14
A on̈ tic yuninal on̈xo Jehová co Diosal. Man̈ cacꞌ echnaj co nivanil, man̈ co joxpaxel xil co jolom dꞌa snan̈al co sat ayic scham junoc anima, 2 yujto schon̈abꞌ Jehová co Diosal caji. A ix on̈ sicꞌanel dꞌa scal juntzan̈xo chon̈abꞌ dꞌa sat luum tic, yic tzon̈ ochcan yicoc.A nocꞌ nocꞌ schiji yedꞌ nocꞌ max chijilaj
3 Man̈ e chi nocꞌ nocꞌ max chijilaj, nocꞌ ay yovalil yuj Dios.
4 Aton nocꞌ tic syal e chiꞌani: Nocꞌ vacax, nocꞌ calnel, nocꞌ chiva, 5 nocꞌ chꞌucul, masanil macan̈il nocꞌ cꞌultaquil chej yedꞌ nocꞌ caltacteꞌal chiva. 6 Syal e chiꞌan masanil nocꞌ nocꞌ sjax yan̈, cha xechan̈ yech. 7 Axo pax nocꞌ max yal-laj e chiꞌan jun, vachꞌchom sjax yan̈ nocꞌ palta tato man̈ cha xechan̈oc yech nocꞌ, aton nocꞌ tic:
Nocꞌ camello, nocꞌ nivac chich yedꞌ nocꞌ tojolal chich. A juntzan̈ nocꞌ tic man̈ vachꞌoc nocꞌ, sjax yan̈ nocꞌ, palta man̈ cha xechan̈oc yech nocꞌ.
8 Yedꞌ pax nocꞌ chitam, cha xechan̈ yech nocꞌ, palta max sjaxlaj yan̈ nocꞌ. A juntzan̈ nocꞌ chiꞌ yovalil tzeyojtaquejeli to man̈ vachꞌoc nocꞌ. Man̈ e chi nocꞌ, man̈ eyam nocꞌ ayic chamnacxo nocꞌ.
9 Axo pax masanil nocꞌ ay dꞌa yoltac a aꞌ, syal e chiꞌan nocꞌ tato ay scꞌaxil nocꞌ yedꞌ stuminal spatic nocꞌ. 10 A pax nocꞌ malaj yic jun, man̈ e chi nocꞌ. Yovalil tzeyojtaquejeli to man̈ vachꞌoc nocꞌ.
11 Ay pax nocꞌ much syal e chiꞌani, nocꞌ vachꞌ icha yalan ley. 12 Palta ay juntzan̈ nocꞌ max yal-laj e chiꞌani: Nocꞌ chꞌacbꞌa, nocꞌ vacavoc, nocꞌ chꞌacbꞌa yic a aꞌ, 13 nocꞌ xulem, nocꞌ milano, 14 yedꞌ pax masanil macan̈il nocꞌ joj, 15 nocꞌ avestruz, nocꞌ nivac cujubꞌ, nocꞌ xalun̈e yedꞌ masanil macan̈il nocꞌ chꞌacbꞌa, 16 nocꞌ tonton, nocꞌ ibis yedꞌ nocꞌ pech, 17 nocꞌ julum chay, nocꞌ ostoc, nocꞌ cormorán, 18 nocꞌ cigüeña, nocꞌ abubilla yedꞌ nocꞌ sotzꞌ.
19 Masanil nocꞌ cotac nocꞌ ay scꞌaxil tzꞌecꞌ dꞌa juntac petan̈il, man̈ vachꞌoc nocꞌ. Max yal-laj e chiꞌan nocꞌ. 20 Axo pax nocꞌ cotac nocꞌ to ay scꞌaxil albꞌilxo to vachꞌ, syal e chiꞌan nocꞌ.
21 Man̈ e chiꞌ junoc nocꞌ ton̈ej scham dꞌa ichn̈ejtaꞌ, yujto a on̈ tic sicꞌbꞌil on̈ el yuj Jehová co Diosal. Palta syal eyacꞌan nocꞌ dꞌa ebꞌ chꞌoc chon̈abꞌil ayecꞌ cajan dꞌa e cal. A ebꞌ chiꞌ syal schiꞌan nocꞌ ebꞌ. Mato syalpax e chon̈an nocꞌ dꞌa ebꞌ chꞌoc chon̈abꞌil ton̈ej sbꞌeyecꞌ dꞌa e cal.
Man̈ e tzꞌan̈ nocꞌ yuneꞌ chiva dꞌa scal yal yim snun.
Checnabꞌil yuj diezmo
22 Junjun abꞌil yovalil tzeyicꞌcanel sdiezmoal sat eyavbꞌen yedꞌ tastac tze mol sat. 23 Tzeyicꞌanbꞌat sdiezmoal ixim e trigo, e vino yedꞌ eyaceite. Tzeyicꞌanpaxbꞌat sbꞌabꞌel yuneꞌ nocꞌ e vacax yedꞌ sbꞌabꞌel yuneꞌ nocꞌ e calnel dꞌa jun lugar ol siqꞌuel Jehová co Diosal bꞌaj ol aj scajnubꞌ. Ataꞌ ol e va juntzan̈ chiꞌ dꞌa yichan̈ Jehová yuj eyicꞌanchaan̈. 24 Tato a jun lugar bꞌaj ay scajnubꞌ chiꞌ, najat scan dꞌayex, tato nivan svachꞌcꞌolal Jehová syacꞌ dꞌayex, max yal eyicꞌanbꞌat masanil e diezmo chiꞌ, 25 syal e chon̈aneli, axo stojol tzeyicꞌbꞌat dꞌa scajnubꞌ Jehová chiꞌ. 26 Axo yedꞌ stojol chiꞌ syal e manan tas syal e cꞌool: Nocꞌ vacax, nocꞌ calnel, vino, ma tas tzꞌucꞌji to pajxo, ma juntzan̈xo tas tze nibꞌej, tzex va dꞌa tzalajcꞌolal yedꞌ eyal eyuninal dꞌa yichan̈ Jehová. 27 A ebꞌ levita cajan dꞌa e cal, tzeyavtej ebꞌ vael eyedꞌoc, yujto man̈ ol yicꞌlaj sluum ebꞌ smacbꞌenoc icha eyic a ex tic.
28 A slajvi junjun yoxil abꞌil tzeyicꞌancanel sdiezmoal sat eyavbꞌen yedꞌ tas tze mol dꞌa jun abꞌil chiꞌ. Tze molbꞌej dꞌa junoc lugar dꞌa yol e chon̈abꞌ chiꞌ. 29 A ebꞌ levita to maj schalaj sluum smacbꞌenoc eyedꞌoc, ma ebꞌ chꞌoc chon̈abꞌil ayecꞌ cajan dꞌa e cal, ma ebꞌ mebꞌaꞌ man̈xa smam yedꞌ ebꞌ ix ix chamnac yetbꞌeyum, syal svaan ebꞌ tastac tze mol dꞌa e diezmo chiꞌ, tzꞌacan slaj yicꞌ yic ebꞌ. Tato icha chiꞌ tze cꞌulej, ol yacꞌ svachꞌcꞌolal Jehová co Diosal dꞌa yibꞌan̈ masanil tastac tze cꞌulej.