Nivan yelcꞌoch Jehová
11
Yovalil sco xajanej Jehová co Diosal, sco cꞌanabꞌajan tas schec co cꞌulej dꞌa masanil tiempo, aton scꞌaybꞌubꞌal, schecnabꞌil yedꞌ scachnabꞌil. 2 Sco naec ticnaic tas ix yutej Jehová on̈ scachani. A on̈ tic ix quilaꞌ, man̈oc ebꞌ cuninal ix ilan tas ix scꞌulej Jehová chiꞌ. A on̈ val tic ix quilaꞌ jantac snivanil yelcꞌochi yedꞌ spoder yedꞌ tas satubꞌtac ix scꞌulej. 3 Quilnac tas scꞌulejnac Jehová dꞌa vin̈ sreyal Egipto yedꞌ dꞌa masanil ebꞌ anima cajan taꞌ. 4 Quilnacpax tas scꞌulejnac yedꞌ ebꞌ soldado vin̈ rey chiꞌ yedꞌ jantac carruaje yedꞌnac nocꞌ chej. Masanil juntzan̈ chiꞌ mucchajnaccanbꞌat yuj Jehová dꞌa yol aꞌ Chacchac Mar ayic on̈ spechan ebꞌ, yuj chiꞌ a co Diosal chiꞌ satannaquel ebꞌ dꞌa juneln̈ej. 5 Sco naecpaxcoti jantac vachꞌil scꞌulejnac Jehová chiꞌ dꞌayon̈ dꞌa tzꞌinan lum masanto on̈ javi dꞌa tic. 6 Sco naanpaxcoti tas scꞌulejnac yedꞌ vin̈aj Datán yedꞌ vin̈aj Abiram yuninal vin̈aj Eliab, dꞌa yin̈tilalcan Rubén. Spojnac sbꞌa lum luum dꞌa snan̈al co campamento, mucchajnaccanem ebꞌ yedꞌ masanil yuninal, masanil tas ay dꞌa ebꞌ, smantiado ebꞌ, schecabꞌ ebꞌ yedꞌ nocꞌ smolbꞌetzal nocꞌ ebꞌ. Icha chiꞌ ajnac satel ebꞌ yuj Jehová dꞌa quichan̈. 7 A on̈ tic testigo on̈ dꞌa masanil tas scꞌulej Jehová to satubꞌtac yilji.A lum luum yacꞌnac stiꞌ Jehová yacꞌani
8 Yuj chiꞌ, cꞌanabꞌajejec schecnabꞌil Jehová svacꞌcan tic dꞌayex, yic vachꞌ tzꞌoch val eyip tzex bꞌat cajan dꞌa sat lum luum van yoch eyicoc chiꞌ, 9 yic vachꞌ pax najtil ol ex cajnaj dꞌa lum luum te yax sat chiꞌ, aton lum yacꞌnac stiꞌ Jehová yacꞌan dꞌa ebꞌ co mam quicham yedꞌ dꞌayon̈ a on̈ yin̈tilal on̈ ebꞌ tic. 10 A lum van yacꞌji chiꞌ dꞌayex, man̈ lajanoc lum icha lum Egipto bꞌaj on̈ coti. A dꞌa Egipto chiꞌ slajvi eyavan tas tzeyavej, tzeyacꞌanoch yalil icha bꞌaj tzꞌavchaj an̈ itaj. 11 A pax lum bꞌaj van e cꞌoch chiꞌ jun, ay svitzal luum. Ay pax span̈anil luum, ayn̈ejoch yal luum yuj n̈abꞌ syacꞌ Jehová. 12 A jun lum chiꞌ tan̈vabꞌil lum yuj Jehová, ayn̈ejoch sat dꞌa luum tzꞌecꞌ abꞌil.
13 Yuj chiꞌ, cꞌanabꞌajejec schecnabꞌil Jehová, aton juntzan̈ van valan tic dꞌayex. Tze xajanej Jehová co Diosal, tzeyaqꞌuem e bꞌa dꞌay dꞌa smasanil e cꞌool yedꞌ smasanil e pensar. 14 Tato icha chiꞌ, ol yacꞌn̈ej bꞌabꞌel n̈abꞌ yedꞌ slajvubꞌxo, yuj chiꞌ te vachꞌ ol aj sat eyavbꞌen, e trigo, teꞌ eyuva yedꞌ teꞌ eyolivo. 15 Ay pax yax an̈cꞌultac ol sva nocꞌ e molbꞌetzal nocꞌ, ol ste aqꞌuej sat tas ol eyavej yic vachꞌ ay e vael. 16 Palta tzeyil val e bꞌa, yic malaj junoc mach tzex montanbꞌati yic tzeyicꞌanel e bꞌa dꞌa spatic Jehová, axo talaj dꞌa juntzan̈ocxo comon dios tzex och ejmelal, tzex och tzacꞌan yuuj. 17 Tato icha chiꞌ, ol cot yoval scꞌol Jehová chiꞌ dꞌayex. Man̈xo ol yacꞌlaj n̈abꞌ, man̈xo ol yacꞌlaj sat masanil eyavbꞌen, axo e cham yuj vejel dꞌa sat lum luum te yax sat van yacꞌan Jehová chiꞌ dꞌayex.
18 Scham val eyabꞌancan juntzan̈ lolonel tic, tze sicꞌancan dꞌa e pensar. Tzeqꞌuecoch dꞌa e cꞌabꞌ yedꞌ dꞌa snan̈al e sat. 19 A juntzan̈ tic ol eyacꞌ scꞌaybꞌej ebꞌ eyuninal dꞌa junjun cꞌu. Ayexn̈ejoch eyalan dꞌa ebꞌ, ayic ayex ecꞌ dꞌa e pat, ayic tzex bꞌey dꞌa yoltac bꞌe, ayic tzex vayi, ayic pax tzex qꞌue vaan. 20 Tze tzꞌibꞌanoch dꞌa smarcoal spuertail e pat yedꞌ dꞌa spuertailtac e chon̈abꞌ, 21 yic vachꞌ ol najatbꞌoc e qꞌuinal yedꞌ ebꞌ eyuninal dꞌa sat lum luum yacꞌnac stiꞌ Jehová co Diosal yacꞌan dꞌa ebꞌ co mam quicham. Ol ex cajnajn̈ej taꞌ yacbꞌan ayecꞌ satchaan̈ dꞌa yibꞌan̈ lum luum tic.
22 Tato tze cꞌanabꞌajej masanil juntzan̈ checnabꞌil svalcanel tic dꞌayex, tze xajananpax Jehová co Diosal, tze cꞌulan masanil tas syalaꞌ, 23 ichato chiꞌ bꞌian, a Jehová chiꞌ ol icꞌanel juntzan̈ chon̈abꞌ te nivac, te ay pax yip dꞌa eyichan̈, a exxo ol ex cajnajcan dꞌay. 24 Masanil lum bꞌaj ol ex ecꞌoc, eyic ol ajcan luum, sbꞌatn̈ej lum dꞌa taquin̈ luum masanto scꞌoch dꞌa Líbano. Sbꞌatn̈ej lum dꞌa aꞌ nivan Éufrates masanto scꞌoch dꞌa aꞌ mar Mediterráneo. 25 Malaj mach ol yal stecꞌbꞌan sbꞌa dꞌa eyichan̈. A Jehová ol acꞌanoch nivac xivcꞌolal dꞌa scal anima bꞌaj ol ex ecꞌn̈ej, man̈xo ol yal snaan ebꞌ tas ol yutoc scolan sbꞌa ebꞌ dꞌayex icha ix aj yacꞌan stiꞌ Jehová chiꞌ dꞌayon̈.
26 Abꞌec jun, a dꞌa jun cꞌu tic svacꞌ e sicꞌlej, tom a svachꞌcꞌolal Jehová tze nibꞌej mato a scatabꞌ. 27 Ol e cha svachꞌcꞌolal Jehová co Diosal tato tze cꞌanabꞌajej schecnabꞌil van valan tic dꞌayex. 28 A yoval scꞌol ol cot dꞌa eyibꞌan̈ tato man̈ ol e cꞌanabꞌajej juntzan̈ checnabꞌil tic, tato tzeyiqꞌuel e bꞌa dꞌa Jehová, tzeyacꞌanoch e pensar dꞌa juntzan̈ comon dios to man̈ eyojtacoc, tzeyacꞌanem e bꞌa dꞌay.
29 Ayic toxo ix ex cꞌoch dꞌa sat lum luum chiꞌ yuj Jehová co Diosal, aton jun lum van yacꞌan dꞌayex, ol eyalanel vachꞌ lolonel dꞌa yich lum vitz Gerizim yedꞌ catabꞌ lolonel dꞌa yich lum vitz Ebal. 30 A juntzan̈ lum vitz chiꞌ, a dꞌa yichan̈ecꞌ nivan bꞌe ay luum, tzꞌecꞌ dꞌa scꞌaxepalecꞌ aꞌ Jordán, dꞌa stojolal bꞌaj tzꞌem cꞌu, bꞌaj ay sluum ebꞌ cananeo, ebꞌ anima ay dꞌa yacꞌlical stiꞌ aꞌ nivan Jordán dꞌa yichan̈bꞌat Gilgal. Jun bꞌaj ay teꞌ ji dꞌa yol yic More. 31 Vanxo scꞌoch stiempoal yic ol ex cꞌaxpajecꞌ dꞌa aꞌ Jordán, yic tzꞌochcan lum luum chiꞌ eyicoc yuj Jehová co Diosal. Ayic toxo ix eyicꞌ luum, axo e cajnaj dꞌa sat lum chiꞌ, 32 tzeyacꞌoch dꞌa e cꞌool e bꞌeybꞌalan masanil checnabꞌil svalcan tic dꞌayex ticnaic.