2 A ebꞌ anima cajan dꞌa lum luum chiꞌ, chꞌoc sdiosal ebꞌ bꞌaj syal sbꞌa. Ayic toxo ix eyiquejel lum sluum ebꞌ chiꞌ, yovalil tze satel juntzan̈ yic lesal bꞌaj syal sbꞌa ebꞌ dꞌa sdiosal, vachꞌchom dꞌa jolomtac vitz yedꞌ dꞌa tzalquixtac yedꞌ dꞌa yichtac te teꞌ cꞌayum xiil. 3 Tze macꞌpoj juntzan̈ yaltar ebꞌ, qꞌuen qꞌueen yedꞌ te teꞌ bꞌobꞌil sdiosaloc ebꞌ scuchan Asera, aton bꞌaj syaqꞌuem sbꞌa ebꞌ. Tze n̈usantzꞌaoc, tze macꞌanpoj sdiosal ebꞌ chiꞌ, yic vachꞌ man̈xa bꞌaqꞌuin̈ snachajcot dꞌa juntzan̈ lugar chiꞌ.

4 Man̈ ichoc tzꞌaj yoch ebꞌ ejmelal dꞌa sdiosal chiꞌ, man̈ ichocta tzꞌaj eyoch ejmelal dꞌa Jehová co Diosal. 5 A dꞌa jun lugar ol sicꞌcanel Jehová dꞌa scal eyin̈tilal to yic yaji, ataꞌ ol bꞌat eyaqꞌuem e bꞌa dꞌay. 6 Ol eyacꞌan e silabꞌ stzꞌa smasanil yedꞌ juntzan̈xo silabꞌ yuj eyicꞌanchaan̈ Jehová. Ol eyacꞌanpax e diezmo, e colval yedꞌ tas ix eyacꞌ e tiꞌ eyacꞌani yedꞌ eyofrenda to tzꞌel val dꞌa e cꞌol eyacꞌani. An̈ejaꞌ ol eyacꞌanpax nocꞌ sbꞌabꞌel yuneꞌ e vacax yedꞌ sbꞌabꞌel yuneꞌ nocꞌ e calnel. 7 Ataꞌ ol ex va dꞌa tzalajcꞌolal dꞌa yichan̈ Jehová yedꞌ masanil ebꞌ ay dꞌa yol e pat. Icha chiꞌ ol aj e vaan tas tzeyicꞌ dꞌa e munlajel a to syal svachꞌcꞌolal Jehová ol yacꞌ dꞌayex.

8 Ataꞌ man̈ ol e cꞌulej icha tas sco cꞌulej ticnaic, yujto a dꞌa tic yaln̈ej tas sgana junjun anima, a scꞌulej. 9 Val yel manto ex cꞌochlaj dꞌa lum luum ol yacꞌ Jehová dꞌayex, ataꞌ man̈xalaj tas ol e naꞌa. 10 Vanxo scꞌoch scꞌual yic ol ex cꞌaxpajecꞌ dꞌa aꞌ Jordán, yic tzex cꞌochcan dꞌa sat lum luum ol yacꞌ Jehová eyiquej. Ayic toxo ix ex colchajcanel dꞌa yol scꞌabꞌ ebꞌ ayoch ajcꞌolal dꞌayex, man̈xa xivcꞌolal dꞌayex taꞌ. 11 Axo jun lugar ol sicꞌcanel Jehová yic tzꞌoch yicoc, ataꞌ ol eyacꞌ masanil tas ix val dꞌayex to ol e cꞌulej. Ataꞌ ol eyacꞌ nocꞌ silabꞌ stzꞌai yedꞌ juntzan̈ silabꞌ yuj eyicꞌanchaan̈ Jehová chiꞌ, e diezmo, e colval yedꞌ eyofrenda sicꞌbꞌilel eyuj bꞌaj ix eyacꞌ e tiꞌ eyacꞌani. 12 Tzex te tzalaj dꞌa yichan̈ Jehová co Diosal yedꞌ ebꞌ eyuninal, ebꞌ e checabꞌ yedꞌ ebꞌ levita ol cajnaj dꞌa e cal. Yujto a ebꞌ levita chiꞌ malaj smacbꞌen ebꞌ ol scha eyedꞌoc dꞌa lum luum chiꞌ.

13 Tzeyil val e bꞌa, man̈ e comon n̈usejtzꞌa nocꞌ e silabꞌ dꞌa yaln̈ej tas lugaril e gana. 14 An̈ej dꞌa jun lugar sicꞌbꞌilel yuj Jehová dꞌa scal e chon̈abꞌ smasanil, ataꞌ tzeyicꞌbꞌat e silabꞌ yic tze n̈usantzꞌaoc yedꞌ e cꞌanabꞌajan masanil tas svalcan tic dꞌayex.

15 Ayic tze naanqꞌue e chiꞌan nocꞌ chibꞌej, syal e milancham junoc nocꞌ eyicoꞌ tze chiꞌan bꞌaj ayex ecꞌ chiꞌ, ato syal tas syacꞌ Jehová dꞌayex. Vachꞌchom ayex vachꞌ eyaji, icha yalan ley, mato maay, syal e chiꞌani, ichoc tzꞌaj e chiꞌan junoc nocꞌ chꞌucul ma junoc nocꞌ cꞌultaquil chej. 16 An̈ej val schiqꞌuil nocꞌ bꞌian, man̈ jabꞌoc syal e chiꞌani, ma eyucꞌani, an̈ej to tze tobꞌcanem dꞌa sat luum ichoc a aꞌ.

17 Max yal e vaꞌan sdiezmoal e trigo dꞌa yol e chon̈abꞌ, ma sdiezmoal e vino, eyaceite, ma e chiꞌan nocꞌ bꞌabꞌel yuneꞌ e vacax yedꞌ bꞌabꞌel yuneꞌ e calnel, ma eyofrenda tzeyacꞌ e tiꞌ eyacꞌani, ma e colval, ma eyofrenda tzꞌoch bꞌachan dꞌa yichan̈ Jehová. 18 An̈ej dꞌa jun lugar ol sicꞌcanel Jehová co Diosal, ataꞌ ol e chiꞌ juntzan̈ silabꞌ chiꞌ, ajun ebꞌ eyal eyuninal eyedꞌoc yedꞌ ebꞌ e checabꞌ yedꞌ ebꞌ levita ayecꞌ dꞌa e cal. Ataꞌ tzeyacꞌ tzalajbꞌoc e cꞌol dꞌa yichan̈ Jehová yuj tas syacꞌ dꞌa e munlajel chiꞌ. 19 Yacbꞌan ayex ecꞌ dꞌa jun luum chiꞌ, mocabꞌ bꞌat ebꞌ levita satcꞌolal eyuuj.

20 A val yic ol levanbꞌoc e luum yuj Jehová co Diosal dꞌa jantac yacꞌnac stiꞌ yacꞌani, tato syal e cꞌol ol e chi nocꞌ chibꞌej, ol yal e chiꞌan nocꞌ dꞌa yaln̈ej tas cꞌual. 21 Tato najat cajan ex dꞌa jun lugar ol sicꞌcanel Jehová co Diosal bꞌaj tzꞌoch ejmelal chiꞌ, syal e milancham nocꞌ e vacax yedꞌ nocꞌ e calnel syacꞌ Jehová chiꞌ dꞌayex bꞌaj cajan ex chiꞌ, tze chiꞌan nocꞌ icha syal jantac snibꞌej e cꞌool, icha ix aj valan dꞌayex. 22 Ichataxon tzꞌaj e chiꞌan yaln̈ej tas macan̈il nocꞌ cꞌultaquil chej, icha chiꞌ tzꞌajpax e chiꞌani, tato vachꞌ eyaj icha yalan ley, mato maay, syaln̈ej e chiꞌan nocꞌ. 23 Palta max yal-laj e chiꞌan nocꞌ chibꞌej max el-laj schiqꞌuil, yujto a dꞌa schiqꞌuil nocꞌ chiꞌ ay sqꞌuinal. Max yal-laj e chiꞌan nocꞌ chibꞌej chiꞌ yedꞌ sqꞌuinal. 24 An̈ej to tze tobꞌcanel schiqꞌuil nocꞌ chiꞌ dꞌa sat luum ichoc a aꞌ. 25 Man̈ e chiꞌa, man̈ eyuqꞌuej schiqꞌuil nocꞌ nocꞌ chiꞌ yic vachꞌn̈ej ol ex ajelcꞌoch yedꞌ eyin̈tilal yuj e cꞌanabꞌajan Jehová. 26 A pax masanil tas to yicxo Dios yaj eyuuj jun yedꞌ tastac toxo ix eyacꞌ e tiꞌ eyacꞌani, yovalil tzeyicꞌbꞌat dꞌa jun lugar ol siqꞌuel Jehová. 27 A dꞌa yibꞌan̈ altar yic Jehová co Diosal, ataꞌ tzeyacꞌ nocꞌ e silabꞌ to stzꞌa smasanil schibꞌejal yedꞌ schiqꞌuil nocꞌ. Axo pax junxo macan̈ nocꞌ e silabꞌ jun, syal e chiꞌan schibꞌejal nocꞌ, an̈ej val schiqꞌuil nocꞌ stobꞌchajcanoch dꞌa yich altar dꞌa yichan̈ Jehová.

28 Scham eyabꞌani yedꞌ e cꞌanabꞌajan masanil tas sval tic, yic vachꞌ vachꞌn̈ej ol aj e bꞌeybꞌat yedꞌ ebꞌ eyin̈tilal dꞌa masanil tiempo, yujto tze cꞌanabꞌajej tas scha scꞌol Jehová co Diosal, tojol exn̈ej dꞌa yol sat.

29 Ayic ol satjoquel masanil juntzan̈ chon̈abꞌ dꞌa eyichan̈ yuj Jehová co Diosal, a exxo ol ex cajnajcan dꞌa sat slum ebꞌ chiꞌ. 30 Scham val eyilani, man̈ ex bꞌat tzacꞌan dꞌa sbꞌeybꞌal ebꞌ icha tzꞌaj yacꞌanem sbꞌa ebꞌ dꞌa sdiosal. Man̈ e cꞌanbꞌej tas tzꞌaj yoch ebꞌ ejmelal dꞌa sdiosal chiꞌ, yic vachꞌ man̈ ichocta tzeyutejpax e bꞌa. 31 Man̈ ichoc syutej sbꞌa ebꞌ chiꞌ, man̈ ichoc chiꞌ tzeyutej e bꞌa dꞌa Jehová co Diosal, yujto a masanil tas scꞌulej ebꞌ chiꞌ chacbꞌilel yuuj. A juntzan̈ chiꞌ aton sbꞌeybꞌalej ebꞌ anima chiꞌ yic tzꞌoch ebꞌ ejmelal dꞌa sdiosal. Ay pax bꞌaj sn̈ustzꞌa yal yuninal ebꞌ silabꞌil dꞌa sdiosal chiꞌ.

32 Cꞌanabꞌajejec e bꞌeybꞌalan masanil tas svalcan tic dꞌayex. Man̈ eyiqꞌuel jabꞌoc, man̈ eyacꞌpaxoch stzꞌacubꞌ juntzan̈ checnabꞌil tic.