Ix bꞌoxi sqꞌuexul chabꞌ pachan̈ qꞌuen qꞌueen
10
Yalanxi Jehová chiꞌ dꞌayin icha tic: Tzacꞌ bꞌojoc chabꞌoc pachan̈ qꞌuen qꞌueen, icha qꞌuen ix vacꞌ dꞌayach dꞌa sbꞌabꞌelal. Tzacꞌ bꞌojocpax junoc teꞌ caxa, slajvi chiꞌ tzach qꞌueta dꞌa jolom vitz tic. 2 Ol in tzꞌibꞌanxioch lolonel ayoch dꞌa qꞌuen ix vacꞌ dꞌayach dꞌa sbꞌabꞌelal, aton qꞌuen ix a macꞌpojoc. Axo qꞌuen yic schaelal tic, ol em qꞌuen dꞌa yol teꞌ caxa chiꞌ, xchi dꞌayin.3 Vacꞌan bꞌojoc jun teꞌ caxa chiꞌ, a teꞌ acacia och dꞌa teꞌ. Vacꞌan tzeychaj chabꞌ qꞌuen qꞌueen chiꞌ, vicꞌanqꞌue qꞌueen dꞌa jolom vitz chiꞌ. 4 Stzꞌibꞌanxioch lajun̈eꞌ schecnabꞌil Jehová chiꞌ dꞌa qꞌueen. Icha aj stzꞌibꞌan qꞌuen dꞌa sbꞌabꞌelal, aton juntzan̈ checnabꞌil yal dꞌayon̈ dꞌa scal cꞌacꞌ dꞌa jolom vitz ayic molanon̈ecꞌ dꞌa yich vitz chiꞌ. Yacꞌanxi qꞌueen dꞌayin. 5 Vemxita dꞌa jolom vitz chiꞌ bꞌian, vacꞌanem qꞌueen dꞌa yol teꞌ caxa chiꞌ, icha aj yalan Jehová chiꞌ dꞌayin. Ataꞌ canxon̈ej qꞌueen.
6 (Ix el ebꞌ israel dꞌa aꞌ Beerot-bene-jaacán, ix javi ebꞌ dꞌa Mosera. Ataꞌ ix cham vin̈aj Aarón, ix mucji vin̈ taꞌ. Axo vin̈aj Eleazar, vin̈ yuninal vin̈ ix ochcan sqꞌuexuloc sat sacerdoteal. 7 Ix lajvi chiꞌ ix elxi ebꞌ, ix javi ebꞌ dꞌa Gudgoda. Ix elxi ebꞌ taꞌ, ix javi ebꞌ dꞌa Jotbata. A dꞌa jun lugar chiꞌ te ayn̈ej a aꞌ.
8 A dꞌa jun tiempoal chiꞌ ix acꞌjioch yopisio ebꞌ yin̈tilalcan vin̈aj Leví yuj Jehová, yic syicꞌanbꞌat teꞌ scaxail strato Jehová chiꞌ ebꞌ, yic smunlajpax ebꞌ dꞌa yichan̈, yic syalanpax vachꞌ lolonel ebꞌ dꞌa yibꞌan̈ ebꞌ anima dꞌa sbꞌi Jehová chiꞌ. Ichaton chiꞌ scꞌulejn̈ej ebꞌ. 9 Yuj chiꞌ, a ebꞌ yin̈tilalcan vin̈aj Leví chiꞌ, maj schalaj smacbꞌen luum ebꞌ, yujto a Jehová icha smacbꞌen ebꞌ yajcani, icha ix aj yalan Jehová.)
10 A dꞌa jun tiempoal chiꞌ, 40 cꞌual 40 acꞌval ayinecꞌ dꞌa jolom vitz chiꞌ, icha in cꞌulej dꞌa sbꞌabꞌelal. An̈ejaꞌ dꞌa junelxo chiꞌ scha scꞌol Jehová yabꞌan tas svalaꞌ, yuj chiꞌ maj ex satjiel-laj yuuj. 11 Yalan dꞌayin icha tic: Ixic, cuchbꞌejbꞌat jun chon̈abꞌ chiꞌ, yic bꞌat schaan lum luum ebꞌ to ol yiquej, aton lum vacꞌnac in tiꞌ vacꞌan dꞌa ebꞌ e mam eyicham, xchi dꞌayin.
A tas yovalil scꞌanabꞌajej ebꞌ israel
12 A ticnaic jun, ex vetchon̈abꞌ Israel, ¿tas snibꞌej Jehová co Diosal dꞌayon̈? Aton tic snibꞌej dꞌayon̈: Ayocabꞌ yelcꞌoch dꞌa yol co sat, sco cꞌanabꞌajani, sco xajanani yedꞌ coch ejmelal dꞌay dꞌa smasanil co cꞌool yedꞌ dꞌa smasanil co pensar. 13 Tato sco cꞌanabꞌajej masanil scꞌaybꞌubꞌal yedꞌ schecnabꞌil, vachꞌn̈ej ol on̈ elcꞌoch dꞌa smasanil. 14 Scham val e naani to a Jehová co Diosal, aꞌ ay yic satchaan̈ yedꞌ dꞌa yichan̈bꞌat satchan̈ chiꞌ. Aꞌ ay pax yic lum luum tic yedꞌ masanil tas ay dꞌa sat luum. 15 Yujto xajan ebꞌ co mam quicham yuuj, yuj chiꞌ ix sicꞌjicanel yin̈tilal ebꞌ yuuj, a on̈ toni, ix on̈ sicꞌjiel dꞌa scal juntzan̈xo chon̈abꞌ yuuj icha cajcan tic.
16 Naecn̈ejcot jun trato sbꞌo Jehová eyedꞌoc, man̈xo e pitej e bꞌa dꞌay. 17 Yujto a Jehová co Diosal, ecꞌto dꞌa yibꞌan̈ juntzan̈ comon dios, Yajal yaj dꞌa yibꞌan̈ ebꞌ yajal, ayecꞌ dꞌa yibꞌan̈ masanil tas, te ay spoder, sat co cꞌool yuuj. Malaj sqꞌuexan̈il ebꞌ anima dꞌay. Max schalaj tumin yuj schꞌolbꞌitani, max schapax silabꞌ yic smontaji. 18 Tzꞌocꞌ scꞌol dꞌa ebꞌ mebꞌaꞌ yedꞌ dꞌa ebꞌ ix ix chamnac yetbꞌeyum. Xajanpax ebꞌ chꞌoc chon̈abꞌil ayecꞌ dꞌa co cal yuuj, yuj chiꞌ tzꞌacꞌji svael ebꞌ yedꞌ spichul ebꞌ yuuj. 19 Ichocabꞌ taꞌ scutejpax co bꞌa, yujto chꞌoc chon̈abꞌil ajnac on̈ ecꞌ cajan dꞌa yol yic Egipto.
20 An̈ejocabꞌ Jehová co Diosal nivan yelcꞌoch dꞌa yol co sat. An̈ej dꞌay tzon̈ och ejmelal, sco cꞌanabꞌajann̈ej. Tato ay bꞌaj scacꞌ co tiꞌ dꞌa junoc tasi, an̈ejocabꞌ dꞌa sbꞌi Jehová chiꞌ scalaꞌ. 21 Quiqꞌuecchaan̈ Jehová co Diosal. Cuuj man̈ jantacoc tas te satubꞌtac yilji ix scꞌulej icha val ix aj quilani. 22 Ayic scꞌochnac ebꞌ co mam quicham dꞌa Egipto, 70-n̈ej sbꞌisul ebꞌ, axo ticnaic jun, a Jehová ix acꞌan qꞌuibꞌ co bꞌisul icha sbꞌisul qꞌuen cꞌanal dꞌa satchaan̈.