13
Tzeyil val e bꞌa, talaj ay junoc mach sqꞌue vaan dꞌa e cal schecabꞌ Dios yalani, tzꞌoch ijan yalani to ay tas ma vayich syilaꞌ, ma schꞌoxanel dꞌa e cal tastac to satubꞌtac yilji, ma ayocto syalan yuj junoc tas ol ujoc, 2 tato cꞌocbꞌil tzꞌelcꞌoch tas syal chiꞌ tzꞌoch ijan yalan dꞌayex icha tic: Cotan̈ec, ay val juntzan̈xo dios man̈ eyojtacoc, bꞌat on̈ emec cuman dꞌa yichan̈, tzon̈ ochec ejmelal dꞌay, tato xchi dꞌayex, 3 man̈ e cha eyabꞌ juntzan̈ chiꞌ dꞌay. Yujto a Jehová co Diosal, sgana syilaꞌ tato yel tze xajanej yedꞌ smasanil e cꞌool yedꞌ smasanil e pensar. 4 Ochan̈ec tzacꞌan dꞌa spatic Jehová co Diosal, ayocabꞌ yelcꞌoch dꞌa yol e sat, cꞌanabꞌajejec schecnabꞌil, abꞌec tas syalaꞌ, ochan̈ec ejmelal dꞌay, junn̈ejocabꞌ eyaj yedꞌoc. 5 A jun anima syaloch sbꞌa schecabꞌoc Dios chiꞌ, mato syalaꞌ to ay tas syilaꞌ, yovalil schami, yujto sgana tzex elcan dꞌa spatic Jehová. Snibꞌej jun anima chiꞌ tzex scuchbꞌej yic tze pitej e bꞌa dꞌa Jehová co Diosal on̈ colanelta dꞌa Egipto, bꞌaj ecꞌnac on̈ checabꞌvumal. Yuj chiꞌ tze macꞌcham jun anima chiꞌ, yic vachꞌ satel jun chucal chiꞌ dꞌa e cal.6-11 Tato ay mach tzex cuchbꞌanbꞌat dꞌa elcꞌaltac eyoch ejmelal dꞌa sdiosal ebꞌ anima cajan dꞌa e lacꞌanil, ma dꞌa najat, aton juntzan̈ bꞌaj max cal co bꞌa, man̈ yalnacocpax sbꞌa ebꞌ co mam quicham, man̈ e cha eyabꞌ dꞌay. Aqꞌuecoch dꞌa yol scꞌabꞌ ebꞌ yajal yic schami. Mocabꞌ ocꞌ e cꞌol dꞌay, vachꞌchom eyucꞌtac, ma eyuninal, ma eyisil, ma eyetbꞌeyum to xajanabꞌil eyuuj, ma a junoc te vachꞌ eyacꞌan yedꞌoc, man̈ e cꞌubꞌejeli. A ex tze bꞌabꞌlaj iqꞌuejqꞌue qꞌuen qꞌueen tze julanchamoc. Icha pax chiꞌ syutej masanil ebꞌ anima eyedꞌoc. Julqꞌuenajocabꞌ chamoc, yujto sgana tzex yiqꞌuel dꞌa spatic Jehová co Diosal on̈ icꞌanelta dꞌa Egipto, bꞌaj ecꞌnac on̈ checabꞌvumal. Ol yabꞌ jun chiꞌ ebꞌ quetchon̈abꞌ smasanil, ol xiv ebꞌ, man̈xo ol say mulan sbꞌa ebꞌ icha juntzan̈ ix uji chiꞌ.
12 Tato a dꞌa junoc juntzan̈ chon̈abꞌ van yacꞌan Jehová co Diosal dꞌayex yic tzex cajnaj dꞌay, tzeyabꞌ specal to 13 ay ebꞌ max cꞌanabꞌajan Dios, axo ebꞌ scuchbꞌan scꞌuloc ebꞌ anima dꞌa jun chon̈abꞌ chiꞌ yoch ejmelal dꞌa comon dios bꞌaj max cal co bꞌa, 14 scham val e cꞌanbꞌanecꞌ eyabꞌi. Tato yel ay mach van scꞌulan jun chucal chiꞌ dꞌa e cal, 15 a masanil ebꞌ cajan dꞌa jun chon̈abꞌ chiꞌ, xicjicham ebꞌ yedꞌ nocꞌ smolbꞌetzal nocꞌ, tze satanel masanil tastac ay dꞌa jun chon̈abꞌ chiꞌ. 16 A bꞌaj smolbꞌej sbꞌa ebꞌ anima, ataꞌ tze molbꞌejoch masanil stastac ebꞌ, tzeyacꞌanoch scꞌacꞌal jun chon̈abꞌ chiꞌ yedꞌ masanil stastac ebꞌ chiꞌ silabꞌoc yuj eyicꞌanchaan̈ Jehová co Diosal. A jun chon̈abꞌ chiꞌ, scanxon̈ej icha chiꞌ. Man̈xa bꞌaqꞌuin̈ sbꞌojixiqꞌuei.
17-18 A juntzan̈ tastac toxo ix alchaji to sateli, man̈ eyamaꞌ, yic vachꞌ max cot yoval Jehová co Diosal dꞌayex. Tato tze cꞌanabꞌajej masanil juntzan̈ checnabꞌil svalcan dꞌayex tic, vachꞌ tzeyutej e bꞌa dꞌa Jehová, ol yacꞌ svachꞌcꞌolal dꞌayex, ol yacꞌan qꞌuibꞌ e bꞌisul icha ajnac yacꞌancan stiꞌ dꞌa ebꞌ co mam quicham.