum ol yacꞌ chiꞌ dꞌayex. 5 Tato ol e cꞌanabꞌajej e bꞌeybꞌalan juntzan̈ checnabꞌil van valancan tic dꞌayex, 6 ol yacꞌ svachꞌcꞌolal Jehová co Diosal dꞌa eyibꞌan̈, icha val ajnac yacꞌan stiꞌ, tzijtum tas ol yal eyacꞌan majanil dꞌa juntzan̈xo nación. Palta a ex tic, man̈oc exlaj ol e cꞌan tastac e majnej dꞌa ebꞌ. Tzijtum juntzan̈ nación ol eyacꞌ yajalil dꞌa yibꞌan̈, palta man̈oclaj ebꞌ ol acꞌan yajalil dꞌa eyibꞌan̈.7 Tato ay junoc ebꞌ quetchon̈abꞌ tic mebꞌaꞌ dꞌa e cal dꞌa junoc chon̈abꞌ van yacꞌan Jehová dꞌayex, man̈ chucoc tzeyutej e cꞌol dꞌa ebꞌ, palta tze col ebꞌ dꞌa tas tzꞌoch yuuj, 8 tze sian tastac dꞌa ebꞌ, tzeyacꞌan smajnej ebꞌ tastac tzꞌoch yuuj. 9 Tzeya ilej e pensar, xe natalaj icha tic: Man̈xo ol vacꞌlaj tas majanil, ina to lacꞌanxo sjavi yuquil abꞌil, aton jun abꞌil bꞌaj maxtzac cꞌanbꞌaj tastac aybꞌat majanil, xe chitalaj. Max yal to chuc tzeyutej e cꞌol dꞌa ebꞌ mebꞌaꞌ ay dꞌa scal ebꞌ quetchon̈abꞌ, qꞌuetalaj yav ebꞌ dꞌa Jehová yuj e chuccꞌolal chiꞌ, yuj chiꞌ tzꞌoch e mul dꞌa Jehová. 10 Mocabꞌ chucoc tzeyabꞌi tzex colvaj dꞌa ebꞌ, bꞌecanocabꞌ yel eyuuj, yujto a yuj tas vachꞌ tze cꞌulej chiꞌ, ol yacꞌ svachꞌcꞌolal Jehová co Diosal dꞌa eyibꞌan̈ ayic ol bꞌeyn̈ejbꞌat tiempo. 11 Ayn̈ej ebꞌ mebꞌaꞌ dꞌa e cal, yuj chiꞌ a in sval dꞌayex to elbꞌenocabꞌ eyuuj dꞌa ebꞌ quetchon̈abꞌ van yabꞌan syail mebꞌail dꞌa yol e chon̈abꞌ chiꞌ.
Ley yuj ebꞌ checabꞌ
12 Tato ay junoc ebꞌ quetisraelal, junoc vinac, ma junoc ix ix schon̈ji dꞌayex tzꞌoch checabꞌoc, vaquen̈ej abꞌil tzꞌoch e checabꞌoc, axo dꞌa yuquil abꞌil jun, tzeyacꞌanel dꞌa libre. 13 Ayic tzꞌel dꞌa libre chiꞌ, max el-laj dꞌa ichn̈ej taꞌ. 14 Palta nivanocabꞌ tas tzeyacꞌ dꞌay: Nocꞌ calnel yedꞌ ixim trigo yedꞌ vino. Syalelcꞌochi to syicꞌpax yic dꞌa masanil tas ix yacꞌ Jehová co Diosal dꞌayex. 15 Mocabꞌ bꞌat satcꞌolal eyuuj to on̈ ecꞌpax checabꞌvumal dꞌa Egipto, palta a Jehová co Diosal on̈ colanelta. Yuj chiꞌ syacꞌ jun checnabꞌil tic dꞌayex ticnaic.
16 Palta tato a junoc ebꞌ e checabꞌ chiꞌ max yal-laj scꞌol tzꞌel dꞌa libre, yujto xajan ex yuj ebꞌ yedꞌ eyaleyuninal, yujto vachꞌ yajecꞌ ebꞌ eyedꞌoc, 17 tato icha chiꞌ, tzeyicꞌcot junoc qꞌuen ol-labꞌ tzeyacꞌanoch checꞌan ebꞌ dꞌa spuertail e pat, tzeyolan schiquin ebꞌ yedꞌ qꞌueen. Icha chiꞌ tzꞌaj yochcan ebꞌ e checabꞌoc dꞌa juneln̈ej. Icha pax chiꞌ tzꞌutaj ebꞌ ix ix tzꞌochcan checabꞌoc dꞌa juneln̈ej. 18 Mocabꞌ chucoc tzeyabꞌi ayic tzeyacꞌanel ebꞌ e checabꞌ chiꞌ dꞌa libre, yujto vaqueꞌ abꞌil ix ex yacꞌ servil ebꞌ, nan̈aln̈ej tze tup ebꞌ dꞌa stojol junoc mach tzꞌacan scha stojol dꞌa junoc cꞌu. Axo Jehová co Diosal ol acꞌan svachꞌcꞌolal dꞌa yibꞌan̈ masanil tas tze cꞌulej.
Sicꞌchajel sbꞌabꞌel yuneꞌ nocꞌ nocꞌ to vinac
19 Masanil sbꞌabꞌel yuneꞌ nocꞌ e vacax, ma nocꞌ e calnel, tato vinac tze sicꞌcaneli yic tzꞌochcan yicoc Jehová co Diosal.
Man̈ eyacꞌ munlaj nocꞌ bꞌabꞌel yuneꞌ e vacax chiꞌ, man̈ e joxpaxel xil nocꞌ bꞌabꞌel yuneꞌ e calnel chiꞌ. 20 Junjunn̈ej abꞌil tze chiꞌan nocꞌ yedꞌ eyal eyuninal dꞌa yichan̈ Jehová co Diosal, dꞌa jun lugar ol siqꞌuel scajnubꞌoc. 21 Palta tato ay jabꞌoc spaltail nocꞌ jun, tato coxo yoc nocꞌ, mato chuclaj yol sat nocꞌ, ma man̈ val vachꞌoc nocꞌ, man̈ eyacꞌ nocꞌ silabꞌil dꞌa Jehová. 22 A nocꞌ chiꞌ, syal e chiꞌan nocꞌ bꞌaj cajan ex chiꞌ. Yaln̈ej mach syal schiꞌan nocꞌ, taxon̈ej vachꞌ yaj ebꞌ, icha yalan ley, mato maay, ichataxon tzꞌaj e chiꞌan nocꞌ cꞌultaquil chej, ma nocꞌ chꞌucul. 23 Palta man̈ e chiꞌ schiqꞌuil nocꞌ, an̈ej to tze tobꞌel dꞌa sat luum, icha tzꞌaj stobꞌcanbꞌat a aꞌ.